1 Samiyel 16

Mbulum a zlà Dawda aà mene Əbay

1 BATSAH kwa ŋa a gwaɗa a Samiyel haa ndeɗime dziye na ki mə̀sake a mazlàŋà Sul dziye? Iye ŋa na i ye iɗəm ŋgat a. Aɗaba a sle a mekwere gà Isərayel asa tsa. Zla mbukum mal yak, ka rah aɗəm a mal, ka da. I sləra kər a bəra Yese ana i Betelehem a, aɗaba Yàa ŋgat Əbay ga na i waya mene Əbay ya, i liwiŋ gà ɓəza ŋgar. 2 Samiyel a zlaŋa a gwa: « I ge a dzena meme na dite i de a ya? Aɗaba Sul aka tə̀ tsaraka ka, a te kiɗe a iye. » BATSAH kwa ŋa a gwaɗar: « Ki gə̀se a dər səɓə̀l sla, dite ki gweɗere a i dara ka, aà makəɗar dukw taf a BATSAH kwa ŋa ya. » 3 Zalar à megirive madəva akwa makə̀ɗà dukw ata a Yese. Iye ŋa i ti ɗifeke a a dukw ana ki ta ge ya. Dza aaka ka, a mal na aka Əbay ana i ti ɗifeke a dər a. 4 Samiyel a ge dukw ana BATSAH kwa ŋa a tsiker a dite a da a Betelehem. Gà bàba gà mburma ana i kwite ata ya, ta ŋgatar tsara ka, tə dzəba aà medzedzere ika miɗ ŋgar, ta wiz ahər, ta gwaɗar: madara yak aaha ya ana a ɗife a mə̀r a ana aà dukw maŋgayaba ibam a? 5 Samiyel a gwaɗa tar aaka, « Haya i dara ka, aà makəɗar dukw taf a BATSAH kwa ŋa ya. Nwim aba gà tsəɗaŋŋa ŋa, kà dumara kà tàkwa aka ba nda ga iye à megirive makəɗa dukw ata. » Samiyel a gwaɗa a gà Yese nda gà ɓəza ŋgar, nwim gà tsəɗaŋŋa ŋa i zele a kurum a aà makəɗa dukw ata. 6 I təv ana gà Yese nda gà ɓəza ŋgar ti ndzeha ya ka, Samiyel a ŋgat a à Eliyav a zlaŋa a gwa, a ge a ka, wele ana BATSAH kwa ŋa a zla ya na naha ika miɗ ŋgar a. 7 Ama BATSAH kwa ŋa a gwaɗa a Samiyel kà zlaŋa aka zubul ŋgar nda metsehine ŋgar tsa. Aɗaba ŋgat tsa na i zla ya, I fire a ka, aà dukw ana mburma a ŋgetere a ya tsa. Gà mburma ta ge a metsehe ka, a dukw ana are tar a ŋgatar a. Ama Iye BATSAH kwa ŋa ka, i fər a ka, a huɗ gəzləŋ a ana. 8 Yese a zala a Abinadab, a da à ŋgat aka miɗ Samiyel. Samiyel a gwaɗar BATSAH kwa ŋa aka zla wele aaha tsidze. 9 Yese a daha a Samma, dite Samiyel a gwaɗar: BATSAH kwa ŋa aka zla wele aaha ɓav tsa asa. 10 Kamala taŋa ya na Yese a daya aà gà asiŋ gà ɓəza ŋgar aaha təsəla ya aka miɗ Samiyel a. Dite Samiyel a gwaɗa Yese, BATSAH kwa ŋa aka zla wura i liwiŋ tar a ilik tsidze. 11 I dəba ŋa ya Samiyel a gwaɗa a Yese: Gà ɓəza yak ŋgiɗ riŋ asa tsiye? Dite Yese a gwaɗar: Na a zeha riŋ ka, kudər ŋana, ŋgat ka, a kəvawa gà təmaŋ. I fata ya Samiyel a gwaɗa a Yese: Slər aaka mburma aɗaba ki sle a madzàkwa ba aà mazəma ɗaf tsa na aka dara zukw tsiye! 12 Yese a slər aaka mburma, a dara. Tsaatsa ka, ŋgat a ndza ka, hazlzla, bəzlakəka i are ya. BATSAH kwa ŋa a gwaɗa a Samiyel hitse a mbulum dza aaka a mal, naka ka, ŋgat ŋa kùɗa. 13 Samiyel a zla mbukum mal ŋgar dite a dza aaka aka miɗ gà damər ŋgar a fata. Mezite mesife BATSAH kwa ŋa a dakara aka Dawda a kuɗa, daga aà pat ŋa ata ya da dər aka miɗ. I dəba ŋa ya Samiyel a hitse a mbəɗ gər a ma a Rama.

Dawda a da à megemir a bəra Sul

14 Mezite mesife BATSAH kwa ŋa a mə̀sak a Sul. Dite BATSAH kwa ŋa a vəl ahər vatwa a gà setene aà tə daha tə sawerar are. 15 Gà ɓəzla megemir Sul ta gwaɗar: Mìi sər, araha Mbulum na a vəl a kər vatwa a gà setene aà tə sawerak are ya. 16 Batsah mə̀r ŋa fafəl kwaŋ, mə̀r ɗa ika miɗ yak, mìi yahakara mburma ya ilik, wele ana a sər medze gandzavəl a. A dzewe a ka, aka təv ana setene ata aka dzèba a kər a, dite na a geke a ŋgulum a. 17 Sul a gwaɗa tar aaka a gà ɓəzla megemir ŋgar ata: Kaɗəŋ yahumiŋ ara wele ana a sər medzeŋa lele ya. Kà slwirimiŋ ara. 18 Ilik i liwiŋ gà ɓəzla megemir ŋgar ata ya, a gwa: Araha Yàa ŋgat kəla Yese gà Betelehem. Kəla ŋa a sər medze ŋa. Ŋgat asa ka, batsah mala guvəl, a fafəlawa tekeɗe ka lele, dite ndzəɗa ŋa hinne asa. Bəzlakəka mbaŋa BATSAH kwa ŋa mandza ŋa nda ŋgat. 19 Sul a slər gà ɓəzla sik ŋgar aà tə ta gwaɗa a Yese ka, sliriŋ ara kəla yak Dawda ana a kə̀vawa gà təmaŋ a te. 20 Yese a zla hezweŋe a dza aka gà peŋ^ª nda gà guzum i kiwa kwiye, nda gà kəla awak, dite a slərar aaha a Sul nda ahər kəla ŋgar Dawda. 21 Dawda a ndzeha aka miɗ Sul ka, Sul a waya ŋgat hinne, a ne dər mala mandzə̀kar dukw ahər. 22 Sul a slər mburma aà te daha ta gwaɗa a Yese ka, kamkam i hamak məsakiŋ a Dawda te, aɗaba a tsahən à iye. 23 I təv ana setene ata a dzawa ba aà mesewere are a Sul aka, Dawda a zlàwa gandzavəl a dzèwar, i fata ya ka, Sul a sifawa zayya, a gewar ŋgulum a mə̀sakàwa dər i mendze zaakwa ya kùɗa.