2 Əbay 18

Ezekiyas a ne Əbay gà Yahuda

1 I huɗ mive məmakər ŋana, Husaya kəla Ela Əbay gà Isərayel a ge a ika mekwere ya ka, Ezekiyas kəla Ahaz a ne Əbay gà Yahuda. 2 Akahər ana a ne Əbay ya ka, ŋgat mive dzik səla gər ŋgar əzləm. A kwara i Yeruzalem, mive dzik səla gər ŋgar tswiɗ. Zləm mama ŋgar, Abi dəm Zakariya. 3 A gewa ka, dukw ana a da gər a BATSAH kwa ŋa ya. Kamala dede ŋgar Dawda a gewa ya. 4 Ŋgat na a mbazlaya à gà təv məbatsa aaka duwa a gà mbulum a, a bats gà kur ana ta hitseye dər a, a ndzaha gà mandwàŋa gà dizl mewisle i biye ya a haɓa ikaba à mesiwiɗ virzegene ana Musa a vəɗ a, aɗaba gà Isərayel tə dulayawar gà dukw ana a ze hwaŋŋa ya, na tsikw akahər ŋgar ata ya. Zləm mesiwiɗ ata ka, Nehustan. 5 Ezekiyas a tike madzala gà gər ŋgar ka, aka BATSAH kwa ŋa Mbulum gà Isərayel. I dəba ŋgar a ka, Əbay ŋgiɗ a riŋ kamala ŋgat tsa, na i liwiŋ gà Əbay ana i Yahuda ya. Wura riŋ metikaba ŋgar kamala ŋgat a tsa, na ku mege i liwiŋ gà Əbay ana tə dara i dəba ya. 6 Ŋgat a dan ba ka, aà BATSAH kwa ŋa, aka mbəɗar dəba tsa. A zazam ka, gà məpala ahəm BATSAH kwa ŋana a vəl a Musa ya. 7 BATSAH kwa ŋa a riŋ mandzaŋa nda ŋgat, a ŋgatawa mege gara i gà dukw ana a gewa ya fit tserdze. A tsalaba à segeme a gər aka Əbay gà Assiriya, a be i ahər mekwere ŋgar a. 8 Asa ka, a bats gà Filistiya, a dəgəz tar tsikw aka ahəɗ kwite Gaza. A ndzàka gà huɗ gà kwite ana malawayaraŋa ya, nda gà təv megemir gà sliwdze ana ta kaslayawa iɗəm gà huɗ gà kwite ya. 9 I huɗ mive məfaɗ ŋana Ezekiyas Əbay gà Yahuda a ge a ika mekwere ya, nda mive matəsəla ŋana Husaya kəla, Əbay gà Isərayel a ge a ika mekwere ya ka, Salmanasar Əbay gà Assiriya a da a mege guvəl aà huɗ kwite Samariya. 10 A zla huɗ kwite ata i huɗ mive makər a. Akahər ana Ezekiyas a ge ika mekwere mive ndilik a, dite Husaya Əbay gà Isərayel, a ge ika mekwere mive tswiɗ a. Akahər ŋa ata na tə zla kwite Samariya ya. 11 Əbay gà Assiriya, a duŋ gà Isərayel a, aka ahəɗ Assiriya ya. A dza tar aka ahəɗ kwite Halah, a dza tar aà guva dulwa Habur ika ahəɗ kwite Guzan, dite a dzaya tar asa, a gà huɗ gà kwite Mediya. 12 Aɗaba ana tàa dza zləm a bazlam BATSAH kwa ŋa Mbulum tar tsiye, tàa tike magəsa masla ana a gəs nda gà tar a, aà ahər tsa, tàa dza zləm a məpala ahəm ŋgar ana a vəl a tar nda ahər Musa mala meslire BATSAH kwa ŋa ya tsa, tàa gəs ahər ahəm tsa. 13 I huɗ mive makurwa gər ŋgar faɗ ŋana Ezekiyas a ge a ika mekwere ya ka, Sennakerib Əbay gà Assiriya a ge guvəl aà huɗ gà kwite gà Yahuda ana gà malawarayaŋa nda zlagam tserdze. A ndzək fit. 14 I fata ya ka, Ezekiyas Əbay gà Yahuda a slər gà mburma a təv Əbay gà Assiriya a Lakis, ta gwaɗar: « Yàa ge bakal, ki ge aà iye guvəl tsa. I pìlek a hadam ana ki wize aà iye ya . » I fata ya ka, Əbay gà Assiriya a tike məpəla gər aà Ezekiyas Əbay gà Yahuda, a wiz ahər, ndzemde məvə̀ɗa kur kiliw dəbuw tswiɗ, dite gura kiliw dərməka tswiɗ. 15 Ezekiyas a ndzəkaraha gà limana ana i ga BATSAH kwa ŋa, nda ana i ga i bəra Əbay ya fit. 16 Akahər ŋa ata na Ezekiyas a haɓa aà gà dukw mahəndəka a batsah gà mbulum, nda gà mezlembel ŋana Əbay gà Yahuda ŋgat ŋa a geye ahər gura ya. a dzàha a Əbay gà Assiriya.

Əbay Sennakerib a sle za a gà Yeruzalem

17 Əbay gà Assiriya a slər batsah mala aka miɗ gà sliwdze ŋgar, mala aka miɗ gà sliwdze nda gà asiŋ gà sliwdze hinne i Lakis a, a təv Əbay Ahaziya a Yeruzalem. I təv ana ti ndzeha ya ka, tə tsala, ta hitse bise nda təv yam ana a zlele a ndaka vatwa mada a guvah gà ɓəzla məbara petek a. 18 Ta waya mifèfiler a Əbay. Ama ka, gà Eliyakim kəla Hilkiya mala aka miɗ gà sliwdze ana ta kesle a ga Əbay ya, Sevəna mala mewetse duwa nda Yuwah kəla Asaf mala məmaya à bazlam Əbay na tə dara a təv tar a ya. 19 Mala aka miɗ, batsah gà ɓəzla aka miɗ gà sliwdze gà Assiriya a gwaɗa a tar: Araha na dukw ana batsah Əbay gà Assiriya a gwa ya : Ki se a gər dzena nda Dukula ? 20 Ki tsiker a bazlam, ika arah a pəra ka, aka sle maŋgata, gà metsehe nda ndzəɗa aà mege guvəl a. Kinehe ka se gər ana nda weke, na ki ge a aà iye guvəl a? 21 Kinehe Yàa sər tsaà ka se gər ka, nda Ezipt ana a ne kamala awasl ana mendzendzeyeŋa, a zle a ahər a ge a mbə̀lak a wele ana aka gəs ahər ba ya. Kamala tàŋa ya na Firawna Əbay gà Egypte a ge a aà gà mburma ana tàa tike ŋgat aà ahər a fit. 22 Ama na ki gweɗwimiŋ ka, mì se gər ka, nda BATSAH kwa ŋa Mbulum mə̀r, ana kər tsiye Ezekiyas, na ka batsaya gà təv matawala fəla nda təv məbatsa aaka duwa a gà mbulum a, i dəba ŋa ya, kə gwaɗa a gà mburma gà Yahuda nda gà mburma gà Yeruzalem ka, ki ti dzwim a gurmits a bəɗ aka miɗ təv məbatsa aaka duwa a Mbulum ana i Yeruzalem a ilik. 23 Ama kinehe ka, i gik kamkam, gəs masla nda batsah gà ŋa Əbay gà Assiriya, i dəba ŋa ya ka, i dzeke a gà piris dəbuw sula, na ki sle a meŋgete gà ɓəzla matsala aaka ŋa ya. 24 Ndzəɗa yak riŋ aà madalawa, batsah mala aka miɗ gà sliwdze ana kəla ŋa ika magər gà ɓəzla meslire batsah gà ŋa ya ya? Na dite kər ki se a gər nda Ezipt, aà maŋgata gà muta piris nda gà ɓəzla matsala aaka ŋa ya! 25 Asla dzena batsah gà ŋa aka dara a maduŋa kwite yak ze mewize meweye BATSAH kwa ŋa ya? Awaŋ taŋa tsidze, BATSAH kwa ŋa nda gər ŋgar ŋa na a vəlar ahər vatwa ya. 26 I fata ya ka, gà Eliyakim kəla Hilkiya nda Sevəna, nda Yuwah ta gwaɗa a Rab-sake batsah mala aka miɗ gà sliwdze gà Assiriya: « Kamkam fafəl a gà ɓəzla meslire yak ndaka ahəm gà Aramiya, mìi tserekiŋa. Ka fafəl a mə̀r ndaka ahəm gà Ibəranikwa tsa, aɗaba gà mburma ana ika gər zlagam a, tar a riŋ ti dzer a zləm . » 27 Ama Rab-Sake a gwaɗa a tar: « Wànà a batsah yak ŋa ya, tsəna a kər a, na batsah gà ŋa a slìrra iye aà metsike bazlam aha ya? Awaŋ bazlam aha ka, biy gà mburma ana tar mandza ŋa ika gər zlagam a mbaŋa. Tar mbaŋa ana, ti ta sleɓeye gà za tar nda gà masaya kwìɗe tar kamala kurum a mba. 28 Rab-sake batsah gà ɓəzla aka miɗ gà sliwdze a hitse a wideye nda ndzəɗa ndaka ahəm gà Ibəranikwa a gwa: Dzum zləm a mifefile batsah Əbay gà Assiriya. 29 Araha na dukw ana Əbay a gwa ya, Ezekiyas ka, ma ta bana kurum tsa. A sle a aà mibeye à kurum a, i hər gà ya tsa. 30 Ka dzum zləm a bazlam Ezekiyas mə bana kurum tsa, a gweɗe a kurum a ka, swim gər nda BATSAH kwa ŋa, ŋgat na a beye a à kurum a ya! A vile a huɗ kwite aaha ahər a Əbay gà Assiriya tsa. 31 Ka dzum zləm a bazlam Ezekiyas tsa, aɗaba Əbay gà Assiriya a gwa ka: « Gəsum masla ka, aà iye. Dumara a təv gà ya, dite ku mege weke ka, a zime a gà manaha dizl viŋye ŋgar, nda gà dizl figiye ŋgar, a se a yam i suwah ŋgar a. 32 I dəba ŋa ya ka, i deha i ndzike a kurum a kwite ana kamala i kurum a, kwite ana gà ble nda gà guzum iɗəm a, kwite ana gà ble peŋ nda viŋye iɗəm a, kwite ana gà mal uliviye nda gà amum iɗəm a. Kamala taŋa ya na ki ndzwim a aà bəra ki metwim a tsiye. Kərga taŋa ya, ka dzum zləm a bazlam Ezekiyas tsa, a peze a kurum a za, a gweɗe a a kurum ka, BATSAH kwa ŋa a beye a kwiŋa. 33 Gà mbulum gà mayahaba gər gà mburma ŋgiɗ ana tàa sle aà mebe à kwite tar i ahər Əbay gà Assiriya ya ilik a? 34 Gà mbulum gà Hamat nda Arəpad ana tar i ŋga? Gà mbulum Sefarəwayim, Hena nda Iwwa ana tar i ŋga? wànà tàa sle aà mebe à huɗ kwite Samariya i ahər gà ya ya? 35 I liwiŋ gà mbulum gà kwite ata ya fit ana awara na aka sle aà mibe a à kwite ŋgar ihər gà ya ya? Na dite ka, BATSAH kwa ŋa a sle aà mibe a à a Yeruzalem ihər gà ya ya? 36 Gà mayahaba gər gà mburma ana i fata fit tserdze ya ka, tə ndza tiytiy, Wura aka fafəlar aaka ilik tsidze. Aɗaba Əbay aka fafəl ka, wura a fefile a aaka tsa. 37 Gà Eliyakim kəla Hilkiya mala aka miɗ gà sliwdze ana ta kesle a ga Əbay ya, Sevəna mala mewetse duwa nda Yuwah kəla Asaf mala məmaya à bazlam Əbay. Tar ata tsedze ya, ta kwayaɗaya ikaba à gà petek a, dite tə dara a təv Ezekiyas a tə ɗamar gà mifefile Rab-sake batsah gà ɓəzla aka miɗ gà sliwdze gà Assiriya ata fit.