1 Samiyel 13

Malahalah bakal Sul ana a ge ya

1 Akahər ŋa ata Sul a ne Əbay a ka, ŋgat mive ……. Dite a kwara gà Isərayel mive sula (2). 2 Sul a pala gà mburma dəbuw makər (3 000) i liwiŋ gà Isərayel a. Dəbuw sula (2 000) ŋana ka, tar akaba nda gà ŋgat i Mikmas i gər kwite Betel, dite dəbuw (1000) ŋana ka, tar nda gà Zunatan i Giveya ika ahəɗ gà Bendzamen. Sul a gwaɗa a gà asiŋ a aaha, ku mege weke mada ma ŋgar. 3 A pat duwa ka, Zunatan a kəɗ Əbay gà Filistiya ana i Geva ya, gà Filistiya tə tsaraka. Tsam ka, Sul a gwa: vatum gà mezleliŋ i huɗ kwite fit, labara ŋa meɗeha aà gà Ibəranikwa. 4 Gà Isərayel fit tə tsaraka, ta gwa là! Sul aka kəɗ Əbay gà Filistiya ana i Giveya ya ka, gà Isərayel ti sle aà mendze akaba nda gà Filistiya asa tsa, ti yahàba gər a təv Sul a Gilgal. 5 Gà Filistiya tekeɗe ti yahàba gər a təv ilik ŋa aà mege guvəl aà gà Isərayel. Gà muta piris a tar, dəbuw dzik makər (30 000) dite gà ɓəzla matsala aka piris, dəbuw ndilik (6 000). Gà asiŋ gà sliwdze tar tekeɗe, ti ɗeme a ba tsa kamala hewyeŋ ana i dulwa ya. Tə dara tə ge təv mandzəba tar à Mikmas ndaka tseke are pat ana a mbəzawara i Bet-Aveŋ a. 6 Gà mburma gà Isərayel ta pər ka, ti sle a asa tsa ka, te da makàhayaba à sləlak, a zulwar, a ɓurum, a gà ga ana tə zlazlayara i gà biye ya, gà asiŋ a aha tekeɗe a tə̀kər. 7 Gà asiŋ a aaha tə təz, tə̀ tsala i dulwa Yurdan a, aà makàhayaba à gà bàba huɗ kwite Gat nda kwite Galaad. Sul ŋgat ka, i Gilgal hiywe, Dite gà mburma ana nda gà ŋgat a ka, tar i magəɗa. 8 Sul a babà mehinne təsəla kamala ana Samiyel a tsiker a. Ama Samiyel aka ndzeha a Gilgal tsa, gà mburma tə təz a Sul a fit. 9 Tsam ka, Sul a gwa: « Gàsùmiŋara gà dukw taf matawala fəla ana tə dulawaha à Mbulum fit kweleŋ a, nda dukw taf matawala fəla magaw ba gà mburma nda Mbulum . » Dite ŋgat nda ahər ŋgar ŋa, a dùl gà dukw taf matawala fəla ata. 10 Kamala ana riŋ a ndìve a madula gà dukw taf matawala fəla ata ya ka, pəzlaŋ Samiyel aka ndzeha, Sul a da a təv ŋgar aà meger wusa. 11 Samiyel a gwaɗar: « Dukula na ki ge ya? » Sul a gwaɗar aaka: « I ŋgatar ka, gà sliwdze tàa tàz aà iye ya, kər tekeɗe kàa ndzera aka məpasla ahər a tsa, dite asa ka, gà Filistiya tàa yahaba gər i Mikmas, 12 i zlaŋa i gwa: « kinehe ka, gà Filistiya riŋ ti dere a aà mege aà iye guvəl à Gilgal a, dite ka Yàa ge duwa biy mendzèhe are tsehe a BATSAH kwa ŋa ɓav tsa. Aɗaba taŋa i vəl dukw taf ana tə dulawaha a Mbulum fit kweleŋ a nda mimbètse ahəm ŋa . » 13 Samiyel a gwaɗa a Sul: « Ki ge dukw aaha ka i huɗ magazlavda ya, kàa zàzàm məpala ahəm BATSAH kwa ŋa Mbulum yak ana a vəl a tsa. Ana ka, BATSAH kwa ŋa aka hadzal ba aà mene a a kər a gwala Əbay gà Isərayel aà biybiy. 14 Ama, kinehe ka, mekwere yak a de a aka miɗ hinne asa tsa. BATSAH kwa ŋa aka yaha ba wele ana gəzləŋ ŋgar a waya ya, dite aka ne aà ŋgat Əbay aka gər gà mayahaba gər gà mburma ŋgar. Aɗaba na kàa zàzàm məpala ahəm ŋgar tsiye . » 15 I dəba ŋa ya Samiyel a da i Gilgal a, a Giveya ana ika ahəɗ Bendzamen a. Sul a dzəba aà maɗama gà sliwdze ana nda gà ŋgat a, ti sle mburma dərməka ndilik. (600) 16 Gà Sul nda kəla ŋgar Zunatan, dite nda gà sliwdze ana tar akaba fit tserdze ya ka, tə ndza i Geva ana i Bendzamen a. Gà Filistiya tekeɗe ta ge təv mandzəba tar, i Mikmas. 17 A pat ŋgiɗ duwa ka, gà sliwdze tə dara i təv mandzəba gà Filistiya ya palam makər aà maduŋa tar. Palam ŋgiɗ a zla vatwa ana a da à Ufra aka ahəɗ kwite Suwal a, 18 palam ŋgiɗ a da ndara à Bet Huruŋ, dite palam məmàkə̀r ŋa aaha a dəɗ aka vatwa ana ndaka gər kwiye a tùlwah Tsəbuyim ana ndaka tseke mandazla ya. 19 Akahər taŋa ka, gà mbəzla riŋ i Isərayel tsa. Aɗaba gà Filistiya ta waya gà Ibəranikwa ta vaɗa gà dukw ahər tsa. 20 Gà Isərayel fit ka, ku mege weke a de a ka, a bəra gà Filistiya na, aà mataslara ahəm medile sla, dàlàmà, zlabà nda gà medile mə̀fite ya. 21 Na bəla wura a sasàr mataslara ahəm medile sla, dàlàmà, melgwe, gà zlabà nda gà medile məfite ka, a pile a kur siŋgwe ŋa ka hinne. 22 A pat guvəl ata ka, gà sliwdze Sul nda biy kəla ŋgar Zunatan ka, dukw ahər a tar tsa. Dukw ahər ka, aà gà Sul nda kəla ŋgar Zunatan ɗekɗek pəra 23 Gà sliwdze gà Filistiya tə dzəba aka vatwa ana a da a Mikmas a.