Yesuwa 23

Mandəvandəv bazlam Yesuwa

1 Aka ndza ka, hinne na idəba ana BATSAH kwa ŋa a vəl mesifikaba a gà Isərayel, a mebeye à tar ihər gà ɓəzla mene are tar, ana tə lawara tar a. Yesuwa ka, mandawal ŋa, aka ndza aà bəra ka, hinne. 2 I fata ya ka, Yesuwa a yaha gər a gà Isərayel fit, gà bàba tar ŋana, gà əbay tar, gà ɓəzla mege seriye tar, gà ɓəzla aka miɗ gà mayahaba gər gà mburma tar, a gwaɗa a tar: « Iye ka, mandawal ŋa, yàa ndza aà bəra ka, hinne. 3 Kàa ŋgatum a gà dukw ana fit tserdze BATSAH kurum ŋa, Mbulum kurum a ge, a gà mayahaba gər gà mburma aaha fit tserdze agəra kurum a. Aɗaba BATSAH kurum ŋa, Mbulum kurum na a ge guvəl nda ahər ŋgar ŋa, agəra kurum a. 4 Pərum ahər, yàa dzaya aba gà ahəɗ gà mburma aaha i duŋ tar a, a gwala kurum nda tsetse aà təv meleke, dite ahəɗ kwite gà mburma aaha, ti zeha aà maduŋa tar a, gəs ika Yurdan ana nda kadwa ya, tsikw aka Batsah duluv ana nda gwa ya asa mbaŋa. 5 BATSAH kurum ŋa Mbulum kurum nda gər ŋgar, a te ŋgiɗitse akaba tar, a delewe a tar ika miɗ kurum a. Ki te zlwime a ahəɗ kwite tar, kamala ana BATSAH kurum ŋa Mbulum kurum a gwa ya.

6 Mərum aba hinne, aà magəsa ahəm nda mege dər megemir ŋa, aà gà dukw ana fit tserdze mewetse ŋa i wakita məpala ahəm Musa ya. Kà ta kəzlahum ika vatwa ya, ndaka tseke ahər mezime, kige tsa ndaka tseke ahər gula tsa. 7 Kà ta gawum ba nda gà mburma ana ti zehe aka magər kurum a tsa. Kà ta ɗəvum zləm a gà mbulum tar tsa, dite kà ta mbaɗum nda zləm tar tsa asa. Kà ta dzum a tar gurmits a biye, kà ta zambaɗum a tar tsa. 8 Gəsum ba ka, aà BATSAH kurum ŋa Mbulum kurum ilik, kamala ana ki gwimera i dəba ya, haa kinehe ya.

9 BATSAH kwa ŋa aka dalawa ika miɗ kurum a gà mayahaba gər gà mburma ana hinne ya, dite tar gà ndzəɗa ŋa asa ya. Dite haa kinehe tekeɗe ka, wura aka sle aà mehitse a kurum a vatwa tsa. 10 Mburma ilik ika magər kurum a ka, a medigize a gà ɓəzla guvəl kurum dəbuw (1 000), aɗaba BATSAH kurum ŋa Mbulum, na a ge guvəl agəra kurum a, kamala ana a tsik a kurum a. 11 Gwim aba metsehe lele, wayum BATSAH kurum ŋa Mbulum kurum! 12 Na kàa mbəɗum dəba a BATSAH kurum ŋa, dite kàa gəsum ba aà gà mayahaba gər gà mburma ana ti zehe aka magər kurum a, na kàa dzakum gà dəm tar, kàa gawum ba ka, 13 sərum a dər ka: BATSAH kurum ŋa Mbulum kurum ka, a ndiɗik a gər aà madalawa gà mayahaba gər gà mburma ata, ika miɗ kurum a asa tsa. Ti ta ne aka kurum a ka, gà ɓele nda ndzarawa, gà megwiymbiɗ magazla kurum aka degwir a, nda gà adak matswasluma a kurum dər aà are. Aka mandəvandəv ŋa ka, ki ta dzeywim ba gà vatwa ika ŋgwal ahəɗ aaha BATSAH kurum ŋa Mbulum kurum a vəl a kurum a.

14 Aɗaba iye ka, i miyeke a aà gər ahəɗ aaha bise, kamala gà asiŋ gà mburma ya mbaŋa. Kinehe ka, sərum dukw aha nda gəzləŋ kurum ilik, nda mesife kurum lele: Gà dukw ana BATSAH kurum ŋa Mbulum kurum a tsikeye a kurum i sida ya, aka geye ba fit tserdze. Duwa ilik aka zeha tsa, tàa geye ba fit. 15 Kamala gà ŋgwal gà bazlam ana BATSAH kurum ŋa Mbulum kurum a tsikeye a kurum i sida ya, a geye ba fit a ka, a te vile a a kurum a mesewere are, na kàa gəsum ahər ahəm tsiye. A te dzeye a kurumiŋa, dite a gwitse ikaba a kurum ika ŋgwal ahəɗ aaha a vəl a kurum a. 16 Na kàa sasum ikaba magəsa masla BATSAH kurum ŋa Mbulum kurum ana a gwaɗa a kurum gəsum ahər ahəm a, dite ki zembeɗwim a aà gà mbulum ŋgiɗ, ki dzum a ter a gurmits a biye ka, matsəɓatsəɓ BATSAH kurum ŋa a dere a aka gər kurum a, dite a veve a aà megwitse ikaba a kurum a ika ŋgwal ahəɗ kwite aaha a vəl a kurum a tsa. »