1 Samiyel 11

Sul a mba à gà Ammuniya

1 Nahas Əbay gà Ammuniya a da mandza maŋgwaɓa aà Yabes ana ika ahəɗ Galaad a. Gà mburma Yabes ta gwaɗa a Nahas: « Gəs masla nda mə̀r, mə̀r ka, mìi heneke a gər a bəɗ . » 2 Ama Nahas a gwaɗa a tar aaka: « Na gis a masla ata ka, say na i tsweslwe a kurum a are ahər mezime kurum ilik nda ilik a dzekwiŋ dite kamala taŋa ya na i burwa à ga Isərayel fit a . » 3 Gà bàba gà mburma ana i Yabes a ta gwaɗar: « Vəl a mə̀r məpasla ahər biy mehinne təsəla, mìi slìreye gà ɓəzla mə̀ma à labara aka ahəɗ gà Isərayel fit. Na bəla wura aka sle mebe a à mə̀r tsəka, mìi mbiɗere a gər a təv yak a . » 4 Gà ɓəzla mə̀ma à labara ata ti ndze à Giveya kwite ana Sul mandza ŋa iɗəm a ka, tə tsik bazlam ata i fata à gà mburma fit tserdze. Gà mayahaba gər gà mburma ata fit tə dza akaba tuwa ɓuhhwa. 5 tsaatsa Sul riŋ a mera i dala ya nda gà sla ŋgar a, a gwa: « Dukula na a ge ba, gà mburma fit ka, tə dza akaba tuwa ya? » Ta ɗamar gà bazlam gà mburma Yabes ana ti tsik a tar a. 6 I təv ana Sul a tsaraka bazlam ata ya ka, mezite mesife Mbulum a da aakara, a tsəɓar turtur a ge arəv hinne. 7 A ndzək gà sla sula, a sasaya ikaba ya, a sləraya aaha à gà Isərayel fit nda ahər gà ɓəzla məma a labara ŋgar, a gwaɗa tar: « Wele ana aka dəɗ aka gà Sul nda gà Samiyel a guvəl a tsiye ka, kamala naha ya, na ti te ge a aà gà sla ŋgar a . » Magəɗa BATSAH kwa ŋa a dzèba aà mege a tar hinne. Tə dzəba aà mede kamala mburma ilik a. 8 Sul a yaha tar gər a ɗama tar i kwite Bizek, gà Isərayel tar də̀buw dərməka makər (300 000), gà Yahuda tekeɗe, tar dəbuw dzik makər (30 000). 9 Ta gwaɗa à gà ɓəzla məmaya à labara ata tə daha a Yabes a: « Araha na dukw ana ki te tsikum a à gà mburma ana i Yabes ika ahəɗ Galaad a: Ndidwe nda magər pat ŋa ka, ki ŋgetwime mezleke . » Gà ɓəzla məma à labara ta maha a labara ŋa a gà mburma ata i Yabes, ta ŋgayaba hinne. 10 Gà mburma Yabes ta gwaɗa a gà Ammuniya: « Ndidwe ka mìi deha à təv kurum, gwim à mə̀r dukw ana a sasa kurum a . » 11 Ndidwe ŋana ka, Sul a ndzàka ika ba gà sliwdze ya medzige makər. I mèkwède hedwe tə da à təv màŋgwaɓà gà Ammuniya, tə dzəba aà məbatsa gà Ammuniya tsikw a magər pat. Gà mburma ana ti zeha nda mesife ya, tə dza aàba sweyèhsweyèh, ku mege weke a val ka, aà gər ŋgar. 12 Gà mayahaba ger gà mburma ta gwaɗa a Samiyel: « Gà weke na ndeɗiŋe ta gwa ka, Sul mene Əbay kwa tsiye? Dza mə̀r gà mburma ata ahər, mìi betse a tar fit . » 13 Ama Sul a gwaɗa a tar: « Makə̀ɗà mburma riŋ tsa na mbakum a, aɗaba mbakum ka, BATSAH kwa ŋa aka vəl mege gara à gà Isərayel . » 14 Samiyel a gwaɗa à gà Isərayel: « Dumara takwa à Gilgal aà metsike à gà mburma asa ka, Sul ka, Əbay . » 15 Gà mayahaba gər gà mburma fit tə da à Gilgal, ti tike Sul a Əbay ika miɗ BATSAH kwa ŋa i Gilgal. I fata na tə dzaya gà dukw taf matawala fəla mazləba aà Mbulum a. I fata mbaŋa na, gà Sul nda gà mayahaba gər gà Isərayel fit tserdze, tə dzəba aà maŋgayaba hinne ya.