1 Samiyel 14

Guvəl gà Zunatan nda gà Filistiya

1 A pat duwa Zunatan kəla Sul a gwaɗa a wele ana a ndzəkara dukw ahər a: « Dara tama ndisl a təv mandzəba gà Filistiya aaka . » Ama kəla ka, aka tsik a dede ŋgar tsa. 2 Sul a ndza bise nda kwiye gà Giveya aà huɗ dizl Grenadiye^ª i Migruŋ dite gà sliwdze ana tar akaba fit tserdze ya ka, ti sle aà dərməka ndilik. (600) 3 Ahiya mala mə̀ɓatsa duwa a Mbulum riŋ i fata. Ŋgat ka, kəla Ahitut, damər Ikabud, tar gà ɓəza Finiyas. Finiyas ka, kəla Eli ana mala məbatsa duwa a BATSAH kwa ŋa i Silu a. Ahiya riŋ nda gà Efud^ª ikaba. Ama gà mayahaba gər gà mburma ka, tàa sə̀r aà mede Zunatan ana a da ya tsa. 4 Aà mada a təv mandzəba gà Filistiya, mege aà tar guvəl a, Zunatan a yaha vatwa ndaka bulum gà gər kwite Buses nda Senne. 5 Gər kwite ilik, a pər ser aka ahəɗ Mikmas aka yam, dite ilik ŋa aaha a pər ser aka ahəɗ Geva ndaka tseke gular 6 Zunatan a gwaɗa a wele ana a ndzəkara dukw ahər a: « Dara tama ndisl a təv mandzəba gà mburma aaha tar gà masasaŋa tsiye. Biy tsa BATSAH kwa ŋa a zleke a ma. Aɗaba duwa riŋ na a pele a ahəm a BATSAH kwa ŋa aà məvə̀lama slagama ya tsa, ku mege gà mburma ŋa tar ndaw tsa, kige tsa tar diŋ a . » 7 Wele ata a ndzəkara dukw ahər a a gwaɗar: « Ge dukw ana ka waya ya, tama iye riŋ i zezeme a kər, ku mege i təv Dukula ya fit tserdze . » 8 Zunatan a gwa « Yaw » . Kinehe ka, tamaha ndisl a təv gà mburma aaka dite ɗema tar aàba. 9 Na tàa gwaɗama, hitswìm, mə̀r nakà mìi dehiŋa a təv kurum, ki ndzekwe i təv ilik ŋa, taŋa ka, ki teme a a təv tar tsa. 10 Ama na bəla a tàa gwaɗàma, tsalùmàra a təv mə̀r a ka, ki tsìlemiŋa, aɗaba BATSAH kwa ŋa aka dza ma tar ahər, kərga taŋa ya na ki səràma dər a. 11 Gà wele ata sula ya tə da, a təv mandzəba gà Filistiya ta pat tar aàba, dite gà Filistiya ta gwaɗa aàba: « Araha gà Ibəranikwa aaha tàa dayara i gà makahaba tar i gà sləlak a . » 12 Gà sliwdze ana i təv mandzəba gà Filistiya ya, ta gwaɗa a gà Zunatan nda mala mandzə̀kar dukw ahər: « Tsalwùmàra a təv mə̀r a, mìi tsike a kurum a duwa ilik. Zunatan a gwaɗa a wele ata tar məma a ndzəkara dukw ahər a: « Zazamara iye i dəba ya . » Aɗaba BATSAH kwa ŋa aka dza tar a ahər gà Isərayel mbakum. 13 Zunatan a tsə̀laha ka, nda gà mandzàvəlaŋa, mala madzə̀kar dukw ahər tekeɗe a zàzàmaha ŋgat i dəba ya. Zunatan a dzəba aà mege guvəl nda gà Filistiya, a bats tar, zàmbàlàhha na ika ahəɗ a, mala mandzə̀kar dukw ahər a zàzàm dər ŋgat nda mandəva a mesife tar i dəba i dəba ya. 14 Malahalah guvəl ata gà Zunatan nda mala mandzàkar dukw ahər te ge ya ka, ta bats gà mburma ika varavada ata hinne tsiye ka, te ge a gà mburma dzik səla (20) Taŋa na malahalah ŋana ta mba aà gà Filistiya ya. 15 Batsah magəɗa a dzəba aà mege a gà Filistiya nda gà asiŋ gà misle ŋgiɗ ana i tsaka tar a mbaŋa, gà na i təv mandzəba gà sliwdze ya nda gà Filistiya ana megemir tar ka, mènesa aà duwa ya, ku mege i ŋga mbaŋa ka, hinne. Wàkitwakit ahəɗ a ɓazla aka ba, magəɗa Mbulum a ge tar hinne.

Gà Isərayel ta mba aà gà Filistiya

16 Gà ɓəzla metike are ana ika magər gà sliwdze Sul ana i Giveya ika ahəɗ gà Bendzamen a, ta ŋgat a gà mburma riŋ gùdùbùllwa, ti tize a, tə dzeyaba gà vatwa ku mege weke a val aba a ba ŋgar ka, 17 I fata ya ka, Sul a gwaɗa à gà sliwdze ana i təv ŋgar a: « Zalùm a gà mburma ka ɗàmùm tar aà masər a dər ka, weke na a da ika magər kwa ya?» Tə zal a gà mburma, tə ɗama tar ka, gà Zunatan nda mala mandzèkar dukw ahər ŋgar riŋ tsa. 18 Sul a gwaɗa a Ahiya ana mala məɓatsa duwa a Mbulum a: « sə̀rək ara aà sahər Mbulum a. » Aɗaba aka tàŋa ka, sahər Mbulum ata ka, ar ika magər gà Isərayel. 19 I təv ana Sul riŋ a fə̀file a à mala məbatsa gà dukw ata ya ka, gà matuwaya aba riŋ a ɗera ɓuhhwa hinne ndeyndey i təv màŋgwaɓà gà Filistiya ya. Sul a gwaɗa a mala məbatsa gà duwa: « A ge a ŋgulum asa tsa na aà mazalà aba a Mbulum a. » 20 I fata ya ka, gà Sul nda gà sliwdze ana riŋ ndàs i təv ŋgar, ti yahaba gər, tə da à təv mege guvəl. I təv ana tə ndzeha ya ka, a le a gà Filistiya riŋ ta batse a ba ika magər tar ŋa, gər aka mewise a tar. ku mege weke a ndzah masalama ŋgar ka, aka damər ŋgar. Dedàràgawgaw gər aka wise a tar fit fetitte kweleŋ. 21 Gà Ibəranikwa ana ta gewa megemir dze a gà Filistiya, ku mege i təv masinike a guvəl a tekeɗe ya ka, fit kinehe ka, tə ndər ba nda gà Isərayel ana i təv Sul nda Zunatan a dze. 22 Gà asiŋ gà Isərayel ana tar ndeɗiŋa makàhaya ba ŋa i gà kwite ana ika ahəɗ gà Efərayim a, tə tsaràkà gà Isərayel riŋ ta ŋgìɗitse a gà Filistiya ka, tar tekeɗe tə dza bà aà medigize gà Filistiya mbaŋa. 23 BATSAH kwa ŋa a mbala aà gà Isərayel a pat ŋa ata. Medəgize ana gà Isərayel tə dəgàz gà Filistiya ya ka, kwàts i Bet-Aveŋ a.

Məpàla ahəm Sul ana ndaka vatwa ŋa tsiye

24 A pat ŋa ata ka, gà Isərayel tàa sewer are ka, hinne, fit tàa ya ya ba. Aɗaba Sul aka vəl tar mezelme. Aɗaba Sul a gwa akahər ata ka: « Mezelme mege ika gər wele ana a zəme a ɗaf pat za mediɗe ya, say na, Yàa pəl bà ga aà gà ɓəzla mene are ga ya dzèkwiŋ . » Agəra taŋa na wura aka zəm ɗaf ilik i liwiŋ gà mburma ata ya tsa. 25 Gà sliwdze fit tserdze tə̀ ndzehà a kusak ka, gà amùm ndwə̀rùɗwe i bəra i dala i fata. 26 I təv ana gà sliwdze tə ndzeha a kusak ata ya ka, ta ŋgata à gà amùm riŋ ka, ndwə̀rùɗrùɗ i bəra. Ama wura ilik aka mendzer tsa. Aɗaba tə zàzàm ta ge magəɗa ka, a məvəla mezelme ana Sula vəl a tar a. 27 Zunatan ka, ŋgat riŋ tsa na dede ŋgar a vəl mezelme a gà sliwdze aà mazəma duwa ya. Zunatan a zla zəva ŋgar ata ihər ihər a, a dzak ahəm ŋa a amùm a ndzàhara iɗəm a ka amùm ihər a mendzèr ka, a ŋgat ndzəɗa kùɗa. 28 I dəba ŋa ya wura ilik i liwiŋ gà sliwdze ya a gwaɗar: « Tsir yak aka mbaɗa a gà sliwdze a gwaɗa tar ka, « Mezelme ika gər wele ana a zeme a duwa mbakum a . » Aɗaba taŋa, gà sliwdze ka, tàa yàyà ba. 29 Zunatan a gwa: « Dede gà ka, a zlara mesewere are a kwite ya. Pərum ahər kwaŋ, Yàa ŋgat ndzəɗa aɗaba ana i mendzer amùm aaha zaakwa ya. 30 Nda ndzer ana gà sliwdze tə zəm dukw ana tə lahar i bəra gà ɓəzla mene are tar ana, ki mbekwe a a gà Filistiya dzena a ze a dər naha kinehe ya tsiye? » 31 Pat ŋa ata ka, ta bats gà Filistiya ka, daga ara i Mikmas a ndisl a Ayyalun. Gà sliwdze fit ka, tàa yàyà ba kwèndèhndèh fit kweleŋ. 32 Ta ndabaya aka gà gənaw tar ana gà ɓəza ŋa ya, ta gasaya tar. Gà awak, gà təmaŋ, gà sla nda gà dàgal sla tə zlayar ɗa a fata. Ta papaɗaya ka, i təv ata tə zlayar ɗa ya. Məmbəz ŋa a zlalaya, te ndzàka ya gà limana tar. 33 Ta mar a dukw ata a Sul ta gwaɗar: « Pər ahər kwaŋ gà sliwdze tàa ge bakal nda təv BATSAH kwa ŋa nda məpapaɗa slu ata nda məmbəz ŋa dze ya . » Sul a gwa: « Kàa ɓəlum aka məpala ahəm, tapaslùmara batsah kur a təv ga ya, kinehe ŋa ata . » 34 I fata ya ka, Sul a gwa asa: « Dum a təv gà sliwdze fit kə̀ gwaɗum a tar ka, ku mege weke magə̀sara sla ŋgar a, kige tsa təmaŋ ŋgar a, ki betsekwa ŋa i faha, ki pepeɗe kwa i fata fit, kərga taŋa na ki gekwa dite bakal kwa a pile a i təv BATSAH kwa ŋa ya, agər a məpapaɗa gà dukw ata nda məmbəz ŋa dze ya. Ndaavəɗ ŋa ata ka, ku weke ika magər gà sliwdze ya a gəsara sla ya nda ahər ŋgar ŋa aà mekiɗe i fata, i təv ata. 35 Sul a ge təv məbatsa aaka gà duwa a BATSAH kwa ŋa. Taŋa na malahalah təv məbatsa dukw ana Sul a ge a BATSAH kwa ŋa ya. 36 Sul a gwa: « Tarakwa ndaavəɗ ŋa aaha mbakum a aka gà Filistiya, duŋwakwa tar ndisl a mèkwède. Ka ta zàkwaha a wura ilik tsa . » Gà sliwdze ta gwa: « Ge dukw ana gəzləŋ yak a waya ya fit. » I fata ya ka, mala məbatsa duwa a BATSAH kwa ŋa a gwa: « Zalakwa aba a Mbulum dzekwiŋ. » 37 Sul a zal aba a Mbulum a gwa: « I sle a à mede aaha aka gà Filistiya ya? Wànà ki dze a tar ahər gà Isərayel a? » Ama a pat ŋa ata ka, aka fafəl a tar tsa. 38 Sul a gwaɗa a gà Əbay: « Sərəkum ara a faha ya, kurum gà gər gà sliwdze. Pərum ahər dite ka sərum i təv Dukula ya na kə gekwa bakal mbakum a. 39 Aɗaba BATSAH kwa ŋa riŋ nda are, mala məmbalà a gà Isərayel. Ku mege Zunatan kəla gà tekeɗe na aka ge dukw ana ŋgwal ŋa tsiye ka, ti sèwère are biy məməta. Ika magər gà sliwdze ata i təv ŋgar i fata ya ka, wura aka fafəlar aaka tsa . » 40 A gwaɗa a gà Isərayel: « Ndzùm a təv ilik ŋa, mə̀r nda kəla ga Zunatan tekeɗe mìi ndze a ndaka tseke ŋgiɗ . » Gà Isərayel ta gwaɗa a Sul: « Ge dukw ana a dak a gər lele ya . » 41 Sul a gwaɗa a BATSAH kwa ŋa: « kər Mbulum gà Isərayel, pat a ndzer. » Tsàmka, a pala gà Zunatan nda Sul. Gà Isərayel ti ndze aɗəm a bakal ŋa tsa. 42 Sul a gwa: « gwùm tsaatsa, wànà weke na ika magər mə̀r nda kəla ga Zunatan a? » Tsaatsa ata a gəs Zunatan. 43 Sul a gwaɗa a Zunatan: « ɗemiŋ dukw ana ki ge ya? » Zunatan a ɗamar, a gwaɗar: « Nda zəva ana à iye ihər a na i mə̀ndzer dər amùm a. Iye naha Yàa tsə̀nah ba aà məməta. » 44 Dite Sul a gwaɗar aaka, « Mbulum mə viliŋ batsah mesewere are nà kər, kàa mət tsiye Zunatan! » 45 Gà sliwdze Sul ta gwaɗar: « Dukula! Zunatan ka, a mə̀te a ya? Diydiy a ge a ba tsa. Ŋgat na a be a gà Isərayel a. BATSAH kwa ŋa riŋ nda are, həmbəz ŋgar ilik a diɗe a a bəɗ tsa. Aɗaba Mbulum a ge megemir nda ŋgat na i huɗ pat aaha mbakum a. » kərga taŋa ya na gà mburma ta be a à Zunatan i məməta ya. 46 Sul a məsak aà màzàzàma gà Filistiya, tə da ba a ma. 47 I təv ana Sul a ge Əbay a ndza aka təv mendze ŋgar a ka, a dzəba aà mege guvəl aà gà ɓəzla mene are ŋgar ana ta mbeyer aaha ya fit tserdze. A ge guvəl aà gà Muwabiya, aà gà Ammuniya, aà gà Edumiya, aà gà Əbay gà Tsubiya dite aà gà Filistiya mbaŋa. I təv guvəl ana a gewa ya fit tserdze ya ka, a mbawa a tar. 48 A pat aà ndzəɗa ŋgar nda məbatsa gà Elimelek, a be a gà Isərayel ihər gà mburma ana tə dùŋ tar piŋŋa ya. 49 Gà ɓəza Sul ka, makər: Zunatan, Yisivi dite Malikisuwa. Gà dəm ŋgar tekeɗe sula: Malkwara ka, Mərab, kudər ŋgar tekeɗe ka, Mikal. 50 Zləm məkəs ŋgar ka, Ahinuwam dəm Ahimas. Zləm Əbay gà sliwdze ŋgar ka, Abiner, kəla Ner damər dede Sul. 51 Kis tsir Sul nda Ner tsir Abiner ka, tar gà ɓəza Abiyel. 52 I huɗ mandza a bəra Sul a ka, ta gewa aba guvəl nda gà Filistiya hiywe. Gà mburma ana tar gà ɓəzla ndzəɗa nda gà na tə sər mege guvəl hinne ya ka, a newa a tar gà sliwdze ŋgar.