Madzəba 50

1 Aləka i təv ana Yasufa a samata tsir ŋgar aka mət a ka, a kal aba a bəɗ, a tuwa hinne, a gəs aàba məməta tsir ŋgar, a ndzìwìɗer yam are. 2 I dəba ŋa ya ka, a gwaɗa a gà dàkwtar ana ta gewar megemir a: « Tə dara, ta bah mal aà məməta tsir ŋgar kamala ana ta gewa dər a.» Kamala taŋa ya, gà dàkwtar ata tə daha, ta bah mal aà məməta Zakup. 3 Ta ge megemir məbàhà mal ata ka, mehinne dzik faɗ. Gà mburma gà Ezipt tə tuwa hinne, mehinne dzik makər i dəba məbàha mal ata mbaŋa asa. 4 Aləka i təv ana tuwa ŋa ata a mət aaka ya ka, Yasufa a fàfəl a gà bàba ŋana i ga i bəra Firawna a. A gwaɗa a tar: « Kamkam, na ka wayum iye ka, dumaha, gwaɗum a Firawna ka, 5 aka na tsir gà aka à mimìte ya ka, a waya na Yàa mbəɗar i sida ya ya, i gwaɗar, i ti tike a məməta ŋgar ka, a dive ŋgar ana a le ika ahəɗ Kanan a. Ama kinehe, mi viliŋ vatwa, i de a, i ti le a məməta tsir ga ka, a fata te. Dite na Yàa le aàba ya ka, i mbiɗere a gər a.»vvvv 6 Gà mburma ata tə daha, ti tsik a Firawna ka, a gwaɗa a tarəra: « Ma daha, ma ti le tsir ŋgar kamala ana a mbaɗar i sida ya ya.» 7 Kamala taŋa ya, gà Yasufa ta mah ba, tə da aka ahəɗ Kanan aà melè tsir tar. I təv ana ti de a mba ya ka, gà bàba gà mburma ana i ga i bəra Firawna ya tserdze, tə dəɗ aka ŋgat. 8 Dite nda gà mburma ana i bəra Yasufa ŋa ya dze, nda gà damər ŋgar, dite nda gà asiŋ gà mburma i ga i bəra tsir ŋgar ŋa ya tserdze, tə da. Say gà ɓəza, nda gà dukw gənaw tar na ta miyak à tar ika ahəɗ Gusen a. 9 Mede tar ana ti de a ya ka, gà misle ŋgiɗ tə da nda puspus, gà asiŋ ŋa ibam, tə da nda gà piris, gà mburma ana tə dəɗ aka ŋgat a ka, gə̀də̀bəllà hinne.

10 Aləka ti ndze aka lide dulwa Yurdan, a təv ana tə zalar Atada ya ka, tə tuwa i fata hinne. Yasufa a tuwa tsir ŋgar ka, mehinne təsəla. 11 Gà mburma ana tar mandza ŋa ika ahəɗ Kanan a, tə samata tuwa tar ata i Atada ya ka, ta gwa: « Tuwa gà Ezipt ka, mawùràba ŋa hinne.» Aɗaba taŋa, tə zal a təv ata ka, Abel Ezipt, kamala megweɗe ya ka, tuwa gà Ezipt ana tə tuwa ika lìdè dula Yùrdan a.» 12 Gà ɓəza Zakup ta ge dər ka, kamala ana tsir tar a tsik a tar a. 13 Tə da à məməta ŋgar aka ahəɗ Kanan, tə daha, ti le ŋgat a sləlak ata i guvah Makə̀pala ya. Sləlak ata nda guvah ŋa dze ya ka, Abəraham a səkəm à Efruna kəla gà Hittiya ya. Ar ka, i təv ana tə zalar Mamre ndaka tseke pat ana a mbəzawara ya.wwww

14 I dəba ŋa ya, Yasufa a le aba tsir ŋgar a ka, ta mbəɗ gər aka ahəɗ Ezipt, nda gà damər ŋgar nda gà asiŋ gà mburma ana tə dəɗ aakaha tserdze aɗaba melè məməta tsir ŋgar a.

Yasufa a mataraha à arəv a gà damər ŋgar

15 Aləka i dəba məməta Zakup ana a mət a ka, gà damər Yasufa ta gwaɗaba ika magər tar: « Na bəla Yasufa à mèkwe a à bakal gà dukw ana ki geye kwar akahər ata ya tserdzena, meme?» Ta ge magəɗa hinne. 16 Aɗaba taŋa, tə slər mburma a təv Yasufa, a daha. Ta gwaɗar: « Aka na tsir yak a riŋ nda are ŋgar mba aka mət zukw tsiye ka, a gwaɗa a mə̀r, 17 ‘ki gweɗwim a a Yasufa ka, kamkam, pəl a mə̀r à bakal mə̀r gà damər yak, aɗaba dukw ana akahər ata mì gek ŋgwala tsiye te. « Kinehe ka, mə̀r ihər mìi gek a kamkam, pəl a mə̀r à bakal ata, aɗaba mə̀r tekeɗe, gà mburma Mbulum tsir yak ana a gəsawa ahər ahəm a mbaŋa.» Yasufa a tsaraka taŋa tsara ka, a tuwa hinne.

18 Aləka i dəba ŋa ya ka, gà damər Yasufa ata tserdze ya, tə daha a təv ŋgar kuɗa. Tə daha ka, tə dza gurmits a bəɗ aka miɗ ŋgar. Ta gwaɗar: « Kər ka, Əbay mə̀r, mə̀r gà ɓele yak.» 19 Yasufa a tsaraka kataya asa ka, a gwaɗa a tar: « Ki gwim magəɗa tsa, gà damər gà, wànà iye ya na Mbulum a, na i ge a kurum a seriye ya?» 20 Ama ka, kaɗəŋ, kurum ka, kàa gwimiŋ dukw ana ŋgwala tsiye, ama ka, Mbulum na a waya, na dite a ne à dukw ŋgwal ŋa ya ivaɗ. Aɗaba a ge dər kataya ka, dite gà mburma hinne ta mata tsa, kamala ana a ge ba kinehe ya kaɗəŋ. 21 Aɗaba taŋa, magəɗa ma ge a kurum tsidze, gà damər gà, i vile a kurum a dukw ana a sle a kurum a nda gà ɓəza kurum a tserdze.» Kamala taŋa ya, Yasufa a màha à arəv a gà damər ŋgar, dite ta ŋgaya ba i gəzləŋ tar hinne, a ge a tar zayyà kuɗa.

Məməta Yasufa ana a mət a

22 Gà Yasufa tə ndza ika ahəɗ Ezipt ka, nda gà damər ŋgar, dite nda gà mburma ana i ga i bəra tsir ŋgar a tserdze. Ama ŋgat aka ndza aà bəra ka, mivè dərməka nda kurwa, (110) na dite a mət a. 23 Aka ŋgat a gà ɓəza Efərayim haa tsikw aà gà ɓəza gà ɓəza ŋgar ana məmakər ŋa ya. Dite gà ɓəza Makir i kəla Manasse tekeɗe, a ŋgat a tar asa, dite a gəs tar a liwiŋ gà gwala ŋgar mbaŋa asa.

24 Aləka Yasufa aka à mimìte ka, a gwaɗa a gà damər ŋgar: « Iye ka, Yàa à mimìte, ama ka, Mbulum a ndze a nda gà kurum, a ti de a à kurum ika ahəɗ aaha ya, a de a à kurum a aka ahəɗ ana a mbaɗa a gà Abəraham nda Izak nda gà Zakup, a tsik a tar i sida ya, a gwa, I ta vile a ter a ya.» 25 I fata ya ka, Yasufa a waya na gà damər ŋgar ta mbaɗar i sida ya. A gwaɗa a tar: « I təv ana Mbulum a dere a a təv kurum a ka, ndzəkum dər atasl ba gà i faha ya, ka dum dər aka ahəɗ ana ki dwim aɗəm a ya.»xxxx 26 Aləka Yasufa a mət ka, mivè ŋgar dərməka nda kurwa. Kamala taŋa ya, tə ndà yawuf aà məməta ŋgar, na a ze a bise tsiye, ti tike a sahər ika ahəɗ Ezipt i fata.