Madzəba 44

Tasà Yasufa ana a tiker aka ahəm bùhwa a damər ŋgar a Bendzamen a

1 I dəba ŋa ya asa ka, Yasufa a gwaɗa a mala meslire ŋgar ana i ga i ma ŋgar a: « Rahaya a tar à daw a gà bùhwa gà mburma aaha ka, lele, me zle tar ide ide. Dite kà dzaya a tar aɗəm siŋgwe aka gà ahəm bùhwa tar, ku weke tserdze. 2 Tasà ga ana bìy kur siŋgwe ya ka, say tiker aka ahəm bùhwa a damər tar kudər ŋana, dite kà ndzək siŋgwe kə gawar akaba aɗəm nda daw ŋgar mbaŋa.» Mala meslire ata a tsaraka kataya ka, a ge dər kamala ana Yasufa a tsiker a. 3 Aləka mbulum a dəv ka, ta ŋgeye gà daw tar aka gà hezweŋe, dite ta geye a tar wusa kuɗa. 4 Dite ta màhara ba i kwite ata ya, tàa ndze a təv a dìreŋ zukw tsəka, Yasufa a gwaɗa a mala meslire ŋgar ata tsara: « Daha, zazamaha tar tsəma, na kàa le aà tar ka, gwaɗa a tar: ta gwaɗa a kurum ka, aàla na Yàa ge a kurum ŋgwal lele ka, dite ki gwimiŋ dukw ana ŋgwal tsiye asa ya? 5 Aàmala na kà zlumara tasà à mala ga ya nda akəl a dze ya? Aɗaba tasà ata ka, a sawa dər yam, dite tekeɗe ka, aka vəl a kurum dər yam ata mbaŋa ana, meme? Ama dukw ana kì gwimiŋ a ka, ŋgwala tsidze.» 6 Aləka mala meslire ata a le aà tar ka, a tsik a tar gà bazlam ata. 7 Ta gwaɗar: « Əbay mə̀r, aɗaba la na kà tsik a mə̀r medzibe bazlam ata ya? Aɗaba mə̀r gà ɓele yak ka, maa dzala aà mege kamala taŋa ya tsa. 8 Na ki wiz a siŋgwe ana mì leye ahər ika gà ahəm gà bùhwa mə̀r ana mimaya dərra i ma ya, ika ahəɗ Kanan a ka, araha. Tsəna, wànà meme na mìi dzik a kur siŋgwe, kige tsa gura ara i ga i bəra mala ga ya a dze ya? 9 Yaha, na kàa le aà dukw ata i ahər mburma ŋa i liwiŋ mə̀r gà ɓele yak ka, wele ata mə̀ mət, dite mə̀r gà asiŋ ŋa aaha tekeɗe ka, mìi ne a gà ɓele yak asa mbaŋa.»

10 Wele ata a gwaɗa a tar: « Yawwa, taŋa ka, lele kaɗəŋ, kamala ana kà tsikwim a. Wur ana Yàa le aà dukw ata i kìywa ŋgar a ka, a ne a ɓele gà. Ama kurum gà asiŋ ŋa aaha ka, kàa beywim.» 11 Tə tsaraka kataya tsara ka, ku weke a zlara daw ata ika hezweŋe ya, a tike a bəɗ, ta pə̀laya dər. 12 Wele aaha a daha, a yaha ya aɗəm, a dza ba aà mayaha ŋa ka, i kìywa batsah tar ŋana ya, dite a ndəv dər nda biy kudər ŋana. Kamala taŋa ya, a le aà tasà ata ka, i kìywa Bendzamen. 13 Aləka, gà mburma aaha ta ŋgatar kataya ka, tə taya gà petek tar ika ba ya kwìyaɗ kwìyaɗ, ku weke a mà à dukw ŋgar aka hezweŋe, dite ta mbəɗ gər a huɗ kwite ata asa.

14 Aləka gà Yuda nda gà damər ŋgar ta mbəɗaha gər a fata ka, tə da a ga a bəra Yasufa asa. Ama ŋgat ka, aka da i təv tar ata ndeɗiŋa ya zukw tsa. Tə daha ka, tə dza gurmits a bəɗ aka miɗ ŋgar asa. 15 Yasufa a ŋgat a tar ka, a tsam aà tar, a gwaɗa a tar: « Naha ana, dukùla na kì gwimeha i faha ya dzeya? Wànà kà sərum tsiye, iye ka, mala mipìrè are i ŋget a a gà dukw ana makaha ŋa ya ya?»

16 Yuda a gwaɗar aaka: « Əbay gà, mì gweɗe ana, meme? Mì tsik a dzena, dukùla? Mìi lèmbeɗe a ba mə̀r ana, nda là asa ya? Aɗaba Mbulum aka mbər mele aà bakal mə̀r gà ɓele yak daga piŋŋe. Araha Əbay gà, mə̀r kinehe ka, gà ɓele yak pəra, kəla aaha kà le aà tasà yak i təv ŋgar a ka, a sle duwa tsa, ŋgulum mə̀r tserdze gà ɓèle yak pəra.

17 Yasufa a gwaɗa a tar: « Awaŋ, i ge a kamala taŋa ya tsa, say wele ana i lè aà tasà ga i təv ŋgar a ilik. ŋgat ka, a ne a ɓele gà kaɗəŋ. Ama kurum gà asiŋ ŋa aaha ka, dum a ma a təv tsir kurum nda zayzay lele.»

Yuda a waya mibe à Bendzamen

18 I dəba ŋa ya ka, Yuda a sìrìk a təv Yasufa. A daha, a gwaɗar: « Əbay gà, kamkam vəl vatwa a ɓele yak, mə̀ fàfəl bazlam ilik ika miɗ yak te. Ka ta ge matsəɓatsəɓ aka gər ɓele yak hinne tsa te. Aɗaba kər kà ne ka, kamala Əbay Firawna ya.» 19 A gwaɗar asa: « Əbay ga, malahalah ŋa ka, kàa tsam aà mə̀r gà ɓele yak, kə̀ gwaɗa a mə̀r ka, tsir kurum ana, a riŋ asa ya? 20 Ama maa gwaɗak ka, tsir mə̀r riŋ mandàwal ŋa herem herem tar riŋ i ma nda damər mə̀r kə̀la ŋana kwizikw a. A wa kəla ata ka, i mandawal a. Ama damər kəla ŋa ata ka, aka mət, a zehe ka, ŋgat ilik na i huɗ mama ŋgar a. Dite tsir ŋgar tekeɗe ka, a waya ŋgat hinne mbaŋa asa. 21 Ama kù gwaɗa a mə̀r gà ɓele yak asa ka, dumaha, zlwimiŋara, i ŋgeter a nda are gà. 22 Mər mì gwaɗak aaka, kəla ndirkiz ata ka, a sle aà mimiyek a à tsir ŋgar tsa. Aɗaba aka miyak à ŋgat ka, à mìtiŋa. 23 Kù gwaɗa a mə̀r ka, say dumaha, zlumara kudər kurum ata ya, kàa dumara dze tsəka, ki slwim a aà medere a aka miɗ gà ya asa tsa.

24 Aləka mì mah ba, mì daha a ma a təv tsir mə̀r ka, maa ɗamar gà bazlam yak ata kà tsik a mə̀r a tserdze, Əbay gà. 25 I dəba ŋa ya ka, tsir mə̀r a gwaɗa a mə̀r, mbəɗum gər a fata, ka sə̀kə̀makwara daw a zaakwa asa kwaŋ, gà dəm gà. 26 Ama mə̀r mì gwaɗar: ‘Mìi sle aà mede asa tsa, say vəl a mə̀r damər mə̀r aaha kudər ŋa ya, na dite mìi de a ya. Aɗaba mìi sle a aà mede aka miɗ wele ata asa tsa, na damər mə̀r kudər ŋa aaha a riŋ aà mə̀r tsiye.« 27 Tsir mə̀r a gwaɗa a mə̀r ka: ‘Kurum kà sərum, məkəs gà ata a wiŋ gà ɓəza ka, sula pəra. 28 Ama ilik ka, aka dzeye. I dzala ka, biytsa, gà dukw dala na ta papəɗ a, aɗaba haa kinehe Yàa ŋgatar asa tsa. 29 Na kàa zlum aà iye kəla gà aaha ya, gà duwa tàa papəɗ ŋgat asa ka, i mite a aà arəv kweleŋ, aɗaba iye ka, màndawal ŋa herem herem.« 30-31 Kinehe dzena, meme na i mbìɗ a gər a ma a təv tsir gà ya? Na aka fə̀r kəla ŋgar aaha a riŋ aà iye tsəka, à mìtiŋa. Aɗaba gəzləŋ tar ka, i təv ilik ŋa, na nda kəla ŋgar aaha ya. Kamala taŋa ya, tsir mə̀r aka ŋgat a mə̀r ka, a ge a arəv hinne, tsam ka, à mite a dər, aɗaba ŋgat ka, màndawal ŋa herem herem. 32 Əbay gà, iye i mbùruɗ a kəla aaha nda ba gà. Aɗaba i gwaɗa a tsir gà ka, na Yàa màkara à kəla aaha ya tsəka, tike bakal ŋa aka gər gà, aà biybiy. 33 Aɗaba taŋa, Əbay gà, viliŋ vatwa, i ndze a ɗa avukw kəla aaha, dite ŋgat ka, tə daba a ma nda gà asiŋ gà damər ŋgar. 34 Tsəka, meme na i de a a ma a təv tsir gà ya, na kəla aaha a riŋ aà iye tsiye? Aɗaba i waya maŋgata a dukw ana a ge a ba nda tsir gà ya tsa.»