Madzəba 42

1 Aləka may ata a ge a mburma ika gər ahəɗ tserdze ya ka, Zakup a tsaraka ta gwa là, daw a riŋ ika ahəɗ Ezipt. A tsaraka kataya tsara ka, a gwaɗa a gà ɓəza ŋgar: « Aàmala na ki fìrwìm aàba a kataya masakəŋa taf a? 2 Aɗaba i tsaraka ka, ta gwa daw a riŋ ika ahəɗ Ezipt. A gwaɗa a tar, màhum ba, ka dum a fata, ka ta sakamumara daw ata ya, na dite ki metekwe a asa tsiye.»eeee 3 Gà damər Yasufa ata kurwa ya, tə tsaraka kataya ka, ta mah ba, tə da aka ahəɗ Ezipt, aà masàkàmàra daw ata ya. 4 Ama Bendzamen damər Yasufa ana məmər tar ilik a ka, Zakup aka slər akaba tar nda gà gà damər ŋgar aaha kurwa ya tsa. Aɗaba a dzala ka, a gwa: « Duwa ma ta le aà ŋgat kamala damər ŋgar a asa tsa.» 5 Kamala taŋa ya, gà ɓəza Isərayel ata tə da akaba nda gà asiŋ gà misle ŋgiɗ tserdze aka ahəɗ Ezipt, aà masàkàmàra daw ata ya, aɗaba may ata ka, a ge a a mburma hinne ika ahəɗ Kanan mbaŋa.

Gà damər Yasufa ka, tə sər ŋgat tsa

6 Ama tsaatsa mala ndzəɗa ana a kwere a mburma ika ahəɗ Ezipt ya ka, Yasufa. ŋgat na a dzewe a à daw ata a gà mburma ana tə dawara ika gər ahəɗ a tserdze ya. Aləka gà damər ŋgar aaha ti ndzeha ka, tə daha, tə dzar gurmits a bəɗ, tə dzawa à gà gər tar tserdze a bəɗ aka miɗ ŋgar. 7 Yasufa a fə̀r ikaba ya ka, a ŋgat a gà damər ŋgar, a sər tar tsara. Ama ka, a ɗif a tar à ba ŋgar tsa. A fàfəl a tar nda ndzəɗa ivaɗ, kamala ana a kwere a akaba a tar a, a tsam aà tar, a gwaɗa a tar: « Kà dumara ana, i ŋga ya dze ya?» Ta gwaɗar aaka: « Mì dara ka, daga ika ahəɗ Kanan a, aɗaba masàkàmà daw a.» 8 I fata ya tsara ka, Yasufa a sər gà damər ŋgar, ama tar ka, tə sər ŋgat tsa. 9 Taŋa sunwa ŋgar ata a ɗamawa a tar akahər ata ya ka, a màrra a gər a. Aɗaba taŋa, a gwaɗa a tar: « Kurum ka, gà ɓəzla masamata ahəɗ. Ka dumara ka, aà masamata ika ba təv ika ahəɗ gà mburma ana ndzəɗa tar a riŋ tsiye ya.»ffff 10 Tə tsaraka taŋa ka, ta gwaɗar: « Kataya tsa, Əbay mə̀r, ama mə̀r ka, gà ɓele yak, mì dara ka, aà masàkàmà daw a pəra. 11 Aɗaba mə̀r aaha tserdze ya ka, mə̀r gà ɓəza mburma ŋa ilik, dite mə̀r ka, gà mburma Mbulum asa mbaŋa. Mər ka, gà ɓele yak tsəka, mə̀r gà ɓəzla guvəl ana ta fere a ikaba təv a tsa.» 12 Yasufa a gwaɗa a tar: « Awaŋ, ama kurum kà dumara ka, aà məfə̀rà ikaba təv ika ahəɗ gà mburma ana ndzəɗa tar a riŋ tsiye.»

13 Ta gwaɗar asa: « Mər nda gà damər ka, kurwa gəra sula. Kamala taŋa ya, mə̀r gà ɓəza mburma ŋa ilik, mì dara ka, ika ahəɗ Kanan a. Ama damər mə̀r kudər ŋana ka, tar mandza ŋa i ma nda tsir mə̀r mbakum, dite damər mə̀r ŋgiɗ ilik ibam, aka dzeye.» 14 Yasufa a gwaɗa a tar asa mbaŋa: « Kurum ka, gà ɓəzla guvəl kamala ana i tsik a kurum a kaɗəŋ ndzer, pàrsa iɗəm tsa. 15 Araha ka, i dzik a à kurum ŋa, i mbeɗe a kurum a i sida ya nda zləm Əbay Firawna ka, ki dwim a a ma i faha ya tsa. Say damər kurum kudər ŋa ata i ma ya, a dere a a faha ya dzekwiŋ. 16 Kinehe ka, slərum mburma ilik, ma da aakaha a ma, dite tə dara məma. Ama kurum gà asiŋ ŋa aaha ka, ki ndzwim a ɗa i faha gà madzàwà ŋa. Kamala taŋa ya na i sir a dər ka, bəla kà tsikwim a ka, ndzer kaɗəŋ, kige tsa pàrsa ya. I tsik a kurum a ndzer, kamala ana Firawna ŋgat riŋ nda mesife ya ka, kurum gà ɓəzla guvəl, tə slərra kurum a aà məfə̀rà ikaba təv a.»

17 I fata ya tsara ka, a gasa tar fit, a dza tar a ga daŋgay, tə ndza iɗəm mehinne makər. 18 Aləka a pat məmakər ŋa ata ka, Yasufa a daha, a gwaɗa a tar: « Iye tekeɗe ka, mala mazazama Mbulum mbaŋa. Na a sàs a kurum mibeye ka, araha na ki gwim a dər a. 19 Na bəla arəv a de à kurum a tsəka, mburma ilik ika magər kurum a, mandza ɗa i ga daŋgay i faha. Ama gà naha ka, ta mah ba, tə da. Kà dumaha à daw a gà mburma ana i ma kurum ta mete a à may a. 20 Say dumaha, zlwimiŋara damər kurum ata kudər ŋa i ma ya, dite i sir a dər ka, dukw ana kà tsikwim ana ndzer kaɗəŋ a ya. Na kàa gwim dər kataya ka, ki metwim a tsa.» Tə tsaraka taŋa tsara ka, ta ge dər kataya pəra. 21 Ama ta mà akaba à bazlam ika magər tar, ta gwa: « Kàa gekwa bakal kaɗəŋ ndzer na nda təv damər kwa ata ya. I fata ya ka, kàa ŋgatakwa a mesewere are ŋgar, aka ge a kwa kamkam hinne, dite i ndze a tar are tsehe te, ama ka, kà gə̀sakwa ahəm tsa. Aɗaba taŋa na mesewere are aaha a da aka kwara ya.» 22 Ruben a gwaɗa a tar: « Yàa tsik a kurum tsiye? I gwaɗa a kurum ka, ki gwim akaba bakal nda təv damər kwa aaha kəla ŋa ya tsa. Ama kurum ka, kàa gəsum bazlam gà tsa. Samatum kinehe ka, Mbulum a riŋ ihər a wiz a kwe a məmbəz ŋgar kuɗa.»gggg

23 Ama tar ka, tàa sər Yasufa a riŋ a tsereke a mifefile tar ata tsa, aɗaba mala mə̀mà à bazlam a riŋ ika magər tar, na a màwar dər a. 24 Yasufa a tsaraka kataya ka, a mbəɗ aba i təv tar a, a miyak à tar. A daha, a dza ba aà tuwa. Aləka i təv ana a miyak à tuwa, dite a sle aà mifefile asa ya ka, a mbəɗaha gər a təv tar, a daha, a gəs Simeyun ika magər tar a, a dzaw ŋgat aka miɗ tar a fata. 25 Dite i dəba ŋa ya, a gwaɗa a mburma: « Ràhaywim à daw a bùhwa a gà damər gà, dite kà màyum à gà siŋgwe tar a kiywa tar tserdze mbaŋa. Dite ka dànayum a tar gà dukw mezime ana ti zim a aà vatwa ya mbaŋa asa.» Tə tsaraka kataya ka, ta ge dər kamala ata Yasufa a tsik a tar a. 26 I dəba ŋa ya, gà damər ŋgar aaha ta ŋgeye daw tar aka gà hezweŋe tar, ta mah ba, tə da kuɗa.

Magəɗa a ge a tar hinne

27 Aləka i təv ana tə dza ba aà vatwa ndaavəɗ a ka, misle ŋgiɗ ilik ika magər tar a, a pəl à ahəm bùhwa ŋgar, aɗaba a vile a daw zaakwa a hezweŋe ŋgar. A pəl dər ka, a le aɗəm aà siŋgwe ŋgar i fata. 28 A ŋgatar kataya ka, a gwaɗa a gà damər ŋgar aaha: « Iye ka, siŋgwe gà aka mìŋara a ma ya, araha ika ahəm bùhwa gà.» Tə tsaraka kataya ka, arəv a da aà tar a tsara, tə dzadzar hinne. Ta faraya aba ika magər tar ilik ilik tserdze nda gà medzedzere slàɓ slàɓ slàɓ. Dite ta gwa asa: « Mbulum a gekwa naha dzena, dukùla?»

29 Ta mah ba i fata ya, tə da a ma aka ahəɗ Kanan a təv tsir tar. Ti ndzeha a təv tsir tar ka, tə ɗamar dukw ana a ge ba nda gà tar a tserdze. Ta gwaɗar: 30 « Mì daha ka, mì leha aà wele duwa, ŋgat ka, batsah ŋa ika ahəɗ ata. A ŋgat a mə̀r ka, a fàfəl a mə̀r nda ndzəɗa, a kwara akaba mə̀r. A fə̀r aà mə̀r ka, kamala ana mə̀r ka, gà ɓəzla guvəl, mì daha ka, aà masamata ahəɗ tar a. 31 Dite mə̀r mì gwaɗar, mə̀r ka, gà mburma Mbulum tsəka, mə̀r gà ɓəzla guvəl tsa.» 32 Dite mì gwaɗar asa: « Mər ka, nda gà damər mə̀r kurwa gəra sula, gà ɓəza mburma ŋa ilik. Ama biy ŋgiɗ ilik ka, aka dzeye aà mə̀r a. Kudər ŋana ka, ŋgat a riŋ mandza ŋa i təv tsir mə̀r i ma ika ahəɗ Kanan.» 33 Ama wele ata ŋgat batsah ŋa ika ahəɗ ata ya ka, a gwaɗa a mə̀r: « I sir a dər kurum gà mburma Mbulum ndzer ka, say miyakum ɗa à damər kurum ŋgiɗ ilik a təv ga a faha, dite ki ndzekwim a gà daw kurum, ki dwim a dər a ma a təv gà mburma kurum ata may a wir a aà ter a ya. 34 Dite kàa dumaha ka, ka lekwimiŋara damər kurum ata kudər ŋa ya kuɗa. Kamala taŋa ya na i sir a dər ka, kurum gà ɓəzla guvəl tsa, kurum ka, gà mburma Mbulum a. Na kàa gwim dər kataya ka, i me a kurum a à damər kurum aaha, ki dwim a a ma aka ahəɗ kurum dukw kurum.»

35 Aləka tə ɗama aba gà bazlam ata ya, dite ta pə̀laya à gà bùhwa tar ka, ku weke a le aɗəm aà siŋgwe ŋgar ka, magəɗa a ge a tar hinne, tsir tar ibam, magəɗa a ger mbaŋa. 36 Aɗaba taŋa, Zakup a gwaɗa a tar: « Naha ka, kàa vilwimiŋ kəla megile kuɗa tsam, gà dəm gà. Araha Yasufa aka dzeye, dite Simeyun ibam, aka dzeye asa ana, dite araha kurum riŋ ihər i zlwim a aà iye Bendzamen a asa dzena, meme? Taŋa ka, mesewere are na a dara aka gər gà ya ya.»

37 I dəba ŋa ya ka, Ruben a gwaɗa a dede ŋgar: « Na Yàa màkara à Bendzamen nda zay a tsəka, say ki bets aɗəm gà ɓəza gà aaha sula ya. Vəlar vatwa, mà dəɗ aka iye te, i mekere a à ŋgat ndzer.»

38 Ama Zakup ka, a gəs tsa, a gwa: « Kəla gà ka, à dìɗ a a kurum a tsa, aɗaba damər ŋgar ka, aka mət, ŋgat ilik na a zeha à gər ŋgar a. Na duwa aka ta megìse ŋgat ika vatwa ata ki dwim a dər a asa ka, i mite a à arəv ndeyndey asa, aɗaba iye ka, màndawal ŋa herem herem nda gà akwəl i gər gà herrè.»