1 Samiyel 10

1 Samiyel a zla dis mal a dza dər aka gər Sul. A gəs aàba ŋgat a gwa: « BATSAH kwa ŋa nda gər ŋgar, na a mandza aka kər a mal a, a ne a kər Əbay aka gər gà mayahaba gər gà mburma ana ti ne gà biy ŋgar a . » 2 Mbakum ŋa aaha, i təv ana kàa da aà iye ya ka, ki te lwimeme a nda gà mburma sula, bise nda təv dive Rasel ana i Salsa ika kwiye ahəɗ Bendzamen a. Ti te a gweɗek ŋa: « Gà hezweŋe yak ana ka da a mayaha tar a ka, tàa ŋgat tar. Kinehe ka, dede yak aka məsak aà mazlaŋa gà hezweŋe, ama riŋ a dzele a ka, kurum, a gwaɗawa Dukula na i ge a agəra kəla gà ya? » 3 I fata ya ka, ki de a izaɗ zaakwa ki ndze a à huɗ batsah dizl ɗaf duwa i Tavur, ki te lwimeme a gà mburma makər ti de a à mazləba Mbulum a Betel. Ilik ŋa gà ɓəza wak ihər makər, masulaŋa gà peŋ ihər makər, dite məmakər ŋa aaha tekeɗe kiwa kwiye guzum ihər. 4 Ta gike a wusa, ti dzeke a gà peŋ ata sula, gəs aà tar. 5 I dəba ŋa ya ka, ki ndze a à kwite Giveya-Eluhim. I fata na gà Əbay ana i Filistiya tə ndzawa ya. I təv ana kàa ndze a huɗ kwite ya ka, ki le a à mayahaba gər gà ɓəzla məma guma Mbulum, tar riŋ ti tarəra ika mazlazla təv ana ta batsawa aaka duwa a Mbulum a. tar riŋ te me a a bazlam Mbulum, ti dze a dər megwedzel, tə gizle a mediye ya, nda gà tə vete a dər slilìm. 6 Mezite mesife BATSAH kwa ŋa a de a aka kəriŋa, ki tsikum a akaba guma Mbulum nda gà tar, ki ne a mburma ŋgiɗ. 7 I dəba gà dukw ata tàa geya ba fit nda kər a ka, ge dukw ana ki ge ya, Mbulum riŋ mandza ŋa nda kər. 8 Dite ki lehiŋaha à Gilgal, i deha a təv yak, aà mandza gà dukw taf matawala fəla ana tə dùlawa fit kweleŋ a, nda gà dukw taf matawala fəla mazləba a Mbulum. Ki bebe a mehinne təsəla, haa aka təv ana i dehe a təv yak a. Dite i ɗifeke a à dukw ana ki te ge ya. 9 I təv ana Sul a mbəɗ dəba a de a i təv Samiyel a ka, Mbulum a mbə̀ɗar à gəzləŋ. Gà dukw ata Samiyel a ɗamar a ka, a geya ba a pat ŋa ata fit. 10 Aləka tə ndzeha à Giveya ka, tə ləma nda gà ɓəzla məma à guma Mbulum. Mezite mesife Mbulum a dara aka gər Sul a, a dzəba à metsike guma Mbulum nda gà tar. 11 Gà mburma ana tə sər ŋgat daga piŋŋa ya ka, ta ŋgatar riŋ ti tsike akaba guma Mbulum nda gà ɓəzla məma à guma Mbulum, ta gwaɗa aba ika magər tar: « Dukula na a ge ba nda kəla Kis aaka ya? Wànà Sul ana ika magər gà ɓəzla məma à guma Mbulum mbaŋa ya? » 12 Wele duwa a ndzawa i kwite ata a gwa: « Weke dziye na tsir ŋgar a? Wànà Sul ana ika magər gà ɓəzla məma à guma Mbulum mbaŋa ya? » I bazlam ata ya na bazlam Minew a dara iɗəm a ya. 13 I təv ana Sul a ndəv aba à məma à guma Mbulum a ka, a da aka təv mazlazla təv məvəla aaka duwa a Mbulum a. 14 damər dede Sul a gwaɗa a gà Sul nda mala meslire ŋgar: « Ka dum dzena a ŋga? » Sul a gwaɗar aaka: « A mayaha gà hezweŋe. Ama maa ŋgat tar tsa, dite mì da riŋ a bəra Samiyel . » 15 damər dede Sul a gwaɗa tar asa: « Kamkam ɗemiŋ dukw ana Samiyel a tsike a kurum a . » 16 Sul a gwaɗar aaka a damər dede ŋgar ata: « A gwaɗa mə̀r ka, gà hezweŋe ata ka, tàa ŋgat tar . » Ama Sul ka, aka fafəlar aka gər Əbay ana Samiyel a fafəlar aaka ya tsa. 17 Samiyel a zal a gà mayahaba gər gà Isərayel fit tserdze, aka miɗ BATSAH kwa ŋa a Mitspa. 18 Dite a gwaɗa a gà Isərayel: « Araha na BATSAH kwa ŋa Mbulum gà Isərayel a gwa ya. Iye na a ndzəkara gà Isərayel ika ahəɗ Ezipt ya, Yàa beye a aà kurum i hər gà Ezipt ya, dite i hər gà ɓəzla mene are kurum a fit tserdze. 19 Dite mbakum, ka yum Mbulum ana a beyara a kurum i gà dukw ana a slewa a kurum a, nda gà i gà mesewere are kurum a, dite kə gwaɗumar: vəl a mə̀r Əbay! kinehe ka, hitsum aka miɗ BATSAH kwa ŋa, kəla aà gà gwala kurum, kəla aà məkəs aà kəla məkəs . » 20 Samiyel a sərəkaha aà gà gwala gà Isərayel fit tserdze. Tsetse a dəɗ aka gà gwala Bendzamen. 21 A sərəkaha aà gwala gà Bendzamen kəla aà məkəs aà kəla məkəs ka, tsetse a dəɗ aka kəla məkəs Matri. Tsetse a dəɗ aka Sul kəla Kis. Ti yaha ŋgat a, ama tàa le a ŋgat tsa. 22 Ta wiz a BATSAH kwa ŋa asa: Wànà wele ata na aka dara a faha ya, ibam a? BATSAH kwa ŋa a gwaɗa a tar aakara: « Araka makahaba ŋa ika dəba gà kazlaŋa . » 23 Ta valaha ti yahara ŋgat a, ta hitse dər aka miɗ gà mburma, pizl a za gà mburma fit tserdze nda zubul. 24 Samiyel a gwaɗa a gà mayahaba gər gà mburma: « Kàa ŋgatum a wele ana BATSAH kwa ŋa a zla ya tsiye? Wura riŋ ilik ika magər kurum fit kamala ŋgat a tsa . » Gà mayahaba gər gà mburma fit tə lak aà ahər ta gwa: « Əbay mandza a bəra . » 25 Samiyel a ɗif a tar à dukw ana Əbay a ge ya fit tserdze, a wetse a huɗ wakita, a tike aka miɗ BATSAH kwa ŋa. I dəba ŋa ya Samiyel a gwaɗa gà mburma: « Ku weke ma da a ma . » 26 Sul tekeɗe a daba a ma ŋgar a Giveya. Gà mburma ana yam a dza a tar are tsiye, Mbulum a ləm a tar aà gəzləŋ a ka, tə laka ŋgat. 27 Ama gà gərlaka gà mburma riŋ ta gwa: « Kirim tsəka wele aka ya na a ta beye a kwa ya? Ti ne a aà ŋgat bakal, ta vəlar dukw taf tə tsa. Ama Sul a aka dza zləm a mifefile tar ata tsa .