Madzəba 48

Zakup a pise ahəm a gà ɓəza Yasufa

1 Aləka a ndza zakwayiya i dəba gà dukw ata ya ka, tə daha, ta gwaɗa a Yasufa: « Tsir yak ka, ŋgwala tsa, à mìtiŋa.» Yasufa a tsaraka kataya ka, a daha, a ndzək gà ɓəza ŋgar aaha sula ya, gà Manasse nda Efərayim. A da à tar a təv Zakup tsir ŋgar ata. 2 Ti ndzeha a fata ka, ti ɗif à tar a Zakup, ta gwaɗar: « Araha gà ɓəza Yasufa naha ti dere a a təv yak a.» Zakup a tsaraka ka, a gasa ba aà mbulum. Tùŋ a ndza a bəɗ aka təv mehinne ŋgar. 3 Zakup a ŋgat a Yasufa ka, a gwaɗar: « Mbulum ana ndzəɗa ŋgar a za duwa tserdze ya, a pètiŋ aba akahər ana iye mandza ŋa i kwite Luz ika ahəɗ Kanan, a pisiŋ ahəm a ka, mi pisak ahəm. 4 A gweɗiŋ ka, i ta vilek a gà ɓəza hinne, dite ka, i ta vile a ahəɗ aaha a gà ɓəza yak, a ne a biy tar aà biybiy.oooo 5 Ama kinehe ka, gà ɓəza yak aaha sula ya, gà Manasse nda Efərayim kà wa ɗa tar ika ahəɗ Ezipt akahər ana Yàa dara a faha ya zukw tsiye ka, ti ne a gà biy gà. Tar gà biy gà kamala ana gà Ruben nda Simeyun ti ne gà biy gà ya mbaŋa. 6 Taŋa gà asiŋ gà ɓəza yak ana ka waya i dəba tar a ya, na ti ne a gà biy yak a. Ama tar ta ŋget a duwa ka, i təv gà asiŋ gà damər tar a pəra. 7 I gəs Manasse nda Efərayim ka, aɗaba Rasel məkəs gà ana a mət a, na a miŋara a gər a ya. A mət ka, akahər ana mə̀r nda gà mburma gà, mì màra i Mezapitamiya ya, mi da aka ahəɗ Kanan a. A mət aka iye ka, ika ahəɗ Kanan, maa à mendze aka bàrama ana a da ndàra a Betelehem a. I le ŋgat ka, i fata. Mimete ŋgar ata a mət a ka, aka wur aà iye i gəzləŋ, Yàa tuwa ka, hinne.»pppp 8 Aləka Zakup a ŋgat a gà Manasse nda Efərayim ka, a tsam aà Yasufa. A gwaɗar: « Gà naha ana, gà weke?» 9 Yasufa a gwaɗar aaka a dede ŋgar: « Naha ka, gà ɓəza gà ana Mbulum a dziŋ tar a.» Zakup a gwaɗar: « Sirikara à tar a təv ga a faha ya, i pise a ter a ahəm.» 10 Ama Zakup ka, aka ge màndawal, a sle a aà me ŋget a a vatwa asa tsa. Aɗaba taŋa, Yasufa a sìrìkaha à tar a təv tsir ŋgar. A daha, a gəs aàba tar, a ndzìwìɗ a tar ahəm. 11 I fata ya ka, Zakup a gwaɗa a Yasufa: « I gwa ka, i ŋgeteke a asa tsa, ama kinehe ka, ku mege gà ɓəza yak tekeɗe ka, Yàa ŋgat a tar mbaŋa.»

12 Yasufa a ndzəkara tar aà sik ŋgar a, a dza gurmits a bəɗ aka miɗ tsir ŋgar. 13 I dəba ŋa ya ka, Yasufa a ndzək gà ɓəza ŋgar ata sula ya, a gəs Efərayim, a hitse à ŋgat ndaka tseke ahər gula ŋgar, dite a gəs Manasse, a hitse à ŋgat ndaka tseke ahər mezime Zakup mbaŋa. A sìrìkaha à tar ndiɓ a təv ŋgar. 14 Zakup a zləlaw akaba ahər ŋgar, a tike ahər mezime aka gər Efərayim, ku mege ŋgat kəla ŋana, ahər gula ŋgar ibam, a tike aka gər Manasse, kəla maləkwara ŋa ya. 15 Dite a pise ahəm a gà Yasufa, a gwa: « Mbulum gà bàba gà tsir gà, i gà Abəraham nda Izak ana tə dzawar gurmits a bəɗ aka miɗ ŋgar a ka, mi pise ahəm a gà ɓəza yak aaha. Mbulum ana a kaslawa iye kamala mala makəva gà dukw ana a kesle a gà dukw ŋgar a haa kinehe ya, me ge a tar ŋgwal ŋa. 16 Dite gawla ŋgar ana a bewa à iye i təv gà dukw ana ŋgwala tsiye tserdze, mi pise ahəm a gà ɓəza yak aaha. Zləm gà, nda zləm batsah tsir gà, Abəraham nda zləm Izak tsir gà ma ɗe zləm ka, nda təv tar. Ti te we a gà slàla pampam hinne.»

17 Aləka i təv ana Yasufa a samata tsir ŋgar a tike ahər mezime ŋgar aka gər Efərayim a ka, a tsahən ahər tsa. A gəsara ahər ŋgar ata ika gər Efərayim a, dite me tike aka gər Manasse. 18 A gwaɗa a tsir ŋgar: « Kataya tsa, tsir gà, say tike ahər yak ka, aka gər Manasse, aɗaba ŋgat na maləkwara gà ya.» 19 Ama tsir ŋgar a gəs tsa. A gwaɗar: « I sər ndzer, kəla gà, ŋgat tekeɗe ka, a ta we a gwala ilik mbaŋa. Ama damər ŋgar ana kəla ŋa ya, a ti ne a ne a batsah ŋa ika gər ŋgar, dite gà ɓəza ŋgar ibam, ti ti ne a gà slàla pampam hinne, a ze a biy ŋgar.»

20 Kamala taŋa ya, a pise a tar ahəm a pat ata. A gwaɗa a tar: « Gà gwala gà Isərayel tserdze, ti ta pisewe a ahəm a mburma ka, nda zləm kurum. Ta gweɗewa a ka, Mbulum mi pise a kurum ahəm kamala ana a pise ahəm a gà Efərayim nda Manasse ya. Kamala taŋa ya, a lah à Efərayim aka à Manasse.qqqq 21 I dəba ŋa ya, Zakup a gwaɗa a Yasufa asa: « Araha, iye ka, i mìtiŋa, ama ka, Mbulum a ndze a nda gà kurum, a ta me a à kurum a aka ahəɗ gà tsir kurum ana tə dara iɗəm a ya. 22 I vilek a ahəɗ Sehem, aɗaba ahəɗ ata ka, ŋgwal ŋa lele. Ama gà damər yak ka, ta ŋget a tsa. Ahəɗ ata ka, biy na i zla aà gà Amuriya nda guvəl a ya.»