2 Əbay 15

Ahaziya a ne Əbay gà Yahuda

1 I huɗ mive madzik səla gər ŋgar faɗ ŋana, Yerubuwam Əbay gà Isərayel a ge a ika mekwere ya ka, Ahaziya kəla Amasiya a ne Əbay gà Yahuda. 2 A ne Əbay ka, ŋgat mive kurwa gər ndilik. A kwara mive dzik əzləm sula i Yeruzalem. Zləm mama ŋgar ka, Yekuliya dəm gà Yeruzalem 3 Ahaziya a gewa ka, dukw ana ŋgwal ŋa ya na i təv are BATSAH kwa ŋa ya, kalkal kamala ana dede ŋgar Amasiya a gewa ya. 4 Ama tsaatsa, gà təv matawala gà fəla tar ka, tàa mbazlaya dər tsa, gà mayahaba gər gà mburma tə dawa aà məbatsa aaka duwa nda madula aaka dukw ana a ze hwaŋŋa lele ya hiywe. 5 I fata ya ka, BATSAH kwa ŋa a zlara batsah dukw məməta, mbəlak ba, aka Əbay ya. A ndza dər akaba tsìm a məməta ŋgar, a ndzawa ka i ga, diriŋ aà gà mburma ya. Yutam kəla Əbay a ne mala aka miɗ gà mburma ana i bəra i Əbay ya, dite ŋgat asa na mala makwara gà mayahaba gər gà mburma ana ika ahəɗ ata ya. 6 Gà asiŋ gà megemir Azariya nda gà dukw ana ŋgat a geye fit a, dzena a riŋ mewetse ŋa i wakita labara gà Əbay gà Yahuda ibam a? 7 Azariya a mət, ti le ŋgat a liwiŋ gà dive gà tsir ŋgar, i kwite Dawda a. Yutam kəla ŋgar a zla təv mendze mekwere ŋgar.

Zakariya a ne Əbay gà Isərayel

8 I huɗ mive madzik makər gər ŋgar tsamakər ŋana Azariya Əbay gà Yahuda a ge ika mekwere ya ka, Zakariya kəla Yerubuwam a ne Əbay gà Isərayel, a kwara kiye ndilik i Samariya. 9 A gewa ka, dukw ana ŋgwal ŋa tsiye, na i təv are BATSAH kwa ŋa ya, kamala gà bàba gà tsir ŋgar ana ta gewa ya. Aka mbəɗ dəba a mege medzibe bakal Yerubuwam ana a ge a bana aɗəm gà Isərayel a tsa. 10 Salum kəla Yabes a ge wirwir a kəɗ Zakariya, ika miɗ gà mayahaba gər gà mburma, a zla təv mendze mekwere ŋgar. 11 Gà asiŋ gà megemir Zakariya ka, mewetse ŋa riŋ i wakita labara gà Əbay gà Isərayel a. 12 Taŋa ka, kalkal bazlam ana BATSAH kwa ŋa a tsik a Yehu, a gwaɗar: « Gà ɓəza yak, ti ta ndze a aka təv mekwere gà Isərayel, wa ahər kəla wa ahər kəla medzige faɗ, aka ge ba kataya kaɗəŋ.

Salum a ne Əbay gà Isərayel

13 I huɗ mive ma dzik makər gər ŋgar tswiɗ ŋana Uzziyas Əbay gà Yahuda a ge a ika mekwere ya ka, Salum a ne Əbay gà Isərayel i Samariya, a kwara kiye ilik. 14 Menahem kəla Gadi a daha i Tirtsa ya, a da aka ahəɗ Samariya. A kəɗ Salum kəla Yabes i Samariya. A zla təv mendze mekwere ŋgar. 15 Gà asiŋ gà megemir Salum, nda mege wirwir ŋgar ana a ge ya ka, riŋ mewetse ŋa i wakita gà labara gà Əbay gà Isərayel. 16 Akahər ŋa ata ŋa, na Menahem a ge guvəl à huɗ kwite Tifsa, dite a bats gà mburma ana mandza ŋa ika ahəɗ ata ya tserdze ya, a dzeye à gà dukw ana ika ahəɗ ata ya fit. Gəs i Tirtsa ya, tsikw a Tifsa. A ge dukw ata fit ka, aɗaba ana tàa hə̀ndə̀kar i biye hərmaga mada a kwite Tifsa ata ya tsiye. A tayara gà ɓəza ana aà gà məkəs i huɗ a.

Menahem a ne Əbay gà Isərayel

17 I huɗ mive ma dzik makər gər ŋgar tswiɗ ŋana Azariya Əbay gà Yahuda a ge a ika mekwere ya ka, Menahem a ne Əbay gà Isərayel i Samariya, a kwara mive kurwa. 18 A gewa ka, dukw ana ŋgwal ŋa tsiye, na i təv are BATSAH kwa ŋa ya. I huɗ mandza a bəra ŋgar a fit ka, aka mbəɗ dəba aà mege bakal Yerubuwam kəla Nevat, ana a bana dər aɗəm gà Isərayel a tsa. 19 Pul Əbay gà Assiriya, a dara aà mege guvəl aà gà Isərayel a. Ama Menahem a dzar ndzemde məvə̀ɗa kur siŋgwe kiliw dəbuw dzik makər mazlak ŋgat dite ka, mekwere ŋgar maŋgat ndzəɗa. 20 Menahem a ŋgat siŋgwe ata ka, a səkah a hadam aka gà ɓəzla limana ana i Isərayel a, a dze a siŋgwe ata a Əbay gà Assiriya. Ku mege weke a vəl kur siŋgwe dzik əzləm. I dəba ŋa ya, Əbay gà Assiriya a mbəɗ ger a ma, aka ndza ika ahəɗ gà Isərayel asa tsa. 21 Gà asiŋ gà megemir Menahem nda gà dukw ana a ge fit tserdze ya ana, riŋ mewetse ŋa i huɗ wakita labara gà Əbay gà Isərayel ibam a. 22 I fata ya ka, Menahem a mət ti le ŋgat a liwiŋ gà dive gà tsir ŋgar, Pekahiya kəla ŋgar a ndza aka təv mendze mekwere ŋgar.

Pekahiya a ne Əbay gà Isərayel

23 I huɗ mive madzik əzləm ŋana Ahaziya Əbay gà Yahuda a ge a ika mekwere ya ka, Pekahiya kəla Menahem a ne Əbay gà Isərayel i Samariya, a kwara mive sula. 24 A gewa dukw ana ŋgwal ŋa tsiye na ika təv are BATSAH kwa ŋa ya. Aka mbəɗ dəba a mege gà bakal Yerubuwam kəla Nevat ana a bana dər aɗəm gà Isərayel a tsa. 25 I dəba ŋa ya Peka kəla Remaliya mala aka miɗ gà sliwdze ŋgar, a ge wirwir aà Pekahiya, ta kəɗ ŋgat i huɗ ga i bəra Əbay, tar nda gà Argub, Ariya, nda gà mayahaba gər gà sliwdze gà Galatiya ya dzik əzləm. A zla təv mendze mekwere ŋgar. 26 Gà asiŋ megemir Pekahiya nda gà asiŋ gà dukw ana a geye ya ka, riŋ mewetse ŋa i wakita labara gà Əbay gà Isərayel.

Peka a ne Əbay gà Isərayel

27 I huɗ mive madzik əzləm gər ŋgar sula ŋana Azariya Əbay gà Yahuda a ge a ika mekwere ya ka, Peka kəla Remaliya a ne Əbay gà Isərayel i Samariya. A kwara mive dzik səla. 28 A gewa ka, dukw ana ŋgwal ŋa tsiye na i təv are BATSAH kwa ŋa ya, aka mbəɗ dəba a mege gà bakal Yerubuwam kəla Nevat ana a bana dər aɗəm gà Isərayel a tsa. 29 Akahər mekwere Peka Əbay gà Isərayel ka, Tigilat-Pilizer Əbay gà Assiriya a dara a duŋ gà kwite Iyun, Abel-Bet-Maaka, Yanuwa, Kades, Hatsur, Galaad dite nda gà Galili. Gà ahəɗ Naftali fit. A gasa gà mburma ana mandzaŋa ika gà ahəɗ gà kwite ata ya, aà ɓele, a da a tar aka ahəɗ Assiriya. 30 Uzziyas kəla Ela ta ge wirwir aka gər Əbay Peka kəla Remaliya, a kəɗ ŋgat. A zla təv mendze mekwere ŋgar, i huɗ mive madzik səla ŋana Yutam kəla Uzziyas a ge a ika mekwere ya. 31 Gà asiŋ gà megemir Peka nda gà dukw ana a geye ya fit tserdze ya ka, riŋ mewetse ŋa i wakita labara gà Əbay gà Isərayel.

Yutam a ne Əbay gà Yahuda

32 I huɗ mive masula ŋana Peka kəla Remaliya Əbay gà Isərayel a ge a ika mekwere ya ka, Yutam kəla Uzziyas a ne Əbay gà Yahuda, 33 ŋgat mive dzik səla gər ŋgar əzləm, na akahər ana a ne Əbay ya. A kwara i Yeruzalem mive kurwa gər ŋgar ndilik. Zləm mama ŋgar ka, Yerusa dəm Tsaduk. 34 Yutam a gewa ka, dukw ana ŋgwal ŋa ya, na i təv are BATSAH kwa ŋa ya, kamala ana dede ŋgar Uzziyas a gewa ya. 35 Ama ka, tàa mbazla ya à gà təv matawala fəla tsa. Gà mayahaba gər gà mburma tə dawa aà məbatsa aaka duwa nda madula aaka gà dukw ana a ze hwaŋŋa lele ya hiywe. Ŋgat na a zlazl biye hərmaga ana are a ŋgatar ndzaf tsara aà batsah Mbulum a ga BATSAH kwa ŋa ya. 36 Gà asiŋ gà megemir Yutam nda gà dukw ana a ge ya fit tserdzena riŋ mewetse ŋa i wakita labara gà Əbay gà Yahuda ibam a? 37 Akahər ana Yutam a ne Əbay ya ka, BATSAH kwa ŋa a dzəba aà masləra gà Retsen Əbay gà Siriya nda Peka Əbay gà Isərayel aà gà Yahuda. 38 Yutam a mət ti le ŋgat a liwiŋ gà dive gà tsir ŋgar i kwite Dawda, kəla ŋgar Ahaz a ndza aka təv mendze mekwere ŋgar.