Hana a zambaɗa a BATSAH kwa ŋa nda dimis
2
1 Hana a hama a gwa:« Maŋgayaba i gəzləŋ gà agəra BATSAH kwa ŋa.
Ŋgat na a səkah à iye ya.
I sle a aà mesewle a aà gà ɓəzla mene are gà.
I ŋgeye a ka, agəra ana aka dara aka zlak iye ya, aka pə̀siŋ ahəm a.
2 Wura riŋ tsəɗaŋŋa kamala BATSAH kwa ŋa ya tsa
Mbulum ŋgiɗ riŋ na kamala kər a tsa.
Na a ne batsah gurum gà ka, BATSAH kwa ŋa. Mbulum ŋgiɗ riŋ tsa na kamala ŋgat a.
3 Bazlam ma ta beyera a kurum a tsa.
Gà bazlam magə̀la à gər ma tə dara ika arah kurum a tsa.
Aɗaba BATSAH kwa ŋa Mbulum ka, a sər duwa tserdze , ŋgat na a gewa seriye agəra gà dukw ana gà mburma ta geyewa ya fit.
4 Lèkiɗ gà ɓəzla ndzəɗa aka haɓa ikaba ya .
Gà mburma ana gà màgàhà bəɗ ŋa ya ka, tàa ŋgat a ya ndzəɗa.
5 Gà mburma ana ndeɗiŋe may a gewa a tar tsiye ka, may a ge ter a kuɗa.
Gà na may a gewa a tar a ka, may a ge a ter a asa tsa.
Ku mege məkəs ana ìdil ŋa ya tekeɗe a we a sik təsə̀la kuɗa.
Ama məkəs ana a we a ya ka, a we a asa tsa.
6 BATSAH kwa ŋa a dzeye a à mburma, dite a mbile a dər asa.
A ter a dər a təv mendze gà məməta, dite a mbilere a iɗəm a ŋgat a asa.
7 BATSAH kwa ŋa a ge a matawak à mburma, a ge a dər Əbay asa.
A nìkìɗe a dər, a sikehe dər asa mbaŋa.
8 A hitse a à gà ɓəzla matawak ika bitekwe ya.
Dite a ndzikere a gà ɓəzla mesewere are ika daraɓa ya,
Ti ndzikebe a a təv ilik ŋa nda gà bàba ŋana.
A vile a ter a təv mendzè mezlibe ika magər gà ŋgwal gà mburma.
Gər ahəɗ fit ihər BATSAH kwa ŋa.
Ŋgat na a ndwaŋ a.
9 A kèsle a gà na tàa gəs aà ŋgat ahəm a.
Ama gà ɓəzla bakal ka, ti dzeye a a lùvùŋ.
Aɗaba mburma a mbile a ka, nda ndzəɗa ba ŋgar tsa.
10 Gà ɓəzla mene are BATSAH kwa ŋa ti ta dzedzeriŋa.
A leke terre daga i mbulum i gər ŋa ya.
BATSAH kwa ŋa a ge a seriye a gà mburma ana ika gər ahəɗ fit tserdze.
A vile a ndzəɗa a Əbay ŋgar ana a kwere a gà mayahaba gər gà mburma ŋgar a
A sikehere a à mekwere a Əbay ana ŋgat a zla ya. »
11 I dəba ŋa ya ka, Alkana a mbəɗ gər a ma à Rama, ama kəla ŋgar Samiyel ka, a ndza riŋ i fata aà meger megemir a BATSAH kwa ŋa ika miɗ Eli mala məbatsa duwa a Mbulum.
Gà ɓəza Eli
12 Gà ɓəza Eli ka, madzala gà gər tar a riŋ tsa, tə sər BATSAH kwa ŋa tsa. 13 Araha meme na gà ɓəzla məbatsa dukw ata a Mbulum ta gewa aà gà mayahaba gər gà mburma ya: I təv ana wura a vile a dukw taf matawala fəla ŋgar a ka, mala sik, mala məbatsa duwa a Mbulum, a dehe a akahər ana tàa dzəba aà mede slu ya, nda gà dzə̀rakkidzə̀rak ana zlir makər a ihər ŋgar. 14 A dzekeye a à gà masigire pampam, zləməŋa slu ana dzə̀rakkidzə̀rak aka zlara iɗəm a ka, mala məbatsa duwa a Mbulum a zlebe a a ba ŋgar. Kamala taŋa ya na ta gewe a aà gà Isərayel ana tə dawaha a Silu a. 15 Asa ka, ələk ŋana tə̀ dùle a təv məŋgəl a ka, mala sik mala məbatsa duwa a Mbulum a dehe a a gweɗe a a wele ana a vile a dukw taf matawala fəla ata ya: « Sasarra slu bəŋa biy mala məbatsa duwa a Mbulum a, a ndèziŋa, tsəka a sasar mede ŋana tsa . » A waya ka, slu ndere ŋana. 16 Na wele ata aka gwaɗar aaka: « Ta wulazl gà təv məŋgəl dzekwiŋ, na dite ki sesebe a gà təv ana a dàk a gər a . » Mala sik mala məbatsa dukw a Mbulum ata a gweɗere aakiŋa: « Awaŋ! Say kinehe na ki sesìŋ a ya, tsəka i kizele a nda ndzəɗa . » 17 Bakal gà ɓəza Eli ata ka, aka baha hinne na ika miɗ BATSAH kwa ŋa ya. Aɗaba ti newa à dukw ana ta vəlawa a BATSAH kwa ŋa ya ka, dukw taf mə̀faraŋa .
Samiyel i kwite Silu
18 Samiyel riŋ a gewe megemir a BATSAH kwa ŋa. Ika kəla ata ka, petek ana ta ŋgar nda slewize liŋª a. 19 Kəla a mive ana gà Hana nda zal ŋgar tə dawa a mandza gà dukw taf matawala fəla ana kəla mive ya ka, mama ŋgar, a ŋgarawar dəraha kəla geeri. 20 Eli a pìse ahəm a gà Alkana nda məkəs ŋgar. A gwa: « gà gər a gwa ka, BATSAH kwa ŋa ma dza kurum gà ɓəza avukw kəla aaha a vəl a BATSAH kwa ŋa ya. . » I dəba ŋa ya ta mbəɗ gər a ma tar. 21 BATSAH kwa ŋa a pàt à ŋgwal ŋgar a Hana, a ŋgat kəla, a wa gà ɓəza, gà asləka ŋa makər, gà dəm ŋa sula. Samiyel a gəl ba ka, ika miɗ BATSAH kwa ŋa.
Gà Eli nda gà ɓəza ŋgar
22 Eli aka ge mandawal kwetefkwetef a tsaraka gà dukw ana gà ɓəza ŋgar ta gewa à gà Isərayel a, dite asa ka, ta hənayawa nda gà məkəs ana tə dawaha a mayahaba gər, aka biye hərmaga mekiriwe ga petek maləma gà mburma nda Mbulum a. 23 Eli a gwaɗa a tar: « Aàmala na kə gàwum gà dukw ata ya? Aɗaba i tsarakawà aà gà mayahaba gər gà mburma ya, na gà dukw ana kə gàwum ŋgwal ŋa tsiye. 24 Awaŋ! gà ɓəza gà, dukw ana i tsarakawa ya ka, ŋgwal ŋa tsa. Ki benwim a gà mayahaba gər gà mburma BATSAH kwa ŋa a bakal. 25 Na wura aka ge bakal a mburma ka, Mbulum a gere a seriye, ama na a ge bakal ata ka, aka gər BATSAH kwa ŋa na, weke na a zlek a ŋgat dziye? » Akaba nda taŋa fit ka, tàa tsaraka dukw ana dede tar a tsik a tar a tsa, aɗaba BATSAH kwa ŋa a waya aà medzeye à tar. 26 Kəla gawla ata zləm ŋa Samiyel riŋ a sikehe a aà gìl a ba ya ka, a da a gər a gà BATSAH kwa ŋa nda gà mayahaba gər gà mburma fit tserdze mbaŋa. 27 Pat ŋgiɗ duwa ka, mala məmà à bazlam Mbulum duwa a dara a təv Eli ya a gwaɗar: « Araha dukw ana BATSAH kwa ŋa a tsik a . » « Akahər na gà bàba tsir yak i ɓele i bəra Əbay Firawna ika ahəɗ Eziptª ana wànà Yàa pata tar aba tsiye? 28 A zla ŋgat ka, i gwala gà Isərayel a fit, a mene mala megiŋ megemir gà, i ga gà. A matsəla aka təv medwilwiŋ aaka makərɗa dizl ana a ze hwaŋŋa ya, aà metike akaba geeri ika miɗ gà. Dite Yàa dza a huɗ ga dede yak, gà dukw taf matawala fəla ana gà Isərayel tə dzawa tə dulawaha fit kweleŋ. 29 Aàmala na ka ɓàlàwum aka gà dukw matawala fəla gà nda dukw taf gà ana i vəl ahər vatwa ta vilewiŋ i ga gà ya, ka zləbawa à a gà ɓəza yak bagwal ŋa ika iye ya? Aɗaba kə galawum dər ba nda gà ŋgwal gà dukw taf gà Isərayel gà mayahaba gər gà mburma gà. 30 Aɗaba taŋa, araha na dukw ana, BATSAH kwa ŋa Mbulum gà Isərayel a gwa ya, haya Yàa mbər metsike: « Gà gwala yak, nda gà mburma ana i ga i bəra dede yak a, ti ne a gà ɓəzla megemir ga aà biybiy. Ama kinehe ka, BATSAH kwa ŋa a gwa, a ge a ba diydiy asa tsa, aɗaba i zlìbe a aà wele ana à zlìbe à iye ya. Ama gà na ti tike iye aà ahər tsiye ka, i tike tar aà ahər tsa mbaŋa. 31 Araha pat ŋa aka a mendze aɗəm na i betse a gà ɓəza yak nda gà mburma ana i ga i bəra dede yak a. Wura a ta gewe a mandawal i gwala yak asa tsa. 32 Ki ta ŋgete a mala guvəl yak i ga gà. Gà dukw tserdze ta ge a ba lele nda gà Isərayel ama wura a ta gewe a mandawal i gwala yak asa tsa. 33 Ama kəla ka, i ti zeha à wura ilik i gwala yak a, a təv madùlaka duwa. Ŋgat ata ka, a geha a bəɗ aà are yak a vilek a, matsəɓatsəɓ a gəzləŋ mbaŋa. Zləməŋa gà mburma ana i gwala yak a, ta metewe a ka, nda gà awah i hìter. 34 Ki ŋget a dukuməŋa a pete a aba ndzer ka, nda təv gà ɓəza yak ata sula, gà Hufni nda Finiyas, ta mete a pat ŋa ilik a. 35 I dəba ŋa ya ka, i zle a mala mebetsiŋ dukw ana ndzer a, a gewiŋa ka, dukw ana gəzləŋ gà a waya, i dzala i gər gà ya. A we a gà ɓəza, ti ta ne a gà ɓəzla mebetsewiŋ gà duwa. Ti ndze a i təv ilik ŋa nda Əbay ana i ti zle a mba ya. 36 Na wura aka zeha ilik i gwala yak ka, a dere a a dzewere gurmits a bəɗ aka miɗ ŋgar na, aà maŋgata gà anini nda makwùla maɗavə̀l kwizikw a. Dite a gweɗeweriŋ a: « Viliŋ megemir məbatsa duwa a Mbulum i zleke a ahər a kər, i zemewe a iɗəm ɗaf a te . »