BATSAH kwa ŋa a zal a Samiyel a
3
1 Kəla gawla ata zləm ŋa Samiyel a, riŋ a zlek a Eli aà megemir a BATSAH kwa ŋa. Akahər ŋa ata ka, BATSAH kwa ŋa a fafəlawa à gà mburma ɗə̀kɗə̀k tsa. Dite sunwa tekeɗe a dawa aka gà mburma ɗə̀kɗə̀k tsa mbaŋa. 2 A pat ŋgiɗ duwa, Eli riŋ mahəna ŋa ika slə̀làh ŋgar, akahər ŋa ata ka, are ŋgar aka gehabə̀ɗ, a ŋgata a vatwa lele asa tsa. 3 Tàa mbete aà akwa i lalàmpa, i ga ata tsəɗaŋŋa ya zukw tsa. Samiyel tekeɗe riŋ mahə̀na ŋa i ga BATSAH kwa ŋa i təv ana sahər Mbulum iɗəm a. 4 BATSAH kwa ŋa a zal a Samiyel, a ŋgama: « Walaw, iye naha . » 5 Samiyel a hitse a val a təv Eli a gwaɗar: « Iye naha, kàa zeliŋ a? . » Eli a gwaɗar: « Yàa zalak tsa mbəɗ gər aka mehinne ba . » Samiyel a mbəɗ gər aka mehinne . » 6 BATSAH kwa ŋa a zal a Samiyel asa, Samiyel a hitse a mbəɗ gər a təv Eli a gwaɗar: « Iye naha, kàa zeliŋ a! . » Eli a gwaɗar: « Yàa zalak tsa, kəla gà mbəɗ gər, aka mehinne . » 7 Akahər ŋa ata ka, Samiyel aka sər BATSAH kwa ŋa zukw tsa, dite BATSAH kwa ŋa tekeɗe aka fafəlar ilik zukw tsa asa mbaŋa. 8 BATSAH kwa ŋa a zal a Samiyel məmàkə̀r ŋa, Samiyel a hitse, a da a təv Eli a gwaɗar: « Iye naha, kàa zeliŋ a? » Eli a sər aba kuɗa ka, BATSAH kwa ŋa na a zalawa a kəla ata ya. 9 Eli a gwaɗa a gwaɗa a Samiyel: « Da, mbəɗ gər aka mehinne ba, na tàa zalak ka, ki gweɗere ŋa: « fafəl BATSAH kwa ŋa, ɓele yak riŋ a tserekiŋ a . » Samiyel a mbəɗ gər aka slə̀làh ŋgar ata ndeɗiŋ a ya . » 10 BATSAH kwa ŋa a dara a hitse bise nda ŋgat, a zalar kamala ana a zalawar a: « Samiyel! Samiyel! . » Samiyel a ŋgamar a gwa: « Fafəl ɓele yak riŋ a tserekiŋ a . » 11 Tsam ka, BATSAH kwa ŋa a gwaɗa a Samiyel: « Araha i ge a duwa i Isərayel, Zləməŋa wele ana aka tsaràka ya ka, a ge a màndàkàzləm . » 12 A pat ŋa ata ka, i te rehe a aà gà bazlam gà ana i tsik aka gər ga Eli ya. Duwa ilik a mitse a tsa. 13 Yàa mbər magwaɗar i sida ya ka, i te ge a seriye aka gər ga ŋgar aà biybiy, agəra bakal ana ŋgat ŋa a sər nda gər ŋgar a, gà ɓəza ŋgar ti newa à dukw ana ta vəlawa a BATSAH kwa ŋa ya ka, dukw taf mə̀faraŋa. Dite aka pala tar ahəm ɓav tsa. 14 Aɗaba taŋa, i mbaɗa aka gər ga Eli, duwa riŋ na a sle a a membete a aà bakal gà mburma Eli ya tsa. Ku mege nda məvəla dukw taf matawala fəla, kige tsa məvəla dukw taf a BATSAH kwa ŋa tekeɗe ya . » 15 Samiyel a riŋ mahəna ŋa hiywe haa mekwede. I dəba ŋa ya, a həndak i biye hərmagà ga BATSAH kwa ŋa ya, magəɗa a ge a Samiyel hinne aà maɗama sunwa ŋgar ata à Eli. 16 Ama Eli a zala a Samiyel a gwaɗar: « Samiyel kəla ga. » Samiyel a ŋgamar: « Iye naha batsah gà ŋa, . » 17 Eli a wiz ahər: « Dukula na BATSAH kwa ŋa a tsikik dziye? Kamkam tsikiŋ ka həmbər aà iye duwa ilik tsidze. Na kàa həmbər aà iye gà bazlam ana BATSAH kwa ŋa a tsikik a ka, gà gər a gwa me gik a seriye mawùra ba ŋa ana hinne ya . » 18 Tsam ka, Samiyel a ɗamar gà bazlam ata fit, aka həmbər ahər duwa ilik tsa. Dite Eli a gwa: « Ŋgat ka BATSAH kwa ŋa, mege dukw ana a dzala i gər ŋgar a . » 19 Samiyel aka ge gawla, BATSAH kwa ŋa riŋ mandza ŋa nda ŋgat. Zləməŋa gà bazlam ana Samiyel a aka tsik a ka, BATSAH kwa ŋa a tsarakawar dər fit. 20 Kərga taŋa ya na gà Isərayel fit tserdze, daga ara i Dan a tsikw a Bər-seva tə sər fit, Samiyel ka, aka ne mala məma aà guma BATSAH kwa ŋa. 21 BATSAH kwa ŋa a patawa aba i Silu hiywe. BATSAH kwa ŋa a patawa aba a Samiyel i Silu, a tsikawar gà bazlam ŋgar.