Madzəba 41

Sunwa a da aka Əbay Firawna

1 Aləka i dəba ŋa ya, a ge mivè sula aà gər ana mala meɗwìtsè mawà dukw ata makwàsà ŋa ya, a mà aka megemir ŋgar a ka, sunwa a da aka Əbay Firawna mbaŋa. I huɗ sunwa ŋgar ata a da aka ŋgat a ka, ŋgat riŋ mehìtsè ŋa i dula. 2 A ŋgataha a gà sla təsəla, tə dara i dula ata ya. Gà sla ata ka, gà magala ŋa, slu aà tar lele defeliŋliŋ. Tar riŋ ti zim a kwizir aà guva dula ata. 3 I dəba ŋa ya ka, gà sla ŋgiɗ təsəla tə dara i dula ata ya asa, tə zazamara gà sla ata gà malahalah ŋa ya. Gà sla ata ka, gà ŋgwala tsa, gà mazàlàkà ŋa hamtsakwaslkwasl. Tə dara ta hitse a təv gà sla aaha gà malahalah ŋa ya aà guva dula ata. 4 A samata ka, gà sla ata gà malahalah ŋa ya, tə daha ka, ta papaɗa gà sla aaha gà magala ŋa təsəla ya fit. I fata ya tsara ka, Əbay Firawna a piɗeke. 5 A mà aka mendze are asa ka, sunwa a da aka ŋgat masula ŋa asa. I huɗ sunwa ŋgar ata ya ka, a ŋgat a daw mada a bəra ŋa təsəla ka, guvùkw ŋa ilik, manàhà ŋa lele ɓerɓererre. 6 I dəba ŋa ya asa ka, a ŋgat a daw ŋgiɗ gər ikəka təsəla asa. Ama daw ata ka, aka ge ba lele tsa, aka geha a bəɗ nda himbiɗ ana a màwara ndaka tseke pat ana a pə̀zawara ya, aka nah lele tsa, mbə̀sfəɗ mbə̀sfəɗ. 7 Ama gà daw ata gà manàhà ŋa tsiye, tə daha, tə zəm gà daw aaha təsəla gà manàhà ŋa lele ya fit. Firawna a piɗeke ka, a gwa: « Naha ka, sunwa ana a da aka iye ya.» 8 I mèkwède ŋana ka, sunwa ata a wiser gər. I fata ya tsara ka, a zalawa a gà màhəram, nda gà na tə sərawa gà dukw ata ta ge a ba ika miɗ ika ahəɗ Ezipt ya tserdze. Aləka tə daha ka, a tsik a tar dukw ana i huɗ sunwa ŋgar ata ya, ama wura ilik a sle aà məmàr à bazlam ŋa tsa. 9 I dəba ŋa ya ka, wele ata a ɗwìtsewa mawà dukw ata makwàsà ŋa a vəlawa a Əbay a ka, a gwaɗa a Firawna: « Əbay gà, i dzala aka bakal gà ka, və̀ɗəna. 10 Aɗaba piŋŋe ka, mə̀r nda mala medè ɗaf yak, maa ge aà kər bakal a, kàa ge arəv hinne aka gər mə̀r gà ɓəzla megemir yak, kàa gasa mə̀r a ga daŋgay ahər Əbay ana a kwere a gà sliwdze ya. 11 Ama a pat duwa ndaavəɗ ka, mə̀r ika mendze are ka, sunwa a da aka mə̀r sula məma. Ama sunwa mə̀r ata ka, pampam. 12 I fata ya ka, wele duwa a riŋ i təv mə̀r gawla ŋa, kəla gà Ibəranikwa. ŋgat ka, Əbay gà sliwdze. Mì tsiker gà sunwa mə̀r ata ka, ŋgat tekeɗe, a waya a mə̀màr à bazlam ŋa lele. A tsikeye a mə̀r ilik ilik nda vatwa ŋa lele. 13 Aləka a tsik a mə̀r aba ya ka, dukuməŋa a ge ba kalkal kamala ana a tsik a mə̀r a. I dəba ŋa ya ka, kàa pə̀lara à iye i daŋgay a, kàa mà à iye a təv mendze gà kaɗəŋ, Əbay gà. Ama wele ana a dewek ɗaf a ka, kàa pə̀lara à ŋgat i daŋgay a, tàa dàn ŋgat aà dizl, gà ɗiyeŋ tàa zəm kaɗəŋ mbaŋa asa.»

Yasufa a mà à bazlam sunwa a Əbay Firawna

14 Əbay Firawna a tsaraka kataya tsara ka, a slər mburma aka Yasufa. Tə daha, ta pə̀lara à ŋgat i ga daŋgay a. I təv ana ta pəl à ŋgat a ka, a zàz ikaba gər a, nda gumət ŋa dze. A bara ba, dite a tiye akaba petek ŋgiɗ. I dəba ŋa ya ka, a da a təv Əbay ata kuɗa. 15 Aləka a daha ka, Əbay a gwaɗar: « Sunwa aka da aka iye, ama wura a sle a aà mimìŋ a à bazlam ŋa tsa. I tsaraka ka, ta gwa, kər kà sle aà məmàra iɗəm à dukw ana i huɗ sunwa ya.»

16 Yasufa a gwaɗar aaka: « Əbay ga, iye tsa na a mayawa à gà dukw ata i huɗ sunwa ya. Say Mbulum na à mèyek a dər nda zayzay lele ya.» 17 I dəba ŋa ya, Firawna a gwaɗa a Yasufa: « I huɗ sunwa gà ata ka, iye mehìtsè ŋa aà guva dula ana tə zalar Nil a. 18 I ŋgat a gà sla təsəla tə dara i dula ata ya, gà magala ŋa ndaɗawuzwuz, tə tsahana lele. Tar riŋ ti zim a kwizir aà guva dula ata ya. 19 I dəba ŋa ya asa ka, i ŋgat a gà sla ŋgiɗ təsəla asa, tə zazamara gà na tə làhara ya. Gà sla ata ka, gà mazàlàkà ŋa hinne hamtsakwaslkwasl. Yàa ŋgat a medzibe gà sla ata ika ahəɗ Ezipt ilik tsa. 20 I dəba ŋa ya, gà sla ata gà mazàlàkà ŋa ya, tə daha, ta papaɗa gà sla aaha gà magala ŋa tə làhara təsəla ya fit. 21 Ama i dəba ana ta papaɗa gà sla ata ya ka, tàa gala ba ɓav tsa, tar ka, gà mazàlàkà ŋa hiywe, kamala ana ndeɗiŋa ya dukw tar. I dəba sunwa gà ata ya ka, i piɗeke kuɗa. 22 Dite i mà aka mendze are ka, sunwa ŋgiɗ pam a da aka iye asa. I huɗ sunwa ata ya ka, i ŋgat a daw duwa ŋgwal ŋa lele, gər ikəka təsəla, manàhà ŋa ŋgurŋgurra lele, ika guvùkw ŋa ilik. 23 I dəba ŋa ya asa ka, i ŋgat a daw ŋgiɗ asa gər ikəka təsəla, mada a bəra ŋa ika guvùkw ŋa ilik. Ama daw ata ka, aka ge ba lele tsa, hìfek hìfek, aka geha a bəɗ à himbiɗ ana a màwara ndaka tseke pat ana a mbəzawara ya. 24 Zàkwayiya ka, gà daw ata gà ŋgwala tsa hìfek hìfek a, ti ndeye gà daw aaha gà ŋgwal ŋa təsəla ya fit. I zal a gà mahəram ka, wura ilik aka miŋara iɗəm à bazlam ŋa ya tsa.»

25 Yasufa a gwaɗar aaka: « Əbay gà, sunwa yak ata ka, ar ka, ilik. Əbay Mbulum a ɗifek ka, à dukw ana a ta ge a ba aka miɗ mba ya. 26 Gà sla ata gà magala ŋa təsəla ya ka, a ne ka, mivè təsəla, dite gà gər daw ata gà manàhà ŋa lele təsəla ya tekeɗe ka, a ne mivè təsəla mbaŋa. Gà sunwa yak ata ka, ilik. 27 Gà sla ata gà mazàlàkà ŋa təsəla, tə dara i dəba gà magala ŋa ata ya ka, a ne mivè təsəla. Kamala taŋa ya, gà daw ata təsəla, gà manàhà ŋa tsa, hìfek hìfek a geha a bəɗ nda himbiɗ ana a màwara ndaka tseke pat ana a mbəzawara ya ka, may a ge a mivè təsəla. 28 Ar ka, kamala ana i tsikik a Əbay ga. Mbulum a ɗifek a ka, à dukw ana a ta ge a ba aka miɗ mba ya. 29 Dukw ana i huɗ sunwa yak ata a da aka kər a ka, araha: Mivè təsəla a dere a ka, mburma ta ŋget a dukw mezime ika ahəɗ Ezipt tserdze mbes mbès mbes. 30 Dite i dəba ŋa ya ka, may a ge a riŋ hinne, gà dukw mezime ana gà mburma tə zəmawa ya ka, ti sir a maa zəm duwa asa tsa, à mìts a ter a gər. Gà mburma ana ika ahəɗ Ezipt ya tserdze, may ata ka, a dzeye a à mburma. 31 Mazəma dukw mezime à mìts a gər a gà mburma, agəra ana may ŋa ka, mawùràba ŋa hinne, dukw mezime a riŋ tsiye. 32 Ama sunwa yak ata a da aka kər sik sula ya ka, kamala megweɗe ya, Mbulum a ge a dukw ata ndzer, pàrsa iɗəm tsa, a riŋ a ge a ba ka, bise.» 33 « Əbay ga, kinehe ka, yaha wele ana metsehe ŋgar a riŋ lele, a sər duwa hinne ya. Dite ka ne à ŋgat batsah ŋa ika ahəɗ Ezipt tserdze. 34 Ka pala gà asiŋ gà mburma ana ta kesle a ahəɗ a mbaŋa. Na dite ti yehe a gər a dukw mezime i huɗ mive təsəla ŋa ata dukw mezime a riŋ hinne mbes mbès mbes a. Wura aka ŋgat dukw mezime bùhwa ə̀zləm ka, ti zle a ihər a ilik. 35 Ti yaha gər a dukw mezime i huɗ mivè ata ŋgwal ŋa dukw mezime a riŋ hinne ya. Say ta ge a megemir ata ka, nda ndzəɗa yak Əbay gà. Ti yehe a gər a daw aà kwite aà kwite tserdze, ta kaha gà dukw mezime ata lele. 36 Ti yehe a gər a gà dukw mezime ata ka, aɗaba mivè təsəla ata a ndzer a mba ka, may a ge a ika ahəɗ Ezipt hinne, ta ge a dər kataya ka, aɗaba mburma tə ta mata à may tsa.»

Tə zla Yasufa, a ne masula əbay ika ahəɗ Ezipt tserdze

37 Bazlam ata Yasufa a tsik kataya ka, a da gər a Əbay Firawna, nda gà ɓəzla meslire ŋgar tserdze. 38 I dəba ŋa ya, Əbay ata a tsam aà gà mburma ŋgar, a gwaɗa a tar: « Wele aaha ka, mezite Mbulum i ba ŋgar, ki ŋgetekewere a mburma kamala ŋgat a ana, i ŋga ya?» 39 I dəba ŋa ya, a gwaɗa a Yasufa: « Kər ka, Mbulum aka ɗifek à gà dukw ata tserdze, wura a riŋ na metsehe ŋgar a riŋ, sər duwa kamala kər a ka, a riŋ tsa. 40 Kinehe ka, kər ki ne a batsah ŋa ika gər gà mburma ana i ma gà ya. Tar tserdze ta gəs ahəm yak. Ama ka, iye ana mandza ŋa i təv mendze mekwere gà ya ilik na i zè a kər a.»bbbb 41 I dəba ŋa ya, Firawna a gwaɗar asa: « Araha ka, i tike a kər a Əbay, ki kwere a gà mburma ana ika ahəɗ Ezipt ya tserdze.» 42 Firawna a daha, a zla matsərəɗ gura ana i kəla ahər ŋgar, tsakala ŋa hinne ya, a tiker a ahər, kamala megweɗe ya ka, a vəlar ndzəɗa, dite a zla petek ana ŋgwal ŋa lele ya, a tike aaka. A zlara zele gura ya, a danar a ɗa. 43 I dəba ŋa ya, a vəlar puspus aà masùwàyà dər. I təv ana a riŋ à sìweye a ya ka, gà ɓəzla meslire Firawna ta wideyewa ika Yasufa ya nda magala ŋgəlakəka, ta gwaɗawa ka: « Vəlumar vatwa.» Kamala taŋa ya, Firawna a ne à ŋgat batsah ŋa ika gər gà mburma ana ika ahəɗ Ezipt ya tserdze. 44 I dəba ŋa ya ka, Firawna a gwaɗar asa: « Iye Firawna na a ne Əbay ɗa ika ahəɗ aaha ya. Wura ilik ma ta zla ahər, kige tsa sik ŋgar asa tsa, na bəla kər kà waya asa tsiye» 45 Kamala taŋa ya, Firawna a ɗe zləm a Yasufa, a zalar Dzafənat Paniyak, dite a vəlar daala. Dəm duwa tə zalar Asnat, dəm Putifar, i mala mandəva kuɗa a Mbulum duwa i kwite Heliyupulis. I dəba ŋa ya, Yasufa a dara i ga ya, a sùwaya ika ahəɗ Ezipt tserdze, a samata ahəɗ ata. 46 Akahər ata Yasufa a dza ba aà megemir ana Firawna Əbay gà Ezipt ata a tike aɗəm ŋgat a ka, mivè ŋgar aka ge dzik makər. Kamala taŋa ya, Yasufa a mah ba, a da aà masamata ahəɗ Ezipt tserdze. 47 Aà gər taŋa ya, a ge mivè təsəla ka, gà mburma ana ika ahəɗ Ezipt ya, ta ŋgatawa dukw mezime hinne, mbes mbès mbes. 48 I huɗ mivè təsəla ata ya ka, Yasufa a yahawa gər a daw ana ika ahəɗ Ezipt ya tserdze. Tə dzawa a awura i huɗ kə̀sà. Ti yahawarra gər a dukw mezime ata ya ka, ku mege i ŋga ya tserdze, i gà kwite ana ta mbeha a kə̀sà ata ya, tə dawa dərra, tə dzawa a huɗ kə̀sà. 49 Kamala taŋa ya, a yaha gər a daw hinne sik sik sik, kamala hewiyeŋ ana i dula ya. Agəra taŋa, ti sle a aà melive ŋa asa tsa, aɗaba ana a beha hinne ya.

50 Akahər ata may a dara ka, Yasufa aka wa gà ɓəza gà asləka ŋa sula. Na a war gà ɓəza ata ka, Asnat dəm Putifar i mala mandəva kuɗa ata a Mbulum a. 51 A wa maləkwara ŋana ka, Yasufa a gwa: « Mesewere are gà aka mìtsiŋ gər kuɗa, aɗaba ana Mbulum aka zlak iye nda gà tsir gà tserdze ya.» Aɗaba taŋa na a zal a kəla ata Manasse ya, kamala megweɗe ya ka, məmətsa gər. 52 I dəba ŋa ya, ta wa masula ŋana ka, a gwa: « Mbulum aka viliŋ mawà gà ɓəza hinne ika ahəɗ aaha i sèwère a ɗa iɗəm are ya.» Aɗaba taŋa na a zalar Efərayim a, kamala megweɗe ya ka, mawà gà ɓəza.

53 Aləka i dəba ŋa ya, i huɗ mivè təsəla ata gà mburma ta ŋgat dukw mezime hinne ika ahəɗ Ezipt ya ka, aka ndəv. 54 Dite i huɗ mivè təsəla ŋa aaha ya ka, may a ge a mburma kamala ana Yasufa a tsik a kaɗəŋ. May ata a ge a mburma ika gər ahəɗ tserdze, ama ika ahəɗ Ezipt ka, daw ana ti yahar gər a ka, a riŋ.cccc 55 Aləka may a riŋ a wir a aà gà mburma ana ika ahəɗ Ezipt ya ka, tə dawa a təv Əbay, tə tuwuwar aba, a gwaɗawa a tar: « Dum ka, a təv Yasufa, dite ki gwim dukw ana a tsik a kurum a ya.»dddd 56 Aləka may ata a ge a mburma ika gər ahəɗ tserdze ya ka, Yasufa a daha, a hə̀ndə̀kara aà daw ata ti yahar gər a ga ya. A dzawuwa dər a gà mburma ana ika ahəɗ Ezipt i fata ya. Aɗaba may ata ka, mawùràba ŋa hinne na ika ahəɗ Ezipt ya. 57 Kamala taŋa ya, gà mburma ana ika gər ahəɗ tserdze ya, tə dawaha a təv Yasufa aka ahəɗ Ezipt aà masàkàmà daw, aɗaba may ata a ge a ya ka, mawùràba ŋa, ku mege i ŋga ika gər ahəɗ tserdze.