Madzəba 45

Yasufa a ɗif aba a gà damər ŋgar

1 Ama Yasufa a sle aà magəsa gəzləŋ ika miɗ gà mburma ana a riŋ i təv ŋgar i fata tserdze ya tsa. Aɗaba taŋa, a fafəl a gà Ezipt, a gwaɗa a tar ka, dum a bəra, dite gà asiŋ gà mburma ata tserdze ya, tə dara iɗəm a bəra ya. Kamala taŋa ya, a ɗif aba a gà damər ŋgar ka, wura ilik aka ze riŋ i təv ŋgar asa tsa.hhhh 2 A tuwa nda ndzəɗa hinne. Gà mburma gà Ezipt tə tsaraka tuwa ŋgar ata ka, ku gà na i ga i bəra Əbay Firawna ya tekeɗe, tàa tsaraka mbaŋa. 3 Dite i dəba ŋa ya, Yasufa a gwaɗa a gà damər ŋgar: « Iye ka, Yasufa. Tsir gà ana a riŋ nda gà mesife lele ibam a?» Ama gà damər ŋgar ti sle a aà mifèfiler aaka tsa, aɗaba tàa dzadzar ika miɗ ŋgar i fata ka, hinne. 4 Dite a gwaɗa a tar asa: « Sìrìkwimera a təv ga ya tsiye?» Aləka ti sìrìkaha a təv ŋgar ka, a gwaɗa a tar: « Iye ka, Yasufa damər kurum ana ku kalum dər a gà mburma gà Ezipt ya. 5 Ka ta dzalum duwa hinne asa tsa. Dite asa ka, ka ta gwim matsəɓatsəɓ aà ba kurum, agəra ana ku kalumara aà iye a faha ya ɓav tsa. Aɗaba Mbulum a lah meslire a kurumara iye aka miɗ a ka, aà məmbə̀là à gà mesife kurum. 6 Aka ge kinehe ka, mivè sula na may a sle za a mburma ika gər ahəɗ a, dite ndeyndey ŋana a zeha kinehe ka, mivè ə̀zləm na məpala gà duwa i bəɗ a a riŋ tsa, ku mege mifìte tekeɗe ka, a riŋ tsiye. 7 Kamala taŋa ya, Mbulum a slərra iye aka miɗ kurum a ka, aɗaba a gwa: Ka ta dzeywim ika gər ahəɗ a tsa, dite asa ka, a mbele a à gà mesife kurum, nda mesife gà ɓəza ana i gwala kurum a aà biybiy. 8 Sərum dər ka, kurum na a slərra iye a faha ya tsa, ama Mbulum na a slərra iye ya. Dite gà mburma ana ika ahəɗ Ezipt tserdze ya, na a kwere a ka, iye mbaŋa asa. 9 A gwaɗa a tar asa: « Màhum ba, ka dum a ma a təv tsir gà tsəma tsəma. Kàa dumaha ka, gwaɗumar: Zakup kəla yak a gwaɗak ka, Mbulum aka ne aà iye batsah ŋa ika ahəɗ Ezipt tserdze, a gwaɗak, dara a təv ga a faha ya, ki ge mèhìnèkw tsa. 10 Dara bise a təv ga a faha ya, kurum nda gà ɓəza gà ɓəza yak tserdze, nda gà dukw gənaw yak gà sla, nda gà təmaŋ, zləm a dukw ana kə̀ ŋgat i ga i ma kurum a tserdze, kà ndzəkara tar a, ki ti ndzwim a aka ahəɗ Gusen. 11 I vile a kurumaha a dukw mezime a fata, na dite ki metwim a asa tsiye. Aɗaba may a zeha kinehe ka, mivè ə̀zləm. I ge dər kataya, dite kurum nda gà dukw ana i ma kurum a tserdze, ka matum asa tsa.iiii 12 Araha kurum tserdze kàa ŋgetwimiŋ nda are kurum. Bendzamen damər gà tekeɗe ka, aka ŋgetiŋ nda are ŋgar mbaŋa. Iye Yasufa na a fàfəl a kurum a. 13 Kàa dumaha ka, tsikwim a dede gà, meme na i ŋgat ɗa ndzə̀ɗ ika ahəɗ Ezipt ya. ƒamumar gà dukw ana kə̀ ŋgatumar tserdze ya. Màhum ba tsəma, ka dumaha ka, ka zlumara dede ga a faha ya.»

14 Aləka a tsik aba bazlam ata ya ka, a daha, a gəs aàba damər ŋgar Bendzamen ə̀ŋgəts, a dza ba aà tuwa tsara. Bendzamen ibam, a tuwa. 15 Kamala taŋa ya, a gasa aà ba gà damər ŋgar aaha ilik ilik tserdze, nda gà tuwa. Aləka i dəba ŋa ya, gà damər ŋgar ata tekeɗe, ta fàfəl nda gà ŋgat kuɗa.

Firawna a gwa, Zakup ma dara aka ahəɗ Ezipt ya

16 Aləka i dəba ŋa ya, Firawna a tsaraka, ta gwa là, gà damər Yasufa tàa dara ka, ta ŋgaya ba hinne, nda gà ɓəzla meslire ŋgar tserdze. 17 Firawna a daha, a gwaɗa a Yasufa: « Gwaɗa a gà damər yak ka, ŋgeywim gà dukw kurum aka gà hezweŋe, dite ka màhum ba, ka dum a ma aka ahəɗ Kanan. 18 Kàa dumaha ka, ka zlumara tsir kurum a, nda gà dukw ana i ga ma kurum a tserdze, ka dumara a təv ga a faha ya. I vile a kurum a ŋgwal ahəɗ ana a ge a duwa lele ya, ɗa ika ahəɗ Ezipt, dite ki ŋgetwime a dukw mezime hinne ŋgwal ŋa lele mbaŋa. 19 Tsik a tar bazlam gà ata, gwaɗa a tar ka, ndzəkum dər gà puspus ika ahəɗ Ezipt i faha ya, dite ka, kà ndzakumara aɗəm gà ɓəza kurum, nda gà məkəs kurum a. Ka zlumara tsir kurum a. 20 Ka ta dzaluma gà gər aka gà kàzlàŋa kurum tsa, aɗaba ki ta ŋgetwime a aɗəm a ŋgwal ŋa à zè a taŋa ɗa ika ahəɗ Ezipt i faha.»

21 Gà ɓəza Isərayel tə tsaraka taŋa ka, ta ge dər kataya kaɗəŋ. Yasufa a daha, a dza a tar puspus ata, kamala ana Firawna a tsiker a. Dite a dzaya a tar gà dukw mezime ana ti zim a aà vatwa ya mbaŋa. 22 A dzaya a tar aaka petek ilik ilik tserdze, ku mege weke. Ama biy damər ŋgar Bendzamen ka, a dzàɗar gura ana ta və̀ɗawa siŋgwe ŋa ya, dərməka makər nda petek ə̀zləm. 23 A sləraraha gà hezweŋe a tsir ŋgar kurwa, dite nda gà məmər gà hezweŋe kurwa, nda gà dukw ana gà ŋgwal ŋa pampam ika ahəɗ Ezipt ya. Kamala taŋa ya, gà hezweŋe tar aaha kurwa ya ka, tə ndzək dər daw, nda gà dukw mezime ana tsir ŋgar a zim a aà vatwa, i təv ana a dehe a a təv ŋgar a. 24 A ge aba gà taŋa ya ka, a daha, a ge wusa a gà damər ŋgar kuɗa, i təv ana ta meh a ba ya. Dite a gwaɗa a tar: « Ama ka gwim maàga aà vatwa tsa, dum lele.» 25 Kamala taŋa ya, ta màhara ba ika ahəɗ Ezipt ya, tə da a ma tar aka ahəɗ Kanan, a təv tsir tar Zakup kuɗa.

26 Aləka ti ndzeha a təv tsir tar Zakup ka, ta gwaɗar: « Yasufa ka, a riŋ nda mesife ŋgar, ŋgat na Əbay ŋa a kwere a mburma ika ahəɗ Ezipt tserdze ya.» Ama a tsaraka kataya tekeɗe ka, gəzləŋ ŋgar aka ŋgaya ba tsa, aɗaba a gəs bazlam tar ata tsa. 27 Ama tə ɗamar gà bazlam ana Yasufa a tsik a tarəra tserdze ya, dite asa ka, a ŋgat a gà puspus ana Yasufa a slərarraha, aà mandzək dərraha ŋgat a ka, arəv a màraha kuɗa. 28 Taŋa tsir tar Isərayel a gwa: « Aka sle kuɗa, tsaka Yasufa kəla gà a riŋ ka, nda mesife ŋgar. Say i de a, i ta ŋgeteriŋa, na ələk i ta mite a ya.»