Gà Zakup nda gà ɓəza ŋgar tə da aka ahəɗ Ezipt
46
1 Aɗaba taŋa, Zakup ana tə zalar Isərayel a, ta mah ba nda gà ɓəza ŋgar, nda gà dukw ŋgar tserdze, tə da. I təv ana ti de a ya ka, ti ndze a kwite Bersiba. Ti ndzeha a fata ka, a kəɗ duwa, aɗaba Mbulum tsir ŋgar Izak ana a zàmbaɗawa dər a. 2 A pat ata ndaavəɗ ka, Mbulum a fàfəlar i sunwa ya. A gwaɗar: « Zakup, Zakup.» A ŋgamar aakaha kamala taŋa ya ka, a gwaɗar: « Iye naha.» 3 A gwaɗar: « Iye ka, Mbulum tsir yak ana kà zàmbaɗawa dər i faha ya. Magəɗa me gik tsa, da aka ahəɗ Ezipt, aɗaba i ti ne a à kər a gà gwala batsah ŋa i fata.» 4 I ndze a riŋ nda kər ika ahəɗ Ezipt i fata, dite i ta mère a à gà ɓəza yak a faha ya asa. I təv ana ki mite a ya ka, Yasufa a ndze a i təv yak.» 5 I dəba ŋa ya, Zakup a mah ba i kwite Bersiba i fata ya. Gà ɓəza ŋgar tə ndzək tar a puspus ana Firawna a slərraha aà mandzə̀ka dərraha tar aka ahəɗ Ezipt. Tə tsala aɗəm à tar nda gà ɓəza tar, nda gà məkəs tar tserdze. 6 Dite tə ndzək gà dukw gənaw tar nda gà limana tar ana ta ŋgat ika ahəɗ Kanan a, tə da dər akaba aka ahəɗ Ezipt, tar nda gà ɓəza ŋgar tserdze. 7 Gà ɓəza ŋgar gà asləka ŋa, nda gà dəm ŋana, nda gà ɓəza gà ɓəza ŋgar ana gà asləka ŋa ya, nda gà dəm ŋana tserdze. 8 Araha na zləm gà Isərayel ana tə da aka ahəɗ Ezipt ya. Gà Zakup nda gà ɓəza ŋgar ka, Ruben na maləkwara ŋgar a. 9 Gà ɓəza Ruben ka, gà Hanukw nda Palu, nda gà Hesru, nda gà Karmi. 10 Gà Simeyun nda gà ɓəza ŋgar ka, gà Yemuyel nda Yamin, nda gà Uhad, nda gà Yakin, nda gà Dzuker, nda gà Sewil. Na a war Sewil ka, məkəs ŋgar dəm gà Kananiya. 11 Gà Levi nda gà ɓəza ŋgar ka, gà Gersun nda Kehat, nda gà Merari. 12 Dite gà Yuda nda gà ɓəza ŋgar mbaŋa ka, gà Er nda Unan, nda gà Sala, nda gà Fares, nda gà Zerah. Ama gà Er nda Unan ka, tàa mbər mimete ika ahəɗ Kanan. Ama gà ɓəza Fares ka, sula, gà Hesru nda Hamul. 13 Gà Issakar nda gà ɓəza ŋgar ka, gà Tula nda Puwa, nda gà Yasuɓ nda Simrun. 14 Gà Zabulun nda gà ɓəza ŋgar ka, gà Seret nda Elun, nda gà Yekel. 15 Gà tar ata tserdze ya ka, gà ɓəza Leya ana a war a Zakup i kwite Mezapitamiya ya. Dite Dina ka, dəm ŋana. Kamala taŋa ya, gà ɓəza Zakup ana a dara i hitwis Leya tserdze ya ka, dzik makər gəra makər.16 Gà asiŋ gà ɓəza Zakup ana ti zezem a ŋgat aka ahəɗ Ezipt ya ka, gà Gad nda gà ɓəza ŋgar, gà Dzifiyun nda gà Hagi, nda Suni, nda gà Arudi, nda gà Areli. 17 Gà Aser nda gà ɓəza ŋgar ka, gà Yimna nda gà Beriya, nda gà Sirak, dite damər tar ana dəm ŋa ya. Gà Beriya, nda gà ɓəza ŋgar ka, gà Heber nda Melekiyel. 18 Gà mburma ata tserdze ya ka, gà ɓəza Dzilpa ana a war a Zakup ya. Dzilpa ka, ɓèle ana Laban a vəl a dəm ŋgar Leya ya. Gà ɓəza Zakup ana a dara i hitwis Dzilpa tserdze ya ka, kurwa gər a ndilik.
19 Gà ɓəza Rasel məkəs Zakup ka, gà Yasufa nda Bendzamen. 20 Akahər ana Yasufa a riŋ ika ahəɗ Ezipt ya ka, aka wa gà ɓəza sula, gà Manasse nda Efərayim. Na a war gà ɓəza ata ka, Asənat dəm Putifera, i mala mandəva kuɗa a Mbulum duwa a ndzawa i kwite Awum. 21 Gà ɓəza Bendzamen ka, gà Bela nda Beser, nda gà Asbel, nda Gera, nda Naaman, nda gà Ehi, nda Rus, Mupim, Hupim, nda gà Arda. 22 Gà tar ata tserdze ya ka, gà ɓəza ana Rasel a wa a Zakup ya. Tar ka, kurwa gər a faɗ.
23 Gà asiŋ gà ɓəza Zakup ka, gà Dan nda kəla ŋgar Husim. 24 Gà ɓəza Naftali ka, gà Yakesiyel nda Guni, nda gà Yedzer, nda gà Silem. 25 Gà tar ata tserdze ya ka, gà ɓəza Bilha ana a wa a Zakup ya. Bilha ka, ɓele ana Laban a vəl a dəm ŋgar Rasel a. Gà ɓəza ŋgar ka, təsəla.
26 Gà Zakup ata nda gà ɓəza ŋgar tə da a Ezipt tserdze ya ka, tar dzik ndilik gəra ndilik. Gà məkəs gà ɓəza ŋgar ka, tàa ɗama tsa. 27 I təv ana Yasufa a riŋ ika ahəɗ Ezipt ya ka, aka wa riŋ gà ɓəza sula mbaŋa. Kamala taŋa gà mburma Zakup ta gaw ba ika ahəɗ Ezipt tserdze ka, ti sle dzik təsəla.llll
Gà Zakup tə dara aka ahəɗ Ezipt ya
28 I dəba ŋa ya ka, Zakup a slər Yuda aka miɗ a təv Yasufa, dite ka, ma daha, mə patar aba ika miɗ ŋgar ika ahəɗ Gusen. 29 Aləka Yasufa a tsaraka kataya ka, a dànaya gà piris aà puspus ŋgar. A mah ba, a da aà melime nda tsir ŋgar aka ahəɗ Gusen. I təv ana a ndzeha a təv ŋgar, a ŋgatar a ka, a daha, ə̀ŋgəts a gəs aàba ŋgat, kwàyèya a tuwa aaka hinne. 30 I dəba ŋa ya, Zakup a gwaɗa a Yasufa kəla ŋgar: « Kinehe ka, ku mege i mite a tekeɗe ka, à lèh a duwa tsa, aɗaba Yàa ŋgatak kər riŋ aà bəra nda mesife yak kamala naha.»
31 Dite Yasufa a gwaɗa a damər ŋgar nda gà mburma ana i ga i bəra tsir ŋgar a tserdze: « Kinehe ka, i de a i ti ɗife kurum a à Firawna, i gweɗere a ka, gà dede gà, nda gà damər gà, dite nda gà asiŋ gà mburma ana i ma ŋgar a tserdze tə ndzawa ika ahəɗ Kanan a, tàa dara a təv ga ya. 32 Gà mburma ŋa ka, tar gà ɓəzla makəva gà dukw gənaw, megemir tar ka, makəva duwa hiywe. Tə dara ka, tàa ndzək dərra gà təmaŋ tar a, nda gà sla tar a, zləməŋa gà dukw tar ana ta ŋgat a tserdze. 33 Na bəla Firawna aka zal a kurum, a gweɗe a kurum a, megemir kurum ana dukùla ka, 34 say ki gweɗwimer a ka, mə̀r gà ɓele yak, mə̀r ka, gà ɓəzla makəva gà dukw gənaw, daga aà gər ana mə̀r gà ɓəza mba ya, haa kinehe. Na dite ka, ki ŋgetwime a təv mendze ika ahəɗ Gusen a. Tsəka, aɗaba gà ɓəzla makəva gà duwa ka, tə tsahən aà gà mburma gà Ezipt tsa.»