Mawà Musa nda mbimbile ana Mbulum a mbə̀l à ŋgat a
2
1 Wele duwa i gwala Levi a zla daala, dəm gà gwala ŋgar. 2 Dəm ata a ŋgat kəla. I dəba ŋa ya, a wa kəla ata asləka ŋa. Aləka a samata, kəla ŋgar ata a tsahən ka, a kàhawa i ga haa kiye makər. 3 I dəba ŋa ya, a fə̀r, a sle aà mekèhe a asa tsəka, a daha, a yàhara slìɗiw a, a ŋgar kìteh nda dukw mehindike ŋa ikəka. A bah nda dukuməŋa a riŋ kamala gà guduruŋ nda atwa ya, na dite yam a de aɗəm a tsiye. A həna aɗəm à kəla ata. Dite a daha, a tike dər a liwiŋ gà awasl aà guva dula Nil. 4 Matuwər kəla ata a hitse kətsah zaakwa aà məmàraha à dukw ana a ge a ba nda kəla ata ya. 5 Zàkwayiyà ka, dəm Firawna duwa a daha a dula aà məbara ba. Gà dəm ana ta gewar meslire ya tekeɗe, tar riŋ tì sìweye a aà guva dula ata mbaŋa. Aləka a fə̀r ikaba ya ka, aka ŋgataha a kìteh ata kùtsùkkwa i gà awasl ata. Tsam ka, a slər aakaha mala meslire ŋgar ilik aà mazlaraha. 6 Aləka tə zlaraha, a hə̀ndə̀k ikəka ya, a samata ka, kəla asləka ŋa a riŋ iɗəm, a tiwiŋa. I fata ya ka, a ndzer are tsehe hinne, a gwa: « Naha ka, kəla gà Ibəranikwa. Tə dzawa dər abaya ka, agəra na ta bets a ya.« 7 Matuwər kəla ata a daha, a tsam aà dəm Firawna ata, a gwaɗar: « A sàsak ana, i da, i tə zalakàha a məkəs gà Ibəranikwa, dite mə vəlawakar awah a?» 8 Dəm ata a gwaɗar: « Haya, daha. « Aləka damər kəla ata a daha, a zalaha ka, a məmər kəla ata dukw ŋgar. 9 Aləka məkəs ata a daha ka, dəm Firawna ata a gwaɗar: « Zla kəla aaha, ka vilewiŋar awah. Aləka aka gəl ba ka, i vilek a dukw mayaba yak. « Taŋa məkəs ata a zlaba kəla ŋgar dukw ŋgar, a daha, a vəlawar awah. 10 Aləka a gəl ba dayday ka, a zlaraha a dəm Firawna dukw ŋgar. A ne kamala kəla ŋgar a. A gwa: « I zlara kəla aaha ya ka, i yam a. « Aɗaba taŋa na a zalar Musa ya, kamala megweɗe ya ka, mazlàra iɗəm a. Mivele Musa ana a val aka ahəɗ Madiyan a 11 A pat duwa, i təv ana Musa a ge gawla ya ka, a da a məfə̀rà aka gà gwala ŋgar. A daha, a samata ka, meme na megemir tar ana ta ge a ka, nda mawura ba ŋa ya. Aləka i fata ya, a ŋgat a kəla gà Ezipt duwa, à gìzl a kəla gà Ibəranikwa gà gwala ŋgar ata. 12 A fara ikaba ya ə̀ba ə̀ba ə̀ba ka, wura a riŋ tsa. Tsam ka, a daha, a kəɗ kəla gà Ezipt ata, mə̀sàt a le a hewiyeŋ. 13 Aləka ndidwe ŋana a daha asa ka, aka ŋgat a gà ɓəza gà Ibəranikwa duwa sula, ta ge a maàga. Tsam ka, a tsam aà misle ŋgiɗ a ge bakal a, a gwaɗar: « Aàmala na kə̀ gə̀zl damər yak a?» 14 Wele ata a gwaɗar aaka: « Weke na a tike aɗəm kər Əbay mala mege seriye aka gər mə̀r a? A sàsak ana, mekìɗè iye, kamala ana kə̀ kəɗ kəla gà Ezipt ata ya ya?»I fata ya, Musa a ̀tsaraka kataya ka, a ge magəɗa. A dzala ka, a gwa, bazlam ŋa aka ɗe a bəra. 15 Firawna tekeɗe, aka ̀tsaraka bazlam ŋa mbaŋa. Tsam ka, a yaha vatwa aà makə̀ɗà Musa. Ama Musa a valaba aà Firawna ya, a da aka ahəɗ Madiyan. A ndzeha a fata ka, a ndza a bəɗ aà guva sùwà duwa a riŋ i fata. 16 I fata ka, mala mandəva kuɗa a Mbulum duwa a riŋ, zləm ŋgar Yetiru, gà dəm ŋgar təsəla. Gà dəm ata ka, tə dawara aka sùwà ata ya aà matafa yam. Tə dara, tə rahawa dər a gà dukuməŋa a riŋ kamala gulum a, dite ta vile a a gà dukw gənaw tsir tar. 17 Zàmma tsəka, gà ɓəzla makəva gà duwa tàa daha aka sùwà ata mbaŋa. Ti ndzeha tsara ka, tə dəgəz tar ika yam a. Ama Musa a hitse aà mbulum, a daha, a zlak tar, dite a tafaya yam a gà dukw gənaw tar ata mbaŋa. 18 Aləka gà dəm ata ta mbəɗ gər a ma a təv tsir tar ka, a tsam aà tar, a gwaɗa a tar: « Aɗaba la na kà dumara mbakum ka, bise seyiŋ a?» 19 Ta gwaɗar aaka: « Kəla gà Ezipt duwa na a beye à mə̀r i ahər gà ɓəzla makəva gà duwa ya ya, dite ŋgat asa mbaŋa na a tafa yam a gà dukw gənaw mə̀r a.« 20 I dəba ŋa ya, tsir gà dəm ata a tsam aà tar, a gwaɗa a tar: « Dite wele ŋa i ŋga kinehe ya? Aàmala na kà miyakumaha à ŋgat i dəba ya? Dumaha, zalumaraha, ma dara, ka zəmakwa dukw mezime a təv ilik ŋa. « Aɗaba taŋa ta mbəɗaha gər, tə zal a Musa. Mbulum a ̀tsaraka tuwa gà Isərayel ana ti tiwe aàba a ya 21 Aləka Musa a daha, ta fàfəl ka, a waya mandza i bəra Yetiru. Wele ata tekeɗe, a vəl daala a Musa, dəm ŋgar zləm ŋa Dzifura. 22 I dəba ŋa ya, Dzifura a ŋgat kəla, a wa ka, asləka ŋa. Musa a gwa: « Iye naha ka, slele ika ahəɗ gà misle ŋgiɗ. « Aɗaba taŋa na a zalar Gersun, kamala megweɗe ya ka, iye i slele. 23 Aləka i dəba ŋa ya, a ve hinne ka, Əbay gà Ezipt ata a mət. Ama gà Isərayel ka, tar riŋ ta bès a ba hinne, agəra megemir ana ta ge a ka, a za a tar ndzəɗa ya. Ta wìdeyewa hinne. Mewideye tar ata a ɗeha aà Mbulum. 24 A ̀tsaraka tuwa tar ana ti tiwe aàba a ya. Tsam ka, a dzala gà gər aka masəra ba tar ana nda gà Abəraham nda Izak, nda gà Zakup ya. 25 A fə̀r aà gà mburma ŋgar gà Isərayel ka, ti ndzer are tsehe hinne, na dite a daha, a pàt a tar à ba ŋgar a.