2 Əbay 17

Husaya a ne Əbay gà Isərayel

1 I huɗ mive ma kurwa gər ŋgar sula ŋana Ahaz Əbay gà Yahuda a ge a ika mekwere ya ka, Husaya kəla Ela a ne Əbay gà Isərayel i Samariya. A kwara mive tswiɗ. 2 A gewa ka, dukw ana ŋgwal ŋa tsiye na i təv are BATSAH kwa ŋa ya, ama kəla ka, ŋgulum aà biy gà asiŋ gà Əbay gà Isərayel ana tə da a dəba ya. 3 Salmanasar Əbay gà Assiriya a dara aà mege ŋgat guvəl a ka, Husaya a hənar a gər a bəɗ, a dzawar hadam kəla mive. 4 Ama i dəba taŋa ya ka, Husaya a ge wirwir, a slər gà ɓəzla məmaya à labara ŋgar a təv Suw Əbay gà Ezipt aà mazlak ŋgat. I fata ya ka, a məsak a mandza hadam a Salmanasar ana kəla mive ya. I təv ana Salmanasar a sərarraha aka metsehe ŋgar ata ya ka, a gəs Husaya a tike ŋgat a daŋgay. 5 I dəba ŋa ya ka, Əbay gà Assiriya a ge guvəl aà gà ahəɗ gà Isərayel fit, a həndə̀k a Samariya mive makər a. 6 I huɗ mive Metswiɗ ŋana Husaya a ge a ika mekwere ya ka, Əbay gà Assiriya, a zla huɗ kwite Samariya, a duŋ iɗəm gà Isərayel a, aka ahəɗ Assiriya ya. A dza tar aka ahəɗ kwite Halah, a dza tar aà guva dulwa Habur ika ahəɗ kwite Guzan, dite a dzaya tar asa, a gà huɗ gà kwite Mediya.

Gà dukw ana ti ɗif à mandəvandəv mekwere gà Isərayel a

7 Gà dukw mesewere are ata a geye ba gər a gà Isərayel ka, aɗaba ana tàa ge bakal nda təv BATSAH kwa ŋa Mbulum ana a ndzəkara tar ika ahəɗ Ezipt ya, a beye aà tar ihər Firawna Əbay gà Ezipt ya ya, dite agər ana tàa dza gurmits a bəɗ a gà mbulum ŋgiɗ a. 8 Tə zazam, matawala dukw gà mburma ata ŋgwal ŋa tsa ta gewa, BATSAH kwa ŋa a dalawa tar ika miɗ gà Isərayel a, dite tə zazamawa asa ka matawala dukw gà Əbay gà Isərayel ana ta gewa ya. 9 Gà ɓəza gà Isərayel tàa geye gà dukw ana tàa pala ahər ahəm a, nda wirwir aà BATSAH kwa ŋa Mbulum tar a. Tàa zlazlaya aba gà təv məbatsa aaka duwa a gà Mbulum tar, i gà huɗ gà kwite tar fit. Ku mege i gà ga ana gà sliwdze tə ndzawa iɗəm aà guva vatwa ya, dite i gà huɗ gà kwite tar ana malawaraŋa nda zlagam tits lele ya. 10 Tàa hitseya aà gà kur nda gà dizl dukw mewisle, ika gər gà kwite ana gà bàba gà dizl ɗaf mewiɗeŋa iɗəm a tserdze. 11 I fata na tə dulayawa gà dukw ana a ze hwaŋŋa ya, aka gər təv madula aaka gà duwa a gà mbulum tar ata, kamala gà mayahaba gər gà mburma ŋgiɗ ana BATSAH kwa ŋa a dəgəz tar, ika miɗ tar a, tàa geye gà dukw ana ŋgwal ŋa tsiye, na dite a zlakatarəra matsəɓatsəɓ BATSAH kwa ŋa ya. 12 Tə zləbawa à gà mbulum ana gà ndzer ŋa tsiye, tsaatsa ka, BATSAH kwa ŋa aka pala tar ahər ahəm. 13 BATSAH kwa ŋa aka mbər mebe à ɗaf a gà Isərayel nda gà Yahuda, nda ahər gà ɓəzla məma à guma ŋgar, dite nda ahər gà ɓəzla mipìrè a are fit tserdze, aka gwaɗa a tar: « Miyakum aba à gà mede kurum ana ŋgwal ŋa tsiye, gəsum ahəm aà məpala ahəm gà, nda gà dukw ana i gwaɗa a kurum a gwim a tserdze. Ta riŋ mewetse ŋa i wakita məpala ahəm ana i vəl a gà tsir kurum a. Dite asa ka, Yàa ɗife a kurum dər nda ahər gà ɓəzla meslire gà, gà ɓəzla məma à guma Mbulum. 14 Ama gà Isərayel ka, tàa dzar zləm tsa, tàa raraɗaba ahər a zləm, kamala gà tsir tar ana akahər ata, tə raraɗaba ahər a zləm, tàa gəs BATSAH kwa ŋa Mbulum tar tsiye. 15 Tàa ye məpala ahəm ŋgar a dala, nda magəsa masla ŋgar ana a gəs nda gà tsir tar a, dite asa ka, tàa niw gà bazlam ŋgar ana a be tar dər a ɗaf a. Tə zazam ka, gà mbulum ana a ge a tar a ŋgulum tsiye. Dite tar ŋa tàa ne, gà mburma ana ta ge a ŋgulum tsiye. Tə zazam asa ka, matawala fəla gà mayahaba gər gà mburma ana tə lawara tar a. Tsaatsa ka, BATSAH kwa ŋa aka gwaɗa a tar gwim kamala taŋa ya tsa. 16 Ta məsak aba à gà məpala ahəm BATSAH kwa ŋa Mbulum tar a fit. Ta vaɗa aba ka, gà mendzikiɗe ba gà ɓəza gà sla sula nda virzegene. Tə ndwaŋ dizl dukw mewisle, tə zləbawa aà gà dukw ana ti də̀vawa aà gəza mbulum a tserdze. Tə tawalawa ka, fəla Baal. 17 Ta dzayawa gà ɓəza tar gà asləka ŋana, nda gà dəm ŋana, aà dukw matawala fəla mbulum tar, ta gewa gà dukw gà mene aà mburma ŋgiɗ pampam. Ta vəl ba tar aà megeye gà dukw gà ŋgwal ŋa tsa, na ika are BATSAH kwa ŋa ya, gà taŋa na ta vəlar dər matsəɓatsəɓ a. 18 I fata ya ka, BATSAH kwa ŋa a ge matsəɓatsəɓ hinne aka gər gà Isərayel, a dalawa tar diriŋ i təv are ŋgar a. Na a zeha a riŋ ika ahəɗ ata ka, say gà gwala gà Yahuda ɗekɗek. 19 Ama gà mburma gà Yahuda ŋa tekeɗe ka, tàa gəs məpala ahəm BATSAH kwa ŋa Mbulum tar ŋa ɓav tsa. Tə zazam ka, matawala fəla ana ika mekwere gà Isərayel a. 20 Aɗaba taŋa na, BATSAH kwa ŋa a gwitse aà gà Isərayel tserdze ya. A ma à tar a bəɗ, a dza tar ahər a gà ɓəzla makazala mburma, aà tə dalawa tar diriŋ i təv are ŋgar a. 21 I təv ana BATSAH kwa ŋa a ndzəkara gà Isərayel i mekwere Dawda a. Ti tike Yerubuwam kəla Nevat a Əbay. Yerubuwam a ndaha à gà Isərayel diriŋ i təv are BATSAH kwa ŋa ya, a bana tar aà mege batsah bakal. 22 Daga a gər taŋa ya ka, gà Isərayel tə zazamawa mege bakal ana Yerubuwam a ge ya. Tàa miyak dər a mege ŋa tsa. 23 Mandəvandəv ŋa ka, BATSAH kwa ŋa a dəgəz tar diriŋ i təv are ŋgar a. Kamala ana a tsik nda ahər gà ɓəzla meslire ŋgar, gà ɓəzla məma à guma Mbulum a. Kamala taŋa ya na, BATSAH kwa ŋa a duŋ tar ika ahəɗ tar a, diriŋ aka ahəɗ gà Assiriya haa mbakum a.

24 I fata ya ka, Əbay gà Assiriya a ndzəkara aɗəm gà mburma ana i kwite Babila ya, gà na i kwite Kuta ya, nda ga na i Ava ya, gà Hamat nda gà na i Sefarəwayim a. A dzə̀ tar a huɗ gà bàba gà kwite ana ika ahəɗ Samariya ya, a təv mendze gà Isərayel. Tə zla aba ahəɗ Samariya. Tə ndzaya aba a gà huɗ gà kwite ana a riŋ iɗəm a. 25 I təv ana gà mburma ata tə dzəba aà mendze i fata ya ka, ta ge magəɗa a BATSAH kwa ŋa tsa, kərga tàŋa ya, BATSAH kwa ŋa a slərakataraha, gà azil a, a bats ika magər tar a, bagwal ŋa . 26 Ti ɗifeha a labara ŋa, à Əbay gà Assiriya: « Gà mayahaba gər gà mburma ana ka ndzək tar, ka dza tar a huɗ gà kwite Samariya ya ka, tə sər mazambaɗa à Mbulum gà mburma ana ika ahəɗ kwite ata ya tsa. Mbulum ata a slərakataraha gà azil, aka bats gà mburma ika magər tar a bagwal ŋa. Aɗaba ana tə sər mazambaɗa à Mbulum ana ika ahəɗ kwite ata ya tsiye.

27 Əbay gà Assiriya a vəl məpala ahəm aaha. Slərakwa mala məbatsa duwa a Mbulum ilik ika magər gà ɓəzla məbatsa duwa a Mbulum ana ka duŋəkwara tar ika ahəɗ kwite ata ya, mada ndza a fata, dite mesinike à tar aà matawala fəla Mbulum ana ika ahəɗ ata ya. 28 Mburma ilik i liwiŋ gà ɓəzla məbatsa dukw, a Mbulum ana tə duŋ tar i Samariya ya, a mbəɗ gər, a da mendze a Betel, a sinike a tar dər a gà mburma ata meme na ti zèmbeɗe a à BATSAH kwa ŋa ya. 29 Ama gà mayahaba gər gà mbəlakw gà mburma ata, ta vaɗa gà mendzikiɗe ba gà mbulum tar. Tə̀ dzaya a huɗ gà ga matawala fəla gà Samariya ana tə zlazla ya aà mazləba iɗəm a mbulum tar a. Kəla aà gà mayahaba gər gà mburma ata, ta geye kərga taŋa ya, i gà huɗ gà kwite ana tar mandzàya ŋa iɗəm a. 30 Gà mburma gà Babila ta və̀ɗ mendzikiɗe mbulum tar, Sekut-Benut. Gà mburma gà Kuta, ta və̀ɗ mendzikiɗe ba mbulum tar Nergal. Gà mburma gà Hamat a, ta və̀ɗ mendzikiɗe ba mbulum tar Asima. 31 Gà na i Ava ya, ta və̀ɗ mendzikiɗe gà mbulum tar gà Nibaz nda Tartak. Gà na i Sefarəwayim a ka, tar tə dzayawa gà ɓəza tar, kamala dukw taf matawala fəla ya, a gà mbulum tar, gà Adramelek nda Anamelek. 32 Gà mburma ata, ta ge magəɗa a BATSAH kwa ŋa, ama ta pala gà mburma zləməŋa pəra, ika magər tar a, kamala gà ɓəzla məbatsa duwa Mbulum, ana ika gà təv matawala fəla gà mbulum tar a. Gà mburma ata ta gewa megemir nda zləm tar i huɗ gà ga matawala fəla gà mbulum tar. 33 Gà mburma ata, ta ge magəɗa a BATSAH kwa ŋa, ama akaba nda taŋa fit ka, tə zambaɗawa à ga mbulum tar kamala fəla tar ana ika ahəɗ ata tə ndzəkara iɗəm tar a ya. 34 Haa mbakum, gà mburma ana mandza ŋa i Samariya, tə zàzàmawa ka, matawala fəla tar ana miviye ŋa pìŋŋe ya. Ta gewa magəɗa a BATSAH kwa ŋa tsa. Ta hənawa agər a bəɗ a gà məpala ahəm tara nda gà matawala fəla tar tsa. Ta gəsawa ahəm aà gà məpala ahəm, nda dukw ana BATSAH kwa ŋa a vəl a gà ɓəza Zakup ana a zalar Isərayel a tsa asa mbaŋa.

35 BATSAH kwa ŋa aka mbər megise masla nda gà ɓəza Zakup, dite a vəl a tar məpala ahəm aaha, a gwaɗa a tar: « Ki gwim magəɗa a gà mbulum ŋgiɗ tsa, ka dzum gurmits a bəɗ aka miɗ tar tsa. Ki gwim a tar megemir tsa. Ka dzum a tar dukw taf aà matawala fəla tsa. 36 Ama ki gwim a magəɗa ka, a BATSAH kwa ŋana a ndzəkara kurum ika ahəɗ Ezipt ya, nda ndzəɗa ahər ŋgar ana a za gà duwa tserdze ya ilik. Aka miɗ ŋgar na ki dzwim a gurmits a biye ya. Dite asa ka, a ŋgat na ki dzwìmer a gà dukw taf matawala fəla ya. 37 Ki zezemwim a gà dukw ana a hitse dər a, nda gà dukw ana a gwa gwim a, nda gà məpala ahəm ana a wetse a kurumaha ya fit, kəla wur gà pat, dite ki gwim magəɗa a gà mbulum ŋgiɗ tsa. 38 Magəsa masla ana i gəs nda gà kurum a ka, məmətsa à kurum gər tsa, dite ki gwim magəɗa a gà mbulum ŋgiɗ tsa. 39 Ama gwim magəɗa ka, a BATSAH kwa ŋa Mbulum kurum, na dite a beye a à kurum a ihər gà ɓəzla mene are kurum a tserdze ya.

40 Ama gà mburma ata ka, tàa dzar zləm tsa, ti ndìɗìk gər seyiŋ ivaɗ ka, aà matawala miviye fəla tar ata dukw tar. 41 Kərga tàŋa ya, gà mayahaba gər gà mburma ata ta ge magəɗa a BATSAH kwa ŋa, ama ti ndìɗìk gər aà geye megemir a gà mbulum tar ata hiywe. Kamala gà tsir tar ana ta gewa ya, gà ɓəza tar nda gà ɓəza gà ɓəza tar ta gewa kamala taŋa ya hiywe haa mbakum.