Ezekiyas a mbəl i dukw məməta ya
20
1 Akahər ŋa ata ka, Ezekiyas a dəɗ a batsah dukw məməta ana a mite a dər a. Mala məma à guma Mbulum Ezaya kəla Amuts a dara a təv ŋgar a, a gwaɗar: « Araha na dukw ana BATSAH kwa ŋa a gwa ya: Tike gà məpala ahəm bəɗ i ga ma yak. Aɗaba ki mitiŋa ki ndze a aà bəra tsa . » 2 Ezekiyas a mbəɗ ahəm aà dùdùŋ ga, a hama a BATSAH kwa ŋa a gwaɗar: 3 « A kər! BATSAH kwa ŋa i gək kamkam i mətsak gər tsa, Yàa zazam vatwa yak ka, lele nda ndzer na ika miɗ yak a. I gəs kər ka, nda gəzləŋ ilik. I gewa ka, dukw ana ŋgwal ŋa ya na i təv are yak a. Ndəraɓəɓɓa Ezekiyas a tuwa hinne. 4 Ezaya aka dara ika varavada ana i huɗ ga Əbay ya zukw tsa na BATSAH kwa ŋa a fafəlar a. 5 Mbəɗ gər a təv Ezekiyas, mala aka miɗ gà mayahaba gər gà mburma gà, kə gwaɗar: ‹ Araha na dukw ana BATSAH kwa ŋa Mbulum Dawda tsir yak a gwa ya . » Yàa tsaraka meheme yak, dite Yàa ŋgat a tuwa yemere yak. Kinehe ka, i mbile a à keriŋa, i huɗ mehinne makər a ka, ki de a ga mahama a BATSAH kwa ŋa. 6 I sekeheke a dər aaka mive kurwa gər ŋgar əzləm, aka mandza a bəra yak, i be a à kər a, nda huɗ kwite yak, i ahər Əbay gà Assiriya ya. I kesle a kwite ata, agəra zləm gà, dite agəra zləm mala meslire gà Dawda. 7 Ezaya a gwa: vilwimiŋara tapa maŋgasla mawa figiye ya, a zla ilik, a tike aka mbəlak a Əbay, i fata ya ka, a mbəl. 8 Ezekiyas a gwaɗa a Ezaya: « I Dukula ya na i sər a dər ka, BATSAH kwa ŋa a mbile à iye, dite i huɗ mehinne makər a ka, i de a ga mahama a BATSAH kwa ŋa ya? » 9 Ezaya a gwaɗar aaka: « Araha na dukw ana ki sir a dər ka, BATSAH kwa ŋa a rehe a à bazlam ŋgar ana a tsik a: Kà waya ana siseye masə̀kah miɓele kurwa ya, tsəna menìkìɗ miɓele kurwa ika təv metsile ya ya? 10 Ezekiyas a gwaɗar aaka : « mawùrabaŋa tsa na siseye a sikehe miɓele kurwa ya, ama ŋgulum menìkìɗ miɓele kurwa. 11 I fata ya ka, Mala məma à guma Mbulum Ezaya a hama a BATSAH kwa ŋa. Dite BATSAH kwa ŋa a nikiɗ à siseye miɓele kurwa ika təv matsəla a ga Ahaz a. 12 akahər ata ka, Merudak- Baladan kəla Baladan Əbay gà Babila a sləraha gà wakita nda gà dukw taf a Ezekiyas, aɗaba aka tsaraka ka, Ezekiyas aka dəɗ a dukw məməta. 13 Ezekiyas a ŋgayaba nda mede gà ɓəzla meslire ana tə daha ya. A pat à tar aà ga ŋgar ana a dzawa aɗəm gà ŋgwal gà dukw ŋgar a. Gà ndzemde məvəɗa kur siŋgwe, nda gà gura, nda gà wirdè, nda gà ŋgwal gà mal mə̀baha aba ana a ze hwaŋŋa lele ya. Aka pat a tar aà ga ana i a dzawa gà dukw ahər ŋgar a, nda gà asiŋ gà limana ŋgar ana i gà asiŋ gà ga ŋgiɗ a. Aka pataya à tar aà gà dukw ana i gà ga i ma ŋgar a fit tserdze.14 I fata ya ka, mala məmà à bazlam Mbulum Ezaya a dara a təv Əbay Ezekiyas a, a gwaɗar: Dukula na gà mburma aha ta gwaɗak? Tə dara ana i ŋga ya? Ezekiyas a gwaɗar aaka: Tə dara ka, ika ahəɗ Babila ya, diriŋ. 15 Ezaya a gwaɗar asa: Ta ŋgat ana a Dukula na i ga i ma yak a? Ezekiyas a gwaɗar aaka: Gà dukw ana i huɗ ga i ma gà ya ka, tàa ŋgatayar fit. Duwa ilik aka zeha aà gà limana gà ya, Yàa pàt a tar dər tsəka riŋ tsa . »
16 Ezaya a gwaɗa a Ezekiyas: « Tsaraka dukw ana BATSAH kwa ŋa a tsikik a ya! 17 Pat ŋa riŋ a deriŋa, gà dukw ana i ga i ma yak, gà tsir yak ti yahar gər haa pat aaha mbakum a ka, ti ta ndzike a a Babila. Duwa ilik a zehe tsa, na BATSAH kwa ŋa a gwa ya. 18 Ti ta gese a gà ɓəza yak gà asləka ŋana ka wa tar a bagwal ŋa, ti ta dedeɗeya tar, i ga i bəra Əbay gà Babila. 19 Ezekiyas a gwaɗar aaka a Ezaya: « Bazlam BATSAH kwa ŋana ka tsikiŋ a ka, ŋgwal ŋa. Ezekiyas a dzala a gwa: wànà i huɗ mandza à bəra gà ya ana mandza zay, barbararrara a ta ge a a riŋ ibam a?