2 Əbay 19

Ezekiyas a da a təv mala məmà à bazlam Mbulum Ezaya

1 I təv ana Əbay Ezekiyas a tsaraka tàŋa ya ka, a kwiyaɗa ikaba aà gà petek ŋgar a, a tike akaba buhwa a da a ga mahama a BATSAH kwa ŋa. 2 Akahər ŋa ata, a slər Eliyakim mala aka miɗ gà ɓəzla makasla ga Əbay, Sevəna mala mewetse duwa, nda gà bàba gà ɓəzla məbatsa duwa a mbulum, tə dza akaba buhwa, tə da a təv mala məmà à bazlam Mbulum Ezaya kəla Amots. 3 Aà ta gwaɗar ka: « Araha na dukw ana Ezekiyas a gwa ya: ‹ Pat aaha mbakum a ka, pat matsəɓatsəɓ, pat mesewere are, dite pat hwarwa asa. Ka nekwa ka, kamala məkəs ana aka ndze a pat mawa kəla ka, ndzəɗa ihər aà mendziɗeŋa tsiye. 4 Biy tsa BATSAH kwa ŋa Mbulum yak a tsereke a gà bazlam Rab-sake mala aka miɗ gà ɓəzla makasla ga, batsah ŋgar ŋa, Əbay gà Assiriya, a sləraha aà mandavaya a Mbulum ana a riŋ nda mesife ya. Na mege ka, BATSAH kwa ŋa Mbulum yak a tsereke a gà mendeve ŋgar ata a ndeveyere a ya, dite a vilere a mesewere are agəra bazlam ŋgar ata a tsik a! Hama a BATSAH kwa ŋa agəra gà mayahaba gər gà mburma yak ana tə zeha nda mesife ya. 5 Gà ɓəzla meslire Əbay Ezekiyas tə da a təv Ezaya ya. 6 Ezaya a gwaɗa a tar: « Araha na dukw ana ki ta tsìkwim a a batsah kurum ŋa ya, ana BATSAH kwa ŋa a gwa ya, ki ge magəɗa a gà bazlam ana ka tsaraka ya tsa, nda gà mendeve ana gà ɓə̀zle meslire Əbay gà Assiriya ti ndeveyiŋa tsa. 7 Araha Əbay ata a tsereke a labara duwa, i dəba taŋa ya ka, i vilere a madzala gà gər biy məmbəɗa gər aka ahəɗ kwite ŋgar. I fata na i te kiɗe a ŋgat nda masalama ya. 8 Rab-sake a tsaraka ka, Əbay aka da i Lakis a, tar riŋ ta ge a guvəl aà huɗ kwite Livna, mala aka miɗ gà sliwdze a da a le aà Əbay i fata. 9 I fata ya ka, Əbay gà Assiriya a tsaraka labara aka gər, Tiraka gà Etiyupiya Əbay gà Ezipt aka dara aà mege aà ŋgat guvəl a. I fata ya ka a slər gà ɓəzla məma aà làbarà a təv Ezekiyas asa, a gwaɗar: 10 « Araha dukw ana ki ta tsikwim a a Ezekiyas Əbay gà Yahuda ya. Ka tike madzala gà gər a yak ka, a təv Mbulum, ka ta bana ba yak nda Mbulum yak ana ka tike madzala gà gər a təv ŋgar a gwaɗak ka, Əbay gà Assiriya a sle a aà mezle a huɗ kwite Yeruzalem tsiye tsa. 11 Ka sər ka, nda gər yak lele meme na gà Əbay gà Assiriya ta geyewa a gà asiŋ gà kwite ŋgiɗ fit a. Tàa dzeye aà tar fit kweleŋ, dite kər kə gwa ana, ki be a ya? 12 Akahər ana gà tsir gà ti dzeye aà gà huɗ gà kwite Guzan, Haran, Retsef, tàa dzeye aà gà gwala Eden ana tə ndzawa i Təlasar a. Gà mbulum gà kwite ata ana tàa beye à gà mburma tar a? 13 Gà Əbay gà Hamat, nda gà Əbay gà Arəpad, nda gà Əbay gà kwite Sefarəwayim, nda gà Hena, nda gà Ava ana tar i ŋga?

Ezekiyas a hama a BATSAH kwa ŋa

14 Ezekiyas a zla wakita ata i hər gà ɓəzla məmaya à labara ya, a dzeŋge, a da a ga BATSAH kwa ŋa, Ezekiyas a pəl ikaba a wakita ya aka miɗ BATSAH kwa ŋa. 15 A hama ika miɗ BATSAH kwa ŋa a gwa: « BATSAH kwa ŋa Mbulum gà Isərayel ana kər mandza ŋa ika gər gà Sereben a, kər ilik na Mbulum gà mayahaba gər gà mburma ana i mekwere gər ahəɗ fit tserdze ya. Aɗaba kər na a ge gà gəza mbulum nda gər ahəɗ a. 16 BATSAH kwa ŋa dziŋ aakara zləm a lele, tsaraka, həndə̀k ika are BATSAH kwa ŋa dite kə fər ahər. Tsaraka, bazlam Sennakerib ana a slərra biy mandavaya a Mbulum ana a riŋ mandzaŋa nda mesife ya. 17 Ar ka, ndzer BATSAH kwa ŋa na gà Əbay gà Assiriya, na tàa dzeye à gà asiŋ gà mayahaba gər gà mburma nda gà kwite tar ŋa fit a. 18 Tàa dzaya gà mbulum tar akwa. Ama gà mbulum ata ka, gà mbulum ana gà ndzer ŋa ya tsa. Ama gà mburma na ta vaɗa tar nda ahər tar a. Ta vaɗa ka, gà dizl, nda kur. Dite gà Əbay ata ka, tàa dzeye iɗəm à tar a fit kweleŋ. 19 Ama kər ka, BATSAH kwa ŋa Mbulum mə̀r, be a à mə̀r i ahər Sennakerib a, dite gà mburma ana ika gər ahəɗ fit tserdze ya tə sər, kər ilik na, BATSAH kwa ŋa Mbulum a. 20 I fata ya ka, Ezaya kəla Amuts, a slər gà mburma a təv Ezekiyas, aà ta gwaɗar: « Araha na dukw ana BATSAH kwa ŋa Mbulum gà Isərayel a a gwa ya: Haya Yàa tsaraka meheme yak ana ka hemiŋ aka gər Sennakerib Əbay gà Assiriya ya. 21 Araha na bazlam ana BATSAH kwa ŋa a tsik aka gər ŋgar a: Huɗ kwite Yeruzalem ana a tsahən hinne, kamala dəm ana aà gama wura aka ləm ahər zukw tsiye, a wele a aà kər a, a sewle a keriŋa. Haya kaɗəŋ ŋgwal kwite Siyun a riŋ a ɓezle a à gər kwatà kwatà i dəba yak, a sewle keriŋa. 22 Ka ndavaya dzena a weke? Ka ne bakal dzena aà weke? Ka salah aba dzena aka weke? Ka zla gər yak aà mbulum, ka pər ka, aà Iye Mbulum gà Isərayel ana tsəɗaŋŋa ya. 23 Nda ahər gà ɓəzla məmaya à labara yak ka, kàa ndavaya a BATSAH kwa ŋa, dite kə gwa ka: nda gà muta piris gà ana hinne ya ka, Yàa tsəl aka dalagər gər gà kwite, tsikw aka gər kwite Liban. Yàa sasa a gà zababul gà Seder tar ana gà ŋgwal ŋa ya. Yàa sasa a gà ŋgwal gà Sipre tar asa. Yàa ndisl aka metsìmiɗe gər kwite tar ana zubul ŋa are a da aba ya tsa, gà dizl ɗaf iɗəm ziŋziŋ ŋa. 24 Iye, Yàa leye gà suwah, Yàa saya yam, gà mayahaba gər gà misle ŋgiɗ. Yàa seye a à gà duluv yam ana Ezipt a, nda tapa sik gà. 25 Kàa tsaraka tsiye, daga piŋŋe na i geye gà dukw ata ya, akahər ŋa ata pìŋŋe na i geye ya, dite kinehe kuɗa na iye a riŋ i reheye a dər a. Yàa hàdzal ba, na kər ki mbezleye aà ga bàba gà huɗ gà kwite ana gà malawaraŋa nda zlagam a, ki ne a dər təv mayaha gər gà kur a. 26 Gà mburma ana mandzaŋa iɗəm a ka, gà ɓəzla ndzəɗa tsa, magəɗa riŋ a ge teriŋa, dite hwarwa a ge teriŋa asa mbaŋa. Ti ne ka, kamala kwizir ana i dala ya, kamala ɓəza kwizir ana a sləl kinkin a mbèffe ya. Kamala gà kwizir ana tə sləlawa ika gər ga ya. Kamala ble ana metwinwe a zler ɗa ya . 27 Ama iye ka, i sər na akahər ana kər mandzaŋa i bəɗ a, i sər na akahər ana ki de a a bəra ya, i sər na akahər ana ki de a a ga ya, asa ka, i sər na akahər ana ki tselebe a à segeme aka gər gà ya. 28 Aɗaba kàa tsalaba à segeme a gər, aka gər gà, Yàa tsaraka gà mewele yak ana ka walawa aà iye ya. Aɗaba taŋa i tikike a matsərəɗ a hitir, dite i tikike a tsarlàw bazlam. I me à kər a, a ma yak, ndaka vatwa ana ka da dər a, a faha ya. 29 Taŋa i ɗifek ka, à mendzikiɗe ba duwa. Vìyena ka, ki zimwim a ka, gà wur gà ble ana a sləl i bəɗ a ya, ndiziŋ ŋana, ki zimwim a ka, maluva ŋana. Ama aà mive məmakər ŋana ka, ki slìgwime a duwa, ki pelwmiŋa, ki tseveywim a gà dizl viŋye ki zimwim a gà mewe tar ŋa. 30 I fata ya ka, gà mburma ana ti zeha i gwala gà Yahuda nda mesife ya ka, ti ndze a kamala gà dizl ɗaf ana a de a à zlile ŋgar a biye ya, na dite we a gwètsik gwètsik a. 31 Aɗaba gà mburma ana ti zeha nda mesife ya ka, gà mburma ana i Yeruzalem a, nda gà i gər kwite Siyun a ya. Araha na dukw ana BATSAH kwa ŋa a ge a agəra meweye ŋgar ana a waya gà mburma hinne ya . » 32 Aɗaba taŋa, araha na BATSAH kwa ŋa a tsik aka gər Əbay gà Assiriya ya: « A de a a huɗ kwite aaha tsa, a ta ye aɗəm a sìmir tsa, a ta ge ahər a guvəl tsa, a sle a aà mekèhe a ba a huɗ slakwa aà mege ahər guvəl tsa. 33 A mbiɗe a gər a ma, ndaka vatwa ana a da dərra ya. A de a a huɗ kwite Yeruzalem tsa, BATSAH kwa ŋa nda gər ŋgar ŋa, na a tsik a. 34 I kesle kwite ata, i be a à ŋgetiŋa, i ge a kamala taŋa ya ka, agər ana iye Mbulum a, dite agər a Dawda mala meslire gà. 35 Ndaavəɗ ŋaha ka, gawla Mbulum a dara a təv mandzəba gà Assiriya ya, a bats a gà sliwdze dəbuw dərməka nda dzik tsamakər gər ŋgar əzləm. I mèkwède ŋana ka, gà sliwdze, ti le a aà gà məməta ata. 36 I fata ya tsara ka, Sennakerib Əbay gà Assiriya, a mbəɗ gər a ma a huɗ kwite Neniwe. 37 A pat ŋgiɗ duwa riŋ a heme a mbulum ŋgar Nisruk ka, gà ɓəza ŋgar sula, gà Adrammalek nda Saresar, ta kəɗ ŋgat nda masalama, tar ŋa tə təz aba a kwite Ararat. Kəla ŋgar Asarhadun a ndza aka təv mendze mekwere ŋgar .