2 Əbay 25

Maduŋa kwite Yeruzalem masula ŋana

1 I huɗ mive Metswiɗ ŋana Tsidikiya a ge a ika mekwere ya, nda makurwa ŋa, nda mehinne kurwa kiye ata, Nevuhadnetsar, Əbay gà Babila a hitse à guvəl aà Yeruzalem nda gà sliwdze ŋgar fit tserdze. A dza maŋgwaɓa ŋgar aka miɗ huɗ kwite ata, ti le biye aà huɗ kwite ata tiwlik tits. 2 Mandza maŋgwaɓa ata a ndza, tsikw aà mive kurwa gər ŋgar ilik ŋana Əbay Tsidikiya a kwara ya. 3 Batsah may a dzəba a mege, gà mburma ana i huɗ kwite ata ya ta ŋgat dukw mezime asa tsa, nda kiye məfaɗ ŋa, mehinne tswiɗ ka, 4 gà Babila ta təm biye aà zlagam ana a lawara kwite ata ya. Ku mege gà Babila tàa lawara huɗ kwite ata tekeɗe ka, Tsidikiya Əbay gà Yahuda nda gà sliwdze ŋgar, tə təz ndaavəɗ ŋa ata ndaka biye hərmaga ana ika magər gà zlagam ata sula bise nda dzèrnè Əbay ya, tə zla vatwa ana a da ndaka tulwah Yurdan a. 5 Ama gà sliwdze gà Babila tə zazam Əbay, ta gəs ŋgat aka varavada mada a Yeriku. Gà sliwdze ŋgar fit tserdze tə təz, ta məsak aà ŋgat. 6 Gà sliwdze gà Babila ta gəs Əbay Tsidikiya, tə da a ŋgat aka miɗ Əbay gà Babila a Ribla. I fata na gà Babila ta ger seriye ya. 7 Ti zleye ɗa a gà ɓəza Tsidikiya a təv are ŋgar, i dəba ŋa ya, Nevuhadnetsar a tsuslumayar à are a Tsidikiya. Ta ŋge ŋgat ŋa, nda tsitsirɓe virzegene are sula, dite tə da a ŋgat a Babila.

8 I huɗ mive kurwa gər ŋgar tswiɗ ŋana, Nevuhadnetsar a ge a ika mekwere ya, nda kiye ma əzləm ŋa, nda mehinne təsəla ŋana i huɗ kiye ata ya, Nebuzaradan mala aka miɗ gà sliwdze ana, ta kaslawa Əbay ya, ŋgat i liwiŋ gà ɓəzla meslire Əbay gà Babila, a da a Yeruzalem. 9 A wànà ga BATSAH kwa ŋa, ga Əbay, dite nda gà ga ana riŋ i Yeruzalem tserdze ya. A dzeye akwa aà gà ga, gà ŋgwal gà mburma ana ta gewa akaba megemir nda gà Əbay a tserdze. 10 Gà sliwdze gà Babila ana tə da akaba nda gà ŋgat a, ta mbazla a zlagam ana a lawara huɗ kwite Yeruzalem a. 11 Nebuzaradan mala aka miɗ gà sliwdze ana, ta kaslawa Əbay ya, a gasa gà mburma ana ti zeha i huɗ kwite ata ya, gà na ta vəl ba a Əbay gà Babila ya, nda gà asiŋ gà mayahaba gər gà mburma. 12 Ama a məsak riŋ ka, aà gà matawak ŋana ndeyndey ya, aà mə̀fata a tar guvah viŋye nda gà asiŋ gà guvah dukw ŋgiɗ.

13 Gà Babila ta haɓaya aà gà mendweŋe virzegene ata sula aà mada a ga BATSAH kwa ŋa ya, gà ɓəza muta piris, nda gà batsah tugwàɗ virzegene ata metikiŋa ika varavada ya. Tə ndzàka gà virzegene ata a Babila. 14 Tə ndzaka gà kazlaŋa megemir ana nda virzegene, ta gewe dər megemir i ga BATSAH kwa ŋa ya: Gà keyeɗ mandzə̀ka bitekwe, gà pel, gà awis masasa liɓir lalampa, nda gà səra magwàtsakàyà à məmbəz. 15 Mala aka miɗ gà sliwdze ana, ta kaslawa Əbay ya, a ndzək gà dukw ana ta və̀ɗ nda gura, nda gà ndzemde məvəɗa kur siŋgwe ya fit: Gà tətəgwa madula makərɗa dizl ana a ze hwaŋŋa ya, nda gà səra magwatsaka à məmbəz. 16 Wura a sər mibe virzegene, gà bàba gà mendweŋe ata sula ya, batsah gah ata, nda gà muta piris ana Salumun a vaɗa a dza a ga BATSAH kwa ŋa ya tsa. 17 Zubəl malahalah mendweŋe ata ka, metir tswiɗ, ika gər mendweŋe ata ka, felere virzegene riŋ ikəka metir ilik nda mezehe ŋa. Malawaraŋa nda ndzàrawa virzegene, ta ge ahər dukw metsehine, gà mendzikiɗe ba gà mawa dizl Grenadiye ya, nda virzegene tiwlik tits. Gà dukw metsehine ana aà masula mendweŋe ya ka, tar kalkal.

18 Mala aka miɗ gà sliwdze ana, ta kaslawa Əbay ya, a gəs Səraya batsah gà ɓəzla məbatsa duwa a Mbulum, nda mala sik ŋgar Safuniya, nda gà ɓəzla makasla ga mbulum makər. 19 A gasa akaba batsah gà sliwdze nda gà ɓəzla megemir Əbay əzləm, i huɗ kwite ya, a gəs mala mewetse dukw mala aka miɗ gà sliwdze ana a ndzəkawa gà sliwdze a megemir a, nda gà mburma gà Yahuda dzik ndilik. Gà mburma ata fit tserdze ya ka, tar mandza ŋa i Yeruzalem. 20 Nebuzaradan mala aka miɗ gà sliwdze ana, ta kaslawa Əbay ya, a ndzək tar a da a tar aka miɗ Əbay gà Babila a Ribla. 21 Əbay gà Babila a gazla tar, a bats tar a biye daw i Ribla ika ahəɗ gà Hamat. Kamala taŋa ya, na tə duŋ gà Yahuda diriŋ ika ahəɗ tar a.

22 Gà mezehe gà mburma gà Yahuda ana Nevuhadnetsar Əbay gà Babila a miyak riŋ à tar a, a ne a Gedaliya kəla Akikam mala makwara ahəɗ tar, Akikam ka, kəla Safan. 23 I təv ana gà bàba gà ɓəzla aka miɗ gà sliwdze, nda gà sliwdze gà Yahuda, tə tsaraka ka, Əbay gà Babila aka ne a à Gedaliya mala makwara ahəɗ ka, tə dara a təv Gedaliya a Mitspa ya, tar nda gà mburma tar: Gà Ismayel kəla Netaniya, Yuhanan kəla Kareyat, Səraya kəla Tanehumet ana i Netufa ya, nda Yazaniya ana i Maka ya. 24 Gedaliya a gwaɗa a gà ɓəzla aka miɗ gà sliwdze ata nda gà mburma tar a: « Ki gwim magəɗa a gà ɓəzla meslire gà Babila tsa. Ndzum ika ahəɗ ata, gwim megemir a Əbay gà Babila, dite ki ndzwim a zay. 25 Ama i huɗ kiye matəsəla ŋana ya ka, Ismayel kəla Netaniya, Netaniya kəla Elisama gwala Əbay, a dara nda gà mburma ya, kurwa. A bats gà Gedaliya nda gà Yahuda, nda gà Babila ana tar akaba i Mitspa ya. 26 I fata ya ka, gà mayahaba gər gà mburma, gà ɓəza, gà bàba ŋa, nda gà ɓəzla aka miɗ gà sliwdze ya. Tə da aka ahəɗ gà Ezipt aɗaba ta ge magəɗa a gà Babila.

27 I huɗ mive madzik makər gər ŋgar təsəla ŋana tə dùŋ gà Yuyakin Əbay gà Yahuda, nda kiye makurwa gər ŋgar sula ŋa, nda mehinne dzik səla gər ŋgar təsəla ŋana ya ka, Evil-Merudak Əbay gà Babila, i huɗ mive ŋa ata ya, na a ne Əbay ya. A ger ŋgwal a Yuyakin Əbay gà Yahuda, a pə̀lara aà ŋgat i daŋgay ya. 28 A fafəlar himme, a tike ŋgat aka təv mendze mekwere ana a za dər biy gà asiŋ gà Əbay ŋgiɗ ana tar akaba nda gà ŋgat i Babila ya fit tserdze. 29 A ndzək ikaka petek daŋgay ŋgar a, Yuyakin a zemawa dukw mezime aà tabel ŋa ilik nda Əbay kəla pat, na i huɗ mandza a bəra ŋgar a fit. 30 Kamala taŋa ya, kəla wur gà pat, i huɗ mandza a bəra ŋgar a fit, Yuyakin a gə̀sawara dukw mezime ŋgar a ka, aà Əbay gà Babila ya.