Yesuwa 24

Magəsa mazla ana ta gəs i Sehem a

1 Yesuwa a yaha gər a gà gwala gà Isərayel fit tserdze a Sehem. A zal ka, a gà bàba ŋana, gà əbay tar, gà ɓəzla mege seriye tar, dite a gà ɓəzla aka miɗ gà mayahaba gər gà mburma a. Tə daraha te hitse aka miɗ Mbulum. 2 Yesuwa a gwaɗa a gà mayahaba gər gà mburma ata fit tserdze ya: « Araha na dukw ana BATSAH kwa ŋa, Mbulum gà Isərayel a gwa ya: ‹ Akahər ata ka, gà bàba gà tsir kurum, Terah, tsir gà Abəraham nda Nahur, tə ndzawa ka, ika tseke lide dulwa Efrat ŋgiɗ, dite tə dzawa gurmits a bəɗ ka, a gà mbulum ŋgiɗ. 3 Yàa zlara batsah tsir kurum Abəraham ika ahəɗ ŋgiɗ ana ika tseke duluv Efrat ŋgiɗ a, dite yàa suwaya aà ŋgat ika ahəɗ kwite Kanana fit tserdze. Yàa səkah aà gà gwala ŋgar, yàa vəlar Izak, 4 yàa dza a Izak gà Zakup nda Isuwa. Yàa vəl ahəɗ kwite ana ika gər kwite Seyir a, a Isuwa aà təv meleke ŋgar.

Ama gà Zakup nda gà ɓəza ŋgar ka, tàa tar aka ahəɗ Ezipt. 5 Yàa slər gà Musa nda Haruna, dite yàa mba aà Ezipt nda gà dukw mesewere are pampam. I dəba ŋa ya ka, yàa ndzəkara iɗəm kurum ika ahəɗ kwite ata ya. 6 I dəba ana ì ndzəkara iɗəm gà tsir kurum i Ezipt ya, ti ndzera aka batsah duluv Awasl ka, gà Eziptiya tə zazamara tar a tsikw a fata ya, nda gà muta piris nda gà ɓəzla matsala aaka ŋa ya. 7 Tsam ka, gà tsir kurum tə zeliŋ àba, a iye BATSAH kurum ŋa, dite yàa tike luvuŋ ziŋziŋ aka magər gà mburma kurum nda gà Eziptiya. Yàa pəlara a yam duluv ana a hitse dzeŋ a, aka gər tar a, a kaha tar. Are kurum aka ŋgat a dukw ana i ge aà gà Eziptiya ya. I dəba ŋa ya ka, kàa ndzum i dala i kusak hinne.^*

8 I dəba ŋa ya asa ka, yàa lakara kurum aka ahəɗ gà Amuriya ana tə ndzawa ika lide Yurdan ŋgiɗ a. Tàa ge a kurum guvəl, yàa dza tar ahər a kurum. Kàa zlum ahəɗ kwite tar, yàa dzeye aà tar ika miɗ kurum a. 9 Balak kəla Tsippur əbay gà Muwabiya aka hadzal ba aà mege guvəl aà gà Isərayel. Aka zalaha a Balaam kəla Beyur, aà madara məvəl a kurum mezelme. 10 Ama yàa niw mandza zləm a dukw ana Balaam a tsikeye a ya. Ama a piseye a kurum ka, ahəm seyiŋ ivaɗ, dite asa ka, yàa beye a kurum i ndzəɗa ahər Balak a. ^*

11 Kàa tsalum i dulwa Yurdan a, dite kàa ndzwim a Yeriku tsim. Gà mburma ana tar mandzaŋa i Yeriku a, tàa ge aà kurum guvəl, gà Amuriya, gà Perizziya, gà Kananiya, gà Hittiya, gà Girgasiya, gà Hivviya nda gà Yebusiya. Gà mburma ata fit tserdze ya ka, yàa dza tar ahər a kurum. 12 Yàa sləraha gà bàba gà mangavavəl, aka miɗ kurum, na tə dalawa gà əbay Amuriya ata sula ya. Kà dagazum tar ka, nda gà masalama nda gà likiɗ kurum tsa. 13 Yàa vəl a kurum ahəɗ kwite ana kà tsatsəŋgum nda ahər kurum tsiye. Yàa dza a kurum gà huɗ kwite ana kà zlazlum nda ahər kurum tsiye, ama kurum mandzaŋa iɗəm. Yàa dzaya a kurum gà guvah viŋye nda gà uliviye ana kurum kà tsavayum tsiye, ama kurum riŋ i hər ki zimwimiŋa. ›

14 Kinehe ka, hənum à gər a bəɗ a BATSAH kwa ŋa, dite kə gwimer megemir terwihhwe lele, nda gəzləŋ kurum sah ilik. Dzeyum à gà mbulum ana gà bàba gà tsir kurum tə zambaɗawa dər ika lide dulwa Efrat ŋgiɗ, dite i Ezipt ya. Gwim megemir ka, a BATSAH kwa ŋa a gər ŋgar ilik. 15 Na aka tsahən aà kurum, aà mege megemir a BATSAH kwa ŋa tsəka, zlum iɗəm a mbakum, mbulum wara na kà wayum meger megemir a? Wànà a mbulum ana gà bàba gà tsir kurum tə zambaɗawa dər ika lide dulwa Efrat ŋgiɗ a ya? Kige tsa na, a gà mbulum gà Amuriya ana kurum mandza akaba ŋa ika ahəɗ kwite tar a ya? Ama mə̀r nda gà mburma ana i huɗ ga gà ya ka, mìi gere a megemir ka, a BATSAH kwa ŋa. »

16 Gà mayahaba gər gà mburma ta gwaɗar aaka: « Awaŋ, diydiy tsidze, madzala gà gər mə̀r riŋ aà məməsaka a BATSAH kwa ŋa, dite aà mege megemir a gà mbulum ŋgiɗ tsa! 17 Tsəka, BATSAH kwa ŋa, na Mbulum mə̀r a, ŋgat na a mburuɗara mə̀r, nda gà tsir mə̀r, i ɓele i Ezipt ya. Ŋgat na a geye gà bàba gà dukw mene aà mburma aà are mə̀r a, dite aka kasla mə̀r ika vatwa mə̀r ana miì da dərra ndaka magər gà mayahaba gər gà mburma ya. 18 BATSAH kwa ŋa aka dalawa gà mayahaba gər gà mburma fit ika miɗ mə̀r a, ndeyndey ŋa ka, gà Amuriya ana tə ndzawa ika ahəɗ kwite ata ya. Aɗaba taŋa, mə̀r tekeɗe ka, mìi gere a megemir a BATSAH kwa ŋa, aɗaba ŋgat na Mbulum mə̀r a. »

19 Yesuwa a gwaɗa a gà mayahaba gər gà mburma ata: « Ki slwime a aà mege megemir a BATSAH kwa ŋa tsa, aɗaba ŋgat ka, Mbulum ana tsəɗaŋŋa ya, dite ŋgat ka, sələk ŋa. A pəl a kurum a à gà segeme nda gà mege bakal kurum tsa. 20 Na kàa miyakum a BATSAH kwa ŋa, dite kì gwim a megemir a gà mbulum gà mbəlakw ka, a te mbiɗe a ba aà kurum, a te ge kurum a dukw ana ŋgwal ŋa tsiye, dite a ndzeye a aà kurum a fit, ku mege i dəba ana aka ge a kurum ŋgwal tekeɗe ya. »

21 Gà mayahaba gər gà mburma ta gwaɗar aaka a Yesuwa: « Awaŋ, mìi ge a megemir ka, a BATSAH kwa ŋa. » 22 Yesuwa a gwaɗa aaka a gà mayahaba gər gà mburma ata: « Kurum ŋa nda gər kurum, na kà nwim gà ɓəzla sida ba kurum ŋa ya, kurum ŋa na kà zlum, BATSAH kwa ŋa, aà meger megemir a. » Ta gwaɗar aaka: « Haya, mə̀r ŋa na gà ɓəzla sida ŋa ya. » 23 Yesuwa a gwaɗa a tar aaka asa: « Kinehe na kataya ka, dzeyum iɗəm à gà mbulum gà slele aaha ika magər kurum a, dite kà mbəɗum aà gəzləŋ kurum a təv BATSAH kwa ŋa, Mbulum gà Isərayel. »

24 Gà mayahaba gər gà mburma ata ta gwaɗar aaka a Yesuwa: « A BATSAH mə̀r ŋa Mbulum mə̀r ilik, na miì gere a megemir, mìi gise a ahər a ahəm a! »

25 Pat ŋa ata i Sehem, Yesuwa a gəs masla aka magər gà mayahaba gər gà mburma ata, nda BATSAH kwa ŋa. A vəl a tar gà məpala ahəm nda gà dukw ana mehitse dər ŋa ya. 26 Yesuwa a wetseye gà bazlam tar ata a huɗ wakita məpala ahəm Mbulum. A zla batsah kur, a hitse dər aà huɗ batsah dizl ɗaf, aà guva təv ana pam biy BATSAH kwa ŋa ya. 27 Yesuwa a gwaɗa a gà mayahaba gər gà mburma ata fit tserdze ya asa: « Kur aaha, a ne a ka, dukw sida kwa, aɗaba aka tsaraka gà bazlam ana BATSAH kwa ŋa a tsikeye a kwa fit tserdze ya. A ne a dukw sida ika magər kurum ka, aà ka tə ɗwim bərakəzəm a Mbulum kurum tsa. »

28 I dəba ŋa ya, Yesuwa a gwaɗa a gà mayahaba gər gà mburma, dum ba. Ku mege weke a mbəɗ gər aka ahəɗ meleke ŋgar.

Məməta Yesuwa

29 I dəba gà dukw ata ya ka, Yesuwa kəla Nun, mala meslire BATSAH kwa ŋa, a mət aà mive dərməka nda kurwa (110). 30 Ti le ŋgat aka ahəɗ ŋgar ana a ne meleke ŋgar i Timnat-Serah, ika ahəɗ ana ika gər kwite Efərayim, ndaka tseke are yam kwite Gayas a. 31 Gà Isərayel tàa ge megemir a BATSAH kwa ŋa, i huɗ mandza a bəra Yesuwa ya fit tserdze, dite i dəba məməta ŋgar a ka, tàa ge ɗa megemir i huɗ mandza a bəra gà bàba ŋana, tàa ŋgat a gà bàba gà dukw mene à mburma ana BATSAH kwa ŋa a ge nda təv gà Isərayel a tserdze.

32 Gà Isərayel ti le atasl Yusufa ana tə ndzək dərra i Ezipt ya, a Sehem a guvah ana Zakup a səkəm aà gà ɓəza Hamur mala kwite Sehem nda kur siŋgwe dərməka (100) ya. Guvah ata ka, təv meleke gà ɓəza Yusufa.

33 Eliyazar kəla Haruna a mət asa mbaŋa, ti le ŋgat aka gər diyes ana ta vəl a kəla ŋgar Pinihas ika gər kwite Efərayim a.