Gà Filistiya ta mà à sahər Mbulum
6
1 Sahər BATSAH kwa ŋa ata a ndza i kwìte gà Filistiya ka, kiye təsəla 2 Gà Filistiya tə zal a gà ɓəzla məbatsa duwa a Mbulum nda gà mahə̀ram, ta gwaɗa a tar: « Ki gekwa dzena meme na à sahər BATSAH kwa ŋa aaha ya? Tsikwum a mə̀r dukw ana mìi ge a, biy məma dər à sahər aaha a təv mendze ŋgar a, . » 3 Ta gwaɗa a tar aaka: « Na ki mume a à sahər Mbulum gà Isərayel ka, ka ta mum dər kataya taf masakəŋa tsa, Ama ki dzume a gà dukw taf matawala fəla mepə̀là gər dukw bakal aà meendzwə̀l, tsam ka, ki mbilwimiŋa, dite ki sirwim a dər, agəra la na BATSAH kwa ŋa aka mà à ahər bəɗ ika kwa ya tsiye . » 4 Gà Filistiya ta gwa: « Dukw taf məpəla gər dukw bakal wara na, ki dzekwere ya? » Gà mburma ata ta gwaɗa tar aaka: « Mendzikiɗe ba gà meslesle gà dukw ata əzləm nda gura, dite mendzikiɗe ba gà kwahum əzləm nda gura mbaŋa asa, tìts aà gà Əbay ana i kwite Filistiya ya. Aɗaba gà meslesle gà dukw ata aka pat a ba kurum, dite aà gà Əbay kurum a. 5 Kinehe ka, vaɗum gà mendzikiɗe ba gà maslesleya gà dukw kurum ata, nda gà biy gà kwahum ata tə nəs à huɗ kwite kurum a, dite ka zlə̀bum à Mbulum gà Isərayel, biy tsa a me a aà ahər ŋgar a bəɗ ika kurum a, ika gà mbulum kurum a, dite ika huɗ kwite kurum a. 6 Aàmala na ki, tselwim aba a sègèmè gər kamala gà Firawna nda gà mburma Ezipt ana ti tsalaba à sègèmè a gər a? I təv ana Mbulum a pat a tar a ndzəɗa ŋgar ana, wànà tàa mə̀sak aà gà Isərayel tàa daba tsiye? 7 Kinehe ka, vəɗum muta piris awiya ŋa, dite gasum gà mawur gà sla ana tàa tike aka tar zukw ilik tsiye sula, danum aà tar muta piris ata, dite kà tùrzlum aà tar gà ɓəza tar ana ti zezeme a tar i dəba ya à dagara. 8 Ki zlìme a sahər BATSAH kwa ŋa ata ki tikwim a à muta piris. Gà dukw maslawa ata nda gura ya, ki dzwim a aà məpəla gər dukw bakal a ka, ki dzwim a a sahər, ki tikwimaha aà guva sahər, dite ki mesekwim a dər ti de a dər. 9 Ki tikwimerehe are, na aka zla vatwa ana a da aka ahəɗ kwite ŋgar nda Bet-Semes a, taŋa ka, BATSAH kwa ŋa na a vəl a kwa batsah mesewere are ata ya. Na aka zla vatwa ŋgiɗ pam, taŋa ka, BATSAH kwa ŋa tsa na a vəlakwa mesewere a kwa are ya. Taŋa ka, medzeye kwa pə̀ra na a le a kwa ya . » 10 Gà Filistiya ta ge kamala taŋa ya. Ta gasa gà mawur gà sla sula, tə dàn aà tar muta piris ata, ta handaka aà gà ɓəza tar a dagara. 11 Ti tike sahər BATSAH kwa ŋa ata a muta piris, dite ti tike ahəraha kəla sahər ata gà məvə̀ɗa gà mendzikiɗe ba gà kwahum nda mendzikiɗe ba gà meslesle ya gà dukw ata nda gura iɗəm a. 12 Gà mawur gà sla ata tə zla vatwa ana ser nda Bet-Semes a. Tə zazam vatwa ata hiywe nda gà tuwa. Tàa mbəɗ aba ndaka tseke ahər gula kige tsa ndaka tseke ahər mezime tsa. Gà Əbay gà Filistiya tə zàzàm tar i dəba ya, haa ndisl aka kwiye Bet-Semes. 13 Gà mburma ana i Bet-Semes a, tar riŋ ti sle a bleª i tulwah. Tə zla gər à mbulum, ta ŋgat a aaha sahər ata ka, ta ŋgaya ba. 14 Muta piris ata a ndze a guvah Yesuwa ana i Bet-Semes a ka, a hitse a fata. Batsah gurum duwa riŋ i fata. Ta ŋgwalaɗaya ikaba aà muta piris ata ya, dite tə dul gà mawur gà sla ata sula ya, biy dukw taf matawala fəla ana tə dulawaha a Mbulum fit kweleŋ a, a BATSAH kwa ŋa. 15 Gà gwala Levi tàa mbər medzikere iɗəm gà sahər BATSAH kwa ŋa ata ya nda gà kəla sahər ata gà məvə̀ɗa mendzikiɗe ba gà dukw ata ta vəɗ nda gura iɗəm a. Tə dza aka batsah gurum ata. A pat ŋa ata ka, gà mburma ana i Bet-Semes a tə dzaya gà dukw taf matawala fəla ana tə dulawaha a Mbulum fit kweleŋ a, nda gà asiŋ gà dukw taf matawala fəla ŋgiɗ pampam a BATSAH kwa ŋa. 16 I dəba ana gà Əbay gà Filistiya ata əzləm a, ta ŋgatar kamala taŋa ya ka, ta mbəɗ gər a Ekrun a pat ŋa ata. 17 Araha na mendzikiɗe ba meslesle gà dukw ata nda gura gà Filistiya ta dza a BATSAH kwa ŋa aà məpəla gər dukw bakal tar a. Ilik biy Asdud, ilik biy Gàza, ilik biy Askaluŋ, ilik biy Gat, dite ilik ŋa aaha biy Ekrun. 18 Gà mendzikiɗe ba gà kwahum ana nda gura ya, riŋ mbaŋa, tits aà gà huɗ gà kwite gà i Filistiya na gà Əbay tar ata əzləm ta kwere ya, ku mege malawaraŋa, ku mege malawaraŋa tsiye, ndisl a təv batsah gurum ata ti tike a aka sahər BATSAH kwa ŋa ata ya. Haa mbakum ka, gurum ata riŋ i guvah Yesuwa ana i Bet-Semes a hiywe. 19 BATSAH kwa ŋa a bats gà mburma ana i Bet-Semes a, aɗaba na tə dzàha are aà sahər BATSAH kwa ŋa ata ya. A bats gà mburma dzik təsəla (70) i huɗ gà mburma dəbuw dzik əzləm a (50 000). Gà mburma ata tə dza akaba tuwa aɗaba BATSAH kwa ŋa aka bats aà tar a hinne ya. 20 Gà mburma ata i Bet-Semes a ta gwa: « Weke na a sle a aà mehitse a aka miɗ BATSAH kwa ŋa, Mbulum aaha tsəɗaŋŋa ya? Ki zlekwe a sahər BATSAH kwa ŋa aaha ana a ŋga, na dite a de a à kwa ya . » 21 Tə zlər gà ɓəzla məmaya à labara a təv gà mburma ana i kwite Kiriyat-Yeyarim a, aà te ta gwaɗa a tar: « Gà Filistiya tàa mara a sahər BATSAH kwa ŋa ya. Dumakara dite ka zlum aaha a ma kurum . »