2 Samiyel 1

2 Samiyel

Məməta gà Sawul nda Yunatan

1 A pat ŋgiɗ duwa, i dəba məməta Sawul a. I dəba Dawda ana a bats aba gà Elimelekiya ya ka, a mbəɗ gər a Tsiklak, a ndza a riŋ i fata mehinne sula. 2 Pat məmakər ŋana ka, pəzlaŋ wura a slalara i təv maŋgwaɓa Sawul a. Petek ŋgar makwayaɗa ŋa, dite gər ŋgar tekeɗe mbulùhmbulùh nda gà ahəɗ. kərga megweɗe ya, ar ka, nda gà tuwa aà are. I təv ana a ndzeha à təv Dawda a ka, a kal aba aka ahəɗ a dza gurmits a biye aka miɗ ŋgar. 3 Dawda a tsam ahər: « Kà dara ana i ŋga ya?» Wele ata a gwaɗar aaka: « I bera ka, i təv mandza maŋgwaɓa gà Isərayel a» 4 Dawda a gwaɗar: « Dukula na a ge riŋ ba ya? Kamkam ɗemiŋ» Wele ata a gwaɗar: « Gà sliwdze gà Isərayel tàa təz i guvəl a. Dite gà sliwdze tekeɗe bàgwal ŋa tàa bats tar, Gà sliwdze gà Isərayel aà gər tar ɗèkɗèk pəra tsa, ama gà Sawul nda kəla ŋgar Yunatan ka, tàa bats tar mbaŋa asa. » 5 Dawda a gwaɗa à wele ata a ɗemere a gà dukw ata ya: « Meme na kà sər ka, gà Sawul nda kəla ŋgar Yunatan ka, tàa bats tar a? 6 Wele ata a ɗamar gà dukw ata ya a gwaɗar: « Ndzer i daba a meseweye a gər kwite Gilbuwa, i wiy a aba dzə̀dzàragaf aka Sawul riŋ a diyekwe a ba nda suwal ŋgar, dite asa ka araha bise gà ɓəzla madə̀gə̀za gà muta piris guvəl, nda gà ɓəzla matsəla aka gà piris tàa lawara tits, tar riŋ ti de a aakahiŋ a. 7 A mbəɗ aba ka, a ŋgetiŋ, dite a zeliŋ, i gwaɗar iye naha. 8 A gwaɗiŋ: « kər ana weke?» I gwaɗar aaka: « iye ka, gà Elimelekiya.» 9 A gwaɗiŋ kamkam dara a təv gà ya, kə kəɗ iye. Aɗaba iye ka, i məməta, ku mege iye a riŋ nda gà mesife mba tekeɗe ya. 10 I sərəkaha a təv ŋgar i kəɗ ŋgat, i sər ka, aka dəɗ aà mbulum a ka, a sle a aà mehitse a asa tsa. I zlar baramusa ŋgar ana i gər a, dite nda dasa ŋgar ana ihər i ahər a, na naha i dak dərra ya batsah gà ŋa. 11 I fata ya ka Dawda a kwayaɗa ikaba a petek a. Gà mburma ana i təv ŋgar a tekeɗe ta kwayaɗa ikaba à gà petek tar a mbaŋa. 12 Wùrwùs tsikw a hawa, tə ndza kamala ana, tar i ga məməta ya. Tə tuwa, ta ge ndəra, agəra gà Sawul nda kəla ŋgar Yunatan nda gà Isərayel, gà mburma ata ta bats tar tserdze ya ka, gà mburma BATSAH kwa ŋa. 13 Dawda a gwaɗa a wele ata a màrr a gà dukw ata ndeɗiŋ a ya: « Ka dara ana i ŋga ya?» Wele ata a gwaɗar aaka, « Mər nda dede gà ka, mì dara, i kwite ana gà Elimelekiya tə ndzawa iɗəm a. Ama kinehe, mə̀r ɗa ka, i kwite yak» 14 Dawda a gwaɗar: « wànà magəɗa a gək te tsiye, na kà zla ahər a mbulum aà makəɗa wele ana BATSAH kwa ŋa a zla ŋgat a ya?» 15 I fata ya ka, Dawda a zal a sliwdze ŋgar ilik, a gwaɗar: « sərəkara kə̀ kəɗ wele aka. Sliwdze ata a kəɗ Elimelekiya ata.» 16 Dawda a gwaɗa a Elimelekiya ata ta kəɗ a: « bakal ŋa məmàk a gər a kər ŋa. Aɗaba bazlam yak ana kə gwa, iye na a kəɗ wele ana BATSAH kwa ŋa a zla ya, na a kəɗ kər a.

Dimis Dawda ika məməta gà Sawul nda kəla ŋgar Yunatan

17 I fata ya ka, Dawda a lah dimis məməta, ika tuwa gà Sawul nda kəla ŋgar Yunatan ana ta bats tar a. 18 A vəl ahər vatwa aà mesinike dər ŋa, a gà ɓəza gà Yahuda. Taŋa ka dimis sìmir. A riŋ tàa wetse i wakita ana ta zalar Zashar, kamala magweɗe ya, wakita mege ndzer. 19 Isərayel gà ŋgwal gà sliwdze yak ka,

Tàa bats tar ika gà diyis yak.

Hey meme na gà slagama gà mburma ka,

Ta bats tar i Isərayel a ya! 20 Ka ɗum dərraha a gà mburma ana i Gad a tsa.

Ka ti tsikum i gà təv gà metifike ana i Askalun a tsa. Aɗaba gà dəm gà Filistiya ti ta ŋgeye a ba.

Aɗaba gà dəm gà mburma ana gà masasaŋa tsiye ka, ti ta ndebeye a mbulum nda maŋgayaba. 21 A kurum gà kwite ana i Gilbuwa,

Mərah, a ta tsilewa i gà kwite kurum tsa.

Yam a ta dze a ika ahəɗ kurum tsa.

Ku mege gà guvah kurum tekeɗe, a te gewa duwa tsa

Aɗaba i fata na gà slakwa gà ɓəzla slagama tə dzə̀ dər aba ya, ta məsak dər a.

Slakwa Sawul ka, ti ta behe a ahər a mal diydiy asa tsa. 22 Sìmir Yunatan ka, a mawà a bəɗ tsa.

Na ika miɗ gà ɓəzla mene are ŋgar a.

Aka ndzə a tar ka, məmbəz a ŋgizere a iɗəm a.

Ku mege ika miɗ gà bàba gà ɓəzla slagama ana i guvəl a.

Masalama Sawul ka, a mawà fələ̀màh ɓav tsa asa. 23 Gà Sawul nda Yunatan ka, tàa gəs masla,

Ta waya ba,

Tàa mə̀ba ikaba ya tsa, na i huɗ mandza aà bəra tar a.

Haa tsikw aà məməta tar.

Tsəma tsəmma tar ka, a za dər biy gà zləra.

Dite ndzəɗa tar tekeɗe a za dər biy gà azil mbaŋa. 24 Gà dəm gà Isərayel, tuwùm Sawul,

Ŋgat na a dzawa kurum gà ŋgwal gà petek ana.

Nda gà dukw maslawa ikə̀ka nda gura ya. 25 Hey! meme na gà mburma ana gà slagama ŋa ya ka, ta bats tar i guvəl a!

Meme na ta kəɗ Yunatan ka, ika gər kwite Gilbuwa ya! 26 Iye a riŋ i mesewere are, agəra kər Yunatan damər gà,

Masla gà, ana i waya kər hinne ya.

Meweye ana ka waya iye ya ka, ŋgwal ŋa hinne,

A za dər mawaya gà məkəs ana i gà ya. 27 Hey! meme na gà mburma ana gà slagama ŋa ya ka, ta bats tar i guvəl a.

Dite meme na gà dukw maslawa guvəl ti dzeye ya.