Madzəba 49

Zakup a pise ahəm a gà ɓəza ŋgar ilik ilik tserdze

1 I dəba ŋa ya, Zakup a zal a gà ɓəza ŋgar tserdze. A gwaɗa a tar: « Yahum bara gər a təv ga ya, i tsik a kurum a gà dukw ana ti ta ge ba nda kurum aka miɗ mba ya. 2 Kurum gà ɓəza gà, yahum ba gər, dite ka tsarakum dukw ana iye, Isərayel tsir kurum, i tsik a kurum a ya.» 3 « A kər Ruben ana kər maləkwara gà ya, kər ka, ndzəɗa gà, malahalah kəla gà ana i wa kər ka, dite mburma tə sər dər, Yàa ne batsah ŋa kuɗa ya. Kər ka, ki zè a gà asiŋ gà ɓəza gà tserdze nda ndzəɗa. 4 Kər asa ka, kamala dula yam ana maràhà ŋa ya. Ama ku kataya tekeɗe, ki ŋget a duwa à zè a biy tar ɓav tsa, aɗaba ana kà hənaha aà məkəs gà, ka nisiŋ à təv mehinne, kà ndaɗa aka iye hwarwa ya. 5 A kurum gà Simeyun nda Levi ana kurum nda damər a, gà dukw ahər kurum ti ne a ka, biy məbatsa mburma. 6 Ama iye ka, i lìm a aà dukw tar ana ta ge a ya tsa. I de a a təv mayahaba gər tar ana ti yahawa ba gər a tsa asa mbaŋa. Aɗaba i təv ana duwa aka tsəɓ a tar a ka, ta bets a mburma, ta ge a matawak a gà sla ana gà mbuluv sla ŋa ya hinne mbaŋa. 7 Ama ka, Mbulum a vile a ter a mezelme agəra matsəɓatsəɓ tar ana ta ge a ya. Aɗaba tar ka, gà ɓəzla terèŋgiz i təv ana arəv a wir a ter a tərfə̀ɗ tərfə̀ɗ a ka, wura a ndze a tar are tsehe tsa. Tar ka, ti ta ŋget a təv mendzena a ne a biy tar a, ika ahəɗ ga tsa, i gwits à ter a sweyèh sweyèh a liwiŋ gà ɓəza Isərayel tserdze. 8 Ama kər Yuda ka, gà damər yak tserdze tì zèmbeɗe a à kər. Ahər yak ka, à mbè a aà gà ɓəzla mene are yak tserdze, dite gà damər yak tekeɗe, tì dzeke a gurmits a bəɗ aka miɗ yak asa mbaŋa. 9 Kər Yuda ki ne a ka, kamala kəla azil ana aka gəs duwa, aka papəɗ aba ya ka, à mbìɗer a gər a ma ya, a hinne a dər, dite a ndiɗe a aba ya. Dite medzibe azil ata ana, weke na a dehe a a təv ŋgar, a waya mehìtsè à ŋgat a?rrrr 10 Yuda ka, ŋgat a riŋ nda gà zəva makwàrà mburma i ahər, a riŋ mehìtsè ŋa dər i liwiŋ gà sik ŋgar. Gwala ŋgar ka, gà ɓəzla ndzəɗa, ta kwere a dər ka, haa a təv ana batsah Əbay aka dara ya. Taŋa ka, wele ana mburma tserdze ta gis a ahər a ahəm a. 11 A dèn a kəla hezweŋe ŋgar ana à sìweye a dər a ka, aà kəla ahər dizl dukw duwa kamala hàndaza ya. Dukw ata ka, ŋgwal ŋa lele. Ti ɗwits a ka, hinne, a ndze a ka, nduzzwa kamala məmbəz a. A bere a gà petek ŋgar ibam, nda dukw ata, na dite a ndze a tsəɗaŋŋa ya. 12 Are ŋgar a ndze a ka, nduzzwa, aɗaba ana a se a meɗwìtsè mawà dukw ata ya. Dite zlir ŋgar tekeɗe, a ndze a herrè, agəra ana a se a awah a asa mbaŋa.

13 Kər Zabulun ki ti ndze a ka, aà guva duluv, a təv ana gà slə̀làh yam ta hitsewa dər aɗəm a. Kwiye ahəɗ yak a ndze a ka, tsikw aà kwite Sidun.

14 Issakar ka, ŋgat a ne a kamala hezweŋe ana ndzəɗa ŋa hinne, a həna a liwiŋ gà bùhwa ya. 15 I dəba ŋa ya, à fir a aà təv mendze ŋgar ana a ndze a ya ka, à tsehin ahər a lele, dite ahəɗ ŋgar tekeɗe, ŋgwal ŋa lele mbaŋa. Aɗaba taŋa a kirikewa à dzegwim ŋgar a bəɗ hiywe, aà mandzaka dər duwa a təv ŋa. A ne a ka, ɓele metsèkèle pəra.

16 Dan ka, ŋgat a kwere a gà gwala ŋgar nda ndzer kaɗəŋ, kamala gà asiŋ gà gwala Isərayel ŋgiɗ a mbaŋa. 17 ŋgat a ne a ka, kamala mesiwiɗ ana mahə̀nà ŋa aà guva bàrama ya. Dite ŋgat asa ka, kamala palas ana a həna aà guva vatwa ka, a dze a a piris a tərpak sik, dite wele ana aka tsəl aka piris ata ya ka, à dìɗere a ikəka a bəɗ nda dəba ya.

18 Batsah ga ŋa, iye ihər i dze a zləm ka, a təv yak, na dite ki mbil a à iye ya.

19 Gad ka, gà ɓəzla akəl ti slewer a za hinne, ama ŋgat tekeɗe, a slewe a ter a za hinne mbaŋa, a delewe a tar.

20 Ama Aser ka, gà guvah ŋgar ta we a hinne. Dukw mezime ŋgar ana a dzimewe a ya ka, biy gà Əbay.

21 Naftali a ne a ka, kamala miyak ana a vel a hinne, duwa a sle aà magəsa ŋa tsiye, à fèfil a ka, lifeɗiɗe lele.

22 Yasufa ŋgat a ne a ka, kamala dizl ɗaf ana madzə̀và ŋa aà guva yam, a zleleye a gà ahər hinne, tèliŋ tèliŋ a. 23 Gà ɓəzla mene are ŋgar ta ge ahər a guvəl nda gà dukw ahər tar. 24 Ama lìkiɗ ŋgar ka, ŋgwal ŋa, dukw ahər ŋgar asa tekeɗe, a mir a hinne, aɗaba ndzəɗa Mbulum ana a za duwa tserdze, tsir ŋgar Zakup a dzawar gurmits a bəɗ a, na à zlèk a ya mbaŋa. Aɗaba ŋgat à kiv a gà Isərayel kamala mala makəva gà duwa ya. A ne a ka, kamala kuvəl gà Isərayel ana ti yahawaba aaka gər, na dite duwa a ge a ter a asa tsiye ya. 25 Aɗaba Mbulum tsir yak ana a gəsawa ahər ahəm a, na à zlèk a kər a. Mbulum ana ndzəɗa ŋgar a za duwa tserdze ya, mi pisakara ahəm nda yam ana i gər ŋa ya, nda gà aka yam ana i biye ya mbaŋa. Ki ŋget a duwa hinne i guvah a, dite a ta pise a ahəm a gà məkəs yak nda gà dukw yak nda təv mawà gà ɓəza ya. 26 Mi pìsè ahəm tsir yak mege ika gà daw ana i guvah yak a tserdze. Kər ki ŋget a a gà kwite ana gà miviye ŋa ya, ti ndze a aà biybiy a. Ama limana yak ka, a ze a tar tserdze. Gà mi pìsè ahəm ata ka, tə dara aka gər yak Yasufa ya, aɗaba kər ka, Mbulum na a zla kər i liwiŋ gà damər yak a ya.

27 Bendzamen ka, kamala kəra dala ana a gese a duwa kəla pat a. I mèkwède ka, à pèpiɗ a gà dukw ana a gese a ya, dite i hawa tekeɗe, à dzèye a ba a gà dukw ana a ŋget a aà mburma ya.»

28 Gà tar ata tserdze ya ka, gà ɓəza Zakup ana kurwa gər a sula ya. Kamala taŋa ya na tsir tar a fàfəl a tar a. A pise a tar ahəm ilik ilik tserdze, ku mege weke nda mipise ahəm ŋgar pampam. 29-30 I dəba ŋa ya, Zakup a ndəv aba à gà bazlam ata a gà ɓəza ŋgar a ka, a gwaɗa a tar asa: « Na Yàa mət ka, a sèsiŋ ki zlwim a məməta gà i faha ya, ki ti lwim a ka, a sləlak makəpalà, a təv ana tə zalar Mamre ndaka tseke pat ana a mbəzawara ya. Sləlak ata ka, i guvah ana Abəraham a səkəm aà Efruna kəla gà Hittiya, aà mele aɗəm dive ya.ssss 31 I fata ya ka, a le aɗəm məkəs ŋgar Saray. I dəba ŋa ya, ti le gà Izak nda məkəs ŋgar Rebeke tekeɗe, a fata mbaŋa. Dite iye tekeɗe, i le Leya məkəs gà ka, a fata asa mbaŋa.tttt 32 Gà guvah ata sləlak iɗəm a. Tə səkəm ka, aà gà Hittiya ya.»

33 Aləka Zakup a ndəv aba à bazlam ata a gà ɓəza ŋgar a ka, a mà akaba à gà sik ŋgar aka təv mehinne. I fata ya, mə̀sàt a həna ka, a mət tsara.uuuu