1 Samiyel 8

Gà Isərayel ta wiz Əbay

1 I təv ana Samiyel a ge mandawal a ka, a ndzək gà ɓəza ŋgar a ne a tar gà ɓəzla mege seriye a gà Isərayel. 2 Kəla ŋgar malukwara ŋana ka, zləm ŋgar Zuwel, Masula ŋana ka, zləm ŋgar Aviya, ta gewa seriye, i Beer-Seva. 3 Gà ɓəza Samiyel ata ka, tàa zàzàm matikaba ŋgar tsa. Madzala gà gər tar ka, ika siŋgwe, wele ana aka ruɓa tar a ka, ta mbetewa a seriye wele ata. 4 Aɗaba taŋa, gà bàba ŋa na ika ahəɗ Isərayel a fit tə yahaba gər, tə da a təv Samiyel a Rama. 5 Ta gwaɗar: « Araha kàa ge mandawal, dite gà ɓəza yak tàa zàzàm matika ba yak tsəka, kinehe ka, vəl a mə̀r Əbay aà geyewa mə̀r seriye kamala ana, ar i gà kwite ŋgiɗ a mbaŋa? » 6 A tsəɓ a Samiyel na a tsaraka ka: « Vəl a mə̀r, Əbay a gewe a mə̀r seriye ya . » Samiyel a hama a BATSAH kwa ŋa. 7 BATSAH kwa ŋa a gwaɗa a Samiyel: « Dza zləm a bazlam gà mayahaba gər gà mburma aaha, dite kə gəs dukw ana ta wiz a, aɗaba ti ye iɗəm a ka, iye nda ahər gà ya, tsəka kər a tsa, ta waya tsa na i kwere tar a. 8 Dukw ana riŋ ta gike a ya ka, kamala ana ta giŋ daga a gər ana i ndzəkara tar ika ahəɗ Ezipt ya, haa a mbakum a. Tàa məsak a iye, tə dzawa gurmits a bəɗ a gà mbulum ŋgiɗ. 9 Kinehe kər ka, dza zləm a mifefile tar. Ama kəla ka, be tar a ɗaf. Ɗìf a tar a dukw ana Əbay ata a kwere a tar ata ge ya . » 10 Samiyel a mà a bazlam BATSAH kwa ŋana a tsik a gà mayahaba gà mburma ata, ta wiz ahər Əbay ya fit. 11 A gwaɗa a tar: « Araha na gà dukw ana Əbay ata a ta kwere kurum, a ge ya. A ndzike a gà sliwdze ka, i liwiŋ gà ɓəza kurum a, aà məpakawar gà muta piris ŋgar, gà asiŋ a, gà ɓəzla madəgə̀zawar piris aà makasla ŋgat. 12 A dze a gà ɓəzla aka miɗ aka gər gà mayahaba gər gà sliwdze dəbuw ( 1 000), kige tsa dzik əzləm ( 50). Gà asiŋ a ta fitawara i gà guvah dite asa ta gewer a ara gà duwa i dala ya. Gà asiŋ a gà ɓəzla məvaɗa gà dukw ahər nda gà dukw maslawa ana a muta piris a. 13 A ti ndzike a gà dəm kurum, aà medewar wirde, gà misle aà madewar dukw mazime, gà biy ŋgiɗ ibam, ti dewere gà peŋ. 14 A ti ndzeke a gà ŋgwal gà guvah kurum, uliviye nda gà viŋye^ª kurum a dzeye a à ɓəzla sik ŋgar. 15 A zlewe a dukw ilik i huɗ dukw kurwa ya, ika gà dukw kurum ana ki gwimera i dala ya, nda gà ika gà viŋye kurum a, a dzewe a à gà ɓəzla meɗifewar aà metsehe nda gà meslire ŋgar. 16 A ti ndzèke gà ɓəzla megemir kurum gà asləka ŋana nda gà məkəs ŋana, dite gà ɓəza kurum gà gawla ŋa gà ndzəɗa ŋa ya, gà hezweŋe kurum aà megeyewar gà megemir ŋgar. 17 A zlewe adukw ilik i huɗ dukw kurwa ya ika gà dukw gənaw kurum ana ki gelewum a ya. Dite kurum ŋa tekeɗe ki nwim a gà ɓele ŋgar. 18 A ka ndze aka taŋa na ki tiwum a aàba aaha a BATSAH kwa ŋa agəra Əbay kurum ata ka zlum a. Ama a pat ŋa ata ka, BATSAH kwa ŋa a tsereke a kurum a dər tsa . » 19 Gà mayahaba gər gà mburma ata ta gəs bazlam Samiyel ata a tsik a tar a tsa, ta gwa: « I wura duwa tsa, miì waya ka, Əbay hiywe, 20 dite mə̀r tekeɗe mìi ne a kamala gà kwite ŋgiɗ a mbaŋa. Əbay mə̀r a gewe a mə̀r a seriye, a ne a mala aka miɗ gà sliwdze mə̀r, mìi gewa akaba guvəl nda gà ŋgat . » 21 Samiyel a dza zləm a mifefile gà mayahaba ger gà mburma ata fit, a mayar dər zləm a BATSAH kwa ŋa. 22 BATSAH kwa ŋa a gwaɗa a Samiyel: « Dza zləm a mifefile tar, vəl a tar Əbay . » Dite Samiyel a gwaɗa à gà Isərayel: « Dum, ku mege weke mada a huɗ kwite ŋgar . »