1 Əbay 1

1 əbay

Aduniya a waya mene əbay

1 əbay Dawda aka ge mandawal kwetif kwetif. Tə dzawa aaka petek tekeɗe ka, a gewer huzzwa ɓav tsa. 2 Gà ɓəzla meslire ŋgar ta gwaɗar: « mìi ti yehekere a dəm gama ana wura aka həna dər ilik zukw tsiye, aà me gewak megemir, me gewak gər, ma hənawak aà gəzləŋ, dite mə mawak dər huzzwa te, əbay batsah mə̀r ŋa. »

3 Ti yaha dəm gama ana a tsahən hinne ya, ika ahəɗ kwite gà Isərayel a fit ka, tàa le aà dəm gà Sunemitiya duwa zləm ŋgar Abisag, tə zlara a əbay a. 4 Dəm ata ka, metsehine ŋgar aà bəra tsa. A gewar gər a əbay, dite a gewar megemir, ama əbay aka ləm ahər tsa.

5 Akahər ŋa ata ŋa mbaŋa, na Aduniya kəla Hagit, a gəl aà gər ŋgar a, a gwa: « Iye na, i ti ne a əbay a. » A yaha ba gər a gà muta piris, nda gà ɓəzla matsala aaka ŋa dze, nda gà asləka gà mburma dzik əzləm (50), tə ndzar aà miɗ. 6 A gər ana a gəl ba ya ka, dede ŋgar aka palar ahəm, aka gwaɗar, aàmala na ki ge a kərga naha ya ka, aka tsikar ilik tsidze. Aduniya ka, a tsahən hinne. Ta wa ŋgat ka, idəba Absalum a. 7 Aduniya, Zuwab kəla Tsuriya^ª àha Abiyatar mala məbatsa duwa a Mbulum, tə dza aaka ba ahəm, te hitser a dəba. 8 Ama gà Tsaduk mala məbatsa duwa a Mbulum nda gà Benaya kəla Yehuyada, nda gà Natan mala məmà à bazlam Mbulum, nda gà Simhi, nda gà Reehi, dite nda gà sliwdze Dawda ana yam a dza tar a are tsiye ka, tàa hitse a dəba Aduniya tə tsa.

9 A pat duwa ka, Aduniya a bats gà təmaŋ, nda gà sla nda gà ɓəza gà sla ana gà magalaŋa ya, bise nda gurum Zuhelet ana i təv En-Rugel a. A zal aà dukw mezime ata a gà damər ŋgar, gà ɓəza əbay fit tserdze, nda gà mburma gà Yahuda ana tar gà ɓəzla meslire əbay ya fit tserdze asa mbaŋa. 10 Ama aka zal à dukw mezime ata a gà Natan mala məmà à bazlam Mbulum, nda Benaya, dite a gà sliwdze əbay ana yam a dza tar a are tsiye tsa, ku mege a Salumun ana damər ŋgar a tekeɗe ya.

Gà Natan nda Bat-Seba tə da a təv əbay Salumun

11 Tsam ka, Natan a gwaɗa a Bat-Seba məmər Salumun: « Wànà kàa sər aàba tsiye, na Aduniya kəla Hagit aka ne əbay ya? Ama kə̀la ka, BATSAH kwa ŋa Dawda tekeɗe ka, aka sər aàba ɓav tsa! 12 Kinehe ka, i vileke a metsehe ana ki ta be a dər aà gà mesife kurum nda kəla yak Salumun a. 13 Da, a təv əbay Dawda, kə gwaɗar: əbay batsah gà ŋa, Kàa mbaɗa, kàa gweɗiŋ a iye ɓele yak ka, kəla yak Salumun na, a ti ne a əbay, a ti ndze a aka təv mendze mekwere yak, i dəba yak a tsiye? Dite aàla na Aduniya na a ne əbay kinehe ya? » 14 I təv ana kər riŋ ki fefile a a əbay mba ya ka, iye ŋa i dehe a i dəba yak ka, a təv ŋgar aà məvəla ndzəɗa a bazlam yak ata.

15 Bat-Seba a da a təv əbay a meɗikwir ŋgar, aɗaba ana ŋgat ka, mandawal ŋa kwetif kwetif a, dite Abisag dəm gà Sunemitiya ata riŋ ihər a gere a megemir. 16 Bat-Seba a kirik a bəɗ, a dza gurmits a biye aka miɗ əbay. əbay a gwaɗar: « ka waya ana əla? » 17 A gwaɗar: « əbay gà, kàa mbeɗiŋ a iye mala meslire yak nda zləm BATSAH kwa ŋa, Mbulum yak ka, kəla yak Salumun na a ti ne a ɗa əbay i dəba gà ya ya, ŋgat na a ti zle a təv mendze mekwere əbay gà ya. 18 Araha kinehe ka, Aduniya na a ne əbay ya, tsaatsa ka, kər əbay batsah gà ŋa, kàa sər aàba ɓav tsa. 19 Aka bats gà mbuluv sla, gà sla, nda gà ɓəza gà sla ana gà magalaŋa ya, nda gà təmaŋ hinne. Aka zal à dukw mezime ata a gà ɓəza əbay fit tserdze, dite a gà Abiyatar mala məbatsa duwa a Mbulum nda gà Zuwab mala aka miɗ gà sliwdze. Ama aka zal a Salumun mala meslire yak tsa. 20 Kinehe ka, əbay batsah gà ŋa, gà Isərayel fit tserdze ti dze a are ka, aà kər. Aà ka ɗif a tar dər, weke na a ti ndze a aka təv mendze mekwere i dəba yak a, əbay batsah gà ŋa. 21 Tsəka, aka təv ana kər əbay batsah gà ŋa, ki te ge a aà bəra asa tsiye ka, mə̀r nda kəla gà Salumun ka, ti te ne a aà mə̀r a ɗa, gà ɓəzla bakal. »

22 Akahər ana gà Bat-Seba riŋ ta fefile a nda əbay mba ya, na Natan mala məmà à bazlam Mbulum a ndzeha ya. 23 Ta gwaɗaha a əbay, Natan mala məmà à bazlam Mbulum naha ɗa i bəra! Dite Natan a daha aka miɗ əbay, a dza gurmits a biye aka miɗ ŋgar luz yemere aka ahəɗ. 24 Natan a gwa: « əbay, batsah gà ŋa, wànà kər a, na kə gwa ka, a Aduniya, mene əbay, ma zla təv mendze mekwere yak i dəba yak a ya? 25 Aɗaba mbakum ka, aka tar a En-Rugel. Aka bats gà mbuluv sla, gà ɓəza gà sla ana gà magalaŋa ya, hinne. Dite aka zal à dukw mezime ata a gà ɓəza əbay fit tserdze nda gà bàba ŋana ika miɗ gà sliwdze ya, nda gà Abiyatar mala məbatsa duwa a Mbulum. Gà mburma ata fit a ka, tar riŋ ti zime a dukw mezime, ti se a dukw mese ika miɗ ŋgar, tar riŋ ta gweɗe a ka: « əbay Aduniya, mandza aà bəra! » 26 Ama iye mala meslire yak, Tsaduk mala məbatsa duwa a Mbulum, Benaya kəla Yehuyada, nda gà Salumun kəla yak ka, aka zal a mə̀r à dukw mezime ata, tə tsa. 27 Wànà taŋa ndzer ana, na a vəlar ahər vatwa ana kər əbay batsah gà ŋa ya, na aà dukw ata ya? Tsaatsa ka, kàa pàt dər à iye mala meslire yak, aà wele ana a ti zle a təv mendze əbay, i dəba yak a tsa, əbay batsah gà ŋa. »

Ti tike Salumun a əbay

28 Tsam ka, əbay Dawda a gwaɗar aaka: « Zelwimiŋara a Bat-Seba ya! » A daha aka miɗ əbay, a hitse aka miɗ ŋgar. 29 əbay a mbaɗa a gwa: « Nda zləm BATSAH kwa ŋana riŋ nda mesife ya, a beyewa à iye i gà mesewere are ya, 30 kamala ana Yàa mbər məmbaɗak, nda zləm BATSAH kwa ŋa Mbulum gà Isərayel a ka, kəla yak Salumun na a ti ne a əbay, i dəba gà ya, ŋgat na a ti ndze a aka təv mendze mekwere əbay gà ya, mbakum ŋa aaha, iye ŋa nda gər gà, i ge a dukw ana i tsikik a. »

31 Tsam ka, Bat-Seba a kirik a bəɗ, a dza gurmits a biye aka miɗ ŋgar, luz yemere aka ahəɗ, dite a gwa: « əbay Dawda batsah gà ŋa mandza aà bəra aà biybiy » .

32 I dəba ŋa ya ka, əbay Dawda a gwa: « Zelwimiŋara a Tsaduk mala məbatsa duwa a Mbulum a, nda Natan mala məmà à bazlam Mbulum a, nda gà Benaya kəla Yehuyada ya. » Gà mburma ata tə daha a təv əbay. 33 əbay a gwaɗa a tar: « Yahum gər a gà ɓəzla sik batsah kurum ŋa, ka tikwim Salumun kəla gà aka mule gà, ka dum a ŋgat a Gihun. 34 I fata, na gà Tsaduk mala məbatsa duwa a Mbulum, nda Natan mala məmà à bazlam Mbulum, ti te dze à mal aka gər Salumun biy mene à ŋgat əbay gà Isərayel a. Ki te vetwim a mezleliŋ, nda wideye dər, ki gweɗwimiŋa: « əbay Salumun mandza aà bəra! » 35 I dəba ŋa, ki lekwimer a dusswa i dəba ya, a dere a a ndze a aka təv mendze mekwere gà. Ŋgat na a ti ne a əbay avukw iye ya. Ŋgat na ì zla, ì ne a dər əbay aka gər gà Isərayel nda gà Yahuda ya. 36 Benaya kəla Yehuyada a gwaɗar aaka a əbay: « Amin! BATSAH kwa ŋa Mbulum nda gər ŋgar ŋa, na a fafəl nda ahər əbay batsah gà ŋa ya. 37 Kamala ana BATSAH kwa ŋa a ndzara nda əbay batsah gà ŋa ya ka, mandza nda Salumun mbaŋa, masəkah à təv mendze mekwere ŋgar, ma za dər biy əbay Dawda batsah gà ŋa. »

38 Gà Tsaduk Mala məbatsa duwa a Mbulum, nda Natan mala məmà à bazlam Mbulum, nda gà Benaya kəla Yehuyada nda gà Keritiya, nda gà Peletiya, ti tike Salumun aka mule əbay Dawda ata, tə laka dər ŋgat a Gihun. 39 Tsaduk mala məbatsa duwa a Mbulum a zlara mbukum a, mal marahaŋa iɗəm, i mekiriwe ga petek a. A mbəɗ a mal ata a gər, a Salumun tsam ka, tə dzəba aà məvata mezleliŋ. Gà mayahaba gər gà mburma tserdze ta wideye, ta gwa: « əbay Salumun, mandza a bəra! » 40 Idə̀ba ŋa ya ka, gà mayahaba gər gà mburma fit tə lakara ŋgat i dəba ya dusswa. Ta vete a dər tsitsèkw, tar nda gà maŋgayaba. Ahəɗ a ɓazla agəra Mewideye tar ata.

Aduniya a wiz məpəla à bakal

41 Gà Aduniya nda gà mburma ata, a zal a tar à dukw mezime ya, tə tsaraka mewideye duwa, na dəba ana tə ndəv aàba à dukw mezime ya. Zuwab a tsaraka, məvata mezleliŋ, a gwa: « Aɗaba la na mewideye duwa a ɗere a hinne i huɗ kwite ya ya? » 42 Aka ana riŋ ihər a fefile a mba ya ka, pəzlaŋ Yunatan kəla Abiyatar mala məbatsa duwa a Mbulum aka ndzeha. Aduniya a gwaɗar: « dara, kər ka, ŋgwal mburma, a ge a ka, ŋgwal labara ndzer na ki me a dər a. » 43 Yunatan a gwaɗar aaka a Aduniya: « Awaŋ ŋgwal labara tsa, əbay Dawda batsah kwa ŋa, aka tike Salumun a əbay! 44 əbay Dawda aka slər gà Tsaduk mala məbatsa duwa a Mbulum nda gà Natan mala məmà à bazlam Mbulum, nda gà Benaya kəla Yehuyada, nda gà Keretiya nda gà Peletiya tə zla ŋgat aka mule əbay Dawda. 45 Gà Tsaduk mala məbatsa duwa a Mbulum nda Natan mala məmà à bazlam Mbulum, tàa mbəɗar mal a gər i Gihun, tàa ne à ŋgat əbay. Tə tsalara i fata ya ka, nda gà maŋgayaba ya. Gà mburma ana i huɗ kwite fit tserdze ya, tàa rah nda maŋgayaba, nda Mewideye. Mewideye dukuməŋa ka, taŋa na kà tsarakum a. 46 Dite asa ka, Salumun aka ndza aka təv mendze mekwere əbay, ka ndəv. 47 Gà ɓəzla sik əbay tàa daha tàa pise ahəm a əbay Dawda batsah kwa ŋa, ta gwa: Mbulum yak meɗe zləm à zləm Salumun batsah ŋa aà biy yak a. Ma səkah à təv mendze mekwere ŋgar ma za biy yak. Dite əbay aka dza gurmits a bəɗ ika sləlah ŋgar, luz yemere aka ahəɗ, 48 dite aka gwa, mipise ahəm a mege ka, biy BATSAH kwa ŋa Mbulum gà Isərayel, aɗaba ana aka zla mburma mbakum, aka ndza à ŋgat aka təv mendze mekwere gà ya, dite ka, iye riŋ ihər i ŋgetere a nda are gà ya. »

49 Gà mburma ata Aduniya a zal a tar à dukw mezime ya fit tserdze ya ka, tə dzəba aà medzedzere. Te hitse aà mbulum, tə dzayaba gà vatwa, ku mege weke a zla vatwa ŋgar. 50 Aduniya a ge magəɗa a Salumun, a hitse aà mbulum, a da megise ba aà gà mbukum ana aà təv madula aaka duwa a Mbulum a. 51 Tə daha ta mar dər a Salumun, araha Aduniya aka gik magəɗa hinne, aka da megise ba, aà gà mbukum ana aà təv madula aaka duwa a Mbulum a, a gwa: « əbay Salumun ma zəm mimbeɗe mbakum, na a te kiɗe a iye mala meslire ŋgar nda masalama tsiye! »

52 Salumun a gwa: « Na aka ne aàba ŋgar ŋgwal mburma ka, ambəz ŋgar ilik a diɗe a a bəɗ tsa, ama na a ge dukw ana ŋgwal ŋa tsiye ka, a mitiŋ a. » 53 əbay, Salumun a slər gà mburma a təv ŋgar, ma tarəra ika təv madula aaka duwa a Mbulum a. Aduniya a dara, a dza gurmits a biye aka miɗ əbay Salumun luz yemere aka ahəɗ, dite Salumun a gwaɗar: « Da ba a ma yak. »