1 Samiyel 5

Sahər Mbulum ika ahəɗ Filistiya

1 Gà Filistiya tàa zla sahər Mbulum i Eben-Ezer a, tə da dər a Asdud kwite tar. 2 Gà Filistiya tə zla Sahər Mbulum ata ka, tə da metike a ga Dagwaŋ mbulum tar. Ti tikaha à tsaka Dagwaŋ. 3 Ndedwè ŋana i mèkwède hedwe ka, gà mburma ana i Asdud a ta piɗeke, tə daha ta pər ka, dùbùzzwa Dagwaŋ aka dəɗ a bəɗ a mbulum a aka miɗ sàhər BATSAH kwa ŋa. Dzeŋ ta hitse dər aà mbulum a təv mendze ŋgar ata dukw ŋgar. 4 Ndidwe ŋana i mèkwède hedwe asa ka, tə daha ta pər ka, dùbùzzwa Dagwaŋ aka dəɗ a bəɗ a mbulum a aka miɗ sàhər BATSAH kwa ŋa. Gà gər ŋgar nda gà ahər ŋgar masasaya ŋa ikəka ya. Mandza ŋa ika makətaz biye hərmaga ga. Ba ŋana ɗekɗek na a zeha ya. 5 Aɗaba taŋa, gà ɓəzla məbatsa duwa a mbulum Dagwaŋ nda gà mburma ana tə dawa a ga dàgwaŋ i Asdud a, ta ɓəlawa aka makətaz hərmaga ga Dagwaŋ ata tsa haa mbakum. 6 BATSAH kwa ŋa a zla ahər ŋgar a mbulum aka gà mburma ana i Asdud a. A zla aka tarəra mesewere are hinne aka magər tar a, nda gà meslesle duwa aka ahəɗ tar a fit tserdze. 7 I təv ana gà mburma Asdud ta ŋgata a dukw ata a ge ba kamala taŋa ya ka, ta gwa: « Sahər Mbulum gà Isərayel mandza ɗa i ma kwa asa tsa. Aɗaba aka zla ahər ŋgar a mbulum aka gər kwa dite a Dagun mbulum kwa . » 8 Tə zalaya a gà Əbay tar fit tserdze, tə yàhàba gər, a təv tar ta gwa: « Ki gikwe a na meme na aà sahər Mbulum gà Isərayel a? . » Gà Əbay tar ta gwa aaka: « Makwa à sahər mbulum gà Isərayel aaha a Gat . » Dite tə zla sahər Mbulum gà Isərayel. 9 Ama i dəba ana ta zla sahər ata ya ka, BATSAH kwa ŋa a zla ahər a mbulum aka gər huɗ kwite ata. A dza a tar magəɗa hinne, a zla aka tarəra dukw məməta meslsle duwa ya, a gəs aà gà ɓəza ndirkiz a ndisl aà gà bàba ŋana. 10 I fata ya ka, tə zla sahər Mbulum ata a Ekrun. Gà mburma ana i Ekrun a tə dza aka ba a tuwa nda Mewideye, ta gwa: « Tàa zlara sahər aà mə bats kwa, kwa nda gà mayahaba gər gà mburma kwa . » 11 Tə zala a gà Əbay ana ta kwere a gà Filistiya ya fit tserdze, ti yahaba gər a təv tar ta gwa: « Makwa a sahər Mbulum gà Isərayel aaha, à təv mendze ŋgar tsəka mà ta bats kwa tsa. Kwa nda gà mburma kwa ya . » Aɗaba gà mburma ana i huɗ kwite ya, tar riŋ i magəɗa, agər ana BATSAH kwa ŋa aka zla aka tar ahər a mbulum a. 12 Gà mburma ana tàa mata tsiye ka, meslesle dukw ata a dzàrà a tar a. Matuwa aba tar a ɗe ndisl a gəza mbulum.