Madzəba 43

Gà damər Yasufa tə da aka ahəɗ Ezipt ka, nda gà Bendzamen dze

1 I dəba ŋa ya ka, may ata a səkah à mege ika ahəɗ Kanan hinne asa. 2 Aləka gà mburma ana i bəra Zakup ya, tə ndəv daw ata tə da dərra ika ahəɗ Ezipt ya fit, a ndəv ka, Zakup a gwaɗa a gà ɓəza ŋgar aaha: « Dumaha, tə sə̀kəmakwara daw ika ahəɗ Ezipt ya zaakwa asa kwaŋ.» 3 Yuda a tsaraka kataya ka, a gwaɗar: « Wele ata kà tsik a mə̀r i sida ya parakka, a gwa, say ki dwimera a ka, nda gà damər kurum ata kudər ŋa ya, tsəka, ki ŋgetwime a are asa tsa. 4 Na kàa vəl a mə̀r damər mə̀r aaha kəla ŋa ya aà mèndzwil, mìi de a dze ka, taŋa ka, mìi sle a aà mede aka ahəɗ Ezipt, mìi sìkimere a daw a. 5 Ama na kàa vəl a mə̀r ŋgat tsəka, mə̀r tekeɗe, mìi sle a aà mede ɓav tsa. Aɗaba wele ŋa a gwa ka, ki ŋgetwimiŋ a asa tsidze na kàa zlumara damər kurum ata ya tsiye.» 6 Zakup a tsam aà tar, a gwaɗa a tar: « Aàmala na ku gwaɗum a wele ata ka, damər mə̀r ŋgiɗ a riŋ i ma asa dze ya? Ama taŋa kurum ki gwimiŋ a ka, dukw ana ŋgwal a tsiye.» 7 Ta gwaɗar aaka: « ŋgat na a tsam aà mə̀r a dzekwiŋ, na dite a tsam aà gà gwala mə̀r ilik tserdze ya. Dite a gwaɗa a mə̀r asa ka, ‘tsir kurum ana a riŋ nda gà mesife ya? « ‘Dite nda gà damər kurum ana a riŋ aka zeha i ma ilik asa ya ya? « na dite ka, mì ɗifer dər kamala ana a tsam aà mə̀r a ya. Aɗaba maa sle aà mesire dər ka, a gweɗe a mə̀r a, dumaha, zlumara damər kurum ata ya ɓav tsa.» 8 I dəba ŋa ya, Yuda a gwaɗa a tsir ŋgar asa: « Viliŋ kəla aaha a iye, dite mìi meh a ba, mìi diŋa, na dite kwa tserdze ki metekwe a à may asa tsiye. 9 Kəla aaha ka, i ahər gà, i vile a mesife gà aɗaba ŋgat. Na Yàa makara à ŋgat a tsìm a təv yak a tsəka, ti ye bakal ŋa aka gər gà aà biybiy. 10 Na mege kàa mətsakwa aà duwa ndeɗiŋa tsəka, ana kinehe ka, maa màra sik sula.»

11 Zakup tsir tar a tsaraka kataya ka, a gwaɗar: « Na bazlam ŋa a ne kamala taŋa ya ka, gwim kataya. Ama ki dwim a kəla ka, ndzəkum dər gà dukw ana ki gewakwa ika ahəɗ kwa ya, a gà kìywa kurum, ka dum dərraha a wele ata, ka vəlumar biy taf. Ki ndzekwimer a dərraha ka, gà atwa dukw ana a ze huŋŋà lele ya zaakwa, dite amum zaakwa, nda gà wirdè, nda gà yawuf ana a ze huŋŋà lele ya mbaŋa asa, dite nda gà mawà gà dizl ɗaf ana pampam, tə dzəmaya lele ya. 12 Dite kà ndzəkum dər siŋgwe ahər asa mbaŋa, nda gà siŋgwe ana a mətsaya a kurumara aka gà ahəm gà maàpa kurum ana ndeɗiŋa ya, biytsa a ge a kurum a ŋgulum. 13 Kamala taŋa ya, zlum damər kurum, kà màhum ba, dite ka mbəɗum gər a təv wele ata kuɗa. 14 Mbulum ana ŋgat a sle a duwa tserdze ya, me ge a kurum ŋgwal nda təv wele ata, na dite à pìl a kurumara à damər kurum Simeyun nda Bendzamen a ya. Ama iye i dzala ka, gà ɓəza gà a riŋ asa tsa, Yàa ge matawak kəla.»

Yasufa a ge a tar mbəlakw hinne

15 Aləka i təv ana gà ɓəza aaha ta meh a ba ya ka, tə ndzək dər dukw taf ata aɗaba Yasufa ya, tə ndzək dər siŋgwe ahər, dite tə zla dər Bendzamen mbaŋa. Dite ta mah ba, tə da aka ahəɗ Ezipt kuɗa. I fata ka, tə daha, tə da a təv Yasufa, tə daha, ta hitse aka miɗ ŋgar. 16 Aləka Yasufa a fə̀r aà tar, a ŋgat a damər ŋgar Bendzamen i liwiŋ tar ka, a gwaɗa a mala meslire ŋgar ana i ga i ma ŋgar a: « Dara, ndzək ga mburma aaha, ka da à tar a ga a ma gà. Dite kə̀ kəɗ awak, ka de a mə̀r dukw mezime, aɗaba mìi zim a dukw mezime ndaapat aaha ka, nda gà iye dze.»

17 Wele ata a tsaraka kataya ka, a daha, a ge kamala ana a tsiker a, a ndzək tar, a da à tar a ma ŋgar. 18 Aləka gà wele aaha tə daha a ga ka, magəɗa a ge a tar hinne, ta gwaɗaba ika magər tar: « A ge a, tə ndzəkara kwa a ga ya ka, agəra gà siŋgwe ata ta mətsayakwa a gà kìywa kwa piŋŋe ya. Dite ka, ta gese ahər a kwa kuɗa, ti ne à kwe a gà ɓele tar, nda gà hezweŋe kwa fit.»

19 Aɗaba taŋa, ti sìrìkaha a təv mala meslire Yasufa ata, ta fàfəlara ika biye hərmaga ya. 20 Ta gwaɗar: « Kamkam Əbay mə̀r, aɗaba piŋŋe ka, maa sakamaha daw i faha ya. 21 Aləka mì ndze dər aà vatwa ka, mì ndzaya a bəɗ, mì pə̀laya à gà kìywa mə̀r ka, ku weke nda gà siŋgwe ŋgar a riŋ i kìywa kalkal kamala ana mì ndzəkara i ma ya aà masàkàmà daw a dukw ŋgar. Ama kinehe ka, maa màra à siŋgwe ata ya. 22 Dite ka, maa ndzəkara gà siŋgwe ŋgiɗ a, aà masàkàmà daw a asa mbaŋa. Ama gà siŋgwe ata ka, mì sər wur ana a maya a mə̀r dər a gà kìywa mə̀r a tsa.»

23 Wele ata a tsaraka kataya ka, a gwaɗa a tar aaka: « Ndzum zayzay lele, magəɗa me ge a kurum tsa, aɗaba taŋa ka, Mbulum kurum ana nda gà tsir kurum kà dzàwumar gurmits a bəɗ a, na a kaha à kurum gà siŋgwe ata a gà kìywa kurum a. Ama gà siŋgwe kurum ata ka, a riŋ i ahər gà.» Dite i dəba ŋa ya, wele ata a daha, a pə̀lara à Simeyun a təv tar a. 24 A da à tar a ga a bəra Yasufa kuɗa. A daha, a tə̀f a tarəra yam aà məbara gà sik tar a. Dite a daha, a vəl dukw mezime a gà hezwèzè tar mbaŋa. 25 Kamala taŋa ya, tar tekeɗe, ta hadzal ba, ta pə̀laya à gà kìywa tar, tə ndzakara iɗəm gà dukw taf ata tə ndzək dərraha aɗaba Yasufa ya. Aɗaba tàa mbər metsereke Yasufa à mère a ka, nda magər pat a ka, ti zim a dukw mezime a təv ilik ŋa tserdze.

26 Aləka Yasufa a màra a ma ya ka, tə ndzək gà dukw taf aaha ta vəlar, dite tə dzar gurmits a bəɗ aka miɗ ŋgar. 27 ŋgat tekeɗe, a tsam aà tar, a gwaɗa a tar: « Kurum riŋ zayzay lele beya? Dite tsir kurum ata kù gwaɗum màndawal ŋa ya ana, a riŋ ana zayzay lele nda mesife ŋgar ibam a?» 28 Ta gwaɗar aaka: « Øele yak tsir mə̀r ata ka, a riŋ nda mesife ŋgar zayzay lele.» I dəba ŋa ya ka, ta kirikeye a bəɗ, tə dza gurmits a bəɗ aka miɗ ŋgar asa.

29 Aləka Yasufa a fə̀r aà tar, a ŋgat a Bendzamen damər ŋgar ana məmər tar ilik a ka, a tsam aà tar, a gwaɗa a tar: « Naha ana, damər kurum ata kù gwaɗum kudər ŋa ya ya?» I fata ya ka, a gwaɗa a Bendzamen: « Mbulum mi pisak ahəm kəla gà.» 30 Kamala taŋa ya, Yasufa a dara i təv tar i ga ya tsara, aɗaba gəzləŋ ŋgar a ŋgaya ba hinne na a ŋgat a damər ŋgar ata ya. A daha, a yaha təv ana a tiwe aɗəm a ya, a daha, a pəts a ga duwa, a tuwa riŋ iɗəm i fata. 31 Aləka a tuwa aba ya ka, a bara are, dite a dara a bəra ya. A dara ka, a fàfəl a gà ɓəzla meslire ŋgar, a gwaɗa a tar: « Dumaha, zlumara dukw mezime ya.»

32 Gà mburma ata tə tsaraka kataya ka, tə daha, tə zlarra dukw mezime ata ya, ti tiker a bəɗ, təv ŋgar pam à gər ŋgar. Gà damər ŋgar aaha ibam, tə ndzaya təv tar pam mbaŋa. Dite gà mburma gà Ezipt ana gà ɓəzla meslire ŋgar a tekeɗe ibam, tə ndzaya təv tar pam mbaŋa asa. Ta ge dər kataya ka, aɗaba gà Ezipt ti sle a aà mazəma akaba duwa nda gà mburma gà Ibəranikwa tsa, awisl na i təv tar a. 33 Kamala taŋa ya, gà damər ŋgar ata, tə daha, tə ndzaya a bəɗ aka miɗ ŋgar a fata, aka mimbe aka mimbe, daga aà maləkwara ŋana ya, haa tsikw aà kudər ŋana. Aləka ta fə̀raya aàba ka, a ge aà tar kamala sunwa ya. 34 Dite i dəba ŋa ya, Yasufa a sasaya a tar aba dukw mezime ŋgar ata ya kuɗa. Ama a vəl a damər ŋgar Bendzamen ka, a za biy gà asiŋ gà damər ŋgar aaha tserdze ya, medzige ə̀zləm. Kamala taŋa ya, tə zəm dukw mezime ata, dite tə saya aaka dukw mese, ta ŋgaya ba nda ŋgat hinne.