Madzəba 40

Yasufa a mà à bazlam sunwa a gà ɓəzla daŋgay duwa sula

1 Aləka i dəba gà dukw ata ya ka, batsah mala meslire Əbay Firawna ana a vəlawar meɗwìtsè mawà dukw ana makwàsà ŋa ya, nda batsah mala medè ɗaf ŋgar ana a dewar a, ta ger bakal a Əbay ata ŋgat mala ga tar a. 2 Tsam ka, Əbay Firawna a ge matsəɓatsəɓ hinne aka gər gà ɓəzla meslire ŋgar ata sula ya. 3 A gasa tar, a dza tar a ga daŋgay ana batsah mala makaslà ga daŋgay a kaslawa ya, a hə̀ndə̀kaha aà tar a təv ana ta hə̀ndə̀kaha aà Yasufa ya mbaŋa. 4 Batsah mala makaslà ga daŋgay ata a gwaɗa a Yasufa: « Gewa a tar gər.» Kamala taŋa ya, tə ndza i ga daŋgay ata zaakwa. 5 Aləka a pat duwa ndaavəɗ ka, sunwa a da aka gà ɓəzla meslire ata i daŋgay a sula məma, aka gà mala meɗwìtsè mawà dukw ata makwàsà ŋa ya, a vəlawa a Əbay Ezipt ya nda mala medè ɗaf ana a dewer a, tar gà madzàwà ŋa hə̀ndə̀slsla hə̀ndə̀slsla i ga daŋgay a. Gà tar ata sula ya, sunwa a da aka tar məma, tə sər məmara iɗəm à dukw ana a ne i huɗ sunwa tar ata ya tsa. 6 Aləka i mèkwède ka, Yasufa a daha a təv tar, a samata ka, tar riŋ nda gà matsəɓatsəɓ hinne. 7 A tsam aà gà ɓəzla meslire Əbay Firawna ata tar i ga daŋgay nda gà ŋgat dze i bəra batsah mala makaslà tar ata ya, a gwaɗa a tar: « Aàla na i samata gà yam are kurum və̀ɗəna ka, a tsahən tsiye?» 8 Ta gwaɗar aaka: « Sunwa a da aka mə̀r, ama mala məma à mə̀rra iɗəm à bazlam sunwa ŋa ya, a sasar megweɗe ana là ka, a riŋ tsa.» Yasufa a tsaraka kataya ka, a gwaɗa a tar: « Na a màwa à gà dukw ana mawùràba ŋa ya a mburma tserdzena, Mbulum tsiye? Tsikiŋ gà sunwa kurum ŋa kwaŋ.» 9 Dite batsah mala meslire ata a vəlawa meɗwìtsè mawà dukw ata makwàsà ŋa a Əbay a, a tsik bazlam sunwa ŋgar a Yasufa. A gwaɗar: « Dukw ana i huɗ sunwa gà ana a da aka iye ya ka, araha: I ŋgat a dizl dukw ana i ɗwitsewa ya ika miɗ gà. 10 Ika dizl dukw ata ka, gà ahər ŋa mazàrà ŋa ikəka makər. I fata ka, ta wiɗeye, dite a bize. Mibìzè ŋa ata ka, a nàh tsara. 11 Dite kəzləm ana i vəlawa dər a Əbay Firawna ya tekeɗe, a riŋ aà iye i ahər gà. Dite asa ka, i ŋgəl mawà dukw ata i ɗwits aɗəm, i da dərraha a Əbay Firawna, i vəlar ahər.»

12 I dəba ŋa ya, Yasufa a gwaɗar: « Araha, na bazlam ŋana i meke a dərra iɗəm a ya: Gà ahər dizl dukw ata makər a ka, a ne mehinne makər. 13 Kamala megweɗe ya ka, a zeha mehinne makər, Əbay Firawna a zelekiŋa, dite à mèr a à kər a təv mendze megemir yak ana kì gewer a. Ki ta vile a meɗwìtsè mawà dukw ata makwàsà ŋa ya a Firawna asa, kamala ana kà vəlawar piŋŋe ya.» 14 Ama Yasufa a gwaɗar: « Kamkam na Yàa gek ŋgwal kərga naha ya ka, ka dzala gà gər aka iye, ki giŋ ŋgwal ŋa, ka tsik a Firawna, mə̀ pəlaha aà iye i daŋgay a te. 15 Aɗaba ta gəsara iye ika ahəɗ gà Ibəranikwa ya ka, Yàa ge duwa tsa. Dite i faha tekeɗe, ta gəs iye ka, Yàa ge duwa kwizikw ŋana biy metìkè dər iye a daŋgay a ka, a riŋ tsidze.»

16 I dəba ŋa ya, misle ŋgiɗ aaha a samata bazlam sunwa ata Yasufa a maya dər a wele aaha ya ka, lele. Aɗaba taŋa a gwaɗa a Yasufa: « Iye tekeɗe, sunwa aka da aka iye mbaŋa. Dukw ana i huɗ sunwa gà ata a da aka iye ya ka, araha: I ŋgat a gà kəzləm makər matsərzla ŋa ikaba, gà tapa ɗàf iɗəm hinne, metìkè ŋa ika gər gà. 17 I huɗ kəzləm ana ika gər ŋa ya ka, gà dukw mezime Firawna ana i dewer a, tar riŋ iɗəm pampam. Ama gà ɗiyeŋ ta daha, tə zəm aà iye na i kəzləm ana ika gər ŋa ya fit.» 18 Yasufa a gwaɗar aaka: « Dukw ana i meke a dər i huɗ sunwa yak ata ya ka, araha: Kə̀ ŋgat a gà kəzləm ata makər a ka, a ne mehinne makər. 19 Kamala megweɗe ya ka, a zeha mehinne makər na Firawna à pìlehe a à kər i ga daŋgay a, a hitse a à kər aka miɗ mburma tserdze, dite à gis a kər, tì dèn a kər aà dizl, gà ɗiyeŋ ti dere a, ti zim a slu ba yak fit.»

20 Aləka a ndza i dəba ŋa ya, mehinne makər ka, pat mawà Firawna ana ta wa ŋgat a, aka ndze aɗəm, a de a ɗaf batsah ŋa a gà ɓəzla meslire ŋgar tserdze. Dite a pə̀lara à gà bàba gà ɓəzla meslire ŋgar ata i daŋgay a sula ya aka miɗ mayahaba gər gà mburma ŋgar ata tserdze ya. 21 A zla wele ana a vəlawar meɗwìtsè mawà dukw ata makwàsà ŋa ya, a mà à ŋgat a megemir ŋgar. A pat ata tsara ka, a vəl meɗwìtsè mawà dukw ata makwàsà ŋa ya a Firawna. 22 Ama batsah mala mede ɗaf ŋgar aaha ka, a gəs ŋgat, a dàn ŋgat aà dizl. Gà dukw ata tserdze ta geye ba ka, kamala ana Yasufa a maya a tar dər a.

23 Ama dukw ana Yasufa a tsik a mala meɗwìtse mawà dukw aaha ya ka, aka mətsar gər.