1 Samiyel 4

Gà Filistiya tə zla sahər BATSAH kwa ŋa

1 Samiyel a fafəl a gà Isərayel fit tserdze. Gà Isərayel tə da aà mege guvəl nda gà Filistiya ya, ta ge təv mandzəba tar bise nda Eben-Ezer, gà Filistiya tekeɗe ta ge biy tar i Afek. 2 Gà Filistiya tə ndər ba ser aka gà Isərayel aà mege guvəl. Guvəl ata ka, akwa ihər hinne, gà Filistiya, ta mba aà gà Isərayel, ta bats gà mburma dəbuw faɗ (4 000) aà miɗ guvəl a. 3 Gà sliwdze ana tə zeha ya, ta mara a təv mandzəba tar a, dite gà bàba ŋana i Isərayel a ta gwaɗa aba: « Aàla na BATSAH kwa ŋa a mə̀sak a kwa ahər a gà Filistiya ti slekwe za hinne ya? Takwa a Silu tə zlakwara sahər magəsa masla BATSAH kwa ŋa ya, mege ɗa ika magər kwa, dite mibeye aà kwa ihər gà ɓəzla mene are kwa ya . » 4 Gà sliwdze tə slər gà mburma a Silu aà mazlara sahər magəsa masla BATSAH kwa ŋa, Mbulum ana ŋgat ndzəɗa ŋa ika gər gà duwa tserdze ya, mandzaŋa ika magər gà sereben^ª. Gà ɓəza Eli ata sula gà Hufni nda Finiyas a, tar riŋ ti zezeme a sahər magəsa masla BATSAH kwa ŋa ata. 5 I təv ana ti ndzeha a sahər BATSAH kwa ŋa ata a təv mandzəba tar a ka, gà Isərayel fit tə dzəba aà Mewideye maŋgayaba nda magala hinne, ahəɗ a ɓazla aka ba wakitwakit. 6 Gà Filistiya tə tsaraka Mewideye maŋgayaba tar ata hinne ya ka, ta gwa: « Taŋa dzena mawìdeye dukw əla na aɗer a dwàhumdwàhum hinne i təv mandzəba gà Ibəranikwa ya? » Tə sər kuɗa ka, sahər BATSAH kwa ŋa aka ndze a təv mandzəba gà Isərayel. 7 Gà Filistiya ta ge magəɗa hinne ta gwa: « Mbulum aka dara a təv mandzəba tar a. Waya ba kwa ya, aɗaba duwa a ge a ba kamala ana piŋŋa ya asa tsa. 8 Waya ba kwa ya, weke na a te a beye a kwa ihər gà mbulum aaha gà ndzəɗa ŋa ya? Gà mbulum ŋa ka, gà taŋa na ti sle ɗa za a gà Ezipt nda məvəla a tar gà mesewere are pampam hinne i dala i kusak a. 9 Kwa gà Filistiya ka, mə̀rakwa a ba, dite hitse kwa asləka asləka, tsəka, ka tə nekwa gà ɓele gà Ibəranikwa kamala ana, ti ne gà ɓele kwa ya tsa. Hitsekwa asləka asləka aà mege guvəl . » 10 Gà Filistiya tə dzəba a mege guvəl ka, ta mba aà gà Isərayel, ku mege weke a val aba a ma à mekiriwe ga petek ŋgar. Guvəl ata ka, akwa ihər hinne, ta bats gà sliwdze gà Isərayel ana nda sik a, dəbuw dzik makər (30 000) . 11 Tə zla sahər BATSAH kwa ŋa. Dite gà ɓəza Eli ata sula gà Hufni nda Finiyas a ka, tàa bats tar.

Məməta gà Eli nda məkəs kəla ŋgar

12 A pat ŋa ata, wele duwa i gwala gà Bendzamen a valara ika miɗ guvəl a, a da a Silu, gà petek ŋgar makwayaɗa ŋa dite ahəɗ mbùlùhmbùlùh i gər. 13 I təv ana a ndzeha ya ka, Eli riŋ mandza ŋa aà guva vatwa ika təv mendze ŋgar tsavàvva, a veve a labara sahər BATSAH kwa ŋa. Wele ata a ndzehà a huɗ kwite ka, a mà tar a labara ŋa. Gà mburma ana i huɗ kwite ya, tə dzəba a tuwa ɓùhh. 14 Eli a tsaraka, mawìdeye dukw ata ka, a gwa: « Taŋa dzena Mewideye Dukula? » Dite wele ata a mbàha aba tsəmma, a tsik labara ata a Eli. 15 Tsaatsa ka, Eli ka mandawal ŋa mive ŋgar, dzik tswiɗ gəra tsamakər (98) a fire a ka, ndasləslsla, a ŋgata a vatwa tsa. 16 Wele ata a gwaɗa Eli, « Iye na i dara i guvəl a, i bera ika miɗ guvəl a ka, mbakum ŋa aaha . » Eli a wiz ahər: « Kəla gà, Dukula na a ge riŋ ba ya?» 17 Mala məma à ata a gwaɗar aaka: « Gà Isərayel tàa təz ika miɗ gà Filistiya ya, ahər aka dəɗ aka gà mayahaba gər gà mburma. Ku mege gà ɓəza yak ata sula gà Hufni nda Finiyas a ibam ka, tàa mata, dite sahər BATSAH kwa ŋa tekeɗe tàa zla asa mbaŋa . » 18 Ələk ana Eli a tsaraka maɗə̀va zləm sahər Mbulum ata ya ka, tàzl a dəɗ ika təv mendze ŋgar ana bise nda biye hərmaga mada a huɗ kwite ya, a lak a matakwar, a mət aɗəm. Aɗaba ana ŋgat ka, dagwalum ŋa dite mandawal ŋa asa ya. Aka kwarà gà Isərayel ka, mive dzik faɗ (40). 19 Daala kəla ŋgar, məkəs Finiyas ka, huɗ i gər, dite ka ndze a kiye ŋgar. I təv ana tsaraka labara ata, tàa zla sahər Mbulum a, nda məməta dzìdze ŋgar dite nda biy zal ŋgar a ka, a ndza a bəɗ, pakw a wa kəla. Aɗaba mewere mawà kəla a dzahərba tsara. 20 A ɓə̀rasl aɗəm, gà məkəs ana i təv ŋgar a, ta gwaɗar: « Magəɗa ma gək tsa, ka wa ka, asləka ŋa . » Ama aka fafəl a tar tsa. Aka dzar zləm ɓav tsa asa mbaŋa. 21 A ɗe zləm a kəla ata, Ikabut, kamala megweɗe ya, mezlibe Mbulum aka da i təv gà Isərayel a. Nda megweɗe ka: « Mezlibe aka da i təv gà Isərayel a . » Aɗaba ana tə zla sahər Mbulum, məməta dzìdze ŋgar dite nda biy zal ŋgar a. 22 Kamala taŋa ya na məkəs ata a gwa ya: « Mezlibe Mbulum aka da i təv gà Isərayel a, aɗaba ana tàa zla sahər Mbulum a . »