1 Əbay 2

Mandəvandəv meɗife à metsehe Dawda a kəla ŋgar Salumun.

1 Kamala ana ahər məməta Dawda aka mendzera ya ka, a vəl aàba mandəvandəv metsehe a kəla ŋgar Salumun a, a gwaɗar: 2 « Kinehe ka, Yàa mimiseke à gər ahəɗ kamala gà asiŋ gà mburma ana ta miyak dər a. Mà aàba arəv, hitse asləka asləka. 3 Zazam dukw ana BATSAH kwa ŋa, Mbulum yak a gwaɗak ge ya. Zazam vatwa ŋgar lele. Ge metsehe a dukw ana a hitse dər a, nda gà məpala ahəm ŋgar, nda gà seriye ŋgar, nda gà dukw ana a pala ahər ahəm a. Kamala ana riŋ mewetse ŋa i wakita məpala ahəm Musa ya. Kamala taŋa ya, na ki te ŋgete a, mege gara i gà dukw ana ki ge a ya, nda gà təv ana ki de a aɗəm a ya. 4 kərga taŋa ya, na BATSAH kwa ŋa a ti rehe a à bazlam ŋgar ana a tsikiŋ a: « Na gà ɓəza yak tàa te ge metsehe a metike ba tar lele, mede tar aka ta ge ŋgwal ŋa ika miɗ gà, nda gəzləŋ tar fit, nda mesife tar fit tserdze ka, təv mendze mekwere Isərayel ka, a ti de a i ahər tar a tsa. »

5 Asa ka, kər kà sər dukw ana Zuwab kəla Tsuriya a giŋa, a ge a gà ɓəzla aka miɗ gà sliwdze gà Isərayel ata sula ya, a gà Abiner kəla Ner nda Amasa kəla Yeter a. A bats tar ka, ika bəra mendze zay a, kamala ana ika miɗ guvəl a. A bah məmbəz tar aà kanda ŋgar ana ika dəmkul a, aà tsapà ana ihər i sik a. 6 Kà ta miyak à ŋgat, mege mandawal, ma ta mət ika zay ya tsa. Ama kə̀la ka, ge nda metsehe yak.

7 Ama gà ɓəza Barzilay gà Galaad, tar kə̀la ka, ge a tar ŋgwal, te ge ika magər gà mburma ana ki zimwime a akaba ɗaf a. Tàa dara aà mezleke iye ya, na i təv ana i vele a aà Absalum a damər yak a.

8 Dite araha Simhi kəla Gera gà Bendzamen ana i Bahurim a, i tsaka yak. Wele ata ka, aka viliŋ batsah mezelme, na a pat ana i da a Mahanayim a. Ama aka daha aka ŋgəzl aka iye aha aà guva dulwa Yurdan, yàa mbaɗar nda zləm BATSAH kwa ŋa,yàa gwaɗar ka, i kiɗe a kər nda masalama tsa. 9 Ama kinehe ka, ka ta fər aà ŋgat, kamala wele ana aka ge bakal tsiye tsa. Aɗaba kər ka, wele ana metsehe ŋgar riŋ a, dite kər kà sər dukw ana, ki gere a ya. Ku mege aka ge mandawal tekeɗe ka, ki kiɗ a ŋgat hiywe pəra.

Məməta Dawda

10 Dawda a mət a ka, ti le ŋgat i huɗ kwite Dawda. 11 Dawda aka ge ika makwara gà Isərayel ka, mive dzik faɗ (40): A kwara ika ahəɗ Hevrun, mive təsəla (7), dite a kwara ika ahəɗ Yeruzalem, mive dzik makər gər ŋgar makər (33).

12 Salumun a ndza aka təv mendze mekwere əbay Dawda, dede ŋgar. Mekwere ŋgar a ŋgat ndzəɗa.

Məməta Aduniya

13 A pat ŋgiɗ duwa ka, Aduniya kəla Hagit^ª a da a təv Bat-Seba məmər Salumun. Mama Salumun ata a wiz ahər: « Kà dara ana biy ŋgwal beye? » Aduniya a gwaɗar aaka: « Biy zay » 14 I dəba ŋa ya, Aduniya a gwaɗar: « Bazlam gà riŋ ilik na i wiz a aà kər a ya? » Bat-Seba a gwaɗar: « fafəl »

15 « Kər kà sər nda gər yak, mekwere zləmana ka, biy gà, gà Isərayel fit tserdze ta vava ka, iye na i ne əbay a. Ama mekwere ata aka mbəɗ aàba i təv gà ya, a təv damər gà, aɗaba BATSAH kwa ŋa a waya ka, mege ba kamala taŋa ya. 16 Kinehe ka, i wize a aà kər a duwa ilik pəra, ka niwiŋ dər tsa. » Bat-Seba a gwaɗar: « Tsik » 17 Aduniya a gwaɗar aaka: « Ì gik kamkam, da a təv əbay Salumun, aɗaba a niwek a dər tsa, miviliŋ Abisag dəm gà Sunemitiya aà daala. » 18 Bat-Seba a gwaɗar: « Haya lele, iye ŋa nda gər gà i ta fefilere a a əbay aka gər dukw ana kà wiz a. » 19 Bat-Seba a da a ga a bəra əbay Salumun aà məfafəlar aka gər dukw ana Aduniya a wiz a. əbay a hitse, a da aà maləma akaba nda ŋgat, a dza gurmits a biye aka miɗ Bat-Seba, a ndza aka təv mendze mekwere əbay ŋgar. Ti tike təv mendze əbay ŋgiɗ aà guva ŋgar, a mama əbay, a ndza aaka ndaka tseke ahər mezime ŋgar. 20 Bat-Seba a gwaɗa a Salumun: « Kəla mewize gà naha i wize a aà keriŋa, ka niwiŋ dər tsa. » əbay a gwaɗar aaka: « wiz mama gà, i niweke a dər tsa. » 21 Bat-Seba a gwa: « Wànà ki slekwe a aà mivile a Abisag dəm gà Sunemitiya a Aduniya damər yak aà daala, ibam a? » 22 əbay Salumun a gwaɗar aaka a mama ŋgar: « Aàmala na kà wiz Abisag dəm gà Sunemitiya aà məvəla a Aduniya ya? Wizer ndeɗiŋa ka, əbay, aɗaba ŋgat ka, damər gà batsah ŋana. Wiz əbay a Aduniya nda gà mburma ŋgar, a Abiyatar mala məbatsa duwa a Mbulum, a Zuwab kəla Tsuriya!

23 əbay Salumun a mbaɗa nda zləm BATSAH kwa ŋa a gwa: « Mbulum mə viliŋ batsah mesewere are, na yàa kəɗ Aduniya agəra mifefile ŋgar ata tsiye? 24 Kinehe ka, nda zləm BATSAH kwa ŋana riŋ nda mesife ya, ŋgat na a ne aà iye əbay ya, a tike iye aka təv mendze mekwere əbay tsir gà Dawda a. Aka mbər metsikiŋ ka, a te viliŋ a əbay, dite a te vile a a gà ɓəza gà, a gà ɓəza gà ɓəza gà. Mbakum aha kinehe, Aduniya ka, a mitiŋ a. 25 Tsam ka, əbay Salumun a slər Benaya kəla Yehuyada, aà makəɗa Aduniya, a daha a yab aaka, a kəɗ.

əbay a dəgəz Abiyatar

26 I dəba taŋa ya ka, əbay a gwaɗa a Abiyatar mala məbatsa duwa a Mbulum: « Da a Anatut, a təv ana gà guvah yak iɗəm a. Aɗaba kər ka, a da dər biy makəɗa kər, Ama i kiɗe a kər mbakum tsa. Aɗaba kà zla sahər BATSAH kwa ŋa Mbulum yak, kà ndza dər aà miɗ a tsir gà Dawda. Kàa sawarum akaba are nda tsir gà Dawda məma, i gà mesewere are ŋgar ana a lewa ahər tserdze ya. 27 Kərga taŋa ya na Salumun a dəgəz Abiyatar i megemir məbatsa duwa a Mbulum a, kərga taŋa ya na a rah à mifefile BATSAH kwa ŋana a tsik aka gər ga Eli i Silu a.

Salumun a kəɗ Zuwab.

28 Labara ata aka ɗe aha aà Zuwab, a hitse a dəba ka, Aduniya, aka hitse a dəba a Absalum tsa. Tsam ka, a da mekehe ba a mekiriwe ga petek BATSAH kwa ŋa. A gəs ba, aà gà mbukum ana aà təv madula aaka duwa a Mbulum a. 29 Tə dara ta mà dər a əbay Salumun, Zuwab a ka, aka val a makaha ba a mekiriwe ga petek BATSAH kwa ŋa, a riŋ aà guva təv madula aaka duwa a Mbulum. əbay Salumun a slər Benaya kəla Yehuyada a gwaɗar: « Daha, kəɗ ŋgat. » 30 Benaya a daha a mekiriwe ga petek BATSAH kwa ŋa, a gwaɗa a Zuwab, əbay a gwa ka: « Dara i faka ya. » Zuwab a gwa: « Awaŋ, i mite a ka, i faha. » Benaya a dara a mà à dukw ana Zuwab a tsik a, a əbay. 31 əbay a gwaɗar: « Ge kamala ana a tsik a. Kəɗ ŋgat, i dəba ŋa ya, kà le ŋgat. kərga taŋa ya, na ki zle a ika iye, nda gà mburma gà tsir gà ya, məmbəz ana Zuwab a dza dər biy taf a. 32 Kamala taŋa ya ka, BATSAH kwa ŋa a mere a, a məmbəz ŋa a gər ŋgar, aɗaba ana a dza à məmbəz gà mburma ata sula ya: « Gà Abiner kəla Ner mala aka miɗ gà sliwdze gà Isərayel, nda Amasa kəla Yeter mala aka miɗ gà sliwdze gà Yahuda ya, tar gà ɓəzla ndzer, dite gà ŋgwal gà mburma aà ŋgat a, a bats tar nda masalama ka, tsir gà Dawda aka sər aàba tsa. 33 Məmbəz gà mburma ata ka, məmà a gər a gà Zuwab nda gà ɓəza ŋgar aà biybiy. Ama mandza zay BATSAH kwa ŋa, mege ika gər Dawda nda gà ɓəza ŋgar, nda ga ŋgar, dite nda təv mendze mekwere ŋgar hiywe aà biybiy. » 34 Benaya kəla Yehuyada, a kəɗ. Ti le ŋgat, i ga ŋgar i dala i kusak. 35 əbay a tike Benaya kəla Yehuyada a təv mendze Zuwab, a ne à ŋgat mala aka miɗ gà sliwdze, a tike Tsaduk mala məbatsa duwa a Mbulum a təv mendze Abiyatar.

Makəɗa Simhi

36 əbay Salumun a zalaha a Simhi a gwaɗar: « Da ge ga yak, a Yeruzalem, ki ndzewe riŋ i huɗ kwite ata. Ki dere a iɗəm a a meseweye tsidze, ku mege a ŋga ya. 37 Na a pat ana kàa ɓazlara aàba i fata ya, kàa tsəl i lilik Sedruŋ a ka, sər dər, ki mitiŋa, məmbəz yak, a meke a gər. 38 Simhi a gwaɗar aaka a əbay: « Bazlam ata əbay batsah gà ŋa a tsik kə ka, lele. Mala meslire yak a ge a dukw ana ka tsikar a. » Simhi aka ndza i Yeruzalem hinne.

39 Ama i dəba mive makər a ka, gà ɓəzla meslire Simhi sula tə təz aba a bəra Akis kəla Maaka əbay gà Gat. Tə dara ti tsik a Simhi ta gwaɗar: « Gà ɓəzla meslire yak ka, tar i Gat 40 Simhi a dza lidza aka hezweŋe ŋgar, a da a Gat a bəra Akis aà ma tə yahara gà ɓəzla meslire ŋgar a. A ge ka, mede nda məmara na a mara aà gà ɓəzla meslire ŋgar i Gat a. 41 Tə dara ta mà dər a Salumun, Simhi aka da i Yeruzalem a a Gat, ama aka mara a ma ya. 42 əbay a zalaha a Simhi a gwaɗar: « Wànà Yàa mbaɗak nda zləm BATSAH kwa ŋa tsiye? Dite Yàa tsikik aàba ya tsiye? A pat ana kàa dara i huɗ kwite ya, aà mada ku mege a ŋga ya ka, ki mite a ya, ama kàa gweɗiŋ, dukw ana ka tsikiŋ a ka, ŋgwal bazlam lele, yàa tsaraka, ana kàa gweɗiŋ tsiye? 43 Dite agər la dze ya, na kàa gəs ahəm aà mimbeɗe ana a mbaɗa ba ika miɗ BATSAH kwa ŋa ya, nda məpala ahəm gà ana i vəlak a tsiye? » 44 əbay a gwaɗa a Simhi: « Kər kà sər, bakal ana ki ge i madzala gà gər yak, a dede gà Dawda a fit. BATSAH kwa ŋa a meke a aɗəm a aà bakal ŋa. 45 Ama BATSAH kwa ŋa a pìse a ahəm, a əbay Salumun, dite a təv mendze mekwere əbay Dawda, a ŋgete a ndzəɗa ika miɗ BATSAH kwa ŋa, aà biybiy. 46 əbay a vəl vatwa a Benaya kəla Yehuyada, a dara a bəra ya, a yab aka Simhi, a kəɗ ŋgat.

A gər taŋa ya ka, mekwere əbay Salumun a ŋgat ndzəɗa hinne.