Gwala Lewi
Gà matawala fəla ana pampam a
1–5
Dukw matawala fəla ana tə dulawa ya
1
1 BATSAH kwa ŋa a zalarra a Musa, daga ara i ga petek mayahaba gər a, a gwaɗarra: 2 « Tsik məpala ahəm aaha gà Isərayel: ‹ Na wura ilik ika magər kurum a, aka waya məvəla dukw taf gənaw a BATSAH kwa ŋa ka, a sle a, aà mezle a ika magər gà sla ya, gà təmaŋ a, kige tsa ika magər gà awak a.3 Na a vile a ka, sla aà matawala fəla ana tə dulawa ya ka, a zle a ka, mbuluv sla ana bakal ihər tsiye. A gisere a aka biye hərmaga mada a ga petek mayahaba gər a, na dite ka, BATSAH kwa ŋa a gis a dukw taf ŋgar ata ya. 4 A tike a ahər aka gər dukw matawala fəla ana tə dulawa ya. Dite ka, BATSAH kwa ŋa ma gəs dukw taf ŋgar ata, biy məpəlar a bakal ŋgar. 5 Wele ata a vəl dukw gənaw ata ya, a zlere a ɗa aka miɗ BATSAH kwa ŋa. Gà ɓəzla məbatsa duwa a Mbulum, gà ɓəza Haruna, ta peteha à məmbəz ŋa a BATSAH kwa ŋa. I dəba ŋa ya, ta gwetsekeye à məmbəz ata aka gà tseke gà guva, təv madula aaka duwa a Mbulum, ana ika biye hərmaga ga petek mayahaba gər a. 6 Wele ata a hire a dukw gənaw ata, dite a tsele a ikaba ya. 7 I fata ya ka, gà ɓəza Haruna mala məbatsa duwa a Mbulum, ta vete a akwa aka gər təv madula aaka duwa a Mbulum, dite tì dze a aaka tsalaka aka gər akwa ata. 8 I dəba ŋa ya, gà ɓəzla məbatsa duwa a Mbulum gà ɓəza Haruna tì dze a aaka slu ata tə tsala ikaba ya, nda gər ŋa dze, nda gà təv məŋgəl ŋa, aka gər tsalaka ata, ika gər akwa ana ika təv madula aaka duwa a Mbulum a. 9 Wele ata a bere a aà gà dukw huɗ ŋa ya, nda gà mendekwiyek ŋa ya. I dəba ŋa ya kuɗa ka, mala məbatsa duwa a Mbulum ilik, a dwil a gà dukw ata tserdze ya fit akaba, aka gər təv madula aaka duwa a Mbulum. Taŋa ka, dukw matawala fəla ana tə dulawa ya, ta vakawa nda akwa, meze hədzək ŋana hwaŋŋa ya, a tsahən a BATSAH kwa ŋa.
10 Na a vile a ka, hagwala, kige tsa vugul, biy dukw taf matawala fəla ana tə dulawa ya ka, say a gisere a hagwala ya, kige tsa vugul ana bakal ihər tsiye. 11 Wele ata a zlere a ɗa ndaka tseke are yam təv madula aaka duwa a Mbulum, aka miɗ BATSAH kwa ŋa. I dəba ŋa ya, gà ɓəzla məbatsa duwa a Mbulum, gà ɓəza Haruna, ta gwetsekeye a à məmbəz ŋa aka gà tseke gà guva təv madula aaka duwa a Mbulum. 12 Wele ata a tsele a ikaba dukw gənaw ata ya, a sese a gər ŋa, àha gà təv məŋgəl ŋa. Mala məbatsa duwa a Mbulum ilik a dze a gà slu ata a aka gər tsalaka ana ihər a gise a ŋgarŋgar ika gər təv madula aaka duwa a Mbulum a. 13 Wele ata a bere a aà gà dukw huɗ ŋa ya, nda gà mendekwiyek ŋa ya. I dəba ŋa ya kuɗa ka, mala məbatsa duwa a Mbulum a pete a dərraha a BATSAH kwa ŋa, dite a dwil a fit aka gər təv madula aaka duwa a Mbulum. Taŋa ka, dukw matawala fəla ana tə dulawa ya, ta vakawa nda akwa, dite meze hədzək ŋana hwaŋŋa ya, a tsahən a BATSAH kwa ŋa.
14 Na a vile a ka, dukw taf ɗiyeŋ, biy matawala fəla ana tə dulawa ya, a BATSAH kwa ŋa ka, say a gisere a maadagwar a, kige tsa kəla huɗgum a. 15 Mala məbatsa duwa a Mbulum a de a à ɗiyeŋ ata aka miɗ təv madula aaka duwa a Mbulum, a sese a ikəka gər nda gehir a, dite a dwil a gər ŋa ata, aka təv madula aaka duwa a Mbulum. Asa ka, a tekwe a à məmbəz ŋa, aà guva təv madula aaka duwa a Mbulum. 16 A zlere a iɗəm mazlakwa ŋa ya, nda gà dukw ana iɗəm a fit, dite a ye a aka tseke təv madula aaka duwa a Mbulum, nda kadwa. Təv ata ka, tə ndawa aɗəm aà bitekwe məŋgəl ana a wulazl a. 17 A ŋgwileɗe a ikaba à ɗiyeŋ ata ya, ika magər gà gwezleviyek a, ama a sese a ikaba ya tsa. I dəba ŋa ya, mala məbatsa duwa a Mbulum a dwil a aka gər tsalaka ata akwa ihər a gise a ika gər təv madula aaka duwa a Mbulum a. Taŋa ka, dukw matawala fəla ana tə dulawa ya, ta vakawa nda akwa, meze hədzək ŋana hwaŋŋa ya, a tsahən a BATSAH kwa ŋa ›.