2 Əbay 21

Labara Manasse kəla Ezekiyas

1 Manasse a ne Əbay ka, ŋgat mive kurwa gər a sula. A kwara i Yeruzalem ka, mive dzik əzləm gəra əzləm. Zləm mama ŋgar Hiftsiba. 2 A gewa ka, dukw ana ŋgwal ŋa tsiye na i təv are BATSAH kwa ŋa ya. A zazam ka, fəla gà mayahaba gər gà mburma ana ŋgwal ŋa tsa ndeyndey, BATSAH kwa ŋa a dəgəz tar ika miɗ gà Isərayel a. 3 A zlazla à gà təv matawala fəla ana dede ŋgar Ezekiyas a bats a, aà mbulum. A zlazl təv madula aaka duwa a mbulum Baal, a ndwaŋ dizl dukw mewisle kamala na Ahav Əbay gà Isərayel a ge akahər ŋa ata ya, A dzawa gurmits a bəɗ a gà dukw ana tserdze tə də̀vawa aà gəza mbulum a. Dite a gewa a tar megemir. 4 A zlazlaya gà təv məbatsa aaka gà duwa a mbulum a huɗ ga BATSAH kwa ŋa. Kamala na BATSAH kwa ŋa a gwa ka: « I Yeruzalem na zləm gà a pete a ya . » 5 Manasse a zlazlaya gà təv məbatsaya aaka gà duwa a gà dukw ana tə də̀vawa aà gəza mbulum a, ika gà varavada ga sula ya. 6 A dùl kəla ŋgar kamala dukw taf a, a geye gà dukw mene a mburma ŋgiɗ pampam. A dawa a təv gà ɓəzla metike yam asa. A geye gà dukw ana gà ŋgwal ŋa tsiye hinne na ika miɗ BATSAH kwa ŋa ya, aà məvəl matsəɓatsəɓ a BATSAH kwa ŋa. 7 A və̀ɗ mendzikiɗe ba mbulum məkəs ŋa, Asera a tike a ga BATSAH kwa ŋana, BATSAH kwa ŋa aka mbər metsike a gà Dawda nda kəla ŋgar Salumun ka, i huɗ ga aaha, dite i Yeruzalem, na i zla i liwiŋ gà gwala gà Isərayel a, i fata na zləm gà a ta pete a aà biybiy ya. 8 I ti delewe a aà gà Isərayel diriŋ i təv are gà ya, ika ahəɗ kwite ata, i vəl a gà tsir tar a tsa. Zləməŋa na tàa zazam gà dukw ana i tsik a tar a, nda gà məpala ahəm gà ana i vəl a tar nda ahər mala meslire gà Musa ya. 9 Ama tàa dzar zləm tsa, Manasse a bana tar a mege dukw ana ŋgwal ŋa tsiye, zə dər i gər a, a biy gà mayahaba gər mburma ana BATSAH kwa ŋa a dəgəz tar ika miɗ gà Isərayel a.

10 Aɗaba taŋa, na BATSAH kwa ŋa a fafəl a tar nda ahər gà ɓəzla meslire ŋgar, gà ɓəzla məma à guma ŋgar a, a gwaɗa a tar: 11 « Aɗaba Manasse Əbay gà Yahuda, na a ge gà dukw ana ŋgwal ŋa tsa ndeyndey ya, a za dər i gər a biy gà Amuriya ana ta ge malahalah ŋa ya. Dite asa ka, aka bana aɗəm gà Yahuda a bakal matawala fəla ŋgar ata. 12 Aɗaba taŋa, araha na dukw BATSAH kwa ŋa Mbulum gà Isərayel a gwa ya: ‹ I zlere a batsah mesewere are aka gà mburma gà Yeruzalem nda Yahuda ya, gà mburma ana tàa tsaraka ya ka, a dze a tar a magəɗa. 13 I dzeye a à gà mburma ana i Yeruzalem a, kamala ana i dzeye a à gà mburma Samariya, nda gà mburma Ahav a. I ndzike a gà mburma ana i Yeruzalem a, newet kamala matsakaɗa tasa ana mbəɗ dər mbəɗ dər, ngilettite ya. 14 I mbiɗe a dəba a gà asiŋ gà mayahaba gər gà mburma gà ana ti zeha ya, i dze a aà tar, ahər gà ɓəzla mene are tar, ta kezele a a tar gà limana tar a nda ndzəɗa ti dzeye iɗəm a tar a, sleɗik. 15 Aɗaba ana tàa ge dukw ana ŋgwal ŋa tsiye, i təv are gà ya, dite aɗaba ana tàa miyak à megiŋ bakal tsa hiywe, daga a gər ana gà tsir tar tə dara i Ezipt a haa mbakum. 16 Əbay Manasse aka bats gà mburma ana tàa ge duwa tsiye hinne, məmbəz gà mburma ata aka rah a huɗ kwite Yeruzalem fit. Mege megemir ata a səkah à mege gà bakal ana a bana dər aɗəm gà mburma gà Yahuda ya. Nda mege dukw ana ŋgwal ŋa tsa i təv are BATSAH kwa ŋa ya.

17 Gà asiŋ gà megemir Manasse, gà dukw ana a geye ya, nda gà bakal ŋgar ana a ge ya, ana ariŋ mewetse ŋa i wakita labara gà Əbay gà Yahuda ibam a? 18 I təv ana Manasse a mət a ka, ti le ŋgat a dzidzel ŋgar, ana tə zalawar dzidzel Uzza ya. Amun kəla ŋgar a zla təv mendze ŋgar.

19 Amun a ne Əbay ka, ŋgat mive dzik səla gər ŋgar sula. A kwara i Yeruzalem mive sula. Zləm mama ŋgar Mesulemet dəm Haruts ana i Yutba ya. 20 A gewa ka, dukw ana ŋgwal ŋa tsiye na i təv are BATSAH kwa ŋa ya, kamala ana dede ŋgar Manasse ana a gewa ya. 21 A zazam gà dukw ana dede ngar a gewa ya . A zambaɗawa aà gà fəla ana dede ŋgar a zambaɗawa dər a mbaŋa. A dzawa a tar gurmits a biye. 22 A mbəɗ dəba a BATSAH kwa ŋa Mbulum gà tsir ŋgar, aka zazam vatwa BATSAH kwa ŋa tsidze.

23 Gà ɓəzla aka miɗ gà sliwdze Amun tə dza akaba ahər ahəm, ta kəɗ ŋgat i ga i ma ŋgar. 24 Ama gà mayahaba gər gà mburma gà Yahuda, ta bats gà mburma ana tə dza akaba ahəm aà Əbay Amun a tserdze. Dite ti tike kəla ŋgar Zuziyas aka təv mendze mekwere Əbay ŋgar. 25 Gà asiŋ gà megemir Amun nda gà dukw ana a geye ya ana, riŋ mewetse ŋa i wakita labara gà Əbay gà Yahuda ibam a? 26 Ti tike ŋgat a dive ŋgar ana i dzidzel Uzza ya, kəla ŋgar Zuziyas a zla təv mendze mekwere ŋgar.