2 Əbay 24

Maduŋa kwite Yeruzalem malahalah ŋana

1 Akahər mekwere Yuyakim ka, Nevuhadnetsar Əbay gà Babila a ge guvəl aà gà Yahuda, Yuyakim a ndza i mekwere ŋgar, mive makər. I dəba ŋa ya, a mbəɗ ba aà mege aà ŋgat guvəl. 2 I dəba ŋa ya ka, BATSAH kwa ŋa a slər gà ɓəzla makəzala mburma ana i Babila ya, gà ana i Siriya ya, gà na i Muwabiya ya, dite gà na i Ammuniya ya. Tə dzeye à mekwere gà Yahuda, kamala bazlam ana BATSAH kwa ŋa a tsik nda ahər gà ɓəzla meslire ŋgar, gà ɓəzla məma à guma ŋgar. 3 Gà mesewere are ata a ge ba a gər a gà mburma gà Yahuda ka, BATSAH kwa ŋa nda ahər ŋgar ŋa, na a zla aka tar a ya, aà madəgəza gà mburma gà Yahuda diriŋ i təv are ŋgar a. Aɗaba gà bakal Əbay Manasse ana a geye ya. 4 Asa ka, agəra mandza à məmbəz gà mburma ana bakal tar riŋ tsa, huɗ kwite Yeruzalem a rah nda məmbəz tar a. BATSAH kwa ŋa a waya məpəla aà tar à bakal ŋa tsidze.

5 Gà asiŋ gà megemir Yuyakim nda gà dukw ana a ge fit tserdze ya, ana riŋ mewetse ŋa i huɗ wakita labara gà Əbay gà Yahuda ibam a. 6 I təv ana Yuyakim a mət a ka, ti le ŋgat a liwiŋ gà dive gà bàba gà tsir ŋgar, Yuyakin kəla ŋgar a ndza aka təv mendze mekwere ŋgar. 7 Əbay gà Ezipt ya aka dara ika ahəɗ ŋgar a asa tsa, aɗaba Əbay gà Babila aka ndzək gà dukw ana a ne biy ŋgar a. A gəsara daga ika tseke are yam gà Ezipt ya ya, tsikw aka batsah duluv Efrat.

Yuyakin a ne Əbay gà Yahuda

8 Yuyakin a ne Əbay ka, ŋgat mive kurwa gər a tsamakər. A kwara kiye makər i Yeruzalem. Zləm mama ŋgar Nehusta dəm Elnatan ana i Yeruzalem a. 9 A gewa ka, dukw ana ŋgwal ŋa tsiye na i təv are BATSAH kwa ŋa ya, kamala dede ŋgar a. 10 Akahər ŋa ata na, gà sliwdze gà Babila, tə da a mege guvəl aà huɗ kwite Yeruzalem a, tə lawara a huɗ kwite ata. 11 Nevuhadnetsar Əbay gà Babila, a dara aà mege guvəl aà huɗ kwite ata gà sliwdze ŋgar tə lawara ya. 12 I fata ya ka, Yuyakin Əbay gà Yahuda, a dara aka miɗ Əbay gà Babila ya. Ŋgat ŋa, mama ŋgar, gà ɓəzla meslire ŋgar, gà bàba gà mburma ana ika miɗ gà mburma ŋgar a, nda gà bàba gà ɓəzla aka miɗ gà sliwdze ŋgar, a dza tar a daŋgay, i huɗ mive matsamakər ŋana a ge a ika mekwere ya. 13 A ndzək dər gà ŋgwal gà dukw ana i ga BATSAH kwa ŋa ya, nda gà dukw ana i ga i bəra Əbay ya. A batsaya gà kazlaŋa megemir ana Salumun Əbay gà Isərayel, a vaɗaya nda gura ya, a dza a ga BATSAH kwa ŋa. Kamala ana BATSAH kwa ŋa a tsike a ahər a. 14 Nevuhadnetsar a dùŋ gà mburma ana mandza ŋa i Yeruzalem a tserdze, gà na ika miɗ gà mburma ya tserdze, nda gà ɓəzla aka miɗ gà sliwdze. Gà mburma ata ka, dəbuw kurwa. A dzək akaba, nda gà ɓəzla məpapaza dizl, nda gà mbəzla fit tserdze. A miyak ka, aà ɓəzla matawak ana ndeyndey ya. 15 A ndzək Əbay Yuyakin, nda gà məkəs ŋgar, mama ŋgar, gà ɓəzla meslire ŋgar, gà bàba gà mburma ana ika miɗ gà mburma ŋgar a, nda gà bàba gà ɓəzla aka miɗ gà sliwdze ŋgar Babila, 16 Əbay Babila a ndzək, akaba tar nda gà sliwdze dəbuw təsəla, gà ɓəzla məpapaza dizl dəbuw, gà mbəzla dite nda gà ɓəza gà gawla ana mege guvəl ide ya, fit tserdze a Babila. 17 I fata ya ka, Əbay gà Babila a tike aɗəm Əbay ŋgiɗ, zləm ŋgar Mataniya damər dede Yuyakin. A mbəɗar à zləm ŋgiɗ, a ɗer Tsidikiya.

18 Tsidikiya a ne Əbay ka, ŋgat mive dzik sela gər ŋgar ilik, a kwara i Yeruzalem mive kurwa gər ŋgar ilik. Zləm mama ŋgar, Hamutal dəm Yeremiya ana i Livna ya. 19 A gewa ka, dukw ana ŋgwal ŋa tsiye na i təv are BATSAH kwa ŋa ya, kamala Yuyakim a. 20 Dukw ata a ge ba ka, agəra matsəɓatsəɓ BATSAH kwa ŋana a ge aka gər gà Yeruzalem nda gà Yahuda ya. Agəra taŋa na a dəgəz tar diriŋ i təv are ŋgar a. Tsidikiya aka tsalaba à sègèmè a gər, aka gər Əbay gà Babila.