Zuziyas a ne Əbay gà Yahuda
22
1 Zuziyas a ne Əbay Yahuda ka, ŋgat mive tsamakər. A kwara i Yeruzalem mive dzik makər gəra ilik. Zləm mama ŋgar, Yedida dəm Adaya ana i Butskat a. 2 A gewa ka, dukw ana ŋgwal ŋa ya, na i təv are BATSAH kwa ŋa ya. A zazam ka, vatwa dede ŋgar Dawda. Aka mbə̀ɗar dəba tsidze, ku mege ndaka tseke ahər mezime ku mege ndaka tseke ahər gula tekeɗe ya.3 I huɗ mive makurwa gər ŋgar tsamakər ŋana a ge a ika mekwere ya ka, Əbay Zuziyas a slər mala mewetse dukw ŋgar Safan kəla Atsaliya, Atsaliya ka, kəla Mesullam a ga BATSAH kwa ŋa. 4 A gwaɗar: « Da a təv batsah mala məbatsa duwa a Mbulum Hilkiya. Aà maɗama siŋgwe ana gà mburma tə dza aà ga BATSAH kwa ŋa ya, nda biy gà ɓəzla makasla biye hərmaga ana, tə ndzək aà gà mayahaba gər gà mburma ya. 5-6 Tə dza siŋgwe ata, a gà mburma ana ika miɗ gà ɓəzla maləmbaɗa ga BATSAH kwa ŋa ya. Aà ta pəl dər gà ɓəzla ana ti lembeɗe a gà təv ana gà manə̀saya ŋa aà ga BATSAH kwa ŋa ya: Gà ɓəzla məpapaza ya dizl, gà ɓəzla mazlazla ga, nda gà ɓəzla mendzèha gà duwa a mburma. Tə sakama dər gà dizl nda gà kur ana məpapaza ŋa ya, aà maləmbaɗa ga. 7 Ama wura a wiz aà ter a dukw ana ta ge nda siŋgwe ata tə dza a tar ahər a tsa. Aɗaba tar ka, ta ge a dər megemir ŋa ndzer lele.
8 Batsah mala məbatsa duwa a Mbulum Hilkiya a gwaɗa a mala mewetse duwa Safan: « Yàa le a aà wakita məpala ahəm Mbulum i ga BATSAH kwa ŋa. A vəl wakita ata a Safan medzeŋge. » 9 I dəba ŋa ya, mala mewetse duwa Safan a da a təv Əbay aà məmayar à gà dukw ana a ge ba ya, a gwaɗar: Gà ɓəzla meslire yak, tàa ndzək siŋgwe ana ta leher i ga ya, tàa dza a gà ɓəzla aka miɗ gà mburma ana ta ge a megemir maləmbaɗa à ga BATSAH kwa ŋa ya . » 10 I dəba ŋa ya, mala mewetse duwa, Safan a mà dər a Əbay: « Batsah mala məbatsa duwa a Mbulum Halkiya aka viliŋ wakita » Safan a dzeŋge wakita ata ika miɗ Əbay.
11 I təv ana Əbay a tsaraka mifefile ana i huɗ wakita məpala ahəm Mbulum ata ya ka, a kwayaɗa ikaba à gà petek ŋgar a. 12 I dəba ŋa ya, a vəl məpala ahəm aaha a batsah mala məbatsa duwa a Mbulum Hilkiya, a Ahikam kəla Safan, a Akabur kəla Mikaya, a mala mewetse duwa Safan nda Asaya mala meslire Əbay. 13 Dum ka wizwimiŋ madzala gà gər aà BATSAH kwa ŋa, aɗaba iye, dite agəra mayahaba gər gà mburma tserdze, nda gà mayahaba gər gà mburma gà Yahuda fit. Aka gər gà bazlam ata i huɗ wakita aaha tə leher a. Aɗaba matsəɓatsəɓ BATSAH kwa ŋa ka, batsah ŋa, na a ge a agəra kwa ya, aɗaba gà tsir kwa tàa gəs ahər ahəm aà gà bazlam ana mewetse ŋa i huɗ wakita aaha ya tsa, tàa ge dər megemir kamala ana ta wetse ya tsa.
14 Batsah mala məbatsa duwa a Mbulum, Hilkiya, Ahikam, Akabur, Safan nda Asaya tə da a təv mala məmà à bazlam Mbulum duwa məkəs ŋa, Hulda, məkəs Salum kəla Tikva, kəla kəla Haras mala makasla gà petek ana tsəɗaŋŋa i ga mbulum a. Məkəs ata a ndzawa ka, i kwite awiya ŋana i Yeruzalem a. I təv ana gà mburma ata tə ndəv à məfafəlar a ka, 15 məkəs ata a gwaɗa a tar aaka: « Araha na dukw ana Yave Mbulum gà Isərayel a gwa ya: Da gwaɗum a a wele ana a slərra kurum a təv gà ya ka: 16 Araha na dukw ana BATSAH kwa ŋa Mbulum gà Isərayel a gwa ya: I zlere a mesewere are aka gər Yeruzalem nda gà mburma ŋgar a, aà maraha aà gà bazlam ana mewetse ŋa i huɗ wakita məpala ahəm Mbulum ata Əbay gà Yahuda a dzeŋge ya. 17 Aɗaba tàa miyak aà iye, dite tàa dùlaya gà dukw ana a ze hwaŋŋa lele ya, a gà mbulum ŋgiɗ, aà miviliŋ matsəɓatsəɓ, nda gà mbulum tar ana ta vaɗa nda ahər tar a. Matsəɓatsəɓ gà aka zla akwa, aka gər kwite Yeruzalem fit, a mbete a tsa. 18 Ama aka gər Əbay gà Yahuda ana a slərra kurum aà mewize madzala gà gər BATSAH kwa ŋa ya ka, araha na dukw ana ki ta gweɗwimer a ya: ‹ Araha na dukw ana BATSAH kwa ŋa Mbulum gà Isərayel a gwa ya: Kàa tsaraka gà bazlam ata i huɗ wakita ata ya lele, 19 Aɗaba aka ləm aà gəzləŋ yak, kàa nikiɗ aba ika miɗ BATSAH kwa ŋa, na i təv ana ka tsaraka dukw ana i tsik aka gər Yeruzalem, nda gà mburma ŋgar ana tar mandza ŋa iɗəm a. Nda ndzer ka, huɗ kwite aaha ka, Yàa vəlar mezelme, ne a mandazla. Aɗaba kinehe ka, kàa kwayaɗaya ikaba aà gà petek yak a, kàa tuwa ika miɗ gà, Lele, iye tekeɗe Yàa tsaraka, kinehe ka, araha na dukw ana iye BATSAH kwa ŋa, i tsike a ya. 20 Aɗaba tàŋa, i miyek a a kər a, ki de a a təv gà tsir yak nda zay. kərga taŋa ya, na are yak a ŋgete a a mesewere are ata i zlere a aka gər huɗ kwite aaha ya tsiye. Gà ɓəzla meslire ata ta maraha ahəm a Əbay Zuziyas.