1 Samiyel 12

Mandəvandəv mifefile Samiyel a gà Isərayel

1 Samiyel a gwaɗa a gà Isərayel fit tserdze. Yàa tsaraka kurum dər dukw ana ka wizum aà iye, Yàa vəl a kurum Əbay. 2 Kinehe ka, Əbay ata kuɗa na a kwere a kurum a, iye ka, mandawal ŋa mbèlèfmbèlèf. Gà ɓəza gà tekeɗe gà gawla ŋa. I kwara kurum ka, daga a gər gawla gà ya, haa mbakum. 3 Iye naha ika miɗ kurum, gwim sida gà, ika miɗ BATSAH kwa ŋa, dite ika miɗ Əbay ŋgar ana a zla ya. Wànà Yàa zlà sla aà wura ya ilik a? Wànà Yàa zlà hwezeŋè à wura ya ilik a? I sawere are ilik dzena a weke? Dite aà weke ya na i gəs ihər dukw taf aà mimbete dər à seriye ŋgar a? Na Yàa ge kamala taŋa ya ka, i me a kurum a dər aɗəm. 4 Gà Isərayel ta gwaɗar: « Kàa ge a mə̀r bakal duwa ilik tsa, kàa sawer a mə̀r are ilik tsa, kàa ge wirwir à wura ya ilik ɓav tsa asa . » 5 Samiyel a gwaɗa a tar asa: « BATSAH kwa ŋa mala sida kurum, dite Əbay ŋgar aaha a zlà ya, mala sida ana mbakum a, na kàa lwìm a duwa i hər gà tsiye . » Gà Isərayel ta gwaɗar: « Ndzer tar gà ɓəzla sida . » 6 Tsam ka, Samiyel a gwaɗa à gà Isərayel: « BATSAH kwa ŋa na a lakara gà tsir kurum ika ahəɗ Ezipt ya nda ahər gà Musa nda Haruna ya. 7 Kinehe ka, hitswìm aka miɗ seriye BATSAH kwa ŋa, i me a kurum a dərra a gər aà gà ŋgwàl gà dukw ana BATSAH kwa ŋa a ge kurum, nda gà tsir kurum a fit tserdze. 8 I təv ana gà Zakup nda gà ɓəza ŋgar tə da aka ahəɗ Ezipt ata ya ka, gà tsir kurum tə tuwaha aba a BATSAH kwa ŋa, BATSAH kwa ŋa a sler tarəraha gà Musa nda Haruna, tə làkara gà tsir kurum ika ahəɗ Ezipt ya, na a dza tar a faha ya. 9 Ama tar ka, ŋgwìɗik ta mə̀sak a BATSAH kwa ŋa, Mbulum tar, a dza tar ahər Sesera Əbay gà sliwdze gà Hatsur a, a ahər gà Filistiya, a ahər Əbay Muwab, tàa geye aà tar guvəl. 10 Tə zalaha aba a BATSAH kwa ŋa asa, ta gwa: « Maa ge bakal, aɗaba maa mbəɗ dəba a mandza gurmits a bəɗ a BATSAH kwa ŋa, mìi dzawa ka, à gà Baal nda Astarte ya. Kinehe ka, be a mə̀r i hər gà ɓəzla mene are mə̀r a te, dite na mìi geweke a megemir a . » 11 I fata ya ka, BATSAH kwa ŋa a slə̀raha gà Zedeyuŋ, Barak, Yafte dite iye Samiyel, mìi beyara a kurum ihər gà ɓəzla mene are kurum ana tə le a kurum tits a, dite ka ndzum i kwite ata bàrbàrra ya. 12 Ama i təv ana kə ŋgatum a Nahas Əbay gà Ammuniya a daha aà mege a kurum guvəl a ka, kə gweɗwimiŋ, awaŋ Əbay na makwara mə̀r a, tsaatsa ka, BATSAH kwa ŋa Mbulum kurum na Əbay kurum a. 13 Araha kuɗa na Əbay kurum kà zlum a, ŋgat na ka wizum a. BATSAH kwa ŋa aka vəl a kurum Əbay. 14 Nà magəɗa BATSAH kwa ŋa riŋ i gəzləŋ kurum, na ki ndzwimere gurmits a bəɗ, na kàa dzum zləm a gà bazlam ŋgar, dite na kàa tsalum aba à gà segeme agər aka bazlam BATSAH kwa ŋa tsa ka, ki zezemwime a BATSAH kwa ŋa, Mbulum kurum, kurum nda gà Əbay kurum. 15 Ama na kàa dzum zləm a bazlam BATSAH kwa ŋa tsa, nà kàa tsalum aba aà gà segeme a gər aka gà dukw ana a gwaɗa a kurum gwim a ka, ahər BATSAH kwa ŋa a diɗe a aka kurumiŋ a kamala ana a dəɗ ɗa piŋŋa aka gà tsir kurum a. 16 Kinehe ka, vavum dukw mene aà mburma ana BATSAH kwa ŋa a ge a, aà are kurum a. 17 Wànà kwa kinehe ana ihər mesle ble tsiye? I heme a à BATSAH kwa ŋa, Mbulum a lekeyeŋa, yam a dzèŋa. dite kà sərum dər, bakal ana kə gwùm a are BATSAH kwa ŋa nda mewize ahər Əbay a . » 18 Samiyel a hama a BATSAH kwa ŋa, dite pat ŋa ata, BATSAH kwa ŋa a slərra malakaya mbulum yam a dza ya. Gà mayahaba gər gà mburma tə dza ba aà mege magəɗa a gà BATSAH kwa ŋa nda Samiyel. 19 Gà Isərayel ta gwaɗa a Samiyel, hama a BATSAH kwa ŋa Mbulum yak aɗaba mə̀r gà ɓəzla megemir yak, dite ka, mìi mata tsa. Aɗaba nda ndzer maa səkah aà bakal mə̀r ana mì gewa ya, nda mewize Əbay. 20 Samiyel a gwaɗa à gà Isərayel fit tserdze: « Ki gwim magəɗa tsa, kàa gwim gà bakal ata dukw ŋgar, ama akaba nda taŋa fit tekeɗe ka, kà ta sərəkum diriŋ aà BATSAH kwa ŋa ya tsa. Gwim mar megemir a BATSAH kwa ŋa nda gəzləŋ kurum sah ilik pə̀ra. 21 Kà ta mbə̀ɗumar dəba tsa, aɗaba a ti nwime a mba ka, gà dukw taf masakəŋa, dite a mbile a à kurum a tsa asa ya. Aɗaba gà dukw ata ka, gà dukw taf masakəŋa. 22 BATSAH kwa ŋa a mə̀sake a gà mburma ŋgar kataya tsa, aɗaba meɗe zləm ŋgar. BATSAH kwa ŋa aka hadzal ba, aà mene a kurum gà mayahaba gər gà mburma ŋgar. 23 I waya tsidze na i ge a bakal aà BATSAH kwa ŋa nda mə̀məsake a meheme agəra a kurum a. I ɗif a kurum ivaɗ ka, aà ndzer nda ŋgwal vatwa ana ki zezemewume a ya. 24 Ama kurum kəla ka, gwim magəɗa a BATSAH kwa ŋa, gwim mar megemir sàh nda gə̀zlèŋ kurum ilik pəra. Pə̀rum a gà ŋgwal gà bàba gà dukw ana a ge kurum a. 25 Na kàa gwim gà dukw bakal hiywe ka, ki dzeyumiŋ a nda gà Əbay kurum fit tserdze kweleŋ.