1 Samiyel
Gà Eli nda Samiyel
1
1 Akahər ŋa ata, wele duwa ɗa, zləm ŋgar Alkana kəla Yeruham, kəla Elihu, kəla Tuhu, kəla Tsuf, gà gwala gà Efərayim. A ndzawa ka, i kwite Rama ika ahəɗ ana ika gər kwite Efərayim. 2 Alkana ka, gà məkəs ihər sula, gà Hana, nda Penina. Penina ka, gà ɓəza ŋgar riŋ, ama Hana ka, kəla ŋgar riŋ tsa. 3 Kəla aà mive ka, wele ata a dawa i Rama ya a Silu, aà mandza gurmits a bəɗ à BATSAH kwa ŋa Mbulum ana ndzəɗa ŋa, ika gər gà duwa tserdze ya, dite aà madzàr gà dukw taf matawala fəla. Gà Hufni nda Finiyas ka, gà ɓəza Eli, tar gà ɓəzla məbatsa duwa a BATSAH kwa ŋa na i fata ya. 4 Pat ana Alkana aka vəl dukw taf matawala fəla ya ka, a dzawa a gà Penina nda gà ɓəza ŋgar bəŋa biy tar. 5 Ama bəŋa biy Hana, a vəlawar ka, medzige sula, aɗaba ana a waya ŋgat hinne ya, ku mege BATSAH kwa ŋa aka ne dər ìdil tekeɗe ya. 6 Kwasa ŋgar Penina a tə̀rfə̀ɗawar gəzləŋ, a sawlawa aà ŋgat hinne, agəra ana BATSAH kwa ŋa a ne dər ìdil a 7 Kəla aà mive ka, a gewa kataya hiywe, zləməŋa na Hana aka da a ga mahàmà a BATSAH kwa ŋa ya ka, Penina a yahawa ahər ahəm, aà matərfəɗar gəzləŋ hiywe, Hana a dzawa ba aà tuwa, a zəmawà ɗaf tsa. 8 Alkana a gwaɗar: « Hana aàla na ki tiwe a dite ki zime a ɗaf tsiye? Aàla na ki kwilebe a gəzləŋ nda matsəɓatsəɓ dziye? Wànà iye dzena i za dər gà ɓəza yak ana gà asləka ŋa, ki we a kurwa zləmana ya tsiye? . »Meheme Hana
9 I dəba ana tə zəm ɗaf, tə sa aba dukw mese i Silu a ka, Hana a hitse aà mbulum. Eli mala məbatsa duwa a Mbulum riŋ mandza ŋa ika təv mendze ŋgar bise nda təv metsile ana aà biye hərmaga mada a ga BATSAH kwa ŋa ya. 10 Matsəɓatsəɓ i gəzləŋ Hana hinne, a ndzəba aà mahàmà a BATSAH kwa ŋa nda gà tuwe a ndəraɓəɓɓa hinne. 11 Hana a tsik duwa i sida ya, a gwa: « BATSAH kwa ŋa Mbulum ana ndzəɗa ŋa, ika gər gà duwa tserdze ya, nà mege ki waye a ka, samata mesewere are ɓele yak a te, dara zlak iye te, kà məsak à ɓele yak tsa. Na kàa viliŋ kəla asləka ŋa ka, na kàa viliŋ kəla ata asləka ŋa ya ka, i vile a a BATSAH kwa ŋa a gewere a megemir i mandza bəra ŋgar a fit, dite ti zezewer a gər tsa . » 12 Aka ndza aà maheme ŋgar ata zàkwayiya ika miɗ BATSAH kwa ŋa, Eli riŋ a fir a aà tipis ŋgar ana a ɓə̀zle a dər a. 13 Hana riŋ a fefile a ka, i huɗ gəzləŋ ŋgar, tipis ŋgar ɗekɗek na a ɓezle ya pəra, tsəka wura aka tsaraka biye ɗa mifefile ŋgar tsa. Eli a zlaŋa ka, məkəs aaha ka, makwayà ŋa. 14 Eli a gwaɗar: « məkəs aaha, haa ndeɗime na ki ndze a i mekweye ya? Mə̀sak aà masa guzum . » 15 Hana a gwaɗar aaka: « Awaŋ batsah gà ŋa, Yàa sa guzum tsa, ku mege dukw mese makwàsa ŋana tekeɗe ya, i pàt ka, à dukw ana i gəzləŋ gà ya aka miɗ BATSAH kwa ŋa. 16 Ka ta pər aà ɓele yak kamala məkəs ana metsehe ŋgar riŋ tsiye tsa, aɗaba gà dukw ana i madzala gà gər gà ya ka, a beha dite iye i mesewere are, agəra taŋa na i hama aà BATSAH kwa ŋa zàkwayya ya . » 17 Eli a gwaɗar aaka: « Da nda zay, Mbulum gà Isərayel mə vəlak dukw ana ka wiz ahər a . » 18 Hana a gwaɗar aaka: « Ɓele yak maŋgat mendze are tsehe i təv are yak a . » Məkəs ata a da aba, a tə zəm ɗaf, gəzləŋ ŋgar ndzə̀ɗakka, matsəɓatsəɓ ŋgar riŋ asa tsa. 19 Ndidwe ŋana i mekwede hedwe, i təv ana tə ndəv aba à mandza gurmits a bəɗ a BATSAH kwa ŋa ya ka, ta mbəɗ gər a ma, a Rama. 20 Aka mandəvandəv mive ŋa ata ka, Hana a ŋgat kəla, a wa kəla ata ka, asləka ŋa, a ɗer Samiyel. Aɗaba a gwa, i wiz ka, aà BATSAH kwa ŋa.
Hana a vəl Samiyel à BATSAH kwa ŋa
21 Gà Alkana nda gà ma ŋgar, tə da aà mandza gà dukw taf matawala fəla ana kəla mive ya, nda dukw taf ana a tsik nda madzala gà gər ŋgar a gwa i vile a BATSAH kwa ŋa ya. 22 Ama Hana ka, aka da tsa. Aɗaba a gwaɗa a zal ŋgar ka: « Aka təv ana kəla aaha aka məsak à awah a ka, i de a dər i ta pete a dər a BATSAH kwa ŋa a ndze a riŋ i fata aà biybiy . » 23 Alkana zal ŋgar a gwaɗar aaka: « Ge dukw ana a tsahən aà kər a, vava məmə̀sak à awah dzekwiŋ, gà gər a gwa BATSAH kwa ŋa maràh à bazlam ŋgar ana a tsik a . » Hana a ndza, a gə̀l kəla ŋgar haa a təv ana a miyak à masa awah a. 24 Akahər ana a gəs aà awah a ka, tə da akaba nda gà ŋgat. A gasa dər gà mbuluv sla gà sla makər aà ahər, gufa məpani kurwa, kiwa kwiye guzum ilik. Tə da aà gà dukw ata a ga mahama a BATSAH kwa ŋa a Silu. kəla ata a ne mala meslire. 25 Ti zleyer ɗa a gà mbuluv sla gà sla ata, dite tə da à kəla aaha a təv Eli. 26 Hana a gwaɗa Eli: « Kamkam batsah gà ŋa, nda ndzer ka, kər riŋ nda mesife batsah gà ŋa, iye ka, məkəs ata a hama a BATSAH kwa ŋa ɗa i faha ika miɗ yak a. 27 I hama ka, agəra kəla aaha, dite araha BATSAH kwa ŋa aka viliŋ dukw ana i wiz ahər a. 28 Iye tekeɗe ka, i vile a a kəla aaha a BATSAH kwa ŋa i huɗ mandza bəra ŋgar a fit. Ta vəl kəla ata a BATSAH kwa ŋa, tə dza gurmits a bəɗ a BATSAH kwa ŋa.