Madzəba 47

1 I fata ya ka, Yasufa a mah ba, a da, a ɗif a tar à Firawna. A gwaɗar: « Gà dede gà nda gà damər gà tàa dara ika ahəɗ Kanan a. Tə dara ka, nda gà dukw gənaw tar a, gà təmaŋ, nda gà sla, zləm a gà limana tar ana aà tar a tserdze. Araha tar mandza ŋa ika ahəɗ Gusen.» 2 Dite a daha, a pala i liwiŋ gà damər ŋgar ata ya ə̀zləm, a da à tar aka miɗ Firawna. 3 A tsam aà gà damər Yasufa aaha, a gwaɗa a tar: « Mege megemir kurum dzena, dukùla?» Ta gwaɗar aaka: « Mər ka, gà ɓele yak, mə̀r ka, gà ɓəzla makəva gà dukw gənaw kamala gà bàba gà tsir mə̀r ana ɗa akahər ata ya.» 4 Ta gwaɗa a Firawna asa: « Mì dara ka, aɗaba mì ndza aka ahəɗ yak te. Təv makəva gà dukw gənaw mə̀r ka, a riŋ tsa, aɗaba ahəɗ Kanan ka, may riŋ hinne, mawùràba ŋa. Kamkam vəl vatwa a gà ɓele yak tə ndza ika ahəɗ Gusen te.» 5-6 Əbay ata a gwaɗa a Yasufa: « Na gà tsir yak nda gà damər yak tàa dara, ti ndze a i təv yak kamala naha ya ka, lele. I vile a ter a vatwa, ti ndze a ika ahəɗ Ezipt tserdze. Ama i waya ka, tə ndza ika ahəɗ Gusen ata ŋgwal ŋa, kwizir iɗəm lele ya. Na kàa le aà wura i liwiŋ tar, a sər makəva gà dukw gənaw lele ka, ma dara, me kìviŋ gà biy ga te.» 7 I dəba ŋa ya ka, Yasufa a da à tsir ŋgar a təv Əbay ata. A daha, a ɗifer dər. Dite Zakup a piser ahəm. 8 Firawna a tsam aà Zakup, a gwaɗar: « Kàa ndza aà bəra ana, mivè ndaw?» 9 Zakup a gwaɗar aaka: « Yàa ndza aà bəra ka, mivè dərməka nda dzik makər pəra tsəka, hinne tsa. Iye ka, i slele, dite mendze gà ka, kuɗa ihər, aɗaba a ndze a a təv biy gà tsir gà ana tə ndza aà bəra ya tsa.» 10 Kamala taŋa ya, Zakup a piser ahəm asa. Dite a dara i təv ŋgar a kuɗa.

11 I dəba ŋa ya, Yasufa a ndzək gà tsir ŋgar, a da à tar aka ahəɗ Gusen. Aɗaba təv ata ka, ŋgwal ŋa lele, kwizir iɗəm. A vəl a tar təv ata ika ahəɗ Ramses a, kamala ana Əbay ata a tsik a tar a. 12 Dite Yasufa a vəl dukw mezime a tsir ŋgar nda gà damər ŋgar tserdze, dite nda gà asiŋ gà mburma ana i bəra tsir ŋgar ata ya mbaŋa, kalkal lele, kəla biy tar ana a sle a ter a ya.

Yasufa a ne Əbay ika ahəɗ Ezipt

13 Zàkwayiya ka, may ata a vəl mesewere are a mburma ika gər ahəɗ tserdze, ku mege i ŋga, gà mburma ana ika ahəɗ Kanan a, nda gà na ika ahəɗ Ezipt ya fit dze ka, ndzəɗa tar a riŋ asa tsa, aɗaba may ata. 14 Aɗaba taŋa, gà mburma ana ika ahəɗ Ezipt ya nda gà na ika ahəɗ Kanan a tserdze tə dawaha aà masàkàma daw a təv Yasufa. Dite Yasufa a yaha gər a siŋgwe ana gà mburma ata tə sakama dər aà ŋgat daw a ya. A ndzək, a da dər a bəra Əbay ata.

15 Aləka siŋgwe a ndəv aà gà mburma ana ika ahəɗ Ezipt ya nda gà na ika ahəɗ Kanan a fit ka, gà mburma gà Ezipt tserdze tə da a təv Yasufa, tə daha, ta gwaɗar: « Kamkam Əbay, siŋgwe aka ndəv aà mə̀r a, vəl a mə̀r dukw mezime te, dite mi mata tsa te.» 16 Yasufa a tsaraka kataya ka, a gwaɗa a tar: « Dumaha, gasumara gà dukw gənaw kurum a, na dite i vile a kurum a dukw mezine ya, kurum tekeɗe, ki mbèrwiɗwim a ka, nda gà dukw gənaw kurum, na bəla siŋgwe kurum a riŋ tsa, aka ndəv a. 17 Tə tsaraka kataya ka, tə daha tsara, ta gasara gà dukw gənaw tar a, gà piris nda gà təmaŋ, nda gà awak, nda gà hezweŋe ya. Tə da dərraha a Yasufa, ta mburuɗ dərra aà ŋgat daw a. Dite ka, a dzaya a tar daw kuɗa. A vəl a tar dukw mezime i huɗ mivè ata ya, aɗaba gà dukw gənaw tar ata tserdze ya.

18 Aləka i dəba ŋa ya ndizìŋ ŋana ka, tə da a təv Yasufa asa. Tə daha, ta gwaɗar: « Araha, siŋgwe mə̀r ka, aka ndəv, dite gà dukw gənaw mə̀r tekeɗe ka, tàa ne gà biy yak ana, meme? Aɗaba duwa a riŋ na mìi vilek a ya asa tsa. Say gà ba mə̀r ŋa, nda gà guvah mə̀r pəra na a zeha ya. 19 Ka miyak à mə̀r, mi mata ika miɗ yak kataya tsa te, dite gà guvah mə̀r tekeɗe ibam, tə da mataha kusak ŋa tsa mbaŋa asa. Səkəm a mə̀r gà guvah mə̀r ŋa dze. Dite ka, ka vəlawa a mə̀r dukw mezime. Mìi ne a gà ɓèle ɓele Əbay, dza a mə̀r hwife na dite mi ndze a nda mesife, mi mete a tsiye.»

20 Aɗaba taŋa, Yasufa a sakama ahəɗ Ezipt fit dze a Əbay. Ku mege weke, a kalar à guvah ŋgar, aɗaba may ana a betse a tar a. Kamala taŋa ya, gà guvah ana ika ahəɗ Ezipt ya tserdze ti ne biy Əbay ata. 21 Gà mburma ana tar mandza ŋa ika ahəɗ Ezipt ya tserdze, tsìlekara aà kwiye ya, tsikw aà kwiye tseke ŋgiɗ ti ne gà ɓele Əbay ata. 22 Say guvah gà ɓəzla mandəva kuɗa a mbulum tar ata ɗekɗek na aka səkəm tsiye, aɗaba Əbay na a sàs a tar a. Tə zəmawa i tar ka, dukw Əbay ana a vəlawa a tar a. Aɗaba taŋa na tàa dzawa à gà tar ti tsiye ya.

23 I dəba ŋa ya, Yasufa a gwaɗa a tar: « Kinehe ka, Yàa səkəm kurum nda gà guvah ŋa dze aà Əbay Firawna ya. Araha i dzèye a kurum a hwife, dite ka sligeywim a gà guvah kurum. 24 Dite i huɗ gà dukw ana tserdze kàa palayum i gà guvah kurum a ka, ka dzàyum i ba ya təv pampam ə̀zlə̀m, dite ki zlwim a ihər a ilik, ki vilwim a a Əbay. Dite təv faɗ ŋa aaha a zeha ya ka, biy kurum, ki gwim a hwife ŋa, asiŋ ŋa aaha ki zimwim a nda gà mburma ana i ga i ma kurum a, nda gà ɓəza kurum tserdze.» 25 Tə tsaraka kataya ka, ta gwaɗar aaka: « Əbay, taŋa ka, kàa mbala à mə̀r, kamala taŋa ya ka, mì waya mìe ne a gà ɓele yak kaɗəŋ ndzer.»

26 Yasufa a tsik məpala ahəm ŋgar ika ahəɗ Ezipt tserdze. Haa kinehe dukw ana gà mburma tàa pala i bəɗ a ka, ku weke à dzèye a i ba ya təv pampam ə̀zlə̀m, dite a zle a ihər a ilik, a vile a taŋa a Əbay. Say guvah gà ɓəzla mandəva kuɗa a mbulum tar ata na aka ne biy Əbay tsiye ya.

Dukw ana gà Zakup nda kəla ŋgar ti tsik à ba i sida ya yammmm

27 I dəba ŋa ya, gà mburma Isərayel, wele ana tə zalar Zakup ya, tə ndzawa ika ahəɗ Gusen i Ezipt. Ama tàa ŋgat gà limana hinne i fata, dite tàa waya gà ɓəza hinne asa mbaŋa.

28 Zakup a ndza i Ezipt ka, mivè kurwa gər a təsəla. Mendze ŋgar ana a ndza aà bəra fit dze ya ka, mivè dərməka nda dzik faɗ gər a təsəla (147). 29 Aləka i təv ana Zakup, wele ana tə zalar Isərayel aka à mimete ya ka, a zal a Yasufa kəla ŋgar. A gwaɗar: « Na kà waya iye ndzer ka, dara, tike ahər yak a liwiŋ gà sik gà, dite ka mbeɗiŋ i sida ya. 30 Ki giŋ dukw ana ŋgwal ŋa nda ndzer ŋa ya, na Yàa mət ka, ka ta le ɗa iye ika ahəɗ Ezipt tsa, zla iye, ka da à iye, ka le iye a təv gà bàba gà tsir gà. Ki le a iye ka, a təv gà dive tar.» Zakup a gwaɗar asa: « Mbeɗiŋ i sida ya dzekwiŋ.» Yasufa a daha, a mbaɗar kuɗa. 31 I dəba ŋa ya, Zakup a kal à gər a bəɗ aka təv mehinne ŋgar.nnnn