2 Əbay 23

1 Əbay a slər gà mburma a təv gà bàba ŋana i Yahuda ya, nda ana i Yeruzalem a fit, ti yahaba gər a təv ŋgar. 2 I fata ya ka, tə da akaba a ga BATSAH kwa ŋa, nda gà mburma ana i Yahuda ya, gà na i Yeruzalem a, gà ɓəzla məbatsa duwa a Mbulum, nda gà ɓəzla məma à guma Mbulum, nda gà mayahaba gər gà mburma fit tserdze, gəs aà gà ɓəza, nda gà bàba ŋa. A dzeŋge a tar gà bazlam ata tserdze i wakita magəsa masla ata ti le ahər i ga BATSAH kwa ŋa ya. 3 Əbay a hitse aka təv matsəla a ga BATSAH kwa ŋa ya, a gəs masla ika miɗ BATSAH kwa ŋa, biy na a zezeme a dər BATSAH kwa ŋa balaari ya, aà magəsa ahəm aà gà məpala ahəm ŋgar, aà gà dukw ana a tsik a, nda gà dukw ana a gwa gwim a, nda gəzləŋ ŋgar ilik, nda mesife ŋgar dze, aà maraha à gà bazlam magəsa masla ata mewetse ŋa i huɗ wakita məpala ahəm Mbulum ata ya. Gà mayahaba gər gà mburma fit tserdze ta gəs akaba magəsa masla ata mbaŋa.

4 I dəba ŋa ya, Əbay a vəl vatwa a gà Hilkiya batsah mala məbatsa duwa a Mbulum, nda gà asiŋ gà ɓəzla məbatsa duwa a Mbulum ana tə zlakawa ŋgat a, nda gà ɓəzla məbatsa duwa Mbulum ana ta kaslawa biye hərmaga mada a ga BATSAH kwa ŋa. Tə dza dərra a bəra ya, aà gà kazlaŋa megemir ana ta vaɗa tə zləbawa dər aà mbulum Baal, aà mbulum Asera məkəs ŋa ata , nda gà dukw ana tə də̀vawa aà gəza mbulum a. Ta wànà gà dukw ata diriŋ aà huɗ kwite Yeruzalem a, i dala i tulwah Sedruŋ, tə ndzək bitekwe ŋa a Betel. 5 Zuziyas a dalawa gà ɓəzla məbatsa duwa a gà mbulum ana gà ndzer ŋa tsa, gà Əbay gà Yahuda tə dzaya aɗəm tar a, aà madulaya gà wirdè gà dizl dukw ana a ze hwaŋŋa lele ya, aka gà təv mazlazla madula aaka duwa a gà mbulum tar ata, i huɗ kwite Yahuda nda gà təv ana ta mbe yeha a Yeruzalem a. A dalawa idəm gà ɓəzla məbatsa duwa, a gà mbulum Baal, a pat, a kiye a ga mawusawus, nda gà dukw ana tə də̀vawa aà gəza mbulum fit tserdze ya. 6 Tə zlara mandwaŋa dizl dukw mewisle Asera i ga BATSAH kwa ŋa ya. Tə zla tə da dər diriŋ i Yeruzalem a, a dala a tulwah Sedrun, tə dùl i fata. Ti ne dər bitekwe, tə nda dər aka təv gà dive gà mburma. 7 Zuziyas a mbazlaya a gà ga ana bise ta mbeyeha a ga BATSAH kwa ŋa, ta geyewa iɗəm muva, aà məvəla dər mezlibe a mbulum Asera, gà məkəs ta ŋgarayawa iɗəm petek a gà ɓəzla mazləba aà mbulum Asera.

8 A ndzəkara gà ɓəzla məbatsa duwa à Mbulum ana i huɗ gà kwite Yahuda ya, ara a Yeruzalem a, a neye dukw zlaŋgatsak aà gà təv madulaya aaka duwa a gà mbulum ana, gà ɓəzla məbatsa duwa a mbulum, tə dùlaya aaka gà dizl ana a ze hwaŋŋa ya, daga ara i Geva ya ndisl Bet-seba. A mbazlaya à gà təv mazlazla madula aaka duwa, a gà mbulum ana ika biye gà hərmaga mada a huɗ kwite Yesuwa, mala makwara kwite ata. Biye hərmaga ata ka, ndaka tseke ahər gula, na ki a de a a huɗ kwite ata ya. 9 Tàa vəl vatwa a gà ɓəzla məbatsa duwa a mbulum ana ta gewa megemir ika təv mazlazla təv madula aaka duwa a gà mbulum ana gà ndzer ŋa tsa, na aà mege megemir aka təv madula aaka duwa a Mbulum ana tsəɗaŋŋa i Yeruzalem a tsa. Ama ta vəl a tar vatwa ka, aà mazəma peŋ ata giɗe ikəka tsiye, nda gà asiŋ gà ɓəzla məbatsa duwa a Mbulum ŋgiɗ pəra. 10 Əbay a ne dukw zlaŋgatsak à təv madula dukw ana i Tufet, i tulwah Ben-Hinum a, aà ka, wura ilik ma da a madula kəla ŋgar, kige tsa dəm ŋgar, dukw taf ŋa a mbulum Mulek tsa. 11 A bats gà piris ana gà Əbay gà Yahuda, tə dza aà mazləba à mbulum pat ana bise biye hərmaga ma da a ga BATSAH kwa ŋa, a huɗ gà meɗekwir ana aà ga BATSAH kwa ŋa ya, bise nda meɗikwir Netaŋ-Melek ana madadaɗa ŋa ya. A wànà gà muta piris mbulum pat. 12 Əbay a bats gà təv madula aaka duwa a Mbulum ana ika məvah matsəla ma da a ga Ahaz ana ika gər ga ŋgiɗ a, gà na gà Əbay gà Yahuda tə zlazlaya ya, nda gà təv məbatsa aaka duwa a mbulum ana Əbay Manasse a zlazlaya ika gà varavada ata sula a ga BATSAH kwa ŋa ya. A ndzək i fata ya, a nda à bitekwe ŋa, a tulwah Sedruŋ. 13 Əbay a ne dukw zlaŋgatsak aà gà gà mazlazla gà təv mewisle ana ta mbe ser aka Yeruzalem, ndaka tseke gular kwite medzeye ana Əbay Salumun a zlazlaya aà mazambaɗa à mbulum Astarte, mbulum gà Siduniya, ana ŋgwal ŋa tsa ndeyndey ya, aà Kəmus mbulum gà Muwab, aà Mulek, mbulum gà Ammun ana ŋgwal ŋa tsa ndeyndey ya. 14 Zuziyas a bàtsaya gà kur ana ta hitse dər a, a sasaya gà dizl ana ti ne dər dukw mewisle ya. A rah a gà təv ata nda atasl mburma. 15 Zuziyas a bats təv məvəla aaka duwa a Mbulum a, nda təv mazlazla dukw mewisle ana Betel, Yerubuwam kəla Nevat a zlazlaya, a bana dər aɗəm gà Isərayel a bakal a. A mbazla aà təv madula aaka duwa a mbulum ata, nda təv mazlazla dukw mewisle ŋgar. A wànà mazlazla təv mewisle ata, a ne bitekwe, a wànà dizl mewisle ata nda akwa asa mbaŋa. 16 I fata ya ka, Zuziyas a mbəɗ aba, a ŋgat a gà dive ana a riŋ ika gər diyis a. A slər gà mburma aà tə ndzəkara gà atasl i gà dive ata ya. A dùlaya aka gər təv ata ta vəlawa aka duwa a Mbulum a,a ne dər dukw zlaŋgatsak, kamala ana BATSAH kwa ŋa a tsik nda ahər mala məma à guma ŋgar . 17 Zuziyas a wiz: « mendzìbe mendzikiɗe ba Dukula na naaka i ŋgetereha a faka ya? » Gà mburma ana mandza ŋa i huɗ kwite ata ya, ta gwaɗar aaka: « Taŋa ka, dive mala məmà à bazlam Mbulum ana dara i Yahuda ya. Ŋgat na a mà a dukw ana ki ge kinehe, a təv madula aaka duwa a Mbulum aaha i Betel a . » 18 I fata ya ka, a gwaɗar a tar aaka: « Miyakum dər, wura maləm aà gà atasl mala məmà à bazlam Mbulum aaha tsa. Ta miyak à gà atasl ŋgar, kamala gà atasl mala məmà à bazlam Mbulum ana a dara i samariya ya. 19 Zuziyas Əbay gà Isərayel a mbazlaya à gà ga təv mewisle ana i gà huɗ kwite ana ika ahəɗ Samariya, gà Əbay gà Isərayel tə zlazla aà məvəla matsəɓatsəɓ a BATSAH kwa ŋa. A mbazlaya aà gà ga ata fit kalkal kamala ana a ge dər i Betel a. 20 A zleye ɗa a gà mburma ana tə dùlawa duwa aka gər mazlazla təv mewisle ya, aka gər gà təv mewisle ata. Dite a dùlaya aaka gà atasl gà mburma. I dəba ŋa ya, a mbəɗara gər a Yeruzalem. 21 Əbay Zuziyas a vəl məpala ahəm aaha a gà mayahaba gər gà mburma tserdze: « Gwim megirive paska aà məvəla dər mezlibe a BATSAH kwa ŋa Mbulum kurum. Kamala ana riŋ mewetse ŋa i huɗ wakita magəsa masla ya . » 22 Tàa ge medzibe megirive paska ata kamala taŋa ya diydiy ilik tsa. Daga a gər gà ɓəzla mege seriye ana, ta kwara ɗa gà Isərayel a, dite a gər mendze gà Əbay ana tserdze ta kwara gà Isərayel nda gà Yahuda ya. 23 , Nda mive makurwa gər ŋgar tsamakər ŋana Zuziyas a ge a ika mekwere ya, na ta ge megirive ata, i Yeruzalem aà mazləba dər a BATSAH kwa ŋa ya.

24 Zuziyas a bats gà ɓəzla metike yam, gà mahəram, gà mendzikiɗe ba gà dukw mewisle, gà mbulum ana gà ndzer ŋa tsiye, nda gà kazlaŋa megemir gà mburma ana tə sər Mbulum tsiye tserdze, aà magəsa dər ahəm aà gà bazlam ana mewetse ŋa, i huɗ wakita məpala ahəm Mbulum ana batsah mala məbatsa duwa a Mbulum Hilkiya a le ahər i ga BATSAH kwa ŋa ya. 25 A gər gà Əbay gà Isərayel a ka, Əbay a riŋ ilik kamala Zuziyas a tsa, a gəs BATSAH kwa ŋa ka, nda gəzləŋ ŋgar ilik, nda mesife ŋgar fit, dite nda ndzəɗa ba ŋgar fit tserdze, kamala məpala ahəm Musa ya. Dite i dəba Zuziyas a tekeɗe ka, Əbay a ta ge a riŋ kamala ŋgat a ɓav tsa asa. 26 Akaba nda taŋa dze tekeɗe ka, BATSAH kwa ŋa aka nikìɗ a batsah matsəɓatsəɓ ŋgar ana a ge a aka gər gà Yahuda tsa. Agəra gà bakal Manasse ana a ge ika miɗ BATSAH kwa ŋa ya. 27 Aɗaba taŋa BATSAH kwa ŋa a gwa: « Ku mege gà Yahuda tekeɗe ka, i digize a tar diriŋ i təv are gà ya, kamala ana i dalawa gà Isərayel a. I ti ye a kwite Yeruzalem a dala nda ga ana i gwa ka, ti zlibewe a à iɗəm a zləm gà ya. .

28 Gà asiŋ gà megemir Zuziyas nda gà dukw ana a ge ya tserdze, ana tar riŋ mewetse ŋa i huɗ wakita labara gà Əbay gà Yahuda ibam a. 29 Akahər mekwere Zuziyas ka, Firawna Neku Əbay gà Ezipt a da a mazlaka Əbay gà Assiriya, aka duluv Efrat. I fata ya ka, Əbay Zuziyas a da a dzar ba aka vatwa. I təv ana Əbay gà Ezipt a ŋgatar tsara ya ka, a kəɗ ŋgat i Megiddu. 30 I təv ana a mət a ka, gà ɓəzla aka miɗ gà sliwdze ŋgar, tə zla məməta ŋa nda muta piris i Megiddu a, a Yeruzalem, ti tike a dive ŋgar. Gà mayahaba gər gà mburma ana i huɗ kwite ata ya, tə zla aɗəm Yuwakaz kəla Zuziyas, ta dza aaka a mal, ti ne dər Əbay a təv mendze mekwere dede ŋgar.

31 Yuwakaz a ne Əbay ka, ŋgat mive dzik sela gər a makər. A kwara kiye makər i Yeruzalem. Zləm mama ŋgar ka, Hamutal dəm Yeremiya ana i Livna ya. 32 A gewa ka, dukw ana ŋgwal ŋa tsiye na i təv are BATSAH kwa ŋa ya, kamala gà bàba gà tsir ŋgar a. 33 Firawna Neku a gəs Yuwakaz, a tike ŋgat a daŋgay i Ribla ana ika ahəɗ gà Hamat a. Aà makwara Yeruzalem asa tsa. Neku a tike balaari aà gà mburma gà Yahuda aà məpəla hadam, ndzemde məvəɗa kur siŋgwe kiliw dəbuw makər nda gura kiliw dzik makər. 34 Firawna Neku a ne a a Eliyakim kəla Zuziyas a Əbay, a təv mendze mekwere dede ŋgar. A mbə̀ɗar zləm ŋgiɗ a ɗer Yuyakim. Ama Yuwakaz ka, aka tike ŋgat a daŋgay ika ahəɗ Ezipt, a mət riŋ i fata. 35 Yuyakim a tike mandza hadam balaari aà gà mburma Yahuda, aà mandza gà ndzemde məvə̀ɗa kur siŋgwe nda gura ana Firawna Neku Əbay gà Ezipt a tike aà tar a. I təv ana ku mege weke aka pəl biy ŋgar ka, Yuyakim a dzawa gà siŋgwe ata, a Əbay Neku. 36 Yuyakim a ne Əbay ka, ŋgat mive dzik sela gər ŋgar əzləm. A kwara i Yeruzalem mive kurwa gər ŋgar ilik. Zləm mama ŋgar ka, Zebuda dəm Pedaya ana i huɗ kwite gà Ruma ya. 37 Yuyakim a gewa ka, dukw ana ŋgwal ŋa tsiye na i təv are BATSAH kwa ŋa ya, kamala gà bàba gà tsir ŋgar a.