2 Əbay 14

Amasiya a ne Əbay gà Yahuda

1 I huɗ mive ma sula ŋana Yuwas kəla Yuwakaz a ge ika makwara gà Isərayel a ka, Amasiya kəla Yuwas a ne Əbay gà Yahuda. 2 Aka ana a ne Əbay ya ka, mive ŋgar dzik səla gər ŋgar əzləm. A kwara i Yeruzalem mive dzik səla gər ŋgar tswiɗ. Zləm mama ŋgar ka, Yuwadan dəm gà Yeruzalem. 3 Amasiya a gewa ka, dukw ana ŋgwal ŋa ya, na i təv are BATSAH kwa ŋa ya, ama kəla ka, kamala biy dede ŋgar Dawda a tsa, a gewa ka, kalkal kamala biy dede ŋgar Yuwas a. 4 Tsaatsa ka, gà təv matawala gà fəla tar ka, tàa mbazlaya dər tsa. Gà mburma tə dawa aà məbatsa aaka duwa, nda madula aaka dukw ana a ze hwaŋŋa ya hiywe.

5 I dəba ana mekwere Amasiya a ŋgat ndzəɗa ya ka, a bats gà ɓəzla aka miɗ gà sliwdze ŋgar ana ta kəɗ tsir ŋgar a. 6 Ama gà ɓəza gà mburma ana ta kəɗ tsir ŋgar a ka, aka bats tar tsa. Ar ka, kamala ana riŋ mewetse ŋa i wakita məpala ahəm Musa ya. I fata na BATSAH kwa ŋa a vəl məpala ahəm, a gwa ka: « Ta betse a gà tsir agəra bakal gà ɓəza tar tsa. Dite gà ɓəza tekeɗe ta betse a a tar agəra bakal gà tsir tar tsa. Ama ku mege weke a mite a ka, agəra bakal ŋgar. 7 Əbay Amasiya a bats gà sliwdze gà Edumiya dəbuw kurwa i tulwah sləwul. Akahər mege guvəl ata na a zla huɗ kwite Sela ya. A ɗer zləm Yukel, haa mbakum tə zalawar Yukel hiywe.

8 I fata ya ka, Amasiya a slər gà ɓəzla meslire ŋgar a təv Yuwas kəla Yuwakaz kəla Yehu Əbay gà Isərayel ta gwaɗar ka: « Dara gema guvəl . » 9 Yuwas Əbay gà Isərayel a slər gà mburma a təv Amasiya Əbay gà Yahuda a gwaɗar: « Ndzaslək ana i kwite Liban a ka, a slər aaha mifefile a seder ana i Liban a mbaŋa, a gwaɗar: Vəl dəm yak aà daala a kəla gà. Ama, dukw dala ana i Liban a ɓəl aka ndzaslək ata, burɗukw. 10 Ar ka, ndzer kàa bats gà Edumiya, gəzləŋ yak ka, ndzəɗakka, zləbəba à biy yak, ama ndza ba i ma yak! Aàmala na ki dze a ba aà mege guvəl ana a ndìve a ka, nda mawùra bà ŋa ya ya? Ta betse akaba kurum nda gà sliwdze gà Yahuda fit tserdze. 11 I fata ya ka, Amasiya aka dza zləm a bazlam ata tsa. Yuwas Əbay gà Isərayel a da, tə dzəba aà mege guvəl, i Bet-Semes ana ika ahəɗ gà Yahuda ya.

12 Gà sliwdze gà Isərayel ta bats gà sliwdze gà Yahuda. Tsam ka, ku mege weke a val aba a ma ŋgar. 13 Yuwas Əbay gà Isərayel a gəs Amasiya Əbay gà Yahuda, kəla Yuwas, kəla kəla Ahaziya aà ɓele i Bet-Semes. I fata ya ka, a da dərra a Yeruzalem, a huɗ kwite ŋgar a, a mbazla à zlagam huɗ kwite ata, metir dərməka sula, a gəs ika biye hərmaga Efərayim a tsikw aka gà biye hərmaga ana ika guva zlagam a. 14 Yuwas a ndzək gà gura nda gà ndzemde məvə̀ɗa kur siŋgwe, nda gà kazlaŋa megemir ana i ga BATSAH kwa ŋa ya fit. Nda gà ana i ga makasla gà limana Əbay ya. A gasa dər gà mburma ana i gwala Əbay ya mbaŋa, dite a mbəɗ a ba gər a Samariya.

15 Gà asiŋ gà megemir Yuwas, nda gà dukw ana a ge, nda gà ndzəɗa ŋgar nda mege guvəl ana a ge aà Amasiya Əbay gà Yahuda ya. Gà dukw ata tserdzena a riŋ mewetse ŋa i wakita labara gà Əbay gà Isərayel ibam a? 16 I təv ana Yuwas a mət a ka, ti le ŋgat i Samariya i liwiŋ gà dive gà Əbay gà Isərayel. Kəla ŋgar Yerubuwam a ndza aka təv mendze mekwere ŋgar.

17 Amasiya kəla Yuwas Əbay gà Yahuda, a ndza mive 15 na i dəba məməta Yuwas kəla Yuwakaz Əbay gà Isərayel a. 18 Gà asiŋ gà megemir Amasiya ana a riŋ mewetse ŋa i wakita labara gà Əbay gà Yahuda ibam a? 19 I fata ya ka, gà asiŋ gà mburma, ta mà aka ba ahəm aà Amasiya i Yeruzalem. A val aba a Lakis. Ama gà mburma tə zazamaha ŋgat a Lakis, ta kəɗ riŋ ŋgat i fata. 20 I fata ya ka, tə zlara məməta ŋgar a Yeruzalem a, nda piris, dite ti le ŋgat a liwiŋ gà dive gà tsir ŋgar i huɗ kwite Dawda. 21 Gà mayahaba gər gà mburma ana i kwite Yahuda ya tə zla Azariya aka na ŋgat mive kurwa gər ŋgar ndilik a. Ti ne à ŋgat Əbay a təv mendze mekwere dede ŋgar Amasiya. 22 I təv ana Amasiya a mət a ka, Ahaziya a mà a kwite Elat a bəra, a mà dər a ahər a gà Yahuda.

23 I huɗ mive makurwa gər ŋgar sula ŋana Amasiya kəla Yuwas Əbay gà Yahuda a ge ika mekwere ya ka, Yerubuwam kəla Yuwas a ne Əbay gà Isərayel, a kwara i Samariya mive dzik faɗ gər ŋgar ilik. 24 I fata ya ka, a gewa ka, dukw ana ŋgwal ŋa tsiye, na i təv are BATSAH kwa ŋa ya. Aka mbəɗ dəba a mege bakal Yerubuwam kəla Nevat ana a bana dər aɗəm gà Isərayel a tsa. 25 A maya à gà ahəɗ gà Isərayel tserdze, a gəsara i Lebu-Hamat ana ika tseke are yam a, tsikw aka duluv məməta ana a mbe a gular a. Kamala na BATSAH kwa ŋa Mbulum gà Isərayel, a tsik ahər nda ahər mala məmà à bazlam Mbulum Yunas kəla Amitay gà Gat-Hefer a. 26 Aɗaba BATSAH kwa ŋa aka ŋgat a gà mesewere are mawùra ba ŋana gà Isərayel mandza ŋa iɗəm a. Gà ɓele, gà mburma ana a ziwe a gər tar a, wura riŋ ilik aà mazlaka gà Isərayel a, asa tsa. 27 Ama BATSAH kwa ŋa aka gwa: I dzeye a à zləm gà Isərayel aà zlile mbulum a tsa. Agəra taŋa na a beye a a tar nda ahər Yerubuwam kəla Yuwas a.

28 Gà asiŋ gà megemir Yerubuwam, nda gà dukw ana a ge nda gà ndzəɗa ŋgar, nda gà guvəl ana a ge ya, dite meme na a maya à gà ahəɗ gà Damas nda Hamat ihər gà Yahuda ya, a gà Isərayel a. Gà dukw ata tserdze ya, ana tar a riŋ mewetse ŋa i wakita labara gà Əbay gà Isərayel ibam a? 29 I təv ana Yerubuwam a mət a ka, ti le ŋgat a liwiŋ gà dive gà Əbay gà Isərayel. I fata ya ka, Zakariya kəla ŋgar a ndza aka təv mendze mekwere ŋgar.