1 Samiyel 9

Sul i təv Samiyel i Rama

1 Akahər ŋa ata ka, wele duwa riŋ, i gwala Bendzamen, zləm ŋgar Kis, ŋgat kəla Abiyel, kəla Serur, kəla Bikurat, kəla Afiyah gà gwala Bendzamen, ŋgat ka mala ndzəɗa dite yam a dzar are tsa. 2 Kəla ŋgar riŋ zləm ŋgar Sul, gawla ŋa, dite a tsahən hinne. Kəla riŋ i Isərayel a kamala ŋgat a tsa. A za gà Isərayel fit nda zubul. 3 A pat duwa gà məmər hezweŋe Kis dede Sul tə dzeye. Kis a gwaɗa a kəla ŋgar Sul: « Zal a mala meslire gà ilik, kamkam, dum a mayaha gà hezweŋe ata . » 4 Gà Sul tə da, tə tsala ndaka gər kwite Efərayim, dite kwats ndaka ahəɗ Salisa asa, ama tàa ŋgat tar tsa. Tə da ndaka ahəɗ kwite Salim a, tàa le aà tar ɓav tsa asa. Tə da ndaka ahəɗ kwite Bendzamen a tekeɗe tsitsiktsitsik, tàa le a aà tar tsa hiywe. 5 Ti ndze aka ahəɗ kwite Tsuf ka, Sul a gwaɗa a mala meslire ŋgar ana a dəɗ aka ŋgat a: « Dara mbə̀ɗama gər a dəba, tsəka dede gà a ti dzele a gà hezweŋe asa tsa, a dzele a ka, ma. » 6 Mala meslire ŋgar ata a gwaɗar aaka: « Araha i huɗ kwite aaha ka, mburma Mbulum ɗa, dite wele ŋa ka, ti tike ŋgat aà ahər, dukw ana a tsikawa fit tserdze ya, a geyewa ba. Kinehe ka, tama a təv ŋgar, biytsa a ti ɗìfama a vatwa ana ki zleme a ya . » 7 Sul a gwaɗa a mala meslire ŋgar ata: « Na ki teme a na, ki zlemere a dəraha ana la, na mburma Mbulum ata ya? Aɗaba araha dukw mezime i kiwa ma asa tsiye, dite kwets dukw taf aà ma aà məvəlar tsiye. Dukula dziye na aà ma ya? » 8 Mala meslire ata a gwaɗa aaka a Sul asa: « Araha kur siŋgwe naha aà iye ilik. I ta vile a à mburma Mbulum ata, dite a ɗifeme a aà vatwa ana ki zleme a ya . » 9-11 Akahər ŋa ata ɗa i Isərayel ka, na wura a de a à mewize madzala gà gər aà Mbulum ka, ta gwaɗawa! Takwa a bəra mala mipire are. Sul a gwaɗa a mala meslire ŋgar ata: Ndzer yak, dara tama! Tə da a huɗ kwite ata mburma Mbulum mandzaŋa iɗəm a. Akahər ana tar riŋ ti de a a huɗ kwite ata mba ya ka, tàa le a aà ga ɓəza gà dəm duwa ti de a aka yam, ta gwaɗa a tar: « Mala mipire are ɗa i faha ya? » 12 Gà dəm ata ta gwaɗa a tar aaka: « Haya araka riŋ ika miɗ yak, kinehe mba aba tsəma. Aɗaba a dara a huɗ kwite ya ka, aà məvəla dukw taf matawala gà mayahaba gər gà mburma ika təv mazlazla təv məbatsa aaka duwa à Mbulum. 13 Akahər ana kàa ndzwimaha a huɗ kwite ka, ki lwìm ahər ŋa ələk ŋana a tsìle a aka təv mazlazla təv məbatsa aaka duwa a Mbulum a. Aɗaba gà mayahaba gər gà mburma ti sle a mazime a duwa tsa na aka daha tsiye. Aɗaba a pìse a ahəm aka dukw matawala fəla ata. Dite i dəba ŋa ya, gà na tə zal a à tar a, ti sle a aà mezime a kuɗa. Kinehe ka, dumaha ki lwim a ahəriŋa . » 14 Gà Sul nda mala meslire ŋgar ata, tə da a huɗ kwite. Ti ndzeha a huɗ kwite ka, tàa ləma nda gà Samiyel ana a dara a bəra ya, a de a aka təv mazlazla təv məbatsa aaka duwa a Mbulum a. 15 Tsaatsa a pat duwa ələk ŋana Sul a ti dehe, a fata ya ka, BATSAH kwa ŋa aka mbər mifefiler aàba a Samiyel a, a gwaɗar: 16 Ndidwe kərga naha ya ka, i slirekeha wele duwa ika ahəɗ kwite Bendzamen a, ki dze a aka mal a ne a Əbay gà mayahaba gər gà mburma gà, gà Isərayel. A te a beye a aà gà mayahaba gər gà mburma gà i ahər gà Filistiya ya. Aɗaba Yàa ŋgatar, a mayahaba gər gà mburma gà, tuwa tar aka ɗere a à iye ya, ndisl. 17 I təv ana Samiyel a ŋgat a Sul a ka, BATSAH kwa ŋa a gwaɗar: « Araha na wele a ana i fafəlak aaka ya, ŋgat na a kwere gà mayahaba gər gà mburma gà ya . » 18 Sul a sərak ha a təv Samiyel aka biye hərmaga mada à huɗ kwite ata a gwaɗar: « I gək kamkam ɗifiŋ a ga mala məpər a are ana ɗa i faha ya te . » 19 Samiyel a gwaɗar aaka à Sul. « Iye ŋa na mala məpər a are ya, ndza aà miɗ, ka tama aka mazlazla təv ana batsawa aaka duwa a Mbulum, mbakum ka, ki zimekwa akaba ɗaf nda gà iye. Ndidwe ka, i ɗifeke a à gà dukw ana i gəzləŋ yak a fit tserdze, dite i miseke a aà kəriŋa ki debiŋ a . 20 Arəv mada aà kə̀r a, agəra gà hezweŋe yak ana tə dzeye kige kinehe mehinne makər a tsa, aɗaba tàa mbər meŋgete tar. Gà ŋgwal gà dukw ana i Isərayel a dzena tə dzwàdzwàh ana a weke? Wànà a kər tsiye? Nda gà mburma ana i ga i bəra dede yak a tsiye . » 21 Sul a gwaɗar aaka: Wànà iye ana gà Bendzamen tsiye? Gwala ana manìkìɗa ŋa ika ahəɗ gà Isərayel a? Wànà huɗ ga gà ana, manìkìɗa ŋa tsiye na i liwiŋ gà gwala Bendzamen a? Aàla na ki tsikiŋa kamala tàŋa ya ya? » 22 Samiyel a ndzək gà Sul nda mala meslire ŋgar, a ga a vəl a tar təv mendze ŋgwal ŋana aka miɗ gà mburma ana tə zal a tar a dukw mezime ya. Gà mburma ata fit ka, dzik makər (30). 23 Samiyel a gwaɗa a mala mede duwa: « Zlara slu ata i vəlak i gwaɗak tike aà ba ya ya . » 24 Mala mede duwa a ndzəkara gà gwùs ŋa ata nda gà dzimir ŋa ya, a dza aka miɗ Sul. Dite a gwa: « Araha na dukw ana, ti tìkik aba ya ya, sas kà papəɗ. Aɗaba agəra megirive aaha na mì tìkik aba ya ya, papəɗum nda gà mburma ana i zala a tar a . » Kamala taŋa ya na gà Sul nda Samiyel tə zəm akaba ɗaf a pat ŋa ata ya. 25 I dəba ŋa ya, tə tarəra ika mazlazla təv ata tə batsawa aaka duwa a Mbulum a, ara a huɗ kwite ya, gà Samiyel nda Sul ta mets aà mifefile i ga ana ika gər ga ŋgiɗ a. 26 Ndidwèŋa i mèkwède ta hitse aà mbulum ka, Samiyel a zalaha a Sul ana riŋ i ga, ika gər ga ŋgiɗ a, a gwaɗar: « I leke a kər, ka da ba . » Sul a da, tar məma nda Samiyel. 27 I təv ana ti ndze aka kwiye huɗ kwite ya ka, Samiyel a gwaɗa a Sul: « Gwaɗa a mala meslire yak, mada aka miɗ, dite wele ata a da aka miɗ, Samiyel a gwaɗar asa, kinehe ka, hitse kuɗa, i meke a à dukw ana Mbulum a tsikik a . »