Madzəba 39

Gà Yasufa nda məkəs Putifar

1 A ta megeha ka, tə da à Yasufa aaha ndeɗiŋa ya aka ahəɗ Ezipt kuɗa. Na a səkəm ŋgat ka, Putifar kəla gà Ezipt, mala sik Əbay Firawna, dite ŋgat Əbay gà sliwdze asa. A səkəm ka, à gà gwala Ismayila ata tə da à ŋgat a fata ya. 2 Ama Mbulum BATSAH kwa ŋa a riŋ a ndzawa nda gà Yasufa hiywe, a pisewar ahəm i təv megemir ŋgar ana a gewa ya tserdze. A ndzawa ka, i ga i bəra mala ga ŋgar kəla gà Ezipt ata a səkəm ŋgat a.zzz 3 Aləka mala ga ŋgar ata a samata ka, Mbulum BATSAH kwa ŋa a ndzawa nda Yasufa, a pisewar ahəm aka gà dukw ana a gewa tserdze nda ahər ŋgar a. 4 Aɗaba taŋa na a waya Yasufa hinne, a gewer megemir a. Wele ata a ne batsah ŋa aka gər gà na i ma ŋgar a tserdze. zləməŋa dukw ana i ga i ma ŋgar a tserdze a ɗif dər ahər a Yasufa. 5 Daga aà gər ana a tike ŋgat a batsah ŋa aka gər gà na i ma ŋgar a, nda gà limana ŋgar tserdze ya ka, Mbulum BATSAH kwa ŋa a pisewar ahəm a kəla gà Ezipt ata, aɗaba Yasufa. Mbulum BATSAH kwa ŋa a pisewar ahəm aka gà dukw ana i ma ŋgar a, nda gà guvah ŋgar tserdze aka miɗ aka miɗ. 6 Kamala taŋa ya, Putifar a ɗif à gà dukw ŋgar tserdze ahər a Yasufa. Aka ge metsehe a duwa ilik asa tsidze, i ŋgar ka, say mezime ana a zim a ya pəra. Ama Yasufa ka, a tsahən hinne. 7 Aləka i dəba mendze zaakwa ya ka, məkəs mala ga ŋgar aaha a dza ba aà masamata ŋgat nda gà meweke i gəzləŋ, a waya ta həna nda ŋgat. A daha, a gwaɗar: « Dara, hənama nda iye.» 8 Ama Yasufa ŋgat ka, a waya tsa, a niw. A gwaɗa a məkəs mala ga ŋgar ata: « Araha mala ga gà ka, aka ge metsehe a duwa i ga i ma ŋgar ilik tsidze. zləməŋa gà dukw ana aà ŋgat a tserdze ka, i ahər gà. 9 Wura a riŋ i ga i ma ŋgar a za iye ka, a riŋ tsa. Aka peliŋ ahəm aà duwa ilik tsidze, say kər, aɗaba kər ka, məkəs ŋgar. Wànà meme na i ge a dukw bakal batsah ŋa ata aka gər Mbulum a?»

10 Kamala taŋa ya, ku mege məkəs aaha a zazamawa dər ŋgat, a tsikewar kəla pat tekeɗe ka, a niw mehinne nda ŋgat, kige tsa mandza i təv ilik ŋa nda ŋgat ka, a waya tsa. 11 Aləka a pat duwa Yasufa a da ga a təv megemir ŋgar, wura a riŋ i ma tsa. 12 Tsam ka, məkəs aaha a daha a ga a təv Yasufa, a gəs ŋgat i tùmbùlum ŋgar ana ikaba ya, a gwaɗar: « Hənama.» Ama Yasufa ka, a zlara ikaba tùmbùlum ŋgar ata ya sùrat, a miyakar dər a ahər, a valabara ihər a bəra ya.

13 Aləka məkəs aaha a fə̀r Yasufa aka miyakar à petek ata a ahər, a valaba ka, 14 a zalawa a gà mburma ana i ma ŋgar a, a gwaɗa a tar: « Samatum kwaŋ, zal gà a zla aka kwara kəla gà Ibəranikwa aaha ya ka, aà mene à kwa bakal. Aɗaba a daha a təv gà a ga ka, a gweɗiŋ, hənama. Ama iye ka, Yàa wideye nda ndzəɗa. 15 Aləka a tsaraka Mewideye gà ata ka, a miyak aba à tùmbùlum ŋgar a təv ga ya, a dara a bəra ya.»

16 Məkəs aaha a zla tùmbùlum Yasufa ata a kaha, a vava dər mala ga ŋgar ana à mère a a ma ya. 17 Aləka wele aaha a màra a ma ya ka, a tsiker bazlam ata kuɗa. A gwaɗar: « Øele yak aaha gà Ibəranikwa, kà zlara ya ka, a daha a təv gà a ga, a giŋ a màhaw ana, meme. 18 Aɗaba a tsaraka i wideye ka, a miyak aba à tùmbùlum ŋgar a təv ga ya, a valabara a bəra ya.» 19 Mala ga Yasufa aaha a tsaraka bazlam məkəs ŋgar ana a tsiker, a gwaɗar, kamala taŋa ya na ɓele yak aaha a ge aà iye ya ka, a tsəɓar hinne.» 20 Tsam ka, a gəs Yasufa, a yà ŋgat a ga daŋgay, a ga ana tə dzawa aɗəm gà ɓəzla daŋgay i bəra Əbay a, a ndzawa riŋ iɗəm gədzə̀zlzla i fata.

21 Ama Əbay Mbulum BATSAH kwa ŋa aka miyak à Yasufa tsa, a ndzawa nda ŋgat, a vəl a tar masəra ba nda mala makwàrà ga daŋgay batsah ŋana a gewar ŋgwal hinne. 22 Wele ata a dza gà mburma ana i ga daŋgay a fit ahər Yasufa. Gà megemir ana i ga ata ya fit dze na a gewa ka, ŋgat. 23 Batsah mala makwàrà ga daŋgay ata ka, a gewa metsehe a duwa ilik i ga ata asa tsidze, a miyak dər ahər a Yasufa, aɗaba ana Mbulum BATSAH kwa ŋa a riŋ a ndzawa nda ŋgat a. Dukw ana a gewa tserdze ya ka, Mbulum BATSAH kwa ŋa a pisewer aaka ahəm.