1 Samiyel 15

Masula bakal Sul

1 Samiyel a gwaɗa a Sul, iye tsiye na BATSAH kwa ŋa a sləraha iye aka mandza aka kər a mal na dite ka ne Əbay ika magər gà mburma ŋgar gà Isərayel a? Dza zləm a dukw ana BATSAH kwa ŋa a tsikik a ya. 2 Araha na BATSAH kwa ŋa mala aka miɗ guvəl gà Isərayel a tsik a gwa ya: « Aka mitsiŋ gər tsa na dukw ana gà Elimelek ta ge a gà Isərayel ika vatwa ana ti dara ika ahəɗ gà Ezipt a ya. » 3 Dum kinehe kə gwim guvəl nda gà Elimelek, batsum, duŋ tar fit, duwa ilik ma ti zaha tsa. Ka te be a wura ilik nda are tsa asa. ku mege gà asləka, gà məkəs, gà ɓəza, kəla ndirkiz ana a se a awah mba ya, sla tar, gà təmaŋ tar, gà zlìgwèmè tar nda gà hezweŋe tar fit. 4 Sul a zal a gà sliwdze a ɗama tar i Talim. Tar ka, dəbuw dərməka sula. (200:000) na gà mburma ana ti de a guvəl nda sik a. Debuw kurwa (10:000) gà mburma ana i Yahuda ya. 5 Sul a da a tar aka ahəɗ gà Elimelek. A dza maŋgwaɓa, tə̀ŋ a həndək aaha a tar ika varavada i tùlwah. 6 A gwaɗa a gà Kiniya, sərəkum aà gà Elimelek a kətsah. I tə̀ dzèya akaba a kurum a fit nda gà tar tsa. Aɗaba ana kurum kàa, kə gwim ŋgwal à gà Isərayel fit a, dukw ana a da mə̀r gər akahər ana mìi dara ika ahəɗ Ezipt a. Gà Kiniya tə dara ika magər gà Elimelek a. 7 Gà Sul nda gà sliwdze ŋgar ta bats gà Elimelek ka, tsikw ara i Hawila ya ndisl a Sur ana ika tseke are pat ana a mbizere i Ezipt a ya. 8 A gəs Agag Əbay tar nda are, aka kəɗ tsa, dite a bats gà asiŋ a aaha slìrnèh nda masalama. 9 Ama gà Sul nda gà sliwdze ŋgar ta be a a Agag. Gà bàba gà sla ana gà ŋgwal ŋa ya, nda gà təmaŋ ana gà magala ŋa ya nda gà awak ana gà magala lele ya nda gà ŋgwal gà duwa ka fit, ta waya məbatsa tar fit tsa ka,dite asa ka, ta waya manəsa dər tsa, ta beye a a tar. Ta bats ɗekɗek ka, gà gənaw ana gà magala ŋa tsa zlirtəwtəw ti sle duwa tsiye pəra.

BATSAH kwa ŋa a ye Sul i Əbay a

10 I fata ya ka, BATSAH kwa ŋa a fafəl a Samiyel a gwaɗar: 11 « I sər ndeɗiŋ a ka, i tike Sul a Əbay tsa, aɗaba ana riŋ a mbiɗiŋ dəba, a ɓəl aka məpala ahəm ga ya. » I fata ya ka, a tsəɓ a Samiyel, hiyup a hama aaha a BATSAH kwa ŋa. 12 Samiyel a piɗeke i mèkwède hedwe ka, a hitse a da aà mata maləma akaba nda Sul. Ta gwaɗara a Samiyel a ka, Sul aka da a Karmel, aà mehitse aà kur dite ka gà mburma ta zləbawa dər. A mara a, a dara a ka, ndaka vatwa diriŋ ana a da a Gilgal a. 13 Samiyel a da a təv Sul, Sul a ŋgatar ka, a ger wusa a gwaɗar: BATSAH kwa ŋa məpìsek ahəm, Yàa tsarakar dər a BATSAH kwa ŋa dukw ana a tsikiŋ aà mege ya. 14 Samiyel a tsam ahər a gwaɗar: « Matuwa aba gà təmaŋ nda sla, gà gənaw wara na a ɗera à iye ya? » 15 Sul a gwaɗar: tə ndzàk ara ka, aà gà Elimelekiya ya. Aɗaba gà sliwdze tə ndzə̀kabara iɗəm i liwiŋ gà ŋgwal gà təmaŋ nda sla gà gənaw tar a. Aà ti te batse a tə dulaha a BATSAH kwa ŋa Mbulum yak dite gà asiŋ a aaha ka, mìi bats a fit iɗəm a. 16 Samiyel a gwaɗa a Sul: « Mə̀sak a bazlam aka, araha i tsikik a dukw ana BATSAH kwa ŋa a tsikiŋ a i huɗ həvəɗ aaha ya. » Sul a gwaɗar aaka, « fafəl » 17 Samiyel a gwaɗar: « aka na ka, pər a ba yak, kər kəlah ŋa ya ana wànà kàa ne Əbay i gwala gà Isərayel tsiye? Wànà BATSAH kwa ŋa aka dza aka kər a mal, aka ne a kər Əbay gà Isərayel tsiye. 18 BATSAH kwa ŋa a slər kər nda magwaɗak ka, bats gà Elimelek gà ɓəzla bakal ata, ki ge a tar guvəl haa ki betse a tar. 19 Aàla dziye na ka dza zləm a BATSAH kwa ŋa tsiye. Aàla dziye na kàyà ba aka gà limana ata, ki ge Bakal nda təv BATSAH kwa ŋa ya. » 20 Sul a gwaɗa a Samiyel: « Yàa tsarakar dər a BATSAH kwa ŋa lele, Yàa zàzàm vatwa ana a ɗifiŋ dər a, a slər dər iye ya. Yàa gəsara Agag Əbay gà Elimelek a, Yàa bats gà Elimelek ŋa fìt. 21 Ama gà sliwdze tə ndzək i liwiŋ gà dukw ana tə ndzàkàha aà tar a, gà ŋgwal gà təmaŋ nda gà ŋgwal gà sla. Ta pala iɗəm a ka, aà məbatsa à BATSAH kwa ŋa Mbulum yak i Gilgal a. A da dər na mìi betse a gà dukw ata fit a zləmana ya nda zləm BATSAH kwa ŋa . » 22 Samiyel a gwaɗar: « Wànà BATSAH kwa ŋa a waya ana gà məbatsa duwa nda madula duwa fit kweleŋ nda gà asiŋ gà dukw ana gà mburma ta vəlawa a Mbulum a, ika nda màzàzàma bazlam ŋgar a ya? Nda ndzer, araha ka, màzàzàmà bazlam ŋgar ka, a za dər məbatsa ŋgwal gà gənaw, mahənar aà gər a bəɗ, tekeɗe a za dər, madular gà təv məŋgəl gà bàba gà hàgwalà. 23 Haya araha ka, meniwe mege dukw ana Mbulum a tsik a ka, kalkal wele ana a da a mahəram a. Ŋgwal ŋa tsa kalkal mazambaɗa aà magəla aà gər aka Mbulum nda ga dukw ana gà mburma ti newa dər Mbulum tar a. Kàa niw aka məpala ahəm BATSAH kwa ŋa, a niw kər a mbaŋa. Kər kinehe ka, ki ti ne a Əbay asa tsa. » 24 I fata ya ka, Sul a gwaɗa a Samiyel: « Yàa ge bakal, Yàa ge dukw ana BATSAH kwa ŋa a gwaɗəŋ ge ya tsa, nda mifefile yak ŋa dze. I ge magəɗa ka, a gà mburma. Yàa ge dukw ana ta waya ya. 25 Kamkam kinehe ka, pə̀liŋ à bakal ga te, dite kà marà a təv ga ya. Dite ka tama na i dze a gurmits a BATSAH kwa ŋa ya. » 26 Samiyel a gwaɗa a Sul: « Awaŋ i me a à təv yak tsa. Aɗaba ana kàa niw bazlam BATSAH kwa ŋa. Dite BATSAH kwa ŋa a ya iɗəm kər i Əbay a, ki ge a Əbay gà Isərayel asa tsa. » 27 I təv ana Samiyel a mbiɗe a aba aà mede ya ka, ədaw Sul a gəs i ahəm tumbulum a, ndzàɗ a sasar ba ahər. 28 Samiyel a gwaɗar: « BATSAH kwa ŋa a sese a ikaba Əbay gà Isərayel a aà mazla iɗəm kər a mbakum. A vile a Əbay ata ka, à wele ana a za kər a. Wele ana ŋgwal ŋa lele a za dər kər a. 29 Mbulum ana mala ndzəɗa ika magər gà Isərayel ka, a sasawa parsa tsa, Dite asa ka, a mbə̀ɗawà aà madzala gà gər ŋgar tsa. Aɗaba ŋgat ka, kamala mburma ya a mbiɗe a madzala gà gər ŋgar tə tsa. » 30 Sul a gwaɗar aaka asa: « Yàa ge bakal, i gək kamkam, viliŋ mezlibe ika miɗ gà bàba ŋana i kwite ga ya te, dite ika miɗ gà Isərayel a mbaŋa. Marà a təv ga ya dite i ti dze a gurmits a bəɗ a BATSAH kwa ŋa Mbulum yak. » 31 Samiyel a dzəba aà màzàzàma Sul dite Sul a dza gurmits a bəɗ a BATSAH kwa ŋa. 32 I dəba ŋa ya Samiyel a gwa: « Slìrə̀miŋ ara Agag Əbay gà Elimelek a. » I fata ya ka, Agag a daha aka miɗ ŋgar ka, nda gà maŋgayaba. A dzala i gər ŋgar ka, a gwa nda ndzer ka, i mite a asa tsa 33 Samiyel a gwaɗar: « kamala ana masalama yak a ndzək ika ba gà məkəs nda gà ɓəza tar a ka, kamala taŋa ya mbaŋa na ta kəɗ ki dwìme a ika ba nda gà mama yak a. Dite a kəɗ Agag ika miɗ ga ana ta hamawà iɗəm a BATSAH kwa ŋa i fata i Gilgal. 34 Dite Samiyel a da a Rama, Sul a tsəl a da a ma ŋgar a Giveya. 35 Samiyel aka marà à məpəra Sul a ilik asa tsa ndisl a məməta ŋgar. Aɗaba na Samiyel aka tuwa aba Sul a, aɗaba na BATSAH kwa ŋa a gwa i sər ndeɗiŋa ka, i və̀lar Əbay ika magər gà Isərayel tsiye.