7
1 Gà mburma ana i Kiriyat-Yeyarim a tə dara tə zla sahər BATSAH kwa ŋa ata, Tə da dər a ga, a bəra Abinadab aka gər diyis. A tike ahər kəla ŋgar Eliyazar aà makasla sahər BATSAH kwa ŋa ata. 2 Aka ndza hinne, aka ge ka, mive dzik sela (20), na i dəba ana tə da à sahər ata a kwite Kiriyat-Yeyarim a. I fata ya ka, gà Isərayel ta waya məmbə̀ɗ gər aà mazazama BATSAH kwa ŋa. 3 Tsam ka, Samiyel a gwaɗa a gà Isərayel a fit tserdze: « Na ndzer nda gəzləŋ kurum ilik, na ki mwimere a a təv BATSAH kwa ŋa ya ka, batsum gà mbulum gà slele ana ika magər kurum a, dite ka məsakum aà mazambaɗa a mbulum Astarte. Dite ka mbəɗum a gəzləŋ kurum a təv BATSAH kwa ŋa, zambaɗum ka, aà ŋgat ilik pəra. Dite na a beye a kurum a, i hər gà Filistiya ya. 4 Gà Isərayel ta bats gà Baal nda Astarte dite tə zambaɗawa ka, à BATSAH kwa ŋa ilik a. 5 Samiyel a gwa: « Yahum gər a gà Isərayel fit a Mitspa, i heme a a BATSAH kwa ŋa agəra kurum a . » 6 Ti yahaba gər a Mitspa, tə tafa dər yam, ta dzaya dər aka miɗ BATSAH kwa ŋa. Ta ge ndəra a pat ŋa ata, i fata na ta gwa ka: « Kàa ge kwa bakal nda təv BATSAH kwa ŋa . » I Mitspa i fata na Samiyel a ne mala mege seriye a gà Isərayel a. 7 Gà Filistiya tə tsaraka gà Isərayel tàa yahaba gər a Mitspa ka, gà Əbay gà Filistiya tə dara aà mege a guvəl aà gà Isərayel a. Gà Isərayel tə tsaraka ka, magəɗa a ge a tar agəra gà Filistiya. 8 Gà Isərayel ta gwaɗa a Samiyel, ka ndza tiytiy tsa, hama a BATSAH kwa ŋa Mbulum kwa, aà me beye a à kwa ihər gà Filistiya ya. 9 Samiyel a zla kəla təmaŋ ana a se a awah mba ya, a vəl dukw taf ŋa biy matawala fəla ana tə dùlawa fit kweleŋ a BATSAH kwa ŋa. Dite a hama aaha a BATSAH kwa ŋa agəra gà Isərayel, BATSAH kwa ŋa a ŋgamar aaka. 10 Akahər ana Samiyel riŋ a vile a dukw taf ata tə dulawaha a Mbulum fit kweleŋ a ka, gà Filistiya riŋ ti sirəkeha aà mege à tar guvəl. A pat ŋa ata ka, BATSAH kwa ŋa lakaya kwiyàts kwiyàts hinne ser aka gà Filistiya, a dza a tar magəɗa. Gà Isərayel ta mba à tar. 11 Gà mburma gà Isərayel tə dara i Mitspa ya, tə dəgàz gà Filistiya kwats i Bet-kar a. 12 Samiyel a zla kur a ndwaŋ aka magər gà Mitspa nda Sen dite a zal a kur ata Eben-Ezerª, a gwa: « Ndisl ara a faha na BATSAH kwa ŋa a zlakara kwa ya. 13 Kərga taŋa ya na gà Filistiya ta burwa ya, tàa mbəɗ gər aka ahəɗ Isərayel asa tsa. Aɗaba BATSAH kwa ŋa riŋ nda gà tar, tsikw i huɗ mandza a bəra Samiyel a. 14 Gà kwite ana gà Filistiya tə ndzàka aà gà Isərayel a, a mayara ahər gà Isərayel dukw ŋgar, gəs i Ekrun a, ndisl a Gat nda gà ahəɗ kwite ana a mbeye taraha ya fit. Gà Isərayel ta kazala aà gà Filistiya ya. Dite mendze zay a ge ika magər gà Isərayel nda gà Amuriya ya. 15 Samiyel a gewa seriye a gà Isərayel a ka, i huɗ mandza a bəra ŋgar a fit. 16 Kəla mive ka, a dawa a məpəra ikaba i Betel a, i Gilgal a, i Mitspa ya, a gewa seriye a gà Isərayel ka, i gà kwite ata. 17 I dəba ŋa ya, a mbə̀ɗawa gər a Rama kwite ana ga ŋgar iɗəm a. I fata mbaŋa ka, ŋgat na a gewa seriye à gà Isərayel a. A zlazl təv madula aaka duwa a BATSAH kwa ŋa riŋ i fata.