Mendizle
Mesewère are gà Isərayel ana i Ezipt ya
1
1 Araha na gà Isərayel ana tə da akaba aka ahəɗ Ezipt nda gà Zakup tsir tar a, ku weke nda ga ŋgar tserdze. 2 Zləm tar ka, Ruben, Simeyun, Levi, Yuda, 3 Issakar, Zabulun, Benyamin, 4 Dan, Naftali, Gad nda Aser. 5 Taŋa gà ɓəza Zakup ana a waya tar tserdze ya ka, dzik təsəla kalkal. Dite kəla ŋgar Yasufa ibam, a ndzawa riŋ ika ahəɗ Ezipt daga piŋŋe. 6 I dəba ŋa ya, gà Yasufa nda gà damər ŋgar ata tserdze ya, ta mata nda gà asiŋ gà ɓəza tar ŋa fit mbaŋa. 7 Ama gà Isərayel ata ta wuba, tə səkah hinne. Kamala taŋa ya, tə rah aka ahəɗ Ezipt. Tar ka, gà ndzəɗa ŋa hinne. 8 Aləka i dəba ŋa ya ka, ti tike aɗəm Əbay ŋgiɗ awiya ŋa ika ahəɗ Ezipt asa. ŋgat ka, a sər duwa aka gər Yasufa tsa. 9 A gwaɗa a gà mburma ŋgar: « Araha, gà gwala gà Isərayel aaha ka, tə za kwa nda mawà ba hinne, dite tar ka, gà ndzəɗa ŋa aà kwa hinne asa. 10 Na bəla aləka guvəl aka hitse ka, ta gewekwe a nda gà ɓəzla mene are kwa, ti dwiŋ a kwa ika ahəɗ aaha ya. Gekwa metsehe aɗaba tar, dite tə̀ səkah asa tsa.« 11 Aɗaba taŋa, gà Ezipt tə dza aɗəm gà Əbay, dite ta fàr aka tar ndzəɗa nda təv megemir hinne. Akahər ata ka, gà Isərayel tàa zlazl gà kəsà a Firawna, aà makàhà aɗəm gà dukw mezime. Na a zlazl kwite gà Pitum nda Ramses ka, tar. 12 Ama ku mege gà mburma gà Ezipt ta ge a ter a matawak hinne tekeɗe ka, tar tə səkah à mawà ba, tə zla təv hinne asa ivaɗ, haa gà Ezipt ta ge a tar magəɗa. 13 I fata ya ka, ta ge matawak a gà Isərayel hinne, ti ne a tar gà ɓele. 14 Ta gasaya tar aà megemir ana gà mawùràba ŋa ya, mahə̀làɓà dwaɗwa, nda megeye dzelep, dite nda gà megemir ana i gà guvah a mbaŋa. Ta fàr aka tar megemir ana mawùra ba ŋa ya, ku mege awara fit dze. Firawna a ge matawak a gà Isərayel 15 I dəba ŋa ya ka, Əbay Ezipt ata a fàfəl a gà məkəs ana tə sər are mawà kəla i liwiŋ gà Ibəranikwa ya. Zləm gà məkəs ata ka, Sifira, dite bìy ŋgiɗ aaha tekeɗe, zləm ŋgar Puwa. ºbay ata a gwaɗa a tar: 16 « I təv ana kurum riŋ ihər ki zlèkwim a gà məkəs gà Ibəranikwa aà mawà kəla ya ka, gwim metsehe lele. Na bəla tàa wa asləka ŋa ka, kuɗum iɗəm a. Na aka ge dəm ŋa ka, miyakum dər, kə kuɗum tsa, ma ndza nda mesife.« 17 Ama gà məkəs ata tə sər are mawà kəla ya ka, ta ge magəɗa a Mbulum, tàa ge dukw ana Əbay ata a tsik a tar a tsa. Ta miyak à gà ɓəza gà asləka ŋa ata mbaŋa. 18 I fata ya ka, Əbay a zal a tar, a tsam aà tar, a gwaɗa a tar: « Aàmala na kì gwim kataya, kà miyakum à gà ɓəza ana gà asləka ŋa ya ya?» 19 Gà məkəs ata tə sər are mawà kəla ya, ta gwaɗar aaka: « Gà məkəs gà Ibəranikwa ka, kamala gà məkəs kwa gà Ezipt ya tsa, aɗaba tar ka, gà ndzəɗa ŋa. ºlə̀k mə̀r ana mì zlàkawa tar aà mawà kəla ya, mìi ti dehe a ka, tàa mbər mewe.« 20 Taŋa Mbulum a gewa ŋgwal ŋa a gà məkəs ata tə sər are mawà kəla ya. Dite gà Isərayel ibam, ta ŋgat ndzəɗa, tə səkah hinne. 21 Gà məkəs ata tə sər are mawà kəla ya ka, ta gəsawa ahəm a Mbulum. Aɗaba taŋa na a vəl a tar mawà ɓəza ya mbaŋa. 22 I dəba ŋa ya ka, Firawna a fàfəl a gà mburma ŋgar tserdze, a gwaɗa a tar: « Gà ɓəza ana gà Ibəranikwa tàa wa asləka ŋa tserdze ya ka, dzawum à tar a dula Nil. Ama gà dəm ŋa ana ka, tə ndza nda gà mesife.«