2 Əbay 16

Ahaz a ne Əbay gà Yahuda

1 I huɗ mive makurwa gər ŋgar təsəla ŋana Peka kəla Remaliya a ge a ika mekwere ya ka, Ahaz kəla Yutam a ne Əbay gà Yahuda. 2 Ahaz a ne Əbay ka, ŋgat mive dzik səla. A kwara mive kurwa gər ŋgar ndilik i Yeruzalem. A gewa dukw ana ndaka vatwa ŋa ya, kamala tsir ŋgar Dawda a tsa, na i təv are BATSAH kwa ŋa Mbulum ŋgar a. 3 Ama a zazam ka, vatwa gà Əbay gà Isərayel, dite asa aka dul kəla ŋgar kamala dukw matawala fəla ya, a tə̀kər taŋa ka, aà mege dukw gà mayahaba gər gà mburma ana, ta gewa dukw ana ŋgwal ŋa tsa ndeyndey ya, BATSAH kwa ŋa a dəgəz tar, ika miɗ gà Isərayel a. 4 A dzayawa gà dukw taf matawala fəla, dite a dulawa gà dukw ana a ze hwaŋŋa lele ya, aka gər gà təv matawala fəla, ika gər gà diyis, dite aà huɗ gà dizl ɗaf ana gà mewiɗeŋa ya fit tserdze.

5 I fata ya ka, Retsen Əbay gà Siriya nda Peka kəla Remaliya Əbay gà Isərayel, tə da a mege guvəl a Yeruzalem, tə dza maŋgwaɓa aà Ahaz, ama, tàa mba aà tar tsa. 6 Akahər ŋa ata ka, Retsen Əbay gà Siriya, a ma a huɗ kwite Elat aka mekwere Əbay gà Siriya. A dalawa iɗəm gà Yahuda ya, dite gà Edumiya tə daha, tə ndza ba i fata haa mbakum. 7 I fata ya ka, Ahaz a slər gà ɓəzla məma a labara a təv Tigilat-pilizer Əbay gà Assiriya aà ta gwaɗar: Iye ka, mala megemir yak, dite iye kəla yak, dara, kà be a aà iye ihər gà Əbay gà Siriya nda Əbay gà Isərayel a ana ta ge a iye guvəl a. 8 I fata ya ka, Ahaz a ndzək gà ndzemde məvəɗa kur siŋgwe nda gura, ana i ga BATSAH kwa ŋa ya, nda gà na i ga ana tə dzawa aɗəm siŋgwe i bəra Əbay ya. A sləraha gà dukw ata kamala dukw taf a, a Əbay gà Assiriya. 9 Tigilat-pilizer Əbay gà Assiriya a ge dukw ana Ahaz a wiz ŋgat a. A da a mege guvəl a Damas, a zla kwite ata, a ndzək iɗəm gà mburma ata, a da, a tar a Kir. A vəl vatwa aà makəɗa Retsen Əbay tar ŋa.

10 Əbay Ahaz a da a Damas aà tə ləma akaba nda Tigilat-Pizer Əbay gà Assiriya. I fata na Ahaz a ŋgat a təv məbatsa aaka duwa a Mbulum ana pam aà gà biy ŋgiɗ a ya. A ge mendzikiɗe ba ŋa, dite a wetsereha a Uriya a Yeruzalem, aà mazlazl təv məbatsa aaka dukw ata a Mbulum a ka, duwa məmətsa ihər a ilik tsa, aka mimbe aka mimbe. 11 Uriya mala məbatsa duwa a Mbulum a ge təv məbatsa aaka duwa a Mbulum, kalkal kamala ana Əbay Ahaz a slərarraha i Damas a. Mala məbatsa duwa a Mbulum ata a ndəv aà mege ŋa ka, aka ana Əbay Ahaz aka ndzeha i Damas a zukw tsiye. 12 I təv ana Əbay a mbəɗara gər i Damas a ka, a ŋgat a a mazlazla təv məbatsa aaka dukw ata Mbulum a ka, Əbay a sərəkaha a təv mazlazla dukw ata, a bats aaka duwa Mbulum. 13 A dzəba aà madula aaka duwa a Mbulum. Dite asa ka, a dul dukw taf gatuw ana ta pala i bəɗ a, nda məpaslar guzum ana a ndza nduzzwa ya. A gwatsakaya à gà məmbəz gà dukw taf ata, a zleyer ɗa biy mandza zay gà mburma nda Mbulum a mbaŋa. 14 Aka gər təv madula aaka dukw ata, ta ge nda virzegene bise nda hərmaga BATSAH kwa ŋa ya ka, Ahaz a sərək a təv madula aaka dukw ata i təv mendze ŋgar ana ika miɗ ga BATSAH kwa ŋa ya. A zla təv madula aaka dukw ata, ta ge awiyaŋa ika magər tar nda ga BATSAH kwa ŋa ya. A tike təv madula aaka dukw ŋgar ata a ge awiyaŋa ya, ndaka tseke are yam. 15 I fata ya ka, Əbay Ahaz a vəl məpala ahəm aaha a mala məbatsa duwa a Mbulum Uriya: Daga aà kinehe ya, ki ge a megemir ka, nda batsah təv məvəla aaka dukw a Mbulum aaha, aka gər tàŋa na ki dwilewe aaka duwa kəla i mèkwède, i mèkwède ya. Dukw taf gatuw ana ta velewe a ya ka, kəla hawa. Ki dwilewe aaka gà dukw ana Əbay a dza ya, nda gatuw ana a vəl biy taf a mbaŋa. Aka gər təv ata asa ka, ki dwilewe aaka gà dukw gà mayahaba gər gà mburma ana ika ahəɗ aaha ta dza ya, nda gà gatuw tar ana ta dza biy taf a, nda məpasla gà guzum tar nduzzwa ŋana. Dite ki gwetsekeye a ahər a, gà məmbəz gà dukw ana ta bats ti dwil a ya fit, aka gər təv məvəla aaka a dukw ata a Mbulum ta ge nda virzegene ya ka, i dzele ahər a gà gər, nda ahər gà ŋa mba. 16 fata ya ka, mala məbatsa duwa a Mbulum Uriya a ge kamala ana Əbay Ahaz a wiz ahər a fit. 17 Əbay Ahaz a haɓa ikaba à gà ndzemde virzegene ata kaslpaɗamma ya aà gà muta piris ata i ga mbulum a, dite a ndzàka ikəka gà tugwàɗ ata, ika gər gà muta piris ata ya. A zla ikəka batsah tugwàɗ ata kəɗəwurwur metike ŋa ika gər gà mendzikiɗe ba gà sla ata ta ge nda virzegene kurwa gəra sula ya. A tike aka gər gà mandza gà kur ana ahəɗ. 18 Aà məvəl maŋgayaba a Əbay gà Assiriya ka, a mbəɗ à təv mendze Əbay ana a ndzawa aɗəm a pat Sabba ya, ta ge i huɗ ga mbulum a, dite a mbəɗ à biye hərmaga mada aɗəm Əbay ka, ɗa nda bəra ŋana. 19 Gà asiŋ gà mezehe megemir Ahaz nda gà dukw ana a gewa tserdze ya, ana a riŋ mewetse ŋa i wakita labara gà Əbay gà Yahuda ibam a. 20 Ahaz a mət a ka, ti le ŋgat a liwiŋ gà dive gà tsir ŋgar, i kwite Dawda. Kəla ŋgar Ezekiyas a ndza aka təv mendze mekwere ŋgar.