Yesuwa 22

Məmbəɗara gər gà Ruben, Gad aha Manasse a ma ya

1 I dəba ŋa ya, Yesuwa a yaha gər a gà gwala Ruben, Gad nda gà mezehe gwala Manasse ŋgiɗ, 2 a gwaɗa a tar: « Kàa gəsum ahəm aà gà bazlam ana Musa mala meslire BATSAH kwa ŋa a tsik a kurum a tserdze, dite kàa geywim gà dukw ana i gwaɗa a kurum gwim a fit mbaŋa asa. 3 A gər batsah mendze ata ya haa mbakum ka, kàa miyakum aà gà damər kurum gà Isərayel tsa, kamala taŋa ya na kə gəsum ahəm, aà gà bazlam nda gà məpala ahəm BATSAH kurum ŋa Mbulum kurum a. 4 Araha kinehe ka, BATSAH kurum ŋa Mbulum kurum aka vəl mesifikaba a gà damər kurum, kamala ana a tsik a tar a. Kinehe ka, mbəɗum gər a ma kurum, a gà ga mekiriwe ga petek kurum, aka ahəɗ kwite kurum ana a ne biy kurum, Musa mala meslire BATSAH kwa ŋa, a vəl a kurum ndaka tseke lide Yurdan ŋgiɗ aaka ya. 5 Ama kə̀la ka, gəsum ahəm aà gà dukw ana Musa mala meslire BATSAH kwa ŋa, a gwaɗa a kurum gwim a, nda gà məpala ahəm ana a vəl a kurum a lele. Wayum BATSAH kurum ŋa Mbulum kurum, zazamum gà vatwa ŋgar, gəsum ahəm aà gà məpala ahəm ŋgar fit tserdze, gəsum ba aà ŋgat, gwim mar megemir nda gəzləŋ kurum ilik, dite nda mesife kurum fit tserdze. »

6 I dəba ŋa ya, Yesuwa a pise aka tar ahəm, dite a gwaɗa a tar dum aba, ta mbaɗa gər a gà ga mekiriwe ga petek tar. 7 Musa aka vəl ahəɗ Basan ana ika lide Yurdan ŋgiɗ ana nda kadwa ya, a mezehe gà gwala Manasse ŋgiɗ. A mezehe gwala Manasse ŋgiɗ aaha ka, Yesuwa a vəl tar ahəɗ ana ika lide Yurdan ŋgiɗ ana nda gwa ya, ika magər gà damər tar. Akahər ana Yesuwa a gwaɗa a tar, dum aba ya ka, a pise tar ahəm. 8 I dəba ŋa ya, a gwaɗa a tar: « Mbəɗum gər a gà mekiriwe ga petek kurum, nda gà limana hinne, nda gà dukw gənaw hinne, nda gà ndzemde məvəɗa kur siŋgwe, nda gà gura, nda gà virzegene, nda gà zara, dite nda gà petek hinne. Dzayum aba gà limana ata kà ndzəkum aà gà ɓəzla mane are kurum a, nda gà damər kurum gà Isərayel. »

Təv madula aaka duwa a Mbulum ana aà guva Yurdan a

9 I dəbaŋa ya, gà gwala Ruben, gwala Gad, dite nda mezehe gwala Manasse ŋgiɗ aaha, ta məsak aà gà Isərayel i Silu ika ahəɗ kwite Kanana. Ta mbəɗ gər aka ahəɗ kwite Galaad ana a ne təv meleke tar ana ta vəl a tar, kamala ana BATSAH kwa ŋa, a tsik nda ahər Musa ya. 10 Akahər ana gà gwala Ruben, Gad, àha nda mezehe gà gwala Manasse ŋgiɗ aaha ti ndze aà guva Yurdan nda tseke ahəɗ kwite Kanana ya ka, tə zlazl batsah təv madula aaka duwa a Mbulum ɗihim, bise aà guva Yurdan a fata.

11 Gà Isərayel tə tsaraka ta gwa la ka: « Gà gwala Ruben, Gad nda mezehe gà gwala Manasse ana tə ndzawa nda kadwa Yurdan a ka, tàa zlazl təv madula aaka duwa a Mbulum aà guva Yurdan ndaka tseke lide mə̀r, ika ahəɗ kwite Kanana. » 12 I təv ana gà Isərayel tə tsaraka dukw ata ya ka, gà Isərayel fit tserdze ti yahaba gər a Silu aà mada mege à tar guvəl.

13 Gà Isərayel tə slər Pinihas kəla mala məbatsa duwa a Mbulum Eliyazar a təv gà gwala Ruben, Gad àha nda mezehe gwala Manasse ana ika ahəɗ kwite Galaad a, 14 gà əbay kurwa, ilik kəla aà gwala, tə laka ŋgat, tar ka gà ɓəzla ga, na ika magər gà gwala gà Isərayel a. 15 Tə da a təv gà gwala Ruben, Gad, àha nda mezehe gà gwala Manasse ana tar ika ahəɗ kwite Galaad a, ta gwaɗa a tar: 16 « Araha na gà mayahaba gər gà mburma BATSAH kwa ŋa ta gwa ya:

‹ Aàla na ki gwim batsah bakal nda təv Mbulum gà Isərayel dze ya? Dite aàla na kà wayum mesirike diriŋ aà BATSAH kwa ŋa ya ya? Mazlazla təv madula aaka duwa a Mbulum aaha kà zlazlum a ka, kà tsalum aba ka, a segeme a gər nda təv ŋgar na mbakum a. 17 I Pehur ka, kàa gekwa bakal, batsah mesewere are ana a dəɗ aka gà mayahaba gər gà mburma BATSAH kwa ŋa ya^*. Dite haa mbakum tekeɗe ka, kàa barakwa aba dukw zlaŋgatsak ŋa ya tsa. Wànà taŋa dze ana a slekwe aà are tsa hiywe ya? 18 Dite mbakum ka, kurum kà wayum mesirike a diriŋ aà BATSAH kwa ŋa ya! Na mbakum kàa tsalum aba a segeme a gər nda təv ŋgar ka, ndidwe ka, a ge a matsəɓatsəɓ ka, aka gər gà Isərayel fit tserdze. 19 Na kàa fərum, biy tsa ahəɗ kwite kurum dukw zlaŋgatsak ka, mbəɗumara gər aka ahəɗ kwite BATSAH kwa ŋa ya, a təv ana ga petek ŋgar iɗəm a, dite kà ndzum ika magər mə̀r. Ama kà tə tsalum aba a segeme a gər, nda təv BATSAH kwa ŋa, dite nda təv mə̀r, nda mazlazla àba təv madula aaka duwa a Mbulum ŋgiɗ pam, aà biy BATSAH kwa ŋa Mbulum kwa ya tsa. 20 Akahər ana Akan kəla Zerah a ge batsah bakal nda təv gà dukw ana biy medzeye dər iɗəm a ka, matsəɓatsəɓ BATSAH kwa ŋa, aka vəl mesewere are a gà mayahaba gər gà Isərayel fit tserdze. Ŋgat ilik tsa na a mət agəra dukw bakal ŋgar ata ya^*. › »

21 Gà mburma ana i gwala Ruben, Gad a, nda mezehe gwala Manasse ya, ta gwaɗa a tar aaka a gà ɓəzla ga ata ika magər gà gwala gà Isərayel a:

22 « BATSAH kwa ŋa ka, Mbulum ana ika gər gà mbulum tserdze ya. Nda ndzer ŋgat ka, Mbulum ana ika gər gà mbulum a. A sər agəra la na mì ge kərga naha ya. Gà Isərayel tserdze ka, tə sər asa mbaŋa. Na aka ge mì matsalaba ka, aà segeme a gər, na mì ge ka, batsah bakal nda təv BATSAH kwa ŋa ya ka, mə məsak a kwa nda mesife mbakum tsa! 23 Na mì zlazla təv madula aaka duwa à Mbulum, aà məmbəɗ a dəba a BATSAH kwa ŋa, na aka ge miì dulwe a aaka gà dukw matawala fəla ana tə dulawa ya, gà dukw taf aaha nda gà dukw matawala fəla magawuba ka, gà gər a gwa BATSAH kwa ŋa nda gər ŋgar ŋa, mə vəl à mə̀r ahər mesewere are. 24 Awaŋ ar ka, kamala taŋa ya tsa. Mì ge kamala naha ya ka, mì ge magəɗa, aɗaba mba ka, gà ɓəza kurum te ta gwaɗa a gà ɓəza mə̀r: ‹ Dukula na a ləm akaba aà kurum nda gà BATSAH kwa ŋa Mbulum gà Isərayel tsa. 25 A kurum gà gwala Ruben nda Gad, BATSAH kwa ŋa aka tike Yurdan, kamala kwiye ya aka magər kurum nda gà mə̀r a. Kurum ka, vatwa kurum riŋ aà mege megemir a BATSAH kwa ŋa tsa! › Gà biy ŋgiɗ tsa ka, gà ɓəza kurum ti te bene gà ɓəza mə̀r aà mege magəɗa a BATSAH kwa ŋa tsa.

26 Mì dza akaba ahəm aà mazlazla təv madula aaka gà dukw taf a Mbulum ka, biy madula aaka gà dukw taf matawala fəla ana tə dulawa ya, nda gà biy matawala fəla ŋgiɗ tsa. 27 Ama a ne ka, dukw sida ana ika magər mə̀r nda gà kurum a, dite ika magər gà ɓəza kwa ya, mì waya mege megemir ika miɗ BATSAH kwa ŋa, nda madza gà dukw taf matawala fəla ana tə dulawa ya, biy gà dukw taf matawala fəla ŋgiɗ, biy matawala fəla magawuba. Kamala taŋa ya, na aka miɗ mba ka, gà ɓəza kurum ti te sle a à megweɗe a a gà ɓəza mə̀r, kurum ka, ki slwim a aà mege megemir a BATSAH kwa ŋa tsiye. 28 Mì gwaɗa a ba ka, na bəla aka miɗ mba, gà mburma ti te tsike a a mə̀r a dukw ata, a mə̀r nda gà ɓəza mə̀r ka, mìi megweɗe ter a aaka ŋa: ‹ Fərum aà təv madula aaka dukw aaha a Mbulum, gà bàba gà tsir mə̀r tə zlazl a kwaŋ, a ndzikiɗ ba ka, biy BATSAH kwa ŋa. Tə zlazl ka, aà madula aaka gà dukw matawala fəla ana tə dulawa ya, kige tsa, aà madula aaka gà dukw matawala fəla ŋgiɗ tsa, ama ka, dukw sida ana ika magər mə̀r nda gà kurum a. › 29 Màa dzala aà matsala ba aà segeme a gər nda təv BATSAH kwa ŋa, dite aà məmbəɗar dəba, nda mazlazla ba təv madula aaka gà dukw taf matawala fəla ana tə dulawa ya, nda gà dukw taf, kige tsa, nda gà dukw matawala fəla ŋgiɗ pam, aà biy BATSAH kwa ŋa, Mbulum kwa ana ika miɗ mekiriwe ga petek ŋgar a tsa. »

30 I təv ana mala məbatsa duwa a Mbulum Pinihas, gà əbay ana ika magər gà mayahaba gər gà mburma ya, nda gà ɓəzla ga ana ika magər gà gwala gà Isərayel ana tə dəɗ aaka aha ya, tə tsaraka gà bazlam gà gwala Ruben nda Gad, dite nda mezehe gà gwala Manasse ata ya ka, a da a tar a gər. 31 Pinihas kəla mala məbatsa duwa a Mbulum Eliyazar a gwaɗa a tar: « Mì sər mbakum ka, BATSAH kwa ŋa riŋ mandza ŋa nda gà kwa, aɗaba kàa gwim batsah bakal nda təv ŋgar tsa. Kamala taŋa ya ka, kàa beywim aà gà Isərayel ihər BATSAH kwa ŋa ya. »

32 I dəba ŋa ya, Pinihas kəla mala məbatsa duwa a Mbulum Eliyazar nda gà əbay ana ika magər gà Isərayel a, ta məsak aà gà gwala Ruben nda Gad, tə da ika ahəɗ kwite Galaad a, ta mbəɗara gər aka ahəɗ kwite Kanana ya, dite tə ɗama dukw ana a ge ba ya a gà asiŋ gà Isərayel ŋgiɗ aha. 33 Dukw ata ka, a da gər a gà Isərayel, dite ta ge kəkaaha a Mbulum. Ta məsak aà madzala gà gər ma da a mege aà tar guvəl a, nda mazəma ahəɗ kwite ana gà gwala Ruben nda Gad mandza ŋa iɗəm a.

34 Gà gwala Ruben nda Gad ta gwa: « Təv madula aaka dukw aha Mbulum a ka, dukw sida ana a ɗifekwe a dər ka, BATSAH kwa ŋa ilik na Mbulum a. » Dite ti ɗe zləm a təv madula aaka duwa a Mbulum ata, « Mala sida. »