Madzəba 38

Gà Yuda nda məkəs duwa tə zalar Tamar

1 Akahər ata ka, Yuda a miyak à gà damər ŋgar, a da, a ta mendze a bəra wele duwa ŋgat gà Adullam, zləm ŋgar Hira. 2 Aləka i fata ka, Yuda a ŋgat riŋ a dəm Suwa duwa, ŋgat gà Kananiya ka, a tsahən aà ŋgat. A zla dəm ata, ta həna nda ŋgat. 3 Aləka dəm ata a ŋgat kəla, a wa kəla ata asləka ŋa ka, a zalar Er. 4 I dəba ŋa ya, a ŋgat kəla asa ka, a wa asləka ŋa, a zalar Unan. 5 Dite i dəba taŋa ya ka, a ŋgat kəla asa, a wa asləka ŋa asa mbaŋa, a zalar Sela. Ama Yuda a wa Sela ka, ŋgat mandza ŋa i kwite Kedzib. 6 I fata ka, Yuda a zla daala a Er, kəla ŋgar maləkwara ŋana. Zləm dəm ata ka, Tamar. 7 Ama Er maləkwara kəla Yuda ata a gewa ka, dukw ana ŋgwal ŋa tsiye na ika miɗ Mbulum BATSAH kwa ŋa ya. Aləka Mbulum BATSAH kwa ŋa a samata kataya ka, a kəɗ kəla ata. 8 I dəba ŋa ya, kəla aaha a mət ka, Yuda a gwaɗa a Unan: « Zla məkəs ŋa, ka hənum nda ŋgat, dite ka wum kəla, mə̀ mà à gwala damər yak aaha a mət a a bəra.» 9 Ama Unan a sər ka, a ti ne a gwala gà tsa. Aɗaba taŋa, ku mege ndeɗime a hənawa a təv məkəs damər ŋgar aaha ka, a nəsawa à yam ba ŋgar a bəɗ masakəŋa taf, aɗaba a waya tsa na à me a à gwala damər ŋgar ata a bəra ya. 10 Dukw ŋgar ata a ge kamala taŋa ya ka, a tsahən aà Mbulum BATSAH kwa ŋa tsa, a kəɗ ŋgat mbaŋa asa. 11 I dəba ŋa ya ka, Yuda a gwaɗa a Tamar: « Kər ka, daha, tə ndza a bəra tsir yak ze zal tə̀ma, haa a təv ana Sala kəla gà aaha aka ge gawla ya dzekwiŋ.» Aɗaba a dzala i gər ŋgar ka, a gwa: « A ta mite a kamala gà damər ŋana ta mata ya asa mbaŋa.» Tamar a tsaraka kataya ka, a mah ba, a da mendze ba aà ga ma a bəra tsir ŋgar.

12 Aləka a ndza i dəba ŋa ya hinne ka, dəm Suwa ata ŋgat məkəs Yuda aaha ya, a mət. I təv ana arəv a màha a Yuda ya ka, a tsəl a kwite Timna a təv gà ɓəzla masàsàyà mèsis aà gà təmaŋ ŋgar a. Tə daha ka, nda masla ŋgar Hira kəla Adullam ata. 13 Tsam ka, ti tsik a Tamar, ta gwaɗar: « Araha dzìdze yak aka tsəl a kwite Timna aà masàsàyà ŋguz aà gà təmaŋ ŋgar a.» 14 A tsaraka kataya ka, a zla ikaba petek ana ika ba biy madakwa məkəs a, a zla petek ŋgiɗ, a kaha dər ba simbikw, a ndza dər aà guva vatwa kwite Enayim, ndaka vatwa ana tə dawa dər a kwite Timna ya. A ndza a fata ka, aɗaba a samata Sela ka, aka ge gawla kuɗa. Ama ka, aka ne məkəs ŋgar zukw tsa.

15 Aləka Yuda a ŋgatar ka, a fə̀r ahər kamala məkəs ana muva ŋa ya. A fə̀r ahər kataya ka, aɗaba ana a kaha are ŋgar nda petek a. 16 Yuda a ŋgatar ka, a miyak à vatwa ŋgar aaha a de a dər a, a da a təv məkəs ata. A daha, a gwaɗar: « Viliŋ vatwa, dite ka hənama nda kər.» A tsiker kataya ka, aɗaba a sər naha ka, məkəs kəla ŋgar tsa. Dite Tamar a tsam ahər, a gwaɗar: « Ki viliŋ a ana dukula, na dite ki hinneme a ya?» 17 A gwaɗar aaka: « I gìsekere a awak maazawal ŋa ya dìgwìɗ, dite i slirekeriŋa.» Tamar a gwaɗar: « Say ki viliŋ a aba duwa ya tə̀ma haa a pat ana kà sliriŋara awak ata ya ya.» 18 Yuda a gwaɗar aaka: « Dukùla na a sàsak i vəlak aba kinehe tə̀ma ya?» Tamar a gwaɗar aaka: « Ki viliŋ a ka, lambà yak nda liɓir ŋa dze, dite nda zəva aka i ahər yak a mbaŋa.» Yuda a tsaraka kataya ka, a dzàɗar gà dukw ata. Dite ta həna kuɗa. Mehinne ata ta həna ya tsara ka, a ŋgat kəla. 19 I dəba ŋa ya ka, a mah ba i fata ya, a daba. Aləka a daha ka, a zla ikaba petek aaha ndeɗiŋa a kaha dər ba ya, dite a mà akaba à petek madakwa məkəs asa kuɗa.

20 Aləka i dəba ŋa ya, Yuda a gəs maazawal aaha a sləraha a məkəs ata, a slər ka, nda ahər masla ŋgar ata kəla gà Adullam a, dite ka, məkəs ata mə̀ màraha à gà dukw ŋgar ata a dzàɗar aba ndeɗiŋa ya tə̀ma ya. Ama wele ata a ta mede dərraha ka, aka le dər aà məkəs ata tsa. 21 A daha, a tsam aà gà mburma ana i kə̀sà ata ya. A gwaɗar a tar: « Məkəs duwa muva ŋa ɗa i kwite Enayim a ndzawa aà guva vatwa ana, ar ana, i ŋga?» Gà mburma ata ta gwaɗar aaka: « Mala muva ɗa i faha tsa.» 22 I dəba ŋa ya, wele ata a mbəɗara gər a təv Yuda ya. A dara, a gwaɗar: « Yàa le ahər tsa. Dite gà mburma ana i kwite ata ya tekeɗe, ta gweɗiŋ, mala muva ɗa i faha tsa asa.» 23 Yuda a gwa: « Taŋa ka, mandza nda gà dukw gà ata tə̀ma tsəka, aɗaba gà mburma ti ta sewle aà kwiŋa. Tsəna, araha Yàa slər kər nda gà awak maazawal ŋa dìgwìɗ ka, kàa le dər ahər tsəna, meme.»

24 Aləka i dəba ŋa ya, a ge kiye makər ka, ti tsik a Yuda, ta gwaɗar: « Məkəs kəla yak ka, aka ge muva, aɗaba i huɗ muva ŋgar ata a ge ya ka, aka ŋgat kəla ana, meme?» Yuda a tsaraka kataya ka, a gwaɗa a tar: « Gəsum, ka dum dər a dala, ka ta wanum iɗəm ŋgat nda akwa ya.» 25 Aləka tə da à məkəs aaha a dala ka, a slər mburma a təv dzìdze ŋgar, a gwaɗa a tar: « Gwaɗumar, i ŋgat kəla ŋa ka, i təv wele ana a dzèɗiŋ gà dukw aaha ya.» A gwaɗa a tar asa mbaŋa: « Mà samata gà lamba aaha nda liɓir ŋa dze ya, dite nda gà zəva aaha dzeya ana, gà biy weke?» 26 Aləka Yuda a ta mesire dər ka, a gwa: « A tsik ka, ndzer kaɗəŋ, aɗaba ana Yàa vəlar Sala kəla gà asa tsiye.» I dəba ŋa ya, a gəs məkəs ata a ma ŋgar a, ama ka, tàa ndza nda gà ŋgat ilik asa tsa.

27 Aləka i təv ana a ndze a təv mawà kəla Tamar a ka, gà mawusa na i hitwis ŋgar a. 28 I təv ana a riŋ a we a ya ka, kəla ŋgiɗ ilik a pàtara à ahər a bəra ya. Mala magəsa kəla ana à gìser a ika ahəm ɗùwa ya a ŋgatar ka, a danar slewize ndùzza ŋa a ahər. A gwa: ŋgat na a làhara a bəra ya ya.» 29 Aləka kəla ata a mà à ahər ŋgar a hitwis ka, damər ŋa i ŋgiɗ aaha a dara a bəɗ a. Mala magə̀sàra kəla ata ika ahəm ɗùwa ya ya, a gwaɗa a kəla ata: « Hey, kàa tayara biye ya hinne.» Dite tə zal a kəla ata Perez, kamala megweɗe ya ka, meteye. 30 I dəba ŋa ya ka, damər ŋa i ŋgiɗ aaha nda gà slewize ndùzza ŋa madànà ŋa i ahər a dara a bəɗ a kuɗa. Tə zal a ta ŋa ka, Zerah, kamala megeɗe ya ka, ndùzza.